里奧大人的生日

今日好開心呀....因為係我深愛既里奧大人生日呀...作為一個好老婆既我...當然要請假同里奧大人慶祝一番啦...而我喺 7 月果陣時已經送左個銀包比里奧大人喇...所以正式生日果日係無禮物架...尋日雖然落雨...不過唔緊要...因為里奧大人一早諗左 Plan A (戶外), 同 Plan B (室內) ...所以都無咩影響既...

今朝 10:00 起身...個天仲係落緊雨...其實想去嘉道理農場架...不過無辦法啦....唯有plan b囉...就係去睇恐龍骨喇...諗住同里奧大人去飲茶...因為好小機會朝早去茶樓飲茶...點知要等成10張枱呀...點等呀...咁唯有失望地去大家樂食早餐啦...不過我都好鍾意食既...我食左既至愛牛扒腸仔配蘿蔔糕 + 熱央...里奧大人就食左牛扒旦 + 多士配麥皮 + 熱檸茶...好好味呀...之後番屋企沖番個靚涼就出發喇...

第一站 : 1:00 到科學館睇恐龍骨...正呀...因為未試過咁近距離睇恐龍...骨...影左唔小相呀...遲 d 睇里奧大人過相比我就 post 比大家睇...

第二站 : 2:30 lu..近近地去左港晶中心間彩晶軒飲茶喇...haha...因為實在太想同里奧大人飲茶呀...環境唔錯喎...我地叫左蜜汁叉燒腸...煎鍋貼...金銀蒸蝦丸...海哲拚素鵝...酸辣魚腐湯米線...雪蛤燉椰皇 (涷)...呢度既野食通通都...難食呀...好唔開心呀...估唔到好彩集團會有 d 咁差既水準呀...之得去表哥茶餐廳食好過啦...之後行去加連威老道附近食番 d 好野...就係專賣韓國野食既舖頭食番支雪條喇...

我食哈蜜瓜味...里奧大人就食士多啤梨味...兩款味都好好食架...順便買左兩個辛辣杯面番屋企...行行下見到我想買果鞋好...所以試完就買 lu...唔係一陣里奧大人會依依俄俄趕住走咪咩都無?!?!因為里奧大人知我買野既性格係...兇狠型既有殺錯無放過...對鞋喺里奧大人送比我架...邊樹好意思呀...生日要送野比人喎...

行下行下又見到防刮腳..又忍唔住自己比錢買左兩對...其實之前買左都未用...不過見有就買囉...費事後悔嘛...

第三站 : 去海港城 shopping...突然間里奧大人有電話入...係講公事架...有無搞錯呀...請左假家嘛...里奧大人一傾公事就會忘我境界連行錯路都唔知架...不過錯有錯着...行左去 zara 果邊...橫掂無咩人咪行入去睇下囉...比我見到有件 tee 唔錯喎...再等里奧大人過目一下先...yi...里奧大人居然話抵呀...買囉...仲同我揀 size 添呀...唔通生日洗錢真係特別開心 d 既?!?!?!之後乘勢再睇下 d 褸 (難得shopping唔洗自己)...唉...雖然自己有美好既身材...但都有缺憾美...就係隻手唔夠長呀...件褸人地好鍾意家嘛...個袖長 lai lai 點着呀...唯有放棄囉...

臨走發生左件好樣衰勁"火羅"爆既事呀...就係我離遠見到有件好 sharp 既碎花衫...拚上埋身睇下...之後里奧大人走埋黎細細聲講話...妳呢件係 kids 既喎...嘩嘩嘩...勁"火羅"呀...都唔知有無人睇到添呀...

第四站 : 行我既至愛...city'super...不過今次居然無咩野特別想買喎...真係估唔到估唔到....之但係諗住番屋企之際...就入左去 zone 度共下...買家品既舖頭...嘩...比我發現左有special price 既野呀...仲係我想要買既 item 黎架...開心到顛呀...行左大半個鐘...買左兩隻漱口杯 + 梘液樽 + 透明玻璃兜 + 黑色膠兜 + 三張好 sharp 既 placemat + scissors + 切餅刀 +  有蓋玻璃樽...里奧大人仲買左 zone 自家品牌既筆...見里奧大人咁鍾意支筆...橫掂埋單五百幾蚊咁抵...我話我簽咭找數啦...同埋送比你做生日禮物嘛...點知里奧大人話唔洗...唔比我簽...話之前已經送左個銀包做生日禮物...唔洗再送喎...太好喇...里奧大人...我愛您...

第五站 : 搭車番屋企...里奧話去屋企附近酒樓食飯...我話點解既...你想食咩...里奧大人話係因為我鍾意食乳豬...所以去酒樓食喎...嘩...好好好好好好好感動呀...想口水鼻涕一齊流咁對住里奧大人喊呀...自己生日想食既係老婆鍾意食既野...真係好好好好好好好感謝好感動呀...我地食左...例牌乳豬 + 梨山醬汁肉排 + 金銀旦芫菜 + 一碗白飯同十蚊三支既汽水...飽到震呀....

番到屋企就做下家務咁啦...而里奧大人就例行公事...就係入房 check 下 公司 d email...之後我入廚房"鄧"個心型 cheese cake 出黎...因為我唔係用 cake ring 呀...所以要係好大力喺度係咁"鄧"係咁"鄧"呀...好在里奧大人無問咩事咁嘈咋...之後我捧住個旦糕一路行一路唱生日歌...里奧大人望到個樣好 surprise 呀...個心應該係開心到跳左出黎呀 (我估...但未必係)...因為真係估唔到我會咁有心思整旦糕呢...之後就影下相就食 lu...但我覺得個賣相麻麻地...同埋有 d 漏...不過愛心搭夠...hehe...在此鳴謝好朋友 cc 提供左個 blueberry cheese cake 既recipe 比我...如果唔係我就整唔到呢個 cake 架喇...cc..多謝妳呀...

後記 : 里奧大人主動問我食個蘋果好唔好...梗係好啦...唔洗自己切...不過都係切片唔係切粒既...

今日真係好開心好滿足...因為全日有里奧大人喺我身邊陪住我呀...