粟米磨菇粥 + 雙肶腸蛋菜飯 ( OCT-2008 )

放工趕住入荃灣睇中醫   因為今次要食兩個星期中藥   所以佢建議打成粉   但需時要個幾鐘   我又唔想食嘢   所以買本雜誌坐喺度等就算喇 ~

好在等咗 50 分鐘左右就完成   埋單 $2,700   今次算平 lu   因為可以飲兩星期呀 ~

之後里奧大人買外賣番屋企食   我每月一到唔多舒服   食完即沖涼瞓覺喇 ~

赤丸烏冬 + 麥當勞芥末魚柳包 ( OCT-2008 )

尋晚又約家姐去麥當勞食個包先去做瑜珈   試個芥末魚柳包   我覺得炸魚柳同芥末麻麻哋夾   都係沙律醬好味啲 ~

食完就做瑜珈   不過可能食咗藥   個人好攰無咩力   但見尋晚係 Last 嗰堂   所以咪番埋囉   好頭好尾嘛 ~

尋晚放學唔去媽咪屋企食同瞓喇   費事將病菌惹到媽咪同朱朱都病就唔好啦   不過唔去又真係又啲唔慣喎 ~

同家姐去 APM 赤丸食烏冬   好在排第 3 就到啫   食咗冷烏冬 + 天婦羅南瓜 + 餃子 + 煎肉腸 + 八爪魚丸   埋單 $86   裝修之後每樣加多兩蚊   如果唔係仲平呀   不過啲冷烏冬真係好正   勁煙韌   超好味   因為九龍灣嗰間一啲都唔煙韌呢 ~

食完家姐送我搭車就走喇   我哋由細到大都會一路揮手   Bye 到開車為止   同媽咪都係咁   啲人就會覺得我哋好怪   駛唔駛 Bye 咁耐呀  哈哈 ~

頭先無食菜   所以番到屋企就食生果   食蘋果夾芝士   又甜又鹹又爽喎   真係無得頂㗎 ~

~~~~

今朝天氣又係有啲涼   好舒服呢 ~

依家麥當勞啲早餐有特價   所以試下熱香餅 + 奶茶 ($14)   個餅都幾煙韌   但 3 塊實在太多喇   雖然我大食   但我都食咗 2 塊咋   因為我覺得牛油太肥   蜜糖太甜呢   頂唔順呀 ~

番到菇場勁充實   簡直連 M 都唔得閒 M 呀 ~

晏晝超級開心   因為同媽咪 里奧大人去正斗   食雲吞麵 (大) + 泥掹粥 + 炸兩 + 鮮蝦腐皮卷 + 流汁叉燒包   大碗雲吞麵搵笨   根本一 啲都唔大碗   炸兩就完全唔掂   隔夜油炸鬼   個叉燒包又係唔掂   但碗粥就好真材實料   因為我好少見咁大條泥掹魚   之後再陪埋媽咪去奇華買嘢就番菇場喇 ~

咪走雞 @ 大埔 ( OCT-2008 )

尋晚繼續唔煮飯   因為想抖多晚先再發力 ~

雖然無煮飯   但有做家務㗎   又洗衫又熨衫   攰到吖 ~

同里奧大人去咪走雞   食晚飯係第一次   試下好無食   好食會再翻單呢 ~

叫咗咪走雞飯 + 泰醬炒什菜 + 魚香茄子煲 + 熱檸蜜   埋單 $109 其實真係抵   因為唔駛加一可以食到小菜   同埋估唔到又幾好食噃 ~

~~~~

今朝出門口有陣涼意   希望日日都係咁啦   唔想沖完涼就咁快立黐黐呀 ~

早餐食腿蛋治烘底 + 奶茶 ($16)   其實真係唔想食咁多蛋   但又唔想成日食麵   又唔想一早食咁多肉   所以三文治就係最好嘅選擇喇 ~

旺季喇   番到菇場忙到嘔茄   不過時間就過得好快呢 ~

晏晝同里奧大人去餐廳食粉麵   墨丸河 + 魚片頭牛腩河 + 熱央 ($50)   食粉唔落辣椒油真係無哂靈魂咁呀 ~

呢排唔舒服   心情唔多好   再加上睇親報紙同聽新聞都係啲唔好嘅消息   真係 Very Down Down Down 呀 ~

經文分享

耶穌又對眾人說 :”我是世界的光.  跟從我的, 就不在黑暗裏走, 必要得著生命的光. ( 約翰福音 8 : 12 )

景福 @ 官塘 ( OCT-2008 )

尋日放工同媽咪去九龍灣正斗食 Lunch   有得坐卡位好舒服呀 ~

同媽咪食咗雲吞麵 (細) + 炸醬麵 + 及第粥 + 羅漢齋春卷   最正係有余均益辣椒醬   我覺得最好食係碗粥   好綿同啲料又鮮甜喎   真係好少食到呢   埋單 $134 都幾貴呀   但就坐得舒服同無酒樓咁嘈囉 ~

之後媽咪要去婆婆屋企   送完媽咪搭車   就去買件外套比奶奶做生日禮物   之後就上媽咪屋企休息下 ~

休息到 5 點就走喇   因為奶奶生日   所以早啲去酒樓打牌 ~

因為就奶奶   所以去景福   呢間服務態度超唔掂   食物水準當然都係唔掂啦   咁 Cheap 嘅酒樓都要 3 千幾蚊圍呀 ~

我無影到啲食物相   因為全枱都係老餅   費事問影嚟做咩   答唔係問題   而係答完佢哋都唔知係咩   無謂嘥口水 lu ~

食到 10 點半   終於可以番屋企喇 ~

~~~~

今朝無番教會   因為諗住睇醫生   點知睇開果個要晏晝先番   所以都係晏晝先睇   同里奧大人去食早餐算喇   我食火腿通粉 + 餐蛋多士   里奧大人食丁蛋麵   呢間餐廳無啲 Style   扮哂太興   又話係厚多士   點知話轉咗係多士喎   咁改餐牌吖嘛   Order 完早餐又唔比刀叉   都唔知點做嘢   但價錢又同太興一樣喎   但服務態度同食物水準真係差九班啦   Bad List 佢添呀 ~

Food Court @ Jusco ( 鰂魚涌 ) ( OCT-2008 )

尋晚要去惻魚涌做護膚品 Research 訪問   咁啱里奧大人又約咗朋友傾功課   所以我就約家姐食晚飯   順便陪家姐去 Jusco 買傢私 ~

一入門口就比啲麵包吸引   所以買咗芝士法軟包   因為鍾意細細個   同埋好好味呀 ~

買完傢私已經 9 點   但唔知點解度度餐廳都仲係咁多人等   除咗麥記   我又唔想食喎   所以買雜錦壽司 + 腐皮壽司 喺 Food Court 度食   以前有得坐   依家就只可以企喺度食咋   不過估唔到 Jusco 嘅壽司都唔錯噃 ~

依家 Jusco 好似買滿 $1,000 可以用特價換禮品   家姐就二話不說用 $1,500 換一個雪櫃比媽咪   之後又話買衫比媽咪   我真係覺得佢好好   咩都以媽咪為先   我都唔會咁做呀   我有呢個家姐真係好有福   因為家姐對我同媽咪同朱朱都勁好   終完買完所有嘢就搭車番屋企喇 ~

~~~~

今朝 6 點 20 分起身   覺得天都未光好搞笑   因為我想多啲時間見媽咪 朱朱同家姐   所以早啲起身   但佢哋居然仲遲過我喎   唔通真係越近越遲呢個定律係啱嘅 ~

家姐鍾意食麥記嘅薯餅   所以買咗個煙肉蛋漢堡餐   之後再 Share 食五香肉丁雪菜肉絲米粉   好飽呢 ~

終於感冒   做咩假期先嚟病呀 ~

京都豬扒 + 唐生菜 + 芫茜皮蛋鯇魚片湯 ( OCT-2008 )

尋日晏晝收到 Blog 友 冰姑 喺 KL 打嚟嘅長途電話   我覺得啲感覺好搞笑   駛唔駛咁鬼掛住我同阿卡呀 ~

雖然未見過面   但可能平時成日 MSN   所以啲感覺一啲都唔陌生   仲好似好熟咁   所以 Y-Blog 同 Msn 真係抵讚呀 ~

其實我 Office 真係好靜   因為公司規定要開 MSN   用 MSN 同廠聯絡   最頂癮係坐我隔離嘅 Partner 都用 MSN 問我嘢呀   駛唔駛呀   企身問都得啦 ~

所以我次次打電話比人   啲人就會問: 做咩事呀   咁嘅聲嘅   我就會話梗係啦   啱啱開聲咋   同埋公司又靜   要壓住喉嚨講嘢唔可以大聲嘛 ~

尋日無無聊聊等到放工   好在之前諗好咗煮咩   如果唔係就唔想煮㗎喇 ~

去到街市買鯇魚片 + 皮蛋 + 唐生菜 + 急凍雞扒 + 豬扒   其實街市都幾好行嘅   如果啲人唔好咁惡同埋環境乾淨嘅話 ~  

我好少番到屋企咩都唔整就瞓喺梳化唔願郁   所以我估自己又作病   但唔該病得黎唔好咁有胃口啦 ~

尋晚再試驗下自己包容之心   應該真係唔多有   因為我打咗兩次比里奧大人   7  點 45 分同 8 點 45 分一次   但我尋晚真係好攰又唔多舒服   想快啲食快啲休息   所以忍唔住要打電話   不過點催都無用   我都係 10 點先可以開飯呢 ~

是日晚餐 - 京都豬扒 + 唐生菜 + 芫茜皮蛋鯇魚片湯

京都豬扒  -  突然醒起通少嘅京都豬扒   又可以用下支白醋   幾好吖    唔係就 9 世都唔用㗎喇 ~

唐生菜 - 因為懶   但又想食菜   所以多數食生菜   點蠔油就搞掂 ~

芫茜皮蛋鯇魚片湯 - 見到條鯇魚片已經好篾驚   但里奧大人熱氣   所以硬住頭皮都要煲呢個湯比佢下下火囉   再次多謝豬豬妹教我呢個下火湯 ~ 

尋晚又睇阿蘇   有位阿姐教止咳方法就令人相當相當嘔心喇   就係捉一隻蟑螂 (曱甴)   抽咗條腸出嚟   之後 "中" 爛去沖水飲   咁就無咳   仲要話佢啲細佬妹飲完都係無咳   好嘔呀 ~

~~~~

今朝閉家火喇   個吸塵機塞住咗呀   我唔想病呀 ~

星期五要開心啲   所以又去食沙爹牛肉腸仔太陽蛋米粉 + 奶茶 ($18)   不過我成日覺得食米粉唔係咁飽   但呢一刻又唔想食公仔麵喎 ~

番到菇場勁 Happy   因為我要為自己有得番工搵錢已 Happy 呢 ~

晏晝同里奧大人食鹹魚肉餅飯 + 蝦餃 + 鮮竹卷  + 凍奶茶 ($44)   呢餐超難食呀 ~

Food Court @ APM + 瑜珈 + Blog 友短聚 ( OCT-2008 )

尋晚放工又約咗 Blog 友 卡姑  見面喇   不過今次好啲   可以傾到偈   唔會好似速遞咁交完貨就趕頭趕命走 ~

我買咗少少嘢比卡姑   點知佢又特登去買番包古古力酥比我喎   真係呢   當妳朋友買嘢比妳   妳又買嚟買去咁   睇妳人仔細細又幾老土架噃 ~

不過我都好開心嘅   因為妳覺得好食就買比我食呢   不過下次唔好喇   我要開始減肥喇    咁樣會食肥我㗎   知道嗎 ~

難得聚頭   又係要影下相咁啦   今次就醒喇   因為見到電話亭有個凹位   所以又可以玩自拍喇   今次終於可以三七分臉 + 微微咀笑喇 ~

同卡姑道別之後就等家姐一齊去麥記醫肚   食完就上瑜珈喇 ~

唔知係咪呢排攰得滯   所以覺得課室好凍   凍到想瞓覺添呀 ~

之後同家姐去食飯   諗住去 APM 嘅赤丸食烏冬   點知裝修到 10 月尾喎   無計啦   去 Food Court 食囉 ~

食 Pepper Lunch 黑椒牛肉飯 + 蒜蓉牛油雞翼 + 馬拉盞通菜    估唔到呢餐又幾好食噃   不過蒜蓉牛油雞翼就真係唔掂   啲炸漿多到呢   又唔脆   雞翼又咩味都無   仲要 30 蚊得 4 隻   係唔係呀 ~

送完家姐搭車就去媽咪屋企 lu   睇阿蘇整件英式西多士   真係睇到驚   4 隻蛋要落 8 匙更沙糖   又要用咁多油去半煎炸   最離譜係佢炸到燶哂呢   仲話係金黃色   擺明係黑色啦 ~

之後整 "麵包頭" 仲核突   將啲麵包濕水之後係咁 "錬" 已經覺嘔心   之後搓搓下比人搓仲嘔多兩錢   睇完之後已經唔想食喇 ~

~~~~

今朝同媽咪 朱朱食早餐   好攰   所以食奶醬多 + 奶茶    求其塞飽個肚就算喇 ~

番到菇場望住電腦扮勤力   但真係扮唔到   因為 M M 下會忍唔住笑咗出嚟   鬼唔知妳唔係做嘢咩 ~

晏晝里奧大人同新同事出去食飯   所以我買廈門炒米番公司食   之前已經覺得唔好食   但好想食無計   點知都係一樣咁難食   點搞㗎 ~

經文分享

我們又藉着祂, 因信得進入現在所站的這恩典中, 並且歡歡喜喜盼望神的榮耀. (羅 5 : 2-3)

打邊爐 @ 京都 ( OCT-2008 )

酒樓送嘅海鮮船   食咗兩隻蝦   其他無食到   用嚟做湯底

魷魚 - 必食   因為爽爽哋好好味

牛柏葉 + 鯇魚片 -  啲魚好腥

炸魚皮 -  肚餓食嘅時候就好鬆化   飽嘅時候食就咬崩牙

肥牛 - 好肥嗰隻

手打墨魚滑 - 一啲味都無

芝士腸 - 黐鬼線   咁鬼多條   食腸都食到滯

豬潤 - 我鍾意食豬潤   但睇見生勾勾嘅豬潤當堂反胃

辣椒 + 豉油 - 打邊爐嘅靈魂

啤酒 - 男人打邊爐必飲

上星期日里奧大人話想打邊爐   但我唔舒服所以唔打 ~

就係因為無打到   所以成日都覺得有啲嘢無做咁   於是尋晚就決定補番同里奧大人去打邊爐喇 ~

呢家經濟唔好   好多酒樓都會做 Promo 或者會送啲咩咩咁嚟扮益街坊   其實咩計都加埋落個價度㗎啦 ~

之前呢間酒樓要 $120/位 (包湯底 + 任飲汽水 + 花生 + 辣椒醬 + 加一)   依家就 $100/位 (包湯底 + 任飲汽水 + 花生 + 辣椒醬 + 加一 +  1 隻 Cheap Cheap 海鮮船)   我同里奧大人 9 點後去   所以只係 $89/位   咁又真係幾抵嘅   因為自己整打邊爐真係好煩呢 ~  

第一次同里奧大人咁夜打邊爐   啲感覺好新鮮呀 ~

因為食得太飽   所以要成 12 點先瞓得 ~

~~~~

今朝又幾好噃   因為唔係覺得好攰   可能因為熟睡啦   我睡眠質素好差   所以好難有覺好瞓 ~

又係諗唔到食咩   所以又食芝蛋治烘底 + 奶茶 ($16)   今次真係太飽食唔哂喇 ~

基本上我唔會喺咁熱嘅天氣食粥   但我實在太滯喇   所以同里奧大人去食粥    食食下里奧大人話喉嚨有啲唔舒服   同埋有粒睇唔到但摸到嘅大暗蒼   我咪話尋晚唔應該打邊爐啦   佢話因為我想打喎   聽完好心痛添   所以拿拿臨出錢買杯楊桃雪梨比佢滋潤下呀 ~

求其炒飯 + 隔夜湯 ( OCT-2008 )

尋晚覺得自己好好   雖然好攰   但我番到屋企都即刻洗衫   拖地   妳知啦   地方細   拖地真係好卵煩   要拎起呢樣拎起嗰樣先可以拖到   好計攰家嘛 ~

不過識啲人只會拖睇到嘅地方   睇唔到嘅就唔會拖   眼不見為乾淨   我就唔會囉   唔拖嗰度咪立黐黐好污烏糟囉 ~

尋晚里奧大人成 9 點半先番屋企   加上我有少少頭痛   本來想叫佢自己買外賣番屋企食   飲碗隔夜湯就算   但又覺得好似好慘咁   最後我都求其炒碟飯   總好過出去食味精嘅 ~

我尋晚覺得自己好怪   因為居然一啲脾氣都無發   又無打電話催里奧大人收工   唔通我真係開始學識包容同體諒   係就好喇 ~

是日懶餐 - 求其炒飯 + 隔夜湯

求其炒飯 - 將脆肉瓜 + 漢堡扒切粒   加老抽加蛋   炒埋一碟   其實呢   本來想 XO 醬炒脆肉瓜 + 煎漢堡扒 + 炒飯   但里奧大人實在太夜先番到屋企   我又唔想分幾碟餸黎煮   所以煮性炒埋一堆   估唔到里奧大人又鍾意食喎 ~

隔夜湯 - 估唔到仲清甜過第一晚 ~

基本上每個星期日都會由里奧大人負責換床單   因為張床褥好重   所以一定要男人換先得   但里奧大人話果晚太夜唔換住喇   尋晚我又叫里奧大人換床單   佢居然叫我唔駛再提佢   佢記得喎   我咪話記得就換啦   成日要講幾百次先肯去做   最憎人係咁   藉口多多 ~

尋晚睇 "珠光寶氣"   睇到蔡少芬鬧人鬧到好辛苦咁   覺得好勞嘈好煩   定係因為咁啱我頭痛而覺得好煩呢 ~

~~~~

今朝陰陰天   所以覺得勁眼瞓呢   都係有啲陽光曬下好   精神啲   但又唔好太曬   因為唔想有黑斑 ~

本來想去食麥記   但覺得茶餐廳啲奶茶濃味啲   飲咗會精神啲   所以又走咗去食餐蛋治烘底 + 奶茶 ($16)   我第一次食咁厚嘅餐蛋治   食一件已經好飽   再食埋第二件開始驚蛋 lu   唔知做咩鬼無啦啦咁厚蛋嘅呢 ~

番到菇場就係等食晏㗎喇   可悲可悲 ~

同里奧大人去興記   今次我食火腿燴意粉   好好食喎   如果識整啲汁就好喇   今次叫嘢食都幾麻煩   因為凍檸茶要小甜小冰   意粉要多汁   其中一份餐包轉方包   火腿奄到轉火腿腸仔   好在無比人話咋 ~

經文分享

但願使人有盼望的神, 因信將諸般的喜樂, 平安充滿你們的心, 使你們藉着聖靈的能力, 大有盼望 (羅 15 : 13)

燒汁魚柳 + 蒜蓉豆豉炒脆肉瓜 + 蘋果雪梨花膠西施骨湯 + 跑步 ( OCT-2008 )

都話星期日啲時間過得好快   番到屋企坐陣睇下電視又到 3 點   要出去食 Tea 喇 ~

又係未肚餓   但因為夜晚要去跑步   所以想早啲食早啲煮飯煲湯   求其食粉算喇 ~

是日晚餐 - 燒汁魚柳 + 蒜蓉豆豉炒脆肉瓜 + 蘋果雪梨花膠西施骨湯

燒汁魚柳 - 用急凍越南魚柳   已經用大量胡椒粉嚟醃   但里奧大人話好腥   所以我覺得仲腥   下次都係用黑椒汁整好過喇   我估應該無咁腥 ~

蒜蓉豆豉炒脆肉瓜 - 食到有啲悶   但又諗唔到點煮好喎 ~

蘋果雪梨花膠西施骨湯 - 呢個湯真係超級清甜清潤呢   不過估唔到華盛頓蘋果原來好計貴  要 $18 仲得 4 個   又細細個咁   都唔明點解買到咁貴嘅呢 ~

食完抖陣就同里奧大人散步喇   出咗一身汗真係成個人舒服哂 ~

不過呢    太早食飯好似有啲肚餓   所以食咗啲花生合桃咁   不過幾粒應該唔會話好肥咁嘅   同埋我好衰㗎   買番嚟唔即刻食就唔想食㗎喇   所以咪食囉 ~

~~~~

今朝天氣唔錯   但可惜係星期一    唔願番工呢   所以要慢慢行番工呢 ~ 

好想減下肥   所以食啲唔好咁飽嘅早餐   所以食花生醬多士 + 奶茶 ($13)   但食完好似無食過咁喎 ~

番到菇場唔知點解好眼瞓   又凍喎   搞到個人勁唔舒服 ~

晏晝同里奧大人食車仔麵 因為好想食啲辣汁   食完出下汗舒服好多呀 ~

咪走雞 + 胡椒餅 + 愛爾蘭瘋薯 + 肥姐鹵味 ( OCT-2008 )

尋日里奧大人終於做完份功課   所以要去灣仔交功課   之後就 Join 埋我喺銅鑼灣等 ~

我好怕搭地鐵出銅鑼灣   因為出去 Time Square 條路好似行幾年都行唔完咁   又肚餓又熱喎  行完都差啲頭暈咁滯呀 ~

路經么鳳買咗啲零食   口多多問九龍城果間真定假   佢哋話係假㗎   九龍無開分店㗎   我當堂掹到想殺人   因為上次我去咗九龍城買咗幾百蚊佢哋出名嘅鹹酸濕同零食   原來買咗翻版   唔怪之得媽咪話唔好食啦 ~

同里奧大人去文輝食紫菜墨魚丸河粉 + 炸魚皮    嗰度地方勁細   簡直係要夾埋對手嚟食   又要搭枱   不過見人多所以去食   但原來唔係咁好食啫   都唔知點解咁多人去食嘅 ~

食完同里奧大人去薄扶林拜老爺   之後再出旺角掃街 ~

食咗胡椒包 + 愛爾蘭瘋薯 + 肥姐鹵味   好少同里奧大人掃街   所以突然覺得好有上次去台灣掃街嘅感覺呀 ~

胡椒包 - 我覺得勁唔好食   同台灣根本無得比

愛爾蘭瘋薯 - 有10幾人排隊   但 cashier 話等10 分鐘左右就 ok   所以買咗芝士薯條

招牌芝士薯條 - 成 "抽" 芝士   所以好計漏   個底仲有好多芝士   食完真係可以唔駛食飯

不過無咩必要都唔會出旺角   因為實在太多人喇 ~

食飽之後就去 PCCW 攞 Mmini Hifi 組合   之後就番屋企 lu ~

其實番到屋企仲係好飽   但又想睇 "與敵同行" 大結局   所以唔肚餓都要出去食飯   我叫香茅豬扒飯   但叫完真係食唔落   變咗打包番屋企食   再加埋碗隔夜湯   真係超飽呢 ~

~~~~

今朝又係去教會附近食完早餐   就可以輕輕鬆鬆 lu ~

崇拜完之後又係同里奧大人遊街市   買咗啲凍肉凍魚柳   唔想再比藉口唔煮飯喇 ~

當將你的事交托耶和華, 並倚靠他, 他必成全 ( 詩篇 37 : 5 )

麥當勞 ( OCT-2008 )

尋晚放工去媽咪屋企坐陣   有啖湯飲下   影下朱朱同寶寶   順便等埋里奧大人放工一齊出街食飯 ~

點知等到 8 點半里奧大人先放工   度度到要等位   所以拿拿聲求求其其食麥當勞算喇   因為趕住番屋企睇 "與敵同行" 呀 ~

~~~~

今朝又係晨咁早起身出去同媽咪 朱朱食早餐   估唔到家姐又嚟埋喎   不過佢就好啲   因為星期六係 Off   食完可以抖下   而我就要番工呢 ~

沙茶金菇肥牛煲 + 牛油栗米 ( OCT-2008 )

尋晚特登早 3 個站落車   因為有間商場嘅 7 仔買雜誌係平 $ 1 同有紙巾送   點知去到雜誌未出呀   上次去都出咗   做咩今次未出㗎   搞到我無哂心機 ~

我成日都係咁   明明好想買嘅嘢   買唔到嘅話   會好唔開心㗎 ~ 

諗住整臘腸排骨飯   去到吉之島見到啲排骨唔多靚咁   唔買啦   又諗到自己都好攰   所以打比里奧大人話唔煮飯   出街食算喇 ~ 

但一路行又覺得好似好衰咁   難得早咗番到屋企   大把時間都唔煮   同埋我覺得里奧大人一唔食我煮嘅住家飯   塊臉好似好青咁   臉無血色勁暗啞好核突   所以後尾打番比里奧大人話都係煮飯喇   簡簡單單算喇 ~

當唔想煮飯嘅時候要煮嘅話   就一定要煮自己鍾意食嘅嘢喇 ~

去街市買肥牛半磅 ($14) + 3 條粟米 ($5) + 2 包金菇 ($12)   我覺得金菇好似貴咗咁   之前好似係買 $ 7/2 包㗎 ~

是日懶餐 -  沙茶金菇肥牛煲 + 牛油粟米

沙茶金菇肥牛煲 - 好味就好味   但勁油呀   真係只可以幾個月食 1 次呢 ~

牛油粟米 - 有時間   所以又用手逐粒拻消磨時間   不過依家粟米唔甜   唔係咁好食呢 ~

今餐又肥牛又牛油   食完肯定肥爆磅呀 ~

其實我真係好攰   但又唔願做運動   所以熨衫算喇   用陰力熨衫仲辛苦過做運動呀 ~

~~~~

今朝天氣唔錯   又係星期五喎   所特別醒神呀 ~

無啦啦又想食芝士   所以又食芝腿菠蘿包 + 凍央 ($17)   用開心嘅心情食嘢真係零舍好味呀 ~

今日晏晝又得我一個食 Lunch   所以就去試下一間好多人食嘅米線舖頭   外賣腩肉 + 枝竹小鍋米線 (小辣) + 奶茶 ($32)   雖然唔係話好辣   但都一路食一路流鼻涕呀 ~

魚皮餃水餃烏冬 + 煎雞翼 + 韭菜花 + 菜干白菜紅蘿蔔豬骨湯 @ 媽咪屋企 + 瑜珈 ( OCT-2008 )

尋晚又要做瑜珈   不過家姐唔番   無得 Share 食包   唔知係咪因為咁   所以今次玩得勁辛苦   好似無咩力咁   有啲招式又難到嘔電   玩完都無哂力   CC 仲話辛苦過擔泥添呀 ~

我太肥喇   所以做瑜珈好辛苦   因為個腩好 "阻訂"   搞到做唔到啲動作 ~ 

Miss 話瑜珈可以玩到 80歲   我覺得無可能   因為到時啲骨都脆啦   點做呀   耍太極就可以玩到 80 歲喇 ~

做完又係番媽咪屋企食飯兼過夜   做完運動唔多想食飯   所以叫媽咪整烏冬   濕濕咃易入口嘛   媽咪整咗魚皮餃水餃烏冬 (魚湯底) +煎雞翼 + 韭菜花 + 菜干白菜紅蘿蔔豬骨湯   食完勁飽呀 ~

之後食橙   係新奇士橙   但超酸囉   仲以為新奇士超甜添 ~

~~~~

今朝 7 點起身喇   因為同媽咪 朱朱食早餐   食完又番屋企坐陣   沖涼洗頭之後就拿拿聲換衫走人 lu ~

尋晚瞓得唔多好   隻貓無啦啦 "Meow"   隻狗又無啦啦吠   搞到我瞓唔到   再加上咁早起身   好攰呢 ~

番到菇場忙到呢   不過都係嗰句   忙好過無嘢做   之前勁得閒   悶到人都顛   食咩煮咩都無心機諗呀   反而忙我又唔會咁喎   但當然唔好咁忙啦   因為我需要 M 嘛 ~

晏晝里奧大人同同事食 Farewell Lunch   所以我買炒米粉 + 燒賣 + 粉果番公司食   眼闊肚窄   食唔哂喎   不過可能無落辣椒油   所以覺得無咁好食呢 ~ 

經文分享
但那等候耶和華的, 必從新得力, 他們必如鷹展翅上騰, 他們奔跑卻不困倦, 行走卻不疲乏. 

(以賽亞書 40 : 31)

水餃米粉 + 菜心 ( OCT-2008 )

呢幾日食緊中藥要戒下口   所以煮餸嘅範圍縮窄咗好多好多   就係咁   索性唔諗煮米粉算喇 ~

是日懶餐 - 水餃米粉 + 菜心

水餃米粉 - 勁方便   勁好味 ~

菜心 - 勁甜又係好味 ~

呢排唔知做咩   成日做咩都提唔起勁   但又唔係唔舒服喎   女人真係好煩呢 ~

今朝勁開心   因為麥記無咩人排隊   所以早餐食火腿扒芝士包 + 奶茶  ($12)   勁抵呀   所以勁開心呀 ~

番到菇場忙到爆炸   不過好彩咁忙   唔係會好眼瞓   我唔想朝朝番工中眼瞓呢 ~

 
晏晝同里奧大人又去興記   今次我食沙爹牛肉麵   毫無沙爹味可言呀   同埋發覺今次啲豬扒好薄   同牛肉一樣咁薄呀 ~

我個人好怪   一鍾意食就會食食食   食到驚以後就唔會再食   所以里奧大人就成日話我黐線呀 ~

鹵水雞翼 + 菜心 ( OCT-2008 )

尋日晏晝食得太飽   飽到諗唔到煮咩好   但又唔想出街食   又唔想去街市買餸   所以就諗到整雞翼喇 ~

成日唔抵得 小公主 整啲雞翼整得好深色好入味好靚咁   無理由家嘛   我自問都係一個好有心機煮嘢嘅人   無理由整唔到   所以我一定要整   要對自己有個交待   哈哈 ~

是日懶餐 - 鹵水雞翼 + 菜心

鹵水雞翼 - 基本上都跟足小公主   但都有啲修改   無將雞翼解凍   改用鹵水汁   無落燒酒   再加咗啲冰糖   估唔到啲味道又唔錯   里奧大人仲話以為係瑞市汁添   又話好好味喎   但我以前買成支瑞士汁番嚟燜嘢又話唔好食喎   古靈精怪 ~

 

菜心 - 超甜   再點啲雞翼嘅鹵水汁仲正呀 ~

今朝呢   天氣都幾好   所以心情都唔錯   要食豐富啲   食炸菜肉絲餐蛋米粉 + 奶茶 ($19) 好難得炸菜肉絲無肉絲   所以第時又多過選擇喇   因為我係唔食炸菜肉絲啲肉絲嘅 ~

邪邪邪   番到菇場勁忙呀   所以只能一路做一路 M   一心二用真係勁攰 ~

晏晝又同媽咪 里奧大人去美心皇宮飲茶   因為媽咪煲咗雪梨蘋果花膠川貝西施骨湯   正到爆呀   有啲湯水潤下真係唔同啲   特別係女人呀 ~

鬱 躁 症 患 者 徘 徊 天堂與地獄

【 本 報 訊 】 本 港 約 有 20 萬 成 年 人 患 上 鬱 躁 症 ， 精 神 科 專 家 指 出 ， 若 突 然 覺 得 自 己 「 呢 排 好 掂 、 好 順 」 ， 情 緒 高 漲 ， 但 情 緒 又 突 然 變 得 極 為 低 落 ， 就 可 能 患 上 鬱 躁 症 。 鬱 躁 症 患 者 情 緒 時 高 時 低 ， 由 於 病 人 同 時 患 上 驚 恐 或 焦 慮 等 其 他 精 神 病 的 風 險 高 達 五 成 ， 故 患 者 應 及 早 求 診 治 理 。

忽 然 覺 得 「 呢 排 好 掂 」

鬱 躁 症 又 稱 雙 向 情 緒 病 ， 患 者 會 出 現 抑 鬱 及 狂 躁 兩 種 極 端 情 緒 ， 活 像 在 天 堂 與 地 獄 。 香 港 大 學 精 神 科 學 系 副 授 鍾 家 輝 表 示 ， 「 佢 情 緒 有 高 就 有 低 ， 一 年 可 能 會 有 四 個 高 低 循 環 咁 多 」 。 當 患 者 狂 躁 症 狀 出 現 時 ， 會 感 到 自 己 鴻 運 當 頭 ， 「 佢 會 話 呢 排 好 掂 好 順 ， 有 人 會 突 然 做 好 大
投 資， 甚 至 有 人 會 亂 咁 買 樓 ， 有 病 人 試 過 買 樓 之 後 其 實 無 錢 畀 ， 搞 到 要 撻 訂 」 。
狂 躁 病 徵 也 分 輕 重 ， 重 症 者 在 病 發 期 脾 氣 極 為 暴 躁 ， 與 人 吵 架 、 打 人 甚 至 瘋 狂 購 物 ； 輕 躁 者 病 徵 不 明 顯 ， 「 佢 會 自 信 心 增 強 ， 個 人 輕 鬆 自 在 、精 力 過 剩 唔 使 」 。
但 當 狂 躁 的 另 一 端 抑 鬱 發 作 時 ， 患 者 情 緒 低 落 得 很 突 然 ， 忽 然 認 為 自 己 很 無 用 。 但 鬱 躁 症 病 發 時 的 抑 鬱 症 狀 ， 與 純 為 抑 鬱 症 患 者 不 同 ， 前 者 的 抑 鬱 情 緒 會 突 然 出 現 ， 後 者 主 要 由 外 在 因 素 例 如 喪 親 等 引 致 ； 傳 統 抑 鬱 會 失 眠 及 無 胃 口 ， 但 鬱 躁 病 人 則 會 貪 睡 及 暴 食 。

全 港 有 20 萬 成 年 患 者

港 大 去 年 的 研 究 發 現 ， 本 港 約 有 3.4% 市 民 有 鬱 躁 症 症 狀 ， 推 算 本 港 有 約 20 萬 成 年 患 者 。 由 於 鬱 躁 症 病 人 同 時 患 其 他 精 神 病 風 險 很 高 ， 「 100 個 （ 鬱 躁 症 病 人 ） 有 50 個 都 會 有 其 他 精 神 病 」 ， 患 者 應 及 早 尋 求 治 療 。

鬱 躁 症 病 徵

鬱 症 發 作 時 病 徵 （ 持 續 兩 周 出 現 以 下 情 況 ） ：
‧ 情 緒 低 落 、 對 任 何 事 提 不 起 興 趣
‧ 缺 乏 動 力 、 說 話 及 動 作 變 慢
‧ 食 量 改 變 ， 如 胃 口 變 差 或 暴 食
‧ 失 眠 或 睡 眠 質 素 變 差 、 容 易 疲 倦
‧ 自 信 心 減 弱 、 有 自 殺 念 頭

躁 症 發 作 時 病 徵 ：
‧ 較 平 日 精 力 充 沛 、 熱 衷 幫 人
‧ 比 平 日 更 自 信 ， 認 為 甚 麼 事 也 做 得 到
‧ 焦 躁 、 易 發 脾 氣
‧ 多 說 話 、 思 想 快 、 想 做 很 多 事 情 但 難 集 中
‧ 比 平 時 多 做 冒 險 的 事 、 如 投 資及 危 險 駕 駛
‧ 容 易 亂 花 錢 、 入 不 敷 支

資 料 來 源 ： 綜 合 鍾 家 輝 醫 生 及 蘋 果 資 料 室

蝦仁炒飯 + 菜心 + 蕃茄薯仔魚湯 ( OCT-2008 )

同里奧大人番完教會必須要番屋企抖抖   因為我仲係巧攰呢 ~

成日覺得星期日啲時間過得超快   熨完衫已經 2 點半   又係時候食 Tea 喇 ~

食完又係去街市買生果 + 菜 + 大眼雞 + 蕃茄 + 薯仔   雖然勁平淡   但都幾開心嘅   有個人幫妳拎下嘢咁 ~

今次里奧大人又幾好喎   係都要幫我煲埋中藥先去眠一眠   好感動呢 ~

是日懶餐 - 蝦仁炒飯 + 菜心 + 蕃茄薯仔魚湯

蝦仁炒飯 -  求其落啲蝦仁 + 菜脯粒 + 蔥花 + 蛋就算喇 ~

菜心 - 買咗 1 斤 ($12)   其實我覺得依家啲菜好貴   但又唔想食瓜   又見大大棵咁所以照買   橫掂我分兩餐食都抵嘅   估唔到啲菜心又好甜喎   又無渣   唔錯唔錯 ~

蓄茄薯仔魚湯 - 3個蕃茄 + 1 個細薯仔 + 1 條大眼雞   條魚又係 $30   我又係覺得好貴   但我覺得大眼雞煲出嚟啲湯唔腥   所以我會比較捨得買   同埋我會食埋條魚嘛 ~

之前好期待睇獎門人   但依家就可睇可唔睇   覺得好似無咩新意好悶咁 ~

~~~~

今朝雨粉粉   又涼涼哋   所以覺得有啲凍   好正呀 ~

早餐食芝蛋治烘底 + 奶茶 ($16)   飽到唔知點形容 ~

菇場無啦啦有嘢做   勁唔想做呀   星期一真係無咩 Mood 呢 ~

晏晝同媽咪 里奧大人去利苑飲茶   今次真係好好好好飽   因為叫咗 4 人套餐 (2 款點心 + 龍脷葉豬橫脷豬骨湯 + 菜 + 海鮮 + 2 款例牌小菜 )   埋單 $ 400   咁又唔係貴喎   因為碟碟都唔少嘢呢   所以最後食唔哂要媽咪打包番屋企喇 ~

富山和食料理屋 @ 大埔 ( OCT-2008 )

尋日巧忙巧攰巧辛苦呀   朝早同媽咪朱朱食早餐後再去保險箱拎嘢   之後陪家姐去大快活食早餐 ~

食完就打的去拜爸爸   爸爸走咗都十年 lu   但我次次都會忍唔住喊   我覺得生前未好好孝順爸爸   覺得對爸爸有所虧欠   次次去到個心都會好實好唔開心 ~

但里奧大人 2 家姐話我仲掛住爸爸   係好有問題喎   因為都走咗咁耐   佢話佢唔會咁㗎   仲話第時我有咗小朋友就唔會記得呢啲日子喎   但我唔會囉   爸爸嚟家嘛   點會生咗唔掛㗎   呢個簡直係謬論嚟呀 ~

同完家姐拜完爸爸就去荃灣拜公公   搞掂哂就去食米線喇   唔知係咪太攰同太熱關係   覺得今次湯底麻麻哋   唔係咁好味咁 ~

之後里奧大人都到埋   食完就行去北京同仁堂睇中醫   因為里奧大人啲同事話有個醫師睇婦科好掂   所以就去睇下   不過我覺得好好好好貴呀   3 包藥埋單 $1,830   佢哋話有鹿茸片   就咁鹿茸都 $1,200喎   同埋啲藥係靚藥嚟㗎   所以唔係好貴喎 ~

諗住去拎 Coupon   點知去到原來間嘢執咗   改咗為二德惠   咁又錯有錯着   因為之前成日好想去二德惠   但唔識去   估唔到今次又會咁啱有二德惠喎   一場嚟到   買咗個蛋糕模 + 2 隻 梳乎厘杯 + 杏仁片就走喇 ~

番到屋企成 6 點   家姐又會過嚟同我哋去富山食壽司   佢哋要超過一半人數先比入   所以坐陣又要出去攞位食飯 lu ~

食完陪家姐買車仔   再去電器舖格價   之後上我屋企坐陣   坐到 10 點幾就走 lu ~

終於可以沖涼抖下   全日無圍滕   行到腳到痺呀 ~

~~~~

今朝同里奧大人去喺教會附近食早餐   唔駛咁趕 ~

經文分享
你們祈求, 就給你們, 尋找, 就尋見; 叩門, 就給你們開門 ( 馬太福音 7 : 7 )

住家飯 @ 奶奶屋企 ( OCT-2008 )

因為要去奶奶屋企食飯   而里奧大人又唔無咁早收工   所以我就上媽咪屋企坐喇 ~

坐咗無耐媽咪又去睇大戲喎   所以唯有同朱朱玩自拍   不過朱朱好憎影相   因為一見我將相機對住佢   佢就會擰埋臉   串爆   但我又唔敢挨塊臉咁埋   驚佢咬我呀   佢真係會咬人㗎 ~

里奧大人 7 點放工   所以 Join 埋一齊去奶奶屋企食飯 ~

呢餐飯唔多掂呀   魚湯啲魚煎燶咗   湯又好鹹   南乳齋係隔夜   鹹酸菜豬肉同雞係前日喺鄉下拎落嚟   走咗之後同里奧大人講有無搞錯呀   難得個仔番嚟食飯   食隔幾夜嘅餸   食壞人咩 ~

頭先只係食菜同飯   唔係咁飽   所以去麥記食新地   食完真係飽哂喇 ~

食完就去取消保險箱   唔知係咪因為官塘會重建關係而唔要恆生呢   無咗保險箱真係好唔方便   都唔知將啲手飾擺喺邊度好   放喺屋企好唔安全家嘛 ~

元綠壽司 ( OCT-2008 )

為咗拎銀行嘅禮品   迷你雪櫃仔一個   所以要去油麻地一趟   最憎搭地鐵   仲要正值放工時間添   但唔搭地鐵又唔知有咩車去到喎 ~

好在等咗 15 分鐘就可以拎禮品   因為一個人等會好寂寞呢 ~

之後再行去旺角幫朱朱拎藥同營養糊仔   有 5 包藥同 15 包糊仔   所以又係一大包   好重呀 ~

左一包右一包咁慢慢行去搭小巴番屋企   又熱又攰呀 ~

本來之前已經雪定好啲冷飯   諗住整炒飯   但實在太攰   同埋里奧大人同我差唔多時間番到屋企   所以唔煮喇   去元綠食壽司算喇   橫掂有 78 折 ~

次次食壽司都唔會食得太多   可能因為一路飲水一路食   所以飽哂 ~

本來想食完跑步   但唔夠瞓   腰酸背痛好辛苦   所以放棄 lu ~

之前成日想隔晚食芝麻糊   仲特登買兩罐   點知成個月都唔知有無食一次   所以一記得就即訂整嚟食   因為擺得太耐會一嚿嚿咁 ~

我覺得啲芝麻糊無咩味   所以加咗 2 粒湯丸   甜啲好味啲 ~

~~~~

今朝拎一袋二袋坐巴士   所以要坐樓下   熱到呢 ~

咁熱唔想飲熱嘢同食鹹嘢   所以食芝腿菠蘿包 + 凍央 ($17)   食到一半時覺得好滯   所以食埋今次唔想再食住喇 ~

一番到菇場就諗起聽日 Off 就無心機做嘢   好想快啲放工呢 ~

其實我真係好感恩   因為我間公司對我真係好好   點解無啦啦咁講呢   係因為我家姐話佢公司阿 Head 好衰   上次有個同事唔舒服   將個頭伏落張枱到一下   阿 Head 就叫佢唔舒服就走啦   唔好伏喺張枱到咁肉酸喎 ~

咁有次我週期性唔舒服   我伏落張枱度   咁啱我阿 Head 叫我做嘢見到   就話如果妳一陣無嘢做就伏低抖下啦   嗰刻真係好感動   因為覺得佢好體諒我呢 ~

晏晝同里奧大人食車仔麵   出面熱到吖    食完番到公司全身汗呀 ~

住家飯 @ 媽咪屋企 + 瑜珈 + Blog 友短聚 ( OCT-2008 )

尋日好緊張   因為放工要見 Blog 友 卡姑   佢係都要比啲手信我喎   但其實我知佢係好想見我真人就真呢   哈哈 ~

卡姑之前一晚已經 SMS 比我㗎喇   但我好早熄電話   所以朝早先收到佢個 SMS 呢   佢仲話以為我比假電話號碼佢添   哎喲   我係好人嚟家嘛   仲要係好人到唔恨嗰隻喎   點解佢要咁樣 Hurt 我㗎 ~

真係唔好意思   第一次見就遲咗 5 分鐘    因為我記錯時間囉   雖然第一次見卡姑   但啲感覺好似好熟咁   真係要多謝 MSN 喇   因為我哋日日番工都會由番工 M 到放工呢 ~

佢好客氣   比咗袋手信我呀   搞到我唔好意思呢   我唔係一個咁為食嘅人蹳家嘛 ~

之後格硬迫佢同我影相   仲要喺超多人流嘅地鐵站影   我又唔多識自拍   又要就番三七臉   所以一定要卡姑出手先影到咋   如果唔係都唔知要影到幾時呀 ~

其實我已經同佢講咗千千萬萬次我係好人   但我相信佢都係好驚我   因為我望到佢隻手好好好好好好好好震呢 ~

卡姑趕時間   所以比完手信再影埋相就要道別喇   下次要再約出嚟食飯先   因為唔見得唔夠喉呀 ~

之後我就  Join 埋家姐行去學瑜珈   兩個星期無玩   一路玩一路覺得超辛苦呀 ~

放學就同家姐去媽咪屋企食飯   睇下電視   估唔到 "與敵同行" 又幾好睇喎 ~

~~~~

今朝同媽咪 朱朱食早餐   雖然攰   但勁開心呢 ~

番到菇場做下嘢咁   不過全日坐真係幾辛苦   坐到腰骨都痛呀 ~

晏晝同里奧大人又去下村食嘢   咖哩雞飯套餐 + 炒米粉   個咖哩雞絕對絕對唔掂   毫無味道可言   個米粉呢   雖然係白雪雪又無料   但我又好鍾意食喎 ~

梅菜蒸鯇魚 + 金銀蛋菠菜 + 跑步 ( OCT-2008 )

尋日食完早餐    里奧大人就去剪髮   我就喺屋企認真做家務 屋企成日好多塵    掃完都好立黐黐咁    所以我好鍾意用碧麗珠抹嘢   好乾淨同好爽呢 ~

天氣好清涼   所以唔駛開冷氣   如果日日係咁就好咯 ~

做完沖涼  再吹下啲清風   真係好正呢   我覺得成日涼冷氣個人好濕重咁   所以間唔中吹下啲生風真係覺得好正 ~

晏晝同里奧大人去大家樂食 Tea   唔想食咁飽   因為要飲埋媽咪前日煲嘅花旗參湯   如果夜晚飲呢個湯   里奧大人會瞓唔着㗎 ~

是日懶餐 - 梅菜蒸鯇魚 + 金銀蛋菠菜

梅菜蒸鯇魚 - 用 1 棵甜梅菜 + 薑絲   非常之易整   但我真係好怕整魚   次次整完都無胃口食   唔知點解 ~

金銀蛋菠菜 - 因為我除咗識整蒜蓉炒菠菜同金銀蛋菠菜之外   唔識整其他呢 ~

 
天氣好到實在不得不去跑步   但里奧大人膝蓋痛   所以改為一齊徑步   徑咗 35 分鐘   勁正 ~ 

唔知點解依家啲生果無咩生果味   之前買咗個木瓜   口感唔似食木瓜   同埋絕對無木瓜味囉 ~

~~~~

今朝如常番工 lu   嚟緊呢個幾月好慘   因為無假期呀 ~

早餐食芝腿菠蘿包 + 凍奶茶 ($17)   食完覺得有啲滯 ~

番到菇場又係燃燒青春   但一到 12 點就最開心   因為覺得啲時間會突然過得好快咁 ~

同里奧大人又去興記食麵   食食下先發覺原來自己差唔多連續 3 日食公仔麵   所以開始有啲驚   呢個餐實在太多嘢   加上我早餐仲未落格   所以打包奄列同餐包番公司做 Tea 呢 ~

經文分享
如今常存的有信, 有望, 有愛, 這三樣 : 其中最大的是愛 (歌林多前褚 13 : 13)

靚靚雞翼 + 八爪魚卷 + 蒜蓉炒菠菜 ( OCT-2008 )

一早醃咗雞翼   所以放工只係去街市買斤菠菜 ($8) 就番屋企喇 ~

因為聽日係假期   所以做咩都可以唔駛咁趕呢 ~

是日晚餐 - 煎雞翼 + 八爪魚卷 + 蒜蓉炒菠菜

煎雞翼 + 八爪魚卷 - 我覺得煎雞翼真係好需要耐性   所以次次都要煎好耐   今次唔想煎到黑媽媽   所以反嚟反去係咁煎   好嘥時間呢 ~

蒜蓉炒菠菜 - 食菠菜有益   同埋呢排好少見到有菠菜買呀   所以見到即買   不過會分兩次煮   因為唔想食唔哂格硬食 ~

難得又有假期   所以 12 點先捨得瞓呢 ~

~~~~

今朝 10 點半起身   其實假期大多數都係呢個時間起身   咁都幾好嘅   因為可以趕得切食早餐嘛 ~

食完去百佳買鯇魚 ($13)   一心諗住去入買出前一丁   但要 $3.7 一包   好貴呀   所以等特價先再買   不過減價機會都好微   依家咩都貴   咁無益嘅丁都要 $3.7   想點呀 ~

堂細佬婚宴 @ 香格里拉酒店 ( OCT-2008 )

因為夜晚有飲宴   所以 3 點幾先食 Tea   同里奧大人又食酸辣米線   雖然都幾好味   但唔可以再食咁密   唔係會好快食厭呢 ~

食完番到屋企坐陣   梳洗之後就出發喇 ~

臨出門先嚟落大雨   麻煩到爆   人哋想着高跟鞋家嘛 ~

去到就影相   影完就同其他親戚傾偈   唔傾都唔知原來自己已經咁鬼老咯 ~

今次婚宴係中式   所以每枱會有一個 Waiter Serve 嘅   所以影唔到相喇 ~

萬幾蚊一圍   食物質數都唔係咁好啫   又無咩特式   不過派場就絕對掂囉 ~

9 點開席   11 點食完   番到屋企 12 點   12 點半先可以瞓覺   真係好攰呢 ~

~~~~

今朝真係無咩精神   瞓少一個鐘真係差好遠呀 ~

里奧大人又請咗假做功課喎   所以可以瞓晏啲   而我就拖着疲勞嘅身體去梳洗 ~

早餐食芝蛋治烘底 + 奶茶 ($16)   超飽   希望食完超精神呀 ~

番到菇場有嘢做   不過要慢慢來   因為仲未回復番工 Mood ~

今日係家姐農曆生日   所以佢放假   約埋媽咪一齊去美心皇宮飲茶   媽咪又煲咗花旗參湯   又食又拎超勁開心呀 ~