火氣十足既韭菜豬肉水餃 ( AUG-2007 )

尋日喺公司又無野做   所以可以準時收工走人   其實我覺得好鬼尷尬   因為公司又靜英英   一起身係人都知   好肉酸囉   但唔走又唔知做咩   妳有無野做人哋知家嘛   所以我都豁出去 lu   唔理得咁多   早啲番屋企煮定飯比里奧大人食飯好過無無聊聊扮有野做呀...

尋晚兒甥女話上嚟食飯   咁我就整韭菜豬肉水餃   方便嘛   一落車以 9 秒 9 速度去超市買豬肉 ($12)   要攪碎嘅   費事剁到頭痛   之後再去買水餃皮 ($10) + 韭菜 ($4)  再買左恐龍蛋 ($10/7個)   我仲特登去 7 仔買咗支 Perrier 比兒甥女呀   $11.9 呀   我覺得自己好鬼豪呀   因為我自己唔會飲咁貴嘅水   之後即番屋企預備晚餐...醃好啲豬肉同韭菜撈勻就放落雪櫃做其他野喇...話哂有人   點都要掃下塵   執得整齊啲咁嘅 ~

搞掂哂之後就打比兒甥女   點知佢話佢個同學同埋同學嘅媽咪去咗佢屋企   咁啱佢哋又開飯   咁兒甥女話媽咪話人哋喺度食飯   妳走咗唔係咁好   咁咪唯有聽媽咪話囉   咁即係放咗我飛機啦   好唔開心呀   預備好哂家嘛   咁里奧大人番到屋企就問兒甥女係咪唔嚟呀 ?!   我話你又知   里奧大人話因為唔見佢   之後我好嬲話係呀   俾佢放飛機呀   仲係要我打比佢先知道佢唔嚟得呀   咁里奧大人就話咁點得㗎   要早啲話比人聽唔嚟嘛   唔可以等人打比妳先至話唔嚟咁無搭圾   之後打比兒甥女要佢親自同我 Say Sorry   我話唔洗啦   算啦   佢都唔想嘅 ~

雖然嬲嬲哋   但煮啲水餃又好好食喎   火氣夠呀   好食過之前煮嗰兩次   唔知係咪啲皮唔同咗   薄咗   因為睇到裡面係綠色好靚呀   今次里奧大人連續食好多隻   仲話如果再煮多幾隻都食得落添呀   見到里奧大人食得咁開心我都好開心呀   好似啲阿媽咁 ~

尋晚天氣係焗啲   但好在無落雨   所以就同里奧大人散步   散散下好朋 艾文打嚟傾偈   好耐無同佢傾偈喇  所以好開心   好似有講唔完既話題咁呀...

番到屋企就沖涼睇電視   睇亞視訪問 Coco 呀   佢話對唔住屋企   同埋唔想俾家人知道佢做呢行   咁妳比傳媒影到嘅時候妳就掩瞼啦   仲喺度笑   又着埋啲咁嘅衫做訪問   鬼信妳唔係出嚟做咩   不過我覺得最好睇既就係個主持同 Coco 係妙問妙答   笑死 ~

~~~~

今朝食咗個免費早餐   就係家鄉雞既焗鬆餅   .因為之前買咗啲現金劵送嘅 Coupon   番到公司再飲罐 Nescafe   死啦   今個星期飲足 4 日咖啡呀 ~

做咩咁嘅   點解我 MSN 嘅 "我的表情符號" 無哂㗎   我嘔心瀝血搵番嚟嘅 Icon 做咩一下子消失㗎   比番我呀   嚟緊既日子又要好忙   因為我要 Search 番我好鍾意嘅 Icon 呀 ~

晏晝同 VV 食潮州粉麵   同 VV Share 食五香切腩米 + 紫菜三寶米 + 通菜 + 涷奶茶   合共 $43   每人$21.5 好抵呀   又可以傾下偈   唔錯唔錯 ~

今晚又要再去 Nokia 整電話喇   麻鬼煩   上星期整完第二日又影唔到相又死機   有無搞錯   如果仲係咁嘅話   Trade-in 好過呀 ~

晨早溜溜見到小小強 ( AUG-2007 )

尋晚家姐陪我睇中醫   真係好溫馨呢   仲陪我等左成半個鐘車呀   我話唔洗陪我啦   妳番屋企食飯好過啦   喺都要陪我等多 10 分鐘先肯走   到我差唔多番到屋企佢先有車咋   好可憐呀   陪我等車而等到自己無車   我忍唔住同家姐講對唔住   下次唔好陪我喇   妳早啲番到屋企他他條條休息下好過啦   雖然佢都係會陪我   我真係好開心...因為我家姐真係對我好到家零一   諗番起以前細細個成日蝦佢都覺得自己好鬼衰   所以依家知道佢鍾意食嘅嘢會買比佢食   食到驚為止 ~

我覺得自從結咗婚同屋企人加朱朱相處時間少咗勁多既關係   所以次次見親佢哋都勁勁勁勁勁勁開心   諗番起未嫁前成日淨係顧住拍拖行街   唔願番屋企食飯陪屋企人   依家結咗婚就好想同屋企人多啲相處時間   犯賤呀   結婚初時   每次約媽咪飲茶   走嗰陣時媽咪係眼濕濕鼻紅紅想喊咁   梗係擔心我無飯食無湯飲   依家知我咁鐘意煮飯煲湯就放心哂   有時仲問番我點煮添呀 ~

不過我都好享受我婚姻生活嘅   因為多個人錫到加零一嘛 ~

尋晚無咩胃口食飯   所以同里奧大人食車仔麵...我就食油渣麵   勁難食呀   啲豬油渣黑掹掹   望真啲係炸咗嘅薄身豬腩肉   再配啲冬菇絲 + 唔熱嘅白蘿蔔就當係一碗油渣麵   唔係呀化   咁里奧大人叫杯熱豆漿   話 $3 好抵   見到用個膠杯嚟裝   肯定係用 Mircowave 叮   因為飲嗰陣時係暖   又無豆漿味   下次唔好貪平喇   食完碗麵好想反胃   但唔食又嘥鬼哂去 ~

~~~~

今朝出門口時見到隻小小強喺個櫃面   叫里奧大人打死佢...但打唔到   後入咗櫃入面   里奧大人話噴殺蟲水   點知佢打開櫃桶嚟狂噴   大佬呀   櫃桶入面有錶呀   眼鏡呀 記事簿啲雜物家嘛   點可以咁噴   佢話下次用之前洗下去咪得囉   鬼記得咩   之後話下次等我噴喎 ~

今朝好眼瞓   唔想食三文治悶上加悶  所以食精選早餐   珍寶腸 + 餐肉蛋 + 牛油方包 + 熱鴛鴦央 ($15)   好飽呀   食剩塊午餐肉同半塊方包   食食下諗起係唔知咩牌子嘅午餐肉就好驚唔敢再食 lu ~

晏晝同媽咪飲茶   因為媽咪煲咗愛心北芪南早豬𦟌湯   而我哋就淨係食咗一碟勝瓜鱸魚片炒麵 + 馬拉糕   我飲湯都飲飽 lu   而媽咪就因為尋晚食滯咗   所以就係食咁多喇 ~

諗埋今晚煮咩   就係整韭菜豬肉水餃   叫埋兒甥女嚟食   因為講咗今個星期搵一晚上我屋企食飯呢 ~

死火啦   我真係得閒到咁呀   今日都係睇人家嘅 Blog 過活咋   睇到眼都痛呀 ~

開心又一日...唔開心又一日...係咪應該要揀開心呢 ( AUG-2007 )

尋晚好開心呀   因為放工可以見到我深愛嘅朱朱   但因為媽咪陪婆婆出去食飯   家姐又要開 OT   所以得番工人同婆婆工人同我食飯咋 ~

見到 2 個工人坐埋一齊食飯   頓時覺得自己好孤零零添   好在有我鍾意嘅餸同湯 + 白切雞 + 炒西生菜 + 煎紅衫魚 + 紅蘿蔔合掌瓜粟米栗子豬骨湯   唔係仲慘 ~

尋晚咁啱家姐要我朋友幫手整野   所以佢就車我同工人去家姐屋企度   太好喇   唔洗搭車轉車咁煩   佢等埋家姐番嚟就走 lu   家姐成 10 點 45 分先番到呀   難得我去佢屋企瞓嘛   佢又要開 OT   不過無辦法啦   老細指定要嘛   見到佢 OT 到咁夜先番到屋企   我覺得家姐好慘呀   好心痛呢 ~

之後沖埋涼同家姐一齊食零食傾下偈就 12 點幾 lu   非瞓不可呀   .因為聽朝 7 點要起身同媽咪同深愛嘅朱朱食早餐呀   其實同家姐一齊瞓真係有啲唔慣   因為我驚郁嚟郁去呀   訓到 5 點幾我要搬遷喇   因為工人 5 點幾起身整早餐俾姐夫食   咁所以我要去工人間房瞓   .一晚要瞓 2 張床呀   搞笑   好在瞓得都 OK   .唔係就慘喇 ~

~~~~

7 點起身刷牙洗瞼就打的番媽咪屋企附近   同埋深愛嘅朱朱食早餐 lu   好好好好開心呢   同家姐食沙爹牛肉米太陽蛋湯米 + 奶油多 + 吊命涷鴛鴦   媽咪請 ~

之後上番屋企   同婆婆傾下偈   佢話好悶   隻腳又唔行得   我話咁多人陪妳周圍去   又有工人推輪椅同妳散步去街   妳應該開心   悶咩喎   之後婆婆話家姐做野咁辛苦   話好唔安樂   我話做咩唔安樂喎   妳應該開心家姐有賺錢機會同能力   之後又話自己好多嘢諗   諗啲仔女呀   啲孫點呀   我話妳諗嚟做咩   妳有妳諗   佢有佢做   個個咁大有自己思想啦   好在婆婆都識得話時代唔同   唔輪到妳諗啫 ~

做人應該開心過每一日   做咩咁蠢揀唔開心嚟自怨自艾啫   同埋凡事最緊要兩面睇嘛   開心時同人分享   唔開心時仍要同朋友或者親人分憂   咁可以令到大家了解自己   溝通都方便啲啦   我依家就係咁做   .但唔知老咗係咪會變嘅呢～

襯有時間   幻想下我同里奧大人老咗唔洗做野會係點樣生活呢 ～

諗下寫下已經食 Lunch 喇   食番尋晚嘅愛心飯餸   一樣咁好好味   今日好在有啲野做   無咁悶 ～

放工又要過海睇中醫呀   好辛苦呢   之後同里奧大人出街食   我估里奧大人會話食壽司或者越南嘢   因為我鍾意喎   其實係諗唔到自己想食咩就真 ~

漂流寢室 ( AUG-2007 )

尋晚唔知點解好攰   喺車度訓到唔想起身   又唔知點解   尋晚架車又快咗好多   所以好快就番到屋企附近   悶悶哋去 7-11 買嘢   .因為同事想要叮噹印仔   咁就買咗 $30 雪條同甜筒   有 4 個 Chop 呀   但真係見到堆野食都唔知點算   人家想減肥家嘛 ~

番到屋企灘落張梳化度   望到個鐘都嚇左一跳   咁早嘅   可能因為唔洗買餸既關係   唔洗買餸係因為之前我已經醃定咗啲 雞扒   入味啲嘛 ~

呢排成日出暗瘡   加上里奧大人今日要上大陸開月會同過夜   費事煮黑椒雞扒咁熱氣   所以就煮茄汁雞扒 + 灼通菜   我煮既茄汁茨係用薑同蒜頭加喼汁一齊兜嘅   酸酸甜甜好好味   食完飯個天仲落緊雨   所以無得跑步 lu   無野做就食生果   就係孖蕉   因為啲蕉熟得好快   唔食就要掉   咁   唯有掉落自己個肚度無咁嘥囉   但今次里奧大人又唔瓜瓜叫喎   因為次次買親蕉都係臨尾要連哽幾隻   真係好驚㗎   大家都知蕉係幾飽肚啦 ~

~~~~

今朝食芝腿治 + 熱檸茶 ($13)   但唔記得話要烘底呀   個侍應問係咪我嘅時候我話唔係呀   後尾先醒起自己無叫烘底呀   不過算啦   慳番 $1 囉 ~

晏晝又食番尋晚嘅飯餸   好悶呢   但可以慳番啲   無計   成日喺公司真係好悶   又唔想睇報紙 ~

又訓唔到   所以決定出去行下   行新開嘅 Market Place   又吹到好多日本嘢買   搵笨嘅   真係好失望   令人沮喪   行行下見到 "First Choice" 品牌啲嘢添   點解咁熟口面嘅   之後諗住買下啲調味料   但無理由山長水遠咁拎番屋企家嘛   屋企附近嗰間仲係百住超級廣場添   但入得去無理由空手而回   所以買左 2 筒萬樂珠 (Mint) + Snyder 粒粒 + 辣味卷 (5 條) 比家姐   又大拿拿洗咗 $32 呀   里奧大人對你唔住呀 ~

成日亂用錢   可唔可以比番我呀 ~

由於今晚里奧大人會喺大陸開月會同過夜關係   又由於婆婆同工人又去咗媽咪屋企瞓   所以我無地方訓呀   好在家姐有地方我瞓啫   所以食完晚飯就會出發去家姐屋企 lu   而我已經 Plan 定好哂到時一齊食薯片 + 睇電視 + 玩 NDS ~

但其實我無時無刻都想見到我深愛嘅朱朱呢   雖然佢係好早訓   但望下佢既睡姿同熟睡嘅樣   好 Kawaii 呢   我仲會同佢影好多相   但個個見到都話張張一樣   但我真係用唔同既角度影噃   悶悶哋嘅既時候攞部電話嚟睇   真係好開心㗎我 ~

今日有啲嘢做都好   但都仲係有好多空閒嘅時間   所以我就 Set 下我啲目標   就係每星期做 2 次 Mask   每星期飲 1 次綠茶溝益力多   每星期燉 1 次肉汁   每晚要跑步或者做 15 分鐘運動    每晚要睇 1 節聖經   戒食零食   戒飲咖啡  戒亂買嘢 ~

咁快又一日嘅 ( AUG-2007 )

尋日朝早要番教會   所以 10 點要起身   同里奧中人食豪啲   去太興食黑椒雞扒拼腸仔配多士 + 熱即磨咖啡   里奧大人食火腿絲通粉拼滑蛋配多士 + 熱檸茶   食完番教會 lu   講道內容係溝與通   慢慢的說   慢慢的聽   慢慢的動怒   好啱我聽呀   我要好好咁學習呀 ~

番屋企途中見到有間幾吸引嘅家品店   入去行左轉   買咗個直身油樽 + Rubber 就走喇   望下錶   原來已經 1 點幾   終於可以食到涷嘅阿婆豆腐花喇   真係好正   滑到好似飲水咁   食過阿婆豆腐花   再食其他舖頭整嘅豆腐花   水準真係差幾千倍呀 ~

橫掂有個行街 Mood   所以周里奧大人去 Columbia 睇下有無嘢執   里奧大人好大手筆買咗 2 條褲呀   仲每人買咗件格仔恤衫   夫妻裝呀 ~

之後再去買咗 Preious Moment 化妝袋   再去另一度買咗一個變色鐘同一個超迷你 Locker 櫃裝濕碎嘢   所有嘢都係里奧大人用私己錢買㗎   哈哈 ~

見里奧大人咁好   就整咗個丁丁同煎雞尾包 + 涷檸樂做 Tea 比里奧大人嘆下啦 ~

之後表妹打嚟傾左半個鐘   講嘅話題係星期三所有人要同婆婆食飯聚一聚喎   最慶係婆婆無問過任何人得唔得閒就訂咗枱   大佬   個個有嘢做   唔係話嚟就嚟咁簡單家嘛   係咪好應該要尊重下人   問下人邊日方便先出嚟聚一聚先再訂枱呢   聽表妹講話嗰日好少人會到添   梗係啦   人哋一早已經 Plan 好哂家嘛   好似妳咁話約就即刻嚟咩   唔係黑心   我覺得咁仲好   等佢知道唔係妳話咁就咁呀   傾到我同表妹都慶合合呀 ~

傾完就睇下報紙   之後又開始煮晚飯 lu   煲咗花膠淮山茨實鱷魚肉瘦肉湯 + 煎魚餅 + 蝦醬炒通菜    本來想買菜心   但 $12/斤呀   顛咩咁貴   所以買通菜喇   $5/斤咋   仲可以分兩日食添呀   我第一次炒通菜咋   好在都 OK   食完飯同里奧大人去跑步   雖然好熱   但出身汗郁下好啲嘅   番到屋企即刻沖涼   因為趕住睇阿蘇呀   咁又過一日 lu ~

加速燃燒脂肪法 不用錢的只要慶就可以了 ( AUG-2007 )

尋晚起身去咗幾次廁所   又發惡夢   所以好似無訓過咁   十萬個慘呀 ~

今日早餐食腿蛋治 + 吊命熱鴛鴦 ($13) ~

晏晝約咗表妹去 Pizza Hut   一去到表妹就送咗本書比我呀   呢本書對我讀輔導初班有幫助   好感動呀   我哋食咗 2 人餐 (忌廉雞湯 2 客 + 意式風情迷你批 + 焗釀蟹蓋拚魚圈 + 百事)   再加多個三文魚卷   但點解我都係麻麻哋飽...梗係慶得滯喇 ~

加速咗燃燒脂肪嘅速度   因咩慶   咪又係婆婆單嘢囉   講下講下   原來個個都好不滿婆婆啲所為   好心做仔女既就開門見山講婆婆有咩唔啱啦   成日鬧人係咪情緒有問題呢   係就拿拿聲去搵啲專業輔導睇下   唔係越嚟越嚴重就大鑊㗎喇   仲有一樣仲慶呀   就係表妹話今朝打電話比婆婆   話嗰晚因為要喺屋企教琴   所以要 9 點先到   問下有無問題   點知婆婆發脾四話咁遲   食咩呀   食屎啦   之後仲 "Cup" 線   有無搞錯呀   好心問下妳   妳咁既態度仲 "Cup" 線   有無過份啲呀   話哂都係妳個孫吖   洗唔洗咁呀   尊重下人好喎   表妹好唔開心   眼濕濕好想喊   好驚呀   我第一次見佢咁澈動咋   最後我咪話唔想去咪唔好去囉   事實真係有野做   又唔係特登唔去   仍係話比妳知妳所做野行為令到我好不滿呀   最頂癮係表妹同我講婆婆都知好少人會到   話不如取消   點知舅父話唔好喎   我想請問點解唔好呀   無謂嘥咗張枱嘛   而去嘅又唔係好開心咁去   係被迫咁去   因為要取消原有嘅約會   咪食得唔開心   都唔知啲大人諗咩嘅 ~

之後表妹陪我行番公司   又要開工 lu   不過又係無嘢做   所以就寫 Blog 過活 ~

今晚應該灼通菜同整雞扒   但仲未諗到點煮件雞扒呢 ~

很累的一天 ( AUG-2007 )

尋晚食食下飯里奧大人突然間打比我話走喇   原來唔洗喺大陸開月會同過夜呀   因為老細仲同緊個客開會   所以同唔到香港嚟嘅同事開月會   顛㗎   唔洗開會就唔好叫里奧大人上去嘛   嘥哂啲時間 ~

雖然里奧大人會番香港   但我都唔番屋企陪里奧大人喇   因為話咗陪媽咪   同埋又約定家姐聽朝食早餐   所以費事騰嚟騰去 lu ~

唔洗煮飯洗碗嘅日子真係要好好享受同珍惜呀   真係嘆到吖   一坐埋位就可以即刻食   Very Very Good   尋晚媽咪煲咗雞骨草豬橫脷豬骨湯   要煲成 4 個鐘頭㗎   去濕毒同清肝喎   所以媽咪係都要我飲 4 碗   餸就係蒸新鮮沙猛 + 炒白菜 + 蠔油冬菇瘦肉節瓜 + 燒排骨 + 橙色啲生腸   電視節目話係豬嘅子宮   但我唔知有無記錯   所有嘢我都好鍾意食呀   唔知係咪因為好 Relax 呢 ~

食完飯仲有切埋嘅生果食呀   太好喇   覺得自己好幸福   好似回到未嫁時咁呀   食完就同家姐玩 NDS   太鼓好好玩呀    比家姐試下玩   玩到身又郁又係咁 Fing 部機   我真係好驚會整爛部機呀   但家姐唔 Like 玩太鼓   所以玩番佢嘅至愛右腦達人   又話好攰   仲玩埋啲咁聚精會神嘅 Game   傻㗎 ~

之後家姐番屋企   媽咪同深愛嘅朱朱又訓覺   所以我就睇電視同玩 NDS   10 點幾已經好攰   所以上床訓 lu   不過無覺好瞓   因為朱朱成晚喺度吠我   無覺好瞓呢 ~

~~~~

7 點鐘又要起身同家姐食早餐   仲同埋媽咪同朱朱食添   Very Very Very Very 開心   食完番上去沖個靚涼就走 lu   去幫朱朱攞藥   之後去 Nokia 度整手機   話一個鐘有得拎喎   咪去油麻地囓陳枝記逛下囉   買咗啲整 Cookie 同蛋糕既用具   以防萬一   我仲 Pro 到買食物用嘅溫度計添呀   一係唔做   一做就要跟足 ~

之後再行去永安買 Stick 型枴仗   有就有   但無得調教高度呢   所以無買 lu   再行下食品部   買咗啲野就夠鐘就去拎番部手機 lu   又話 1 個鐘有得拎   等左個半鐘呀   又熱又肚餓又急 VV   激到爆炸呀   拎完即刻搭車番屋企同里奧大人食 Tea 呀   去咗大家樂食咗蜜汁燒雞脾 + 紅豆冰   里奧大人就叉燒湯瀨 + 可樂   食完即番屋企放水呀 ~

今晚又唔洗煮飯   因為姑奶佢哋幫里奧大人搞生日 Party   唔洗做又有得食   感謝神呀 ~

里奧大人生日飯 ( AUG-2007 )

我們的枱號

午餐 - 椰汁燉雪蛤 (涷) + 煎餃子 + 蜜汁叉燒腸 + 金銀蒸蝦丸 + 素鵝拚海哲 + 酸辣魚腐湯米線

晚餐 - 乳豬 (例牌) + 金銀蛋芫菜 + 梨山醬汁肉排 + 忌廉同可樂

自制心型藍梅芝士蛋糕 (生日蛋糕) - 正面   我很醜但我很好味

一個人的安樂窩 ( AUG-2007 )

尋晚好開心呀   因為去咗媽咪屋企   又可以見到隻超無敵勁可愛嘅朱朱   可惜家姐要開 OT 啦   如果一齊食仲 Perfert 呀   尋晚媽咪為我特登煲嘅加零一愛心皮蛋豬潤瘦肉魚滑粥   仲有韭菜豬肚炒麵 + 白灼蝦 + 灼芥蘭.+ 煎雞翼   啲粥超超超超超超好食呀   好綿呀   我一口氣食咗 3 碗添呀   就咁食粥都食飽 lu   仲食到好鬼熱   無咩必要都唔好係大熱天時食粥喇 ~

之後再食多 3 隻蝦 + 3 條菜 + 1 隻雞翼   因為真係食唔落   咁我又帶番公司食呢   所以都唔會嘥嘅   哈哈 ~

見到媽咪成晚搓住個胸口   嚇死我   問媽咪咩事   原來係胃痛   因為要睇住煲粥   又要教工人煮麵   平時媽咪會任由工人發揮   搞到我十級心痛   下次都係唔好話想食啲咩喇   次次一話想食嘅嘢   媽咪就會親自督工   唔敢比工人煮   驚唔好食喎   愛心餸喎   梗係唔假手於人啦 ~

媽咪   我愛您   下次嚟我屋企我會整啲我認為好食嘅拿手小菜比妳食㗎 ~

里奧大人尋晚本來 Meeting 完要同客食晚飯   但因為個客太多嘢做   所以 Meeting Only 唔食晚飯 lu   咁即係得里奧大人一個人食飯啦   仲要係去麥記食添   不過里奧大人肯定好開心   因為有 Free Time 喎 ~

其實里奧大人唔洗同客食飯都好   因為可以 Join 埋我一齊搭車番屋企 ~

番到屋企第一件事係洗衫   之後喇喎...咪就係食埋尋晚食剩嘅 Chesse Cake 囉   好漏呀   我真係見到 Cheese Cake 都有啲驚   不過自己整既點都要食哂去   因為里奧大人要出 Tri   .開夜會 + 過夜   所以我要幫里奧大人執衫同埋幫自己執衫   因為里奧大人出 Trip 我就會番媽咪屋企瞓嘅   有人陪我嘛   同埋里奧大人知我好鍾意見到朱朱呢 ~

~~~~

今朝食咗多豉油小辣嘅燒賣粉果 ($10)   自己喺公司沖咖啡   好飽呀   杯咖啡成 10 點先飲到 ~

今日有嘢做喎   不過好快就可以做完   效率高嘛 ~

晏晝喺公司食   食番尋晚嘅嘢   都好好味   之後去咗馬莎少 Shop   買咗啲啲日用品 + Hand Cream 比自己   再買包果汁硬糖比媽咪   又洗咗錢喇   可唔可以介紹份 Part Time 比里奧人嚟幫補下我呀   哈哈 ~

CC 逢星期五下晝就要做 Report   唔得閒同我 MSN   所以次次星期五我都好慘 ~

睇依家情況   都應該無驚無險可以準時放工   今晚會番媽咪屋企食飯同瞓覺   仲有係我聽日 Off   好開心呀   希望里奧大人可以趕得切同我食晏啦   難得唔洗番工嘛 ~

很久不見的晚餐 ( AUG-2007 )

唔寫 Blog 唔得喇   因為老細出咗去呀   太好喇 ~

~~~~

今朝食奶油多 + 熱檸茶 ($14)   唔知係咪杯熱檸無落糖   所以好澀   飲到想反胃呢 ~

今日如我所料   又係無野做   所以都係睇下 Blog 同報紙   MSN 咁過日囉   死未 ~

尋晚食滯咗   所以想食啲刺激味蕾嘅嘢   就叫咗外賣酸辣魚片 + 麻辣牛丸米線 ($23)   好貴呀   不過個衰鬼米線又係好好食囉   好滑嘟嘟   而個湯底又係唔錯 ~

今晚里奧大人同客食晚飯   所以我就趁機番媽咪屋企食晚飯   見下家姐同埋見我深愛嘅朱朱呢 ~

我叫媽咪煲豬潤瘦肉粥   媽咪第一句就問: 妳唔舒服呀 ?!   我話唔係   因為好想食豬潤補下血啫...唔通真係從古至今都係有病先食粥 ?!   之後媽咪打嚟話啲粥加江瑤柱同皮蛋一齊煲喎...我話加咩都好啦   唔洗我煮就咩都好㗎喇   由於今晚又食又拎   帶飯番公司食關係   所以媽咪就叫工人煮多幾樣餸   就係炒麵   炸雞翼同菜心   我仲會買油炸鬼同油脷酥添   太開心喇   因為唔洗煩食啲咩呀...不過里奧大人就慘啲喇   因為唔可以同個靚靚靚老婆食晚飯   無辦法啦   Social 嘛   邊樹叫我又大洗又大食咩...里奧大人辛苦你喇 ~

給里奧大人的生日詩 ( AUG-2007 )

里奧大人嘅生曰

靚太做嘢好穩陣

7 月已經送禮物

銀包送禮唔核突

生日唔要電話入

費事激到眼凸凸

股票投資賺到突

讀書考試無咁密

去下旅行夠充實

份工穩定好過日

生活過得好安逸

里奧大人的生日 ( AUG-2007 )

今日好開心呀   因為係我深愛嘅里奧大人生日呀   作為一個好老婆嘅我...當然要請假同里奧大人慶祝一番啦   而我喺 7 月嗰陣時已經送咗個銀包比里奧大人喇   所以正式生日果日係無禮物   尋日雖然落雨   不過唔緊要   因為里奧大人一早諗左 Plan A (戶外) 同 Plan B (室內)   所以都無咩影響嘅 ~

今朝 10 點起身   個天仲係落緊雨   其實想去嘉道理農場㗎   不過無辦法啦   唯有 Plan B 囉   就係去睇恐龍骨喇   諗住同里奧大人去飲茶   因為好少機會朝早去茶樓飲茶   點知要等成 10 張枱呀   點等呀   咁唯有失望地去大家樂食早餐啦   不過我都好鍾意食嘅   我食至愛牛扒腸仔配蘿蔔糕 + 熱鴛鴦   里奧大人就食牛扒蛋 + 多士配麥皮 + 熱檸茶   好好味呀   之後番屋企沖番個靚涼就出發喇 ~

第一站: 1 點到科學館睇恐龍骨   正呀   因為未試過咁近距離睇恐龍骨   影咗唔少相呀   遲啲等里奧大人過相比我就 Post 比大家睇 ~

第二站: 2 點半就近近哋去咗港晶中心嘅彩晶軒飲茶喇   因為實在太想同里奧大人飲茶呀   環境唔錯喎   我哋叫咗蜜汁叉燒腸 + 煎鍋貼 + 金銀蒸蝦丸 + 海哲拚素鵝 + 酸辣魚腐湯米線 + 雪蛤燉椰皇 (涷)   呢度嘅嘢食通通都   難食呀   好唔開心呀   估唔到好彩集團會有啲咁差既水準呀   之得去表哥茶餐廳食好過啦   之後行去加連威老道附近食番啲好嘢   就係專賣韓國嘢食嘅舖頭食番支雪條喇 ~

我食哈蜜瓜味   里奧大人就食士多啤梨味   兩款味都好好食㗎   順便買左 2 個辛辣杯面番屋企   行行下見到我想買嗰對鞋   所以試完就買 lu   唔係一陣里奧大人會依依哦哦趕住走咪咩都無 ?!   因為里奧大人知我買嘢嘅性格係兇狠型既有殺錯無放過   對鞋喺里奧大人送比我   邊好意思呀   生日要送嘢比人喎 ~

行下行下又見到防刮腳   又忍唔住自己比錢買咗 2 對   其實之前買左都未用   不過見有就買囉   費事後悔嘛 ~

第三站: 去海港城 Shopping   突然間里奧大人有電話入   係講公事㗎   有無搞錯呀   請咗假家嘛   里奧大人一傾公事就會忘我境界連行錯路都唔知   不過錯有錯着   行左去 Zara 嗰邊   橫掂無咩人咪行入去睇下囉   比我見到有件 Tee 唔錯喎   再等里奧大人過目一下先   里奧大人居然話抵呀   買囉   仲同我揀 Size 添呀   唔通生日洗錢真係特別開心嘅   之後乘勢再睇下啲褸   難得Shopping 唔洗自己錢   雖然自己有美好既身材   但都有缺憾美...就係隻手唔夠長呀...件褸人哋好鍾意家嘛   個袖太長點着呀   唯有放棄囉 ~

臨走發生咗件好樣衰勁瘀爆嘅事呀   就係我離遠見到有件好 Sharp 嘅碎花衫   拚上埋身睇下   之後里奧大人走埋嚟細細聲講話   妳呢件係 Kids 嘅喎   哈哈哈哈   勁樣衰呀   都唔知有無人睇到添呀 ~

第四站: 行我至愛嘅 City'super   不過今次居然無咩野特別想買喎   真係估唔到估唔到   之但係諗住番屋企之際   就入咗去 Zone 度共下   買家品嘅舖頭   比我發現咗有 Special Price 嘅嘢呀   仲係我想要買嘅嘢呀   開心到顛呀   行咗大半個鐘   買咗 2 隻漱口杯 + 梘液樽 + 透明玻璃兜 + 黑色膠兜 + 3 張好 Sharp 既 Placemat + Scissors + 切餅刀 + 有蓋玻璃樽   里奧大人仲買咗 Zone 自家品牌嘅筆   見里奧大人咁鍾意支筆   橫掂埋單五百幾蚊咁抵   我話我簽咭找數啦   同埋送比你做生日禮物嘛   點知里奧大人話唔洗...唔比我簽...話之前已經送左個銀包做生日禮物   唔洗再送喎   太好喇   里奧大人   我愛您 ~

第五站: 搭車番屋企   里奧話去屋企附近酒樓食飯   我話點解   你想食咩   里奧大人話係因為我鍾意食乳豬   所以去酒樓食喎   好好好好好好感動呀   想口水鼻涕一齊流咁對住里奧大人喊呀   自己生日想食嘅係老婆鍾意食嘅嘢   真係好好好好好好感謝好感動呀   我哋食咗例牌乳豬 + 梨山醬汁肉排 + 金銀蛋芫菜 + 一碗白飯同十蚊 3 支既汽水   飽到震呀 ~

番到屋企就做下家務咁啦   而里奧大人就例行公事   就係入房 Check 下 公司 Email   之後我入廚房 "鄧" 個心型 Cheese Cake 出嚟   因為我唔係用 Cake Ring 呀   所以要係好大力喺度係咁 "鄧" 係咁 "鄧" 呀   好在里奧大人無問咩事咁嘈咋   之後我捧住個蛋糕一路行一路唱生日歌   里奧大人望到個樣好 Surprise 呀   個心應該係開心到跳咗出嚟呀   因為真係估唔到我會咁有心思整蛋糕呢...之後就影下相就食 lu   但我覺得個賣相麻麻哋   同埋有啲漏   不過愛心搭夠   在此鳴謝 CC 提供咗 Blueberry Cheese Cake 嘅 Reecipe 比我   如果唔係我就整唔到呢個蛋糕㗎喇 ~

後記: 里奧大人主動問我食個蘋果好唔好   梗係好啦   唔洗自己切   不過都係切片唔係切粒嘅 ~

今日真係好開心好滿足   因為全日有里奧大人喺我身邊陪住我呀 ~

辣椒梅菜炒豬肉 + 白灼菜心 ( AUG-2021 )

尋日成日都無野做   點知臨放工我阿 Head 比嘢我改   做咩早唔比遲唔比   .要臨近放工先比我改   搞亂左我放工即走他他條條去買餸嘅計劃   我個人責任心咁重就梗係做埋先放工啦   5 點 36 分 先放工走呀   人哋諗住去馬莎行家嘛  不過我最後都有去到   買完野即走lu ~

尋晚坐架車真係好辛苦   又快   煞車又煞得衰...可能我住喺對住司機個位啦   最難頂係司機個樣 Cool 到爆   到某一個車站時   突破行到最尾   心諗唔係車尾出煙呀...但出煙既話應該開門比我哋走   所以我既就一路目光跟住佢   原來係有個阿姐無入錢...叫人入番錢   嚇死咩 ~

落車即刻飛奔去買菜心   之後就去日本城睇下有無蛋糕模買   因為里奧大人就嚟生日   所以想整個 Chesse Cake 做生日蛋糕   去到得番心型   唔係呀化   有無啲大路啲㗎   唔通整比人食又係心型咩   撞鬼   不過最後我都買咗 Last 嗰兩個   因為實在唔想再嘥時間去搵呀   心型 Cheese Cake   里奧大人仲以為我突然間變得咁浪漫添 ~

番到去即刻收埋個心型模就煮飯喇   煮辣椒梅菜炒豬肉   灼菜心   好似好簡單嘅餸   原來我都要整成個鐘呀   菜心浸左半個鐘   啲梅菜又要浸   浸完又要切   又要用砂糖炒乾去   之後再加 3 隻指天椒同梅頭豬肉去炒   辣到氣咳呀   菜心喇喎   灼完點蠔油就算喇   其實因為我係唔識炒菜   開飯喇   里奧大人話好正喎   未食已經話正   信唔信佢好呢   食落又好正喎   梅菜夠甜又唔辣   啲豬肉又爽   Very Good 呀 ~

拿拿聲洗完碗就開始整 Cheese Cake 喇   又唔想比里奧大人知我整 Cake   唯有快手快腳   但就變咗論論盡盡   里奧大人見咁情況就想幫手   我話唔洗喇   其實真係好想   之後又問我整咩呀   好驚佢知我整 Cake 呀   所以我話整 Cookie 算喇   整呀整   終於搞掂哂   希望好食啦   希望里奧大人鍾意啦 ~

做完野去沖涼   之後問里奧大人幾時食生果呀   里奧大人話我切比妳食吖   哈哈 ~

係切比我食呀   機會率仲難過仲六合彩呀   如果里奧大人知道我咁講佢   可能以後以後都唔會再有此情此景發生㗎喇   坐喺梳化好期待有人遞個蘋果埋嚟比我食   睇里奧大人好有心機批皮個樣   真係心甜   但天呀   里奧大人居然係成個蘋果隊埋嚟   咁大點食呀   我批生果比里奧大人食係用心去切成一粒粒   再比牙簽桔住遞比佢㗎   做咩佢咁對我㗎   我要咆哮話咁大個點食呀   佢先拎番去切開一塊塊比我咋   唔係切粒呀   算吧啦   .我個里奧大人係咁㗎喇   一啲都都唔細心嘅 ~

~~~~

今朝食餐蛋治烘底 + 熱奶茶 ($14)   食到好飽 ~

番到公司坐左成個鐘都唔想飲水   死未   估唔到今日有野做呀   有啲唔慣添 ~

今日好充實喎   因為有野做   同埋又同 CC 同 茄子佢哋 MSN   好忙添呀   放工即走 lu   趕住睇中醫呀   之後就同里奧大人去元祿食壽司   正呀...

聽日放假同里奧大人慶祝生日...好期待呀...希望唔好落雨啦...

突然的感觸 ( AUG-2007 )

昨晚乘車回家途中的時候   突然很感觸   感受了神真的給我很多很多的恩典

感謝神 : 給我一對很好很好   很愛很愛我的父母及一個很好很好   很愛很愛我的家姐

感謝神 : 給我在一個很愉快很溫暖的家庭中成長

感謝神 : 給我每一份工作都是我喜歡的   給我每一份工作都是安穩的   讓我可以養活自己

感謝神 : 給我曾經背棄祢   讓我現在更加依靠祢   仰望祢   焦點歸向祢   榮耀祢

感謝神 : 給我一個很愛很愛我的丈夫   一個很溫暖很溫暖   有神保守的家

感謝神 : 給我一間合適的教會   一班滿有關懷與愛心的弟兄姊妹

感謝神 : 給我一些不愉快的經歷及挫折   讓我從這些經歷中學習成長

感謝神 : 給我身體有點兒毛病   讓我知道要愛惜身體

感謝神 : 給我住院的日子   讓我學懂珍惜眼前人

感謝神 : 給我做每件事情都得力   因為神必帶領着我  保守着我

感謝神 : 給我人生每一個階段都是美好的   沒有任何掛慮

阿門

詩篇 91

91:1   住在至高者隱密處的, 必住在全能者的蔭下

91:2   我要論到耶和華說, 他是我的避難所, 是我的山寨, 是我的  神, 是我所倚靠的

91:3   他必救你脫離捕鳥人的網羅, 和毒害的瘟疫

91:4   他必用自己的翎毛遮蔽你, 你要投靠在他的翅膀底下, 他的誠實, 是大小的盾牌

91:5   你必不怕黑夜的驚駭, 或是白日飛的箭

91:6   也不怕黑夜行的瘟疫, 或是午間滅人的毒病

91:7   雖有千人仆倒在你旁邊, 萬人仆倒在你右邊, 這災卻不得臨近你

91:8   你惟親眼觀看, 見惡人遭報

91:9   耶和華是我的避難所, 你已將至高者當你的居所

91:10   禍患必不臨到你, 災害也不挨近你的帳棚

91:11   因他要為你吩咐他的使者, 在你行的一切道路上保護你

91:12   他們要用手托著你, 免得你的腳碰在石頭上

91:13   你要喘在獅子和虺蛇的身上, 踐踏少壯獅子和大蛇

91:14    神 說, 因為他尊心愛我, 我就要搭救他, 因為他知道我的名, 我要把他安置在高處

91:15   他若求告我, 我就應允他, 他在急難中, 我要與他同在, 我要搭救他, 使他尊貴

91:16   我要使他足享長壽, 將我的救恩顯明給他

甜麵醬蒸鯇魚 + 鹽焗雞翼 ( AUG-2007 )

今朝 10 點起身   同里奧大人落麥記食早餐   我叫咗個超肥煙肉蛋漢堡   而里奧大人就叫咗個火腿扒通粉餐   我好耐無食呢款飽 lu   所以覺得好好食   而里奧大人嗰份通粉嘅火腿扒就超鹹呀   好在各自食啫   如果 Share 就慘喇 ~

之後同里奧大人行路番教會   大概要 10-15 分鐘到啦   真係熱到叫救命呀   不過算啦   當做運動囉   其實啱啱沖完涼   唔洗 2 分鐘已經香汗淋漓   好慘呀 ~

今次講道內容好啱我聽   所以無出現過打喊露情況 ~

大約 12 點 25 分就同里奧大人走 lu   之後去大埔墟嘅阿婆豆腐花度睇下有無涷豆腐花食先   不過如我所料係冇   要 1 點先有喎   咁唯有買支豆漿試下囉   好過無收穫啦   原來豆漿都好正   好似食緊液體嘅豆腐花咁   好香豆味   正呀   不過再涷啲就更好 ~

星期日喇喎   梗係要做番 Family Day 做嘅野啦   就係買家庭用品買餸煮飯再加做家務喇 ~

首先第一步去日本城睇下嘢   比我搵到筍野呀   就係啫喱杯   同放糯米磁啲紙杯仔呀   第一步已經有咁好成績   真係令人好振奮呀   第二步去超市買豬骨同鯇魚   5 包出前一丁+5 包福字麵+2 Pack 膠盒   再買咗 3 個大嘅膠櫃桶   啲人唔知仲以為我哋新居人伙呀   第三步去街市買蔬菜同生果 ~

搞到成 2 點幾先番到屋企   已經攰到半死喇   但都煲左菊花茶比里奧大人清熱氣   同埋醃好啲餸去   之後再煮丁丁 (五香肉丁 + 出前一丁) 同冰涷嘅藍梅汁做 Lunch ~

食完嘢洗完碗就開始我 Family Day 節目   就係執野喇   因為想個廚櫃整齊啲   所以特登去買膠櫃桶嚟 Pack 好啲嘢   唔洗亂糟糟   執完都成 5 點  又要拿拿聲煲南瓜粟米栗子湯   因為無買菜   所以煲南瓜   南瓜批皮切粒   粟米切開去一粒粒易食啲   栗子烚完再搣穀   豬骨出水   加多兩粒蜜棗   水一滾就放哂啲料落去就搞掂   之後去熨衫   執自己櫃桶   之後就睇下報紙   Relax 下   救救救救救救救救命呀   點解啲時間過得好快㗎   咁快到 7 點   又要煮飯喇   好在今晚煮嘅都係用蒸嘅方法   一穫搞掂   唔洗洗咁多野   如果唔係人都顛呀 ~

首先蒸鹽焗雞翼   其他係用鹽醃嘅雞翼   之後再蒸甜麵醬鯇魚   見晏晝食剩咗啲五香肉丁   就整多味五香肉丁炒蛋   Perfert 呀   今晚食紅米  好健康呢 ~

洗完碗之後走去沖涼   又忍唔住洗下個企缸   擦到好乾淨呀   不過好攰呀   因為係要用陰力擦啲 漬   都唔敢咁博命呀   因為好驚大細手呀 ~

一日嘅辛勞終於結束   可以安安樂樂睇阿蘇   正呀 ~

大家有無發覺得我一個做哂啲嘢呢   其實里奧大人都喺屋企㗎   但點解里奧大人會咁忍心唔幫我手嘅   唔通里奧大人真係以為食哂我煮啲餸就等如幫我 ?!

尋日做得咁辛苦   所以里奧大人用佢啲私己送咗個碎銀包比我同埋扭咗兩隻蛋   好開心呀 ~

~~~~

今朝好趕呀   成 9 點 10 分先去到公司附近   唔理喇   食埋早餐先番工 ~

今朝早餐係芝腿治烘底 + 涷鴦 ($16)   實在太趕   唯有涷飲   番到公司又係無嘢做   好在 CC 可以抽空同我 MSN 啫   如果唔係啲時間都唔知點過   多謝 CC ~

元綠壽司 @ 大埔 ( AUG-2007 )

星期六下午放工就同媽咪食車仔麵   都好味嘅   可能因為熱   食到半路都唔想食   好嘥野呢 ~

之後上婆婆屋企   同媽咪 婆婆打三腳呀   原來仲刺激過打四人麻將   因為食糊個速度係快得驚人   真係人都顛呀   我好孝順同埋唔偏心   因為媽咪同婆婆係大嬴家 ~

_{打咗 3 個幾鐘就走 lu   因為媽咪要趕住聽粵曲   而我就約咗里奧大人食晚飯   好充實呀 ~}

由於番到屋企要 7 點幾   又想食元綠又驚多人   所以叫里奧大人早啲落去攞定位   因為突然間實在太想食喇   食咁多次元綠   任何一間啲飯都係酸同埋涷嘅   但今次啲飯唔酸仲微暖添呀   好正呀   咁就同里奧大人食咗三文魚 + 蟹子 + 蟹子沙律 + 素魚翅 + 螺肉 + 天婦羅蟹柳 + 炸蝦壽司   另外加碟牛油粟米同炸蠔手卷   一杯巨蜂蘆薈同紅豆綠茶   勁勁勁勁勁勁飽呀 ~

食完 8 點幾   走嗰陣時   突然間好大風好大雨好恐怖呀   好在呢個時勢我會帶縮骨遮啫   唔係就慘咯   之後就行下啲家庭用品店同超市幫左下消化   同里奧大人食完飯多數行呢啲地方   因為買野嘅話都係用於屋企   咁里奧大人佢就會十分十分樂意比錢   如果係買衫喇喎   就會依依哦哦   哦到妳心煩意亂   無心機買   佢呢啲攻勢好有效   萬試萬靈呀 ~

今日啲時間都過得好充實   希望可以一覺訓天光啦 ~

其實今日真係好開心好開心   .為一日之內可以見到我最愛最愛嘅人   媽咪同里奧大人   美中不足係見唔到家姐呢   如果見埋就好喇 ~

韭菜豬肉水餃 + 番茄煙肉意粉 ( AUG-2007 )

尋日晏晝天氣真係唔錯   唔係太熱   陰陰天但無雨落   所以可以同到朱朱食 Lunch   好開心呀我 ~

之後去覆診喇   喺醫院等左 1 個鐘頭 45 分鐘呀 ~

不過都預咗   政府醫院嘛   覆診結果係甲狀腺無翻發呀   感謝神 ~

之後睇到差唔多 5 點 45 分   好緊張呀   因為又要拿拿聲去買豬肉同韭菜整水餃呀   今次仲試下買半斤南瓜整水餃添 ~

番到屋企就接到里奧大人電話   話已經番到香港   里奧大人今日北上工幹   嚇到我心都跳埋出嚟呀   因為驚佢肚餓   又驚整唔切呀   好在佢話唔肚餓啫   哈哈 ~

剁呀剁   剁豬肉真係好頭痛   可能我用好似瓷嘅針板   嘈到顛呀   之後就蒸南瓜再醃肉   之後就再壓爛啲南瓜變成蓉   好忙呢 ~

尋晚賓姑上嚟我屋企食飯   心諗   韭菜豬肉水餃唔夠食喎   好在之前仲有啲煙肉剩   可以煮多味蕃茄醬煙肉意粉   嗰一刻覺得自己好叻呀   可以喺係短時間內諗多一樣野煮嚟食 ~

開始煮野喇   包韭菜豬肉就無難度   但包南瓜就死火喇   啲南瓜蓉好多水呀   包咗 2 隻就放棄喇   原因係唔夠雲吞皮呀   天呀   咁辛苦壓成蓉   又要特登買南瓜   又要買多啲豬肉   最後要掉咗去   算啦   橫掂都整唔到 ~

我份人喺完美主義者   咁就做死自己喇   因為意粉係西餐   所以要用碟同叉   水餃係中餐   所以要用碗同筷子   所以就每人有 1 隻碟 1 個碗 1 對筷子   因為啲叉唔夠   所以用筷子嚟食   美中不足呀 ~

唔係讚自己   我煮嘅野真係唔錯   今餐嘅水餃同意粉   里奧大人同賓姑佢哋都話好食   因為啲水餃好多韮菜好健康喎   又有人讚自己   好開心呢 ~

不過可能突然有人嚟   時間太緊迫   所以好緊張   餐飯食咗 2 隻水餃同 1 撮意粉咋   但佢哋就食哂啲水餃   唔係點食碟意粉   我話特登煮㗎   要食哂去呀   不過最後都係比佢哋拎走   因為我前晚慘痛經歷   食漏咗   所以唔想再食 ~

前晚買咗香蕉   尋晚已經熟到非食不可   里奧大人輕輕佻佻話夜啲食香蕉船先   都唔知係咪借啲意講比我聽   想我整 ~

不過我作為一個好老婆   當然會係咁易認佢   但就會整比佢嗰隻啦   我仲好有心機   將香蕉切片舖滿隻細碟   再放 3 個藍莓雪糕球   想唔肥都幾難呀 ~

~~~~

今朝同里奧大人去 Oliver's 度食早餐   我食司華力腸 + 雙蛋 + 兩片麥包 + 茶包奶茶 ($26)   里奧大人就煙肉 + 雙蛋 + 薯角 + 咖啡 ($26)   好貴呀    不過大家都勁飽   都抵嘅   哈哈 ~

今日星期六   下晝唔洗番工   太好喇 ~

焗番茄煙肉意粉 ( AUG-2007 )

尋日同媽咪飲茶   前晚等我仲特登炒定飯做 Lunch 添   唯有帶埋個飯盒去酒樓食囉   唔想浪費嘛   因為媽咪又煲咗愛心靚湯比我補補   因小肥肥貧血呀   所以媽咪會每星期煲一次南棗 + 北芪 + 當參湯比我補下   媽咪實在太好喇   我愛媽咪 ~

飲茶啲點心真係麻麻哋   真係至在飲湯同傾偈咋   媽咪話我啲炒飯好香好好味呀   問咗幾次都係咁話喎   我估唔係呃我掛 ~

尋晚放工番到屋企都幾他條   意思係唔洗趕頭趕命去買餸   去咗超市買左幾罐 ABC 雜菜湯   因為里奧大人鍾意飲   之後再買五香粉 + 自發粉同朱古力粒   因為唔忿氣   焗左兩次 Cookie 都唔掂   Blog 友話用自發粉 OK 喎 ~

番到屋企第一時間去雪櫃冰箱拎啲煙肉出嚟   硬崩崩   所以用開水浸軟去   之後切粒   再拎 4 塊芝士出嚟切絲   因為唔想一塊塊放喺焗爐嚟焗   覺得唔均勻同唔靚   所以就切絲   其實可以用芝士粉   .不過想食哂啲芝士   唔想眼冤囉 ~

今次唔用茄汁煮   用茄膏   意粉有啲色係靚好多 ~

炒完意粉咁就好有心機放喺錫紙盤到   先放一層意粉   再放芝士   再放意粉   之後再舖餘下芝士   今次焗出嚟個芝士煙肉意粉樣好靚喎   但食起嚟較為乾身   .應該淋啲茄膏落意粉度嚟焗   再加多碗 ABC 雜菜湯同盒裝檸檬茶   好西餐 Feel 呢 ~

食完無耐就死喇   因為好漏呀   漏到我好唔舒服呀   要里奧大人切個酸酸哋嘅水蜜桃嚟食   再飲多包 250ml 檸檬茶先至好啲咋   不過原來飲完仲死多幾錢重   因為訓唔着呀 ~

~~~~

今朝同同事 V V 食早餐   食餐蛋治烘底 + 熱檸茶 ($14)   都係好抵好豐富   但係開始厭呢 ~

晏晝無落雨嘅話   會番媽咪屋企   同我嘅心肝寶貝朱朱出街食 Lunch   好開心呀 ~

水餃餐 ( AUG-2007 )

尋日真係驚咗成日   驚啲咩  咪驚無雲吞皮買囉   之前咪話想整水餃嘅   連發夢都夢到自己整餃子呀   仲係買漏材料嗰隻添呀   妳話係咪好驚吖   死未   整餐餃子啫   洗唔洗咁緊張呀 ~

一落車我就飛奔去超市買左一包已 Pack 好嘅梅頭豬肉同埋香蕉啦   因為見到啲香蕉好靚   所以就買埋喇   再拿拿聲去街市買韮菜 ($2)   之後再周圍搵下睇下邊度有買雲吞皮買   媽咪話買河粉同豆腐啲舖頭就有喎   講真   有幾何買河炒食   又唔識整   又肥   終於比我見到喇   走去問   有呀   真係開心到暈呀   咁我就買咗圓嘅雲吞皮 50 塊 ($10/斤)   之後又拿拿聲番屋企整餃子喇 ~

番到屋企唔理三七二十一   攞幾張包餃子嘅 Recipe 嚟睇   綜合哂所嘅嘢就開始整喇   今次淨係買左韭菜   原本想買多棵大白菜   但個心淨係諗有無雲吞皮買   所以唔記得買多樣菜嚟包餃添   不過好在無買   因為梅頭 ($10) 同韭菜 ($2) 已經可以包到 20 隻   因為啲皮都好有份量   所以如果再整埋大白菜嘅話   我唔想第一次整就已經食厭呀 ~

包餃子真係易   比煮飯方便好多   剁完啲肉同韭菜   係咁包係咁包   最緊要係一個鑊就搞掂嘛   唔洗洗九萬幾樣嘢   妳知啦   又煮又洗真係好辛苦嘛   一餐飯嘅背後   真係有血 (心血) 有汗㗎 ~

我因為想帶飯嘅關係   就整多兜炒飯   臘腸切粒 + 菜脯切粒 + 少少蔥粒   用老抽同生抽炒呀炒呀咁   估唔到又好好食喎   最緊要係可以慳番廿幾蚊 Lunch 錢   哈哈 ~

7 點幾里奧大人一番嚟見到碟水餃已經係度笑   唔係開心嘅笑喎   係嚇到傻笑呀   因為覺得好鬼大隻同好鬼多呀   不過我話放心   啲水餃係多菜少肉   唔會太飽啫   最搞笑係里奧大人唔知係咪太肚餓關係   一見到炒飯就即 "北" 咗兩湯匙落自己個碗度想刻食   咩唔係應該見到水餃開心啲咩   佢又唔記得祈禱喇   唔通啲飯真係咁吸引   哈哈 ~

9 點幾食埋個叫里奧大人切嘅水蜜桃   今晚真係好滿足 ~

呢幾排煮新野都好好味   真係好開心   用愛心嚟煮野真係事半功倍㗎 ~

~~~~

今朝食蛋牛治 + 熱鴦 ($13)   好飽呢 ~

今日 CC 晏晝放假   無得同佢 MSN   今日應該都係苦悶中渡過喇 ~

今晚想煮焗茄汁煙肉意粉   因為啲意粉係 8 月到期 ~

食棧 @ 大埔 ( AUG-2007 )

尋朝趕住去餐廳食早餐   突然有人叫我   好驚呀   擰轉頭望   原來係我第一份工嘅同事   大大話話都有 10 幾年無見   佢居然認得我   我覺得佢好勁   因為記得個樣唔出奇   記得埋個名先勁呀   之後傾幾句我就話趕時間食早餐呀   ByeBye   其實唔知同佢講咩好 ~

尋晚過海睇中醫   同醫師講心口有時會痛   醫師話可能胸骨發炎同拎得重野多喎   鬼咩   要買餸煮飯唔重就奇咯   同埋自己拎個袋又係好重呢   其實我唔係放好多野啫   銀包 + Key Holder + 化妝袋 + 記事簿仔 + MP3 + Tissue   係咁多啫   但唔知點解都係好得重 ~

同里奧大人講   醫師話我唔拎得重野呀   里奧大人就話第時重嘢等佢攞喎   心諗係咪㗎 ~

點知我一落車佢真係第一時間搶咗我個手袋 + 裝飯盒嘅布袋 + 裝中藥嘅紙袋 (7 包中藥)...真係好感動   好心甜   覺得自己好幸福   但又好心痛喎   因為加起嚟一齊攞真係好重   咁點解佢唔分開 2 隻手攞呀   因為嗰隻手要拖住我嘛 ~

次次睇親中醫都煮唔到飯   所以唯有出街食   我一早已經諗咗食越南嘢   因為好想食春卷同蒸粉包   再加多碟菜同炒飯   真係勁飽   好在食唔哂可以留番比我帶飯   唔洗浪費啲嘢食   一舉兩得   哈哈 ~

~~~~

今朝又係食三文治   腿蛋蛋治 + 熱檸茶 ($13)   豐富的早餐 ~

已經諗埋今晚煮咩喇   就係水餃   .因為里奧大人想食呀   希望成功啦 ~

中式牛仔骨 ( AUG-2007 )

唔知係咪呢排成日落雨關係   好似悶悶不樂咁   所以可能令到我想煮嘢時有啲新款玩下   無咁悶 ~

尋晚又整咗個新餸   中式牛仔骨   平時我煮牛仔骨係就咁煎  再蘸泰式甜酸醬嚟食就 OK   但呢排好想整啲新款嘢   所以試下用中式汁嚟整   最好係材料用洋蔥同番茄   咁帶飯番公司食咪當有菜囉 ~

~~~~

今朝食吞拿魚烘底 + 熱檸茶 ($14)   好豐富呢 ~

Lunch 食尋晚嗰啲囉   不過唔洗錢出去食   都係好嘅 ~

蜜糖雞翼 + 腐乳唐生菜 + 蘋果栗子粟米紅蘿蔔湯 ( AUG-2007 )

尋日 10 點幾同里奧大人落麥記食早餐   我食個魚柳包套餐   魚柳包要多醬   因為好食好多   食完之後就番完教會 lu   散會就番屋企抖抖喇 ~

3 點幾開始肚餓   煮咗丁丁 (五香肉丁+出前一丁)   唔係自己讚自己   真係好味過出面好多   起碼五香肉丁係熱同埋啲麵係真正嘅出前一丁   再加多杯 Mocha   真係超級滿足   如果不用洗碗更好 ~

難得假期   多數煮啲我覺得認為比較花時間煮嘅嘢   而呢排咁啱成日都好想食雞翼   所以就試整咗 ~

第一次整蜜糖雞翼   慢火慢慢煎香去   好好味呀   里奧大人食咗 5 隻呀   平時最多食 3 隻   因為我哋唔係太好食肉   加碟清灼唐生菜   用腐乳蓉蘸點嚟食 ~

再整多煲清潤湯水   煲湯係睇 Blog 度學   真係好清好甜   因為唔用豬肉嚟煲   呢餐晚餐有菜有肉又有湯   十分十分正呀 ~

最開心莫過於係里奧大人食得好開心   希望下次煮新嘢時都煮得好食啦 ~

只要用愛心嚟做飯   真係好好好好味的 ~