泡菜豆腐豚肉鍋 ( 30-SEP-2025 )

( 30-SEP-2025  TUE )

感恩一覺瞓天光呀   仲要係熟睡無發夢嗰隻   今朝其實 7 點 05 分都醒咗   不過懶床到 7 點 20 分先起身整早餐呢 ~

早餐仍然食煙肉芝士迷你酥   我覺得好味道㗎 ~

菇場唔忙   之後聽到溫總又比船頭鬧   因為溫總成日比工廠食住   單位呢啲點會下下自己改㗎   阿爽又唔幫佢話工廠啲人   搞到人哋要做多咗好多嘢   諗起嗰時又係咁   工廠啲價錢錯到離哂譜   成年都係咁   我叫阿爽講   佢又係無講   終於我忍唔住出 Email 仲要用紅色字體叫佢睇清楚先出個單價   我要幫妳對完再改先可以做我份 Report   咁我根本就係做兩個人嘅嘢   咁不如我直接自己做哂   唔駛等嚟等去又改嚟改去先做囉 ~

咁船頭話阿爽講過溫總唔駛幫   溫總話無講過喎   事實如果溫總做唔切   阿爽一定要幫啦   唔係點做人阿頭呀 ~

船頭話叫阿爽幫手做啦   唔駛做呀   呢句講得好呀   我成日都同溫總講   點解阿爽咩都唔做   但就做其他佢唔應該做嘅擦鞋嘢 ~

船頭之後同我講話阿爽不嬲係咁   呢下好愕然   之後仲講咗好多嘢我知   咁我真係覺得好在自己一個人做嘢   唔係拍佢就死得了 ~

Lunch Time 蒸完飯就同船頭阿花一齊行一田   行完就陪阿船頭去買三餸飯   我哋成日話佢好似男人咁   哈哈 ~

洗埋碗就問阿齋噂嘢   之後又下傾保險又傾下中醫   傾咗成個鐘呀   真開心   因為西瓜唔喺度先可以咁咋 ~

唔忙就做其他嘢   所以好快就放工喇 ~

放工即走   有個細路女話見到 DAISY   佢媽咪周圍望   之後話係 DAISO   差一個英文字真係差好遠呀   哈哈 ~

番丁屋企即預備晚餐   里奧大人差唔多 6 點 50 分先番到屋企   不過無咩所謂   因為聽日放假   夜啲食都無問題 ~

里奧大人公司請食秋月冰糖梨

是日晚餐 - 泡菜豆腐豚肉鍋

泡菜豆腐豚肉鍋 - 里奧大人鍾意食   咁就整啦   反正好簡單 ~

里奧大人話今日好忙   之後仲因為姑奶們啲問題   佢無啦啦發顛鬧我呀   仲拍筷子話唔食就入房   我忍住到氣叫佢食啦   不過之後我都頂唔順   我都無食就出咗去   因為我要爆喊呀 ~

我唔打比家姐   我唔想佢唔開心   所以即打比姑奶   我問佢喺邊 ?!   佢以為我望到佢   之後我忍唔住喊   佢話咩事呀 ?!   我可以過嚟㗎我可以過嚟㗎   咩事呀 ?!   我可以過嚟㗎   我話妳細佬鬧我呀   關我咩事呀   之後傾咗 10 分鐘   條氣就順好多   佢叫我唔好嬲   記得無聲抗議呀   呢句我忍唔住笑出來 ~

真係好日唔喊   點知行行下見到姊妹 L   好在我已經行咗半個鐘   應該唔係喊個樣啦   同埋佢同我有講有笑   斷估見到我喊樣嘅話   唔會仲傾呀嘛 ~

番到屋企見到無咗碗飯同埋個湯少咗   即係里奧大人都有食   不過其實佢唔食就算   我都無心情好聲好氣叫佢食囉 ~

開埋機洗衫就諗住沖涼   點知阿妹 Send 咗里奧大人張相比我睇   我整個公仔啦   之後佢講里奧大人今日點點點   我話佢鬧到我喊呀   佢話真定假 ?!   我話呃妳做咩喎 ~

咁繼續傾咗半個鐘   之後佢問我喺邊 ?!   想過嚟陪我   不過我話已經喺屋企了 ~

確實真係極度唔開心   但見到姑奶同阿妹咁緊張我   個人當堂覺得窩心好感動   無再咁激氣呀 ~

沖埋涼真係心情好好多   咁又睇 Youtube 啦   睇到 11 點半先瞓 ~