豉椒鳳爪 + 鮮竹卷 + 山竹牛肉 + 豉椒排骨飯 (外賣) @ 屋企 ( 5-OCT-2022 )

( 5-OCT-2022  THU )

今朝 8 點半要起身喇   食完早餐抖陣就沖涼   之後出發去尖沙咀睇醫生喇 ~

里奧大人特登請半日假陪我睇醫生   因為佢好唔想我做手術呢 ~

準時見醫生   我即講解我嘅情況   之後醫生話我唔駛咁急切做個小手術   只需要停藥   但如果每月一到再痛   咁就要再睇一睇呢 ~

之後再做個小檢查   出嚟結果係好嘅   所以我同里奧大人都開心 ~

真係好感恩里奧大人陪我去睇醫生   因為佢可以聽同問醫生意見   我一緊張就咩都亂哂   同埋係好頭痛咁架 ~

又再一次感受神嘅保守帶領   本身我諗住唔再睇多個醫生就即做手術   但同家姐同里奧大人商量   都係睇多個醫生好啲   所以即打去預約   感恩今日早上有位   如果唔係又要等好耐呢 ~

走嘅時候   我哋同醫生講拜拜   醫生就講拜拜 XX   拜拜里生   當我等電梯時   我同里奧大人講話醫生好似無問你貴姓喎   但點解知你姓里嘅 ?!   我話可能當時住院要有緊急聯絡人資料   所以知你姓咩 ~

睇完都差唔多 11 點幾   之後同里奧大人食午餐喇   因為佢要番工   雖然唔係好餓   但食埋先番工就好啲   好過一陣番工無耐又出去食   咁樣啲時間唔好用呢 ~

我話唔去餐廳食呀   因為我唔餓   無理由格硬食兩個餐嘛   咁去大食代睇下   見無咩人就即坐低食啦 ~

滷排骨套餐配肉燥娃娃菜 ($52) - 唔會有下次   哈哈哈哈

食完就去搭巴士   我買埋哈蜜瓜先番屋企   之後即大清潔屋企再大清潔廁所   之後即沖涼休息   呢排個人無咩力咁   好煩 ~

3 點半瞓着咗   瞓到 4 點   當堂精神哂   哈哈 ~

抖多陣就去睇牙   醫生話傷口無發炎呀   感謝神   但醫生話生哂啲牙肉就要起碼要 3 個月到半年   咁之後就唔會再有食物藏入咗窿度呢 ~

因為我要整牙套   所以要打麻醉針   一支都 ok   另一支比較痛   好在好短時間 ~

姑娘話我好叻忍到痛   咁我都預咗係有啲痺痛嘅   但幾秒痛換來半個鐘頭唔痛   係值得嘅   哈哈 ~

打咗麻醉針就肯定唔痛   但我最怕聽到整牙發出嗰啲喞喞聲   真係令到人周身唔舒服   好想快啲搞掂 ~

劈大個口其實好鬼辛苦   同埋今日我勁有鼻塞嘅感覺   有一下我示意佢要停呀   我係抖唔到氣咁呀   第一次咁樣   嚇鬼死我 ~

6 點半搞掂   里奧大人 6 點鬆啲已經到咗   特登嚟比錢㗎   哈哈 ~

搭車番屋企   我就番屋企沖涼先   里奧大人就買外賣 ~

食完就睇下書同電視   今晚 11 點幾先瞓呢 ~