打邊爐 @ 屋企 ( NOV-2008 )

尋日放工即刻飛奔番屋企同里奧大人一齊 Tea 喇   番到屋企抖陣又番教會 lu ~

一早諗好打邊爐   所以番完崇拜就一齊去街市買材料  再去超市買西柚味汽水   打邊爐唔飲汽水真係唔似打邊爐呀 ~

湯底係芫茜皮蛋 + 老李沙爹火鍋湯底   我多數會將蘿蔔切片一齊煲   所以啲湯底會比例甜呢 ~

今次好快手   整埋影埋相   用咗 50 分鐘就搞掂 ~

喺屋企打邊爐真係幾舒服   無時間限制   又可以睇電視同睇 DVD   食下停下又唔會比人望住   最正係食唔哂可以留番唔好嘥嘢嘛 ~

~~~~

今朝里奧大人又無啦啦腰骨痛   所以買早餐嘅重任就交喺我身上喇 ~

買咗腸粉燒賣魚蛋    我之後再食碗麥皮   降下膽固醇   其實我好怕食麥皮   但為咗健康就無辦法啦 ~

鄧媽媽過橋水餃 @ 葵涌廣場 ( NOV-2008 )

之前托 CC 買 Skin Care   所以尋晚放工就約佢交收   順便一齊去葵芳嘅葵涌廣場 Shopping   雖然山長水又遠   但係啲嘢平靚正   都值得嘅 ~

我好怕好怕搭地鐵   特別係放工時間   真係想迫都迫唔入   同埋啲人好勁   真係可以夾硬攝入去   塊面真係貼住玻璃門㗎   其實真係幾恐怖   我指嗰樣喎 ~

仲有最憎啲人唔係出   但又企喺度阻住哂個門口    好心就出去門口  讓下人    等人出哂咪入番去囉   企喺到唔郁比人撞撞共都辛苦啦   真係吖 ~

好在尋晚同 CC 一齊搭地鐵   可以一齊傾偈   唔覺唔覺就到目的地 lu ~

去到第一時間由上至下   左至右咁係咁行   行到第 3 間舖已經有收穫   所以好有原動力再行呀 ~

今次收穫唔錯   買咗 1 件薄褸 + 1 條裙 + 1 件裇衫 + 1 件背心   埋單 4 百咋   邊度搵呀   我自己買嘢係會買平嘢   無咁肉痛 ~

我覺得好奇怪   就係永遠想買嘅嘢就無   但無諗過買嘅又會買到喎   今次我就係咁喇   一心買 One Piece   點知一條都買唔到   反而買到其他嘢 ~

買完就食嘢 lu   9 點幾唔想食咁飽   所以試下鄧媽媽過橋水餃   我食醬排骨都幾好味   甜甜哋又唔肥   唔錯唔錯   不過我覺得連米線一齊食就有啲怪   因為我唔鍾意有汁嘅餸同濕濕哋嘅粉麵一齊食呢 ~

次次去街都係里奧大人喺屋企附近巴士站接我   所以我都唔想話太夜番   最好 11 點前番   可以早啲休息嘛 ~

平時慣咗 10 點 45 分左右瞓   尋晚沖埋涼又執埋嘢   搞到 11 點 45 先瞓呀 ~

~~~~

今朝約咗家姐 朱朱食早餐   所以要早啲起身   落到街又唔係話太凍咁噃   可能唔大風啦 ~

星期六番菇場真係無 Mood 做嘢   再加上里奧大人今日 Off   個心仲更加唔會響菇場度呀 ~

雜錦小鍋 ( NOV-2008 )

尋晚里奧大人探奶奶   所以我放工行下 Jusco 就番屋企開餐喇 ~

因為好攰   求求其其淥幾粒嘢就算喇   橫掂得我自己一個人食 ~

夜晚凍咗啲   諗住懶勁唔着褸去屋企樓下嘅平台跑步   點知凍得滯   跑 3 個細圈就走喇 ~

~~~~

今朝凍咗好多   勁開心呀 ~

星期五喇   可以食早餐食飽啲   食芝士腸蛋出前一丁 + 奶茶 ($20)   但見到又唔係話太想食喎 ~

番到菇場呢   無嘢做又唔駛點郁   所以越坐越凍呀 ~

晏晝同里奧大人去茶餐廳食 Lunch   因為想食炒麵同飲奶茶   再加多個雞翼牛扒意炒意粉 就啱啱好 ~

今晚同 CC 去街   煮唔到飯    突然覺得里奧大人無住家飯食好似好慘咁   我真係有啲想喊出嚟   唔知點解   呢排唔知點解眼定定望住里奧大人就會好想喊   我覺得佢做嘢好辛苦   我又幫唔到佢   只係聽佢呻   再加上佢之前病到面無血色   所以我係好計擔心佢   我之所以堅持要煮飯   係真係想里奧大人食得健康啲   我辛苦少少無所謂   等佢食完就睇下報紙電視 Relax   將公司一切嘅煩惱都拋諸腦後   番到屋企永遠係開開心心咁就得㗎喇 ~     

無料炒米 + 粟米湯 ( NOV-2008 )

朝早太早起身   所以好攰   無咩 Idea 煮飯 ~

諗唔到   唯有整啲屋企有而功夫唔多嘅嘢啦 ~

是日懶餐 - 無料炒米 + 粟米湯

無料炒米 - 唔想額外煎漢堡扒   所以求其用小量急凍海鮮粒就算   再埋咖哩粉一齊炒   真係好香呢   但實在太小料喇   眼見里奧大人好辛苦喺堆米粉度撩啲海鮮粒出嚟食   好似好慘咁   因為我好少會煮咁少料嘅米粉呢 ~

粟米湯 - 始終都係覺有蛋花好食啲 ~

本來諗住散步   但實在太攰   所以都懶得去呀   唔做運動嘅藉口真係長諗長有呀 ~

~~~~

今朝凍咗   加上又唔知點解特別眼瞓   所以真係唔想起身呀 ~

人哋話食甜嘢會精神啲   所以食芝腿菠蘿包 + 凍奶茶 ($17)   其實食菠蘿包好煩   因為賬卜卜好難咬   所以我多數壓平先食   咁食就方便好多喇 ~

番到菇場雖然有嘢做   但個人超級眼瞓呀   如果番工時間係朝 10 晚 5 你話幾好呢 ~

媽咪又煲咗花旗參石斛豬𦟌湯   所以晏晝就同媽咪  里奧大人去美心皇宮飲茶喇 ~

燒汁豬扒炒飯 + 薑蔥蓉伴菜心 + 齋滷味 (外賣) + 傳統蕃薯糖水 ( NOV-2008 )

依家經濟唔好   好多店舖都唔駛等到 X'mas 已經 Further Sale   所以尋晚同里奧大人一齊放工去 Michel Rene   因為係最後一日做 Promotion   所以即刻買咗 6 件裇衫 + 3 條 Tie 都係 8 百幾咋   真係平到震呀  ~

買完就番屋企喇   其實真係好想食埋飯先番屋企   但前日已經醃咗豬扒   唔整唔得   所以最後都係要番屋企煮飯喇 ~

是日晚餐 - 燒汁豬扒炒飯 + 薑蔥蓉伴菜心 + 齋滷味 + 傳統蕃薯糖水 

燒汁豬扒炒飯 - 有肉有飯   咁樣整真係幾方便   味道又唔錯喎 ~

薑蔥蓉伴菜心 - 唔想食咁多蠔油    又唔想嘥啲蔥尾   所以就整咗薑蔥蓉件菜心喇 ~

齋滷味 -  喺自家素食買嘅   $18 有 3 樣   所以就揀酸齋 齋叉燒同齋鴨腎喇   不過味道就麻麻 ~

傳統蕃薯糖水 ( 強勁版 ) - 里奧大人話黃芯先甜喎   所以咪又整 2 個試下囉   黃芯又真係好似好味過紫心咁喎   不過食完飯即食糖水真係好飽   里奧大人喊住話 "太大碗喇  太多蕃薯喇   出街食無咁多蕃薯㗎   咁多當飯食都得喇   下次唔好煮咁多喇   煮 1 個蕃薯夠㗎喇"   咩咁煩㗎   食就食啦 ~

尋晚真係好飽   烏低身時覺得好辛苦   有啲喘咁   可能真係飽得滯呀 ~

~~~~

今朝又同媽咪 朱朱食早餐   不過覺得今朝有啲凍   所以唔願起身呢 ~

晏晝我扮哂好人問里奧大人想食咩   其實我真係諗唔到想食咩   之後我又話去佢最鍾意果間啦   即係興記    佢開心到震呀   因為佢勁鍾意食福字麵呢 ~

一人一鍋 @ 大家樂 + 變靚啲 Brownies + 散步 ( NOV-2008 )

尋日里奧大人要聽 Seminar   所以同我差唔多時間番到屋企 ~

好難得里奧大人開口主動話打邊爐   我當然唔會 Say No 啦 ~

諗住去屋企樓下酒樓打   點知佢哋有人擺酒   所以無得打   咁話去大家樂   我其實鍾意自助形式多啲   里奧大人話望到我個樣有啲失望好似好慘咁   所以去另一間酒樓睇睇   不過係逐碟計   仲要係 $28 起   我覺得唔抵   如果我食金菇 生菜 粟米都差唔多一百蚊   仲要食其他嘢呢   汽水加一等等咪要 3 百囉   我好慳家嘛   覺得又唔多值喎 ~

最後卒之打道回府去大家樂   因為我實在太想打喇 ~

里奧大人又肚餓   所以買咗粉果醫醫肚   你知啦   打邊爐無咁快食得家嘛 ~

估唔到大家樂一人一鍋有驚喜喎   沙爹湯底居然有沙爹味   豆腐又滑   南瓜又甜   雖然肉唔係好多   但都覺得好飽   係因為菜多定係之前食咗兩隻粉果打底呢 ~

食得太飽   所以同里奧大人散步   散完真係舒服好多 ~ 

番到屋企再熨埋衫   又食下 Brownies   今次加咗啲椰絲   我覺得個樣好好多呀 ~

食完咁甜   又要食番啲酸嘢喇   呢啲車厘子係里奧大人特登買比我㗎   所以一定要食   如果唔食以後就唔會買比我食㗎喇 ~

打邊爐 (燥) + Brownies (燥) + 車厘子 (補血)   一連氣食咗呢 3 樣嘢   幾驚燥到流鼻血呀 ~

~~~~   

今朝凍凍哋   所以好想食啲熱辣辣有湯嘅早餐   所以食咗火腿通粉併腸蛋多士 + 奶茶 ($19)  超超超超飽呀 ~  

番到菇場無咩嘢做    摸下自己個肚   真係好大呀  係時候要忍忍口喇   因為年紀大新陳代謝慢好多㗎 ~    

晏晝同里奧大人食比較唔想咁飽嘅車仔麵喇   食完又行番公司   行到出汗  真係好幫助消化呢 ~  

腐乳蝦醬雞絲炒飯 + 菜心 + 自制常餐 + 自制黑白珍珠西瓜涼粉 + 徑步 ( NOV-2008 )

呢排真係煮嘢煮出癮   雖然只局限於極度簡單嘅餸菜   但我真係落足幾百萬倍嘅心機整㗎   真係煮嘅開心   食嗰個仲開心呢 ~

見里奧大人成日渴望食丁丁   咁難得星期日又有時間   所以整丁丁比佢嘆   加埋開心腸同哈哈笑蛋   佢真係差啲一路食一路感動到流眼淚呀 ~

都話整開有條路   所以比個驚喜里奧大人   就係整咗過超 A 嘅黑白珍珠西瓜涼粉   好透心涼呀   不過呢碗超 A 真係用咗好多時間整呢 ~

食到真係好飽   但又想早啲食完去跑步   所以好快又要預備晚餐喇 ~

是日懶餐 - 腐乳蝦醬雞絲炒飯 + 菜心

腐乳蝦醬雞絲炒飯 - 第一次跟食譜整   又幾好味喎   今次仲錯有錯着   整多咗啲汁   所以可以用多餘嘅汁嚟點菜心 ~

菜心 - 菜心夠正氣   食多多都唔怕 ~

  
食完洗完抖陣就跑步   其實應該係徑步   好耐無徑 lu    所以唔敢徑咁耐   來回 30 分鐘就算喇  
徑步完沖涼啲感到真係好正好舒服   希望嚟緊都有時間可以徑番啦 ~

~~~~

今朝係星期一   但無想像中咁唔想番工喎   唔錯唔錯 ~

尋日食得太多蛋   又食過出前一丁   無咩好選擇就食芝腿治烘底 + 奶茶 ($16) ~

番到菇場終於無咁忙   可以巡完 Blog 先開工   咁先有原動力開工家嘛 ~

里奧大人晏晝要聽 Seminar   所以去麥記   貪佢夠快呀   我覺得個巨無霸好似嘔緊啲菜出嚟咁   好搞嘢呀 ~

牛油蒜蓉法包 + Brownies ( NOV-2008 )

其實兩公婆同一區番工真係幾好   因為可以一齊番工一齊食飯一齊放工   如果雙方都準時收工嘅話   同埋如果雙方鍾意咩都一齊嘅話 ~

尋日好好彩咁可以同里奧大人一齊放工   番到屋企附近就啱啱好食 Tea 時間喇 ~

之後里奧大人 5 點就出門口探奶奶   之後再約朋友食飯   所以尋晚得我一個喺屋企呢 ~

橫掂無電視睇  又唔想出街  所以要學人整下餅咁啦 ~

好興奮咁打開材料盒   點知 2 盒麵粉 發粉 朱古力粒全部過哂期   簡直晴天霹靂呀   因為第一嘥哂啲嘢   第二要特登去超市買過呀 ~

再 Check 多次雪櫃仲有無快將過期嘅烘焙材料   發現朱古力磚同無鹽牛油月底到期   所以拿拿聲用埋去   所以就整咗 Blog 友 MuiMuimui 嘅 Brownies ~

一時間打亂哂陣腳   好在記得之前 卡姑 係整餅高手   所以即刻打去問買咩粉整曲奇   好在都有一個好好嘅答案 ~

買完麵粉   番到屋企先發覺唔記得買 Baking Powder   又要再落街買 ~

番到屋企已經有啲攰   好想放棄   但放軟緊牛油   我先繼續整咋 ~

喺等緊焗嘢其間見無咩嘢做   所以就煮熟啲大西米同粉圓   煮到頭都暈呀   啲大西米整成幾年都唔熟咁嘅   足足整咗個幾鐘先熟   嘥哂啲煤氣呀 ~

整到差唔多成 8 點先食嘢   不過得一個人   求其食方便得黎又自己鍾意嘅嘢就算喇 ~

是日懶餐 - 牛油蒜蓉法包 + Brownies

牛油蒜蓉法包 - 1 個人食哂 1 條法包   仲要狂加牛油同蒜蓉   食完個人漏到不得了   所以拿拿聲拖地消化一下呀   不過都於事無補 ~

Brownies - 估唔到焗起出嚟咁大盤   真係有啲驚   但估唔到又幾好味噃   濃濃嘅古古力真係好正   其實我未食過 Brownies   最可惜賣相唔多掂   無哂心機 ~

等呀等   里奧大人終於 12 點半番到屋企   可能平時我太早瞓   所以覺得好眼瞓呢   但我自己入房瞓先又唔慣喎   因為都係心掛掛瞓唔着呀 ~

~~~~

今朝攰得滯   所以無番教會   諗住去大家樂   離遠睇到 Cashier 超多人   所以掉頭走喇   去茶餐廳食算喇   雖然星期日   但都要飲杯奶茶   試過唔飲   成日都好似無厘精神咁   之後飲番就精神番哂噃   但唔知點解番工飲奶茶又唔會好提神咁喎 ~

A 臘腸排骨煲仔飯 + 紅青蘿蔔粟米栗子豬骨響螺湯 ( NOV-2008 )

尋日同里奧大人食埋 Lunch 先去威院覆診   去到時間啱啱好 ~

難得去沙田   幾日前已經諗定行一田   點知睇見報紙啲人買嘢買到好似唔駛錢咁   都知真係超多人  但我今日成副戰鬥格裝備   所以都去睇睇咩環境   點知真係多人多到顛   超市又係多人到顛   有啲零食餅乾真係平   但唔係好多款咋   而其他都係 95 折   但點解都咁多人買嘢㗎   本來我都諗住買   但睇見 Cashier 條龍長到吖   仲要個個都係成車嘢咁   我估起碼要排一個鐘呀   最終都放棄呢 ~

無咩幾何咁早番屋企   所以就買材料煲湯同買餸喇 ~

諗住番到屋企抖下   點知又忍唔住洗衫 熨衫同執屋   簡直係賢妻典範呀 ~

是日晚餐 - A 貨臘腸排骨煲仔飯 + 紅青蘿蔔粟米栗子豬骨響螺湯

A 貨臘腸排骨煲仔飯 - 里奧大人好鍾意食煲仔飯   所以整煲 A 貨佢嘆下   佢話好好味好香   不過唔好話係煲仔飯喎   因為煲仔飯唔係咁喎   記得要加個 "扮" 字呀   求其啦   有得食仲嘈   真係吖 ~

紅青蘿蔔粟米栗子豬骨響螺湯 -  唔係讚自己   呢煲湯真係極度超甜   可能多料呀   如果次次都係咁好飲就好喇 ~

~~~~

今朝又同媽咪 朱朱飲茶   但又唔覺得好攰   仲諗埋第時如果老咗咁早起身做晨運都好喎 ~

唔知係咪早得滯  所以朱朱都好似未瞓醒咁   乖乖咁坐定定   又着埋衫仔   真係成個人仔咁㗎 ~

老細 Off   番到菇場都無心機做嘢   但都會做嘅   因為我係一個好員工嘛 ~

大排檔 ( NOV-2008 )

鹵水拚盆 - 雖然係拚盆   但都要擺好啲囉

椒鹽鮮魷 - 唔夠乾身   如果唔係仲好味

薑汁炒芥蘭 - 無咩特別

南乳齋煲 - 熱辣辣好好味

外賣魚蛋魚片 - 無食到   不過不嬲都好好味嘅

尋日勁開心呀   因為晏晝同夜晚都會同屋企人一齊食呢 ~

里奧大人約咗朋友食飯   所以我就約媽咪   難得家姐同姐夫又放假嘛 ~

同得屋企人出街食飯   咁當然要帶埋寶貝朱朱啦   所以就去大排檔喇 ~

依家媽咪屋企附近開咗有蓋大排檔   去試下好唔好食先 ~

今次朱朱好乖   唔為食   全程伏落我大脾度   簡直無人知佢嚟咗呀   食完就 Join 埋里奧大人一齊坐車番屋企 lu ~

~~~~

星期五真係特別開心   所以食芝士腸蛋出前一丁 加奶茶 ($20)   估唔到有兩隻蛋咁多   下次叫佢比 1 隻算喇   食唔哂好嘥嘛  ~

晏晝去覆診   所以好似多咗半日假咁   可以煲湯整餅   勁開心呢 ~

水餃米粉 +雙丸米粉 + 再嚟日本蕃薯糖水 ( NOV-2008 )

尋晚放工坐車聽 MP3   聽啲慢歌突然諗起啲唔開心嘅嘢   嚇到即刻轉快歌   之後再聽番慢歌又無事喎   唔知係咪仲未適應日短夜長呢 ~

里奧大人探奶奶   所以無咁快番到屋企   我就可以有時間洗衫熨衫   我唔鍾意一大堆衫放響度    如果唔係成日覺得好似差緊啲嘢未做咁   瞓都瞓得唔安樂 ~

是日懶餐 - 水餃米粉 + 雙丸米粉

水餃米粉 + 雙丸米粉 - 超方便   總好過食街嘢 ~

日本蕃薯糖水 - 呢個糖水真係愛心滿溢㗎   點解咁講呢   因為我無諗住整   但里奧大人無啦啦問會唔會整糖水   佢好少會咁問嘛   我好了解佢  佢咁樣問即係想食  但又驚我辛苦要整   所以就會咁問喇   難得佢鍾意食糖水   我幾攰都煮啦 ~

 

唔知係咪呢排凍凍哋   又食埋糖水  所以都幾好瞓呢 ~

~~~~

今朝又話會凍   都唔係好凍啫 ~

朝朝諗食咩早餐   有時都諗到唔知食咩好   所以又係食三文治  蘑菇雞肉腸片蛋治 + 奶茶 ($16)  三文治都係烘底好食啲   都唔理熱唔熱氣咯 ~

番到菇場一樣咁忙   但忙得好開心   因為期待緊食 Lunch 呀 ~

家姐今日放大假   所以約埋媽咪 里奧大人一齊去 Pizza Hut 食 Lunch   不過唔知點解覺得無咩味咁嘅 ~

睇報紙見到盞記廣告   又幾搞笑咁   不過最頂癮係之前嘅廣告   搵安得尊扮女人   真係令人作嘔兼發惡夢呀 ~

老少平安 + 菜心 ( NOV-2008 )

依家多數會一諗就諗幾晚嘅餸菜   同埋有啲會早一晚買定   咁就唔駛晚晚去街市咁煩 ~

是日懶餐 - 老少平安 + 菜心

老少平安 - $8 鯪魚肉 + 2 磚豆腐   第二次整   好食過第一次好多   不過我對呢個餸麻麻哋   我唔鍾意啲口感   不過唔想食咁多肉   想清清哋先整嚟食咋 ~

菜心 - 之前食剩嘅   所以一定要食埋   唔係擺得耐會黃呀 ~

~~~~

今朝 6 點 10 分起身同媽咪 朱朱食早餐   仲以為自己教錯咗 5 點 10 分   因為個天仲係好黑呀   又話好凍喎   點解一啲都唔覺嘅 ~

可能太早起身   所以番到菇場都唔願做嘢添 ~

晏晝同里奧大人 + 佢同事一齊去興記   又食又傾   真係覺得時間唔夠用呢 ~

南乳煎雞翼拚八爪魚卷 + 菜心 + 勁辣日本蕃薯糖水 ( NOV-2008 )

一早醃定嘢   真係超級方便   唔記得煮又唔驚壞喎   仲會覺得更加入味呢 ~

放工就咁去街市買 1斤菜心 ($10)   再買 4 條日本蕃薯 ($ 8) 就 OK 喇 ~

是日懶餐 - 南乳煎雞翼拚八爪魚卷 + 菜心 + 日本蕃薯糖水

南乳煎雞翼拚八爪魚卷 - 雖然燶咗啲   但燶燶哋嘅效果真係好靚呢   最難得係又香又好味呀   就咁得雞翼好似好單調咁   所以加埋八爪魚卷喇   當堂覺得好豐富咁呀 ~

菜心 -  好大條好靚   但今次灼半斤先   因為想留肚食糖水呢 ~

日本蕃薯糖水 - 估唔到第一次又整我幾好味噃   但我落咗兩大舊薑   所以里奧大人話辣過辣椒醬喎   今次真係顛咗   我覺得啲薑擺得耐驚唔辣   所以落兩大嚿   我居然唔記得薑係越老越辣呀 ~

今朝早咗起身   所以去 KFC 食雞扒芝士包 + 奶茶 ( $14)   佢嘅咖啡好飲過奶茶好多   但依家一飲咖啡就好想反胃   變咗好少飲 lu ~

~~~~

番到菇場又係忙   不過可以專心工作   因為無得遊 Blog 呀 ~

里奧大人約咗同事食 Lunch   所以我就買車仔麵 ($18) 番公司食喇   無得睇 Blog 仲要自己食 Lunch   真係慘上慘呀   上網睇報紙又好慢喎   唔知係咪因此個個無 Blog 睇   所以走去睇報紙呢 ~

粟米龍脷柳碟頭飯 ( NOV-2008 )

去完慈善步行就出赤柱行下   因為我好少會特登入赤柱呢 ~

行咗陣覺得又熱又攰   又好計想飲凍奶茶   所以去咗最近嘅赤柱餐廳喇 ~

無咩胃口   只係食炭燒肉眼根米線 + 紫菜四寶麵   估唔到啲麵好爽   辣汁又唔錯 ~

食完嚟料   因為對腳好痛呀   所以要抖陣先出去行呀 ~

唔知點解成日都唔識用力   用錯力落斜   搞到對腳超痛呀 ~

諗番起喺青春乎少艾嗰陣時行萬里長城   又係落嚟嘅時間用錯力   搞到痛咗成晚無覺好瞓   自此就好怕落斜 lu ~ 

實在無心情再行   索性坐巴士出尖沙咀   又係好想飲凍嘢   所以走咗去大家樂食 Tea   飲完杯可樂真係好爽呀   之後就去醫院探奶奶喇 ~

探到 6 點幾就走喇   途經 Lamborghin   里奧大人話 30 % off 就入去睇下   希望佢想要嘅袋有得平   實在勁開心呀   想要嘅袋居然 50% Off   里奧大人拿拿聲買呀   仲問因為經濟好定係季節性減價   Sales 姐姐話係金融海嘯大減價喎   佢話從未試過做 50% Off 㗎   最多都係 8 折   估唔到經濟真係差成咁 ~

里奧大人驚我辛苦   所以話出去食   但我又覺得有時間   唔想成日食街嘢   最大問題係我居然唔係太想食嘢嘛   如果出街食   食唔哂好似好嘥嘢咁   之後我係都話煮飯   里奧大人都好驚訝愕然話   做咩成日要煮飯嘅 ~

是日懶餐 - 粟米龍脷柳碟頭飯

粟米龍脷柳碟頭飯 - 用地們粟米蓉整嘅   但覺得個汁杰咗啲   不過都好好食喎 ~

食完就影埋慈善步行送嘅嘢   有防曬 + 兒童防曬 + 濕紙巾 + Body Shop 嘅 Shower Gel + 海棉   最鍾意就係紅噹噹嘅環保袋   唔知點解我勁鍾意儲環保袋   我見到有嘢係用環保袋裝住就會雙眼發光笑咪咪㗎   里奧大人就好驚我呢樣嘢呢   話成個傻婆咁喎 ~

~~~~

今朝對腳仲痛   行路辛苦到震呀 ~

早餐食芝腿菠蘿包 + 奶茶 ( $17)   要食多啲芝士補補鈣先 ~

番到菇場忙到不可開交   但係對腳又痛到無心機   所以等到晏晝先做  lu ~

唔想行咁遠   因為唔想行樓梯   只能同里奧大人去距離我公司 50 步嘅舖頭食米線 ~

慈善步行 @ Hong Kong Cancer Fund ( NOV-2008 )

今朝 7 點起身食早餐   之後再番屋企梳洗就出發去 Hong Kong Cancer Fund 舉辦嘅慈善步行喇  ~

呢個活動已經辦咗 10 幾年   入場費係每人捐 $500   但我只係行咗 4 次   因為有幾次都唔舒服去唔到  好唔開心啊   因為我好鍾意佢哋啲 Tee   我覺得好有意義   所以今年可以去到   超級開心呢 ~

目的地喺由香港國際學校出發   有 Shuttle Bus 到會場   但係時間係好早   所以次次我哋都會搭巴士到灣仔再打的去會場   今次黑仔啦   因為司機唔識路   所以又問又等   搭咗百幾蚊的士   仲要搞到我哋遲到添  ~

步行係 9:30am 開始   但我哋去到會場已經 10 點   要急起直追呀 ~

沿途都綠油油   真係好寫意   我好鍾意慈善步行   因為幫到人之餘   自己又可以去大自然吸一吸新鮮嘅空氣 ~

好在天氣好   有太陽又有風    所以行起嚟都好舒服   不過上斜就真係好辛苦囉   好似行極都唔完咁   我又唔想停低休息喎   想快啲行到終點呀 ~

雖然我只係行 5 km  但來回即係 10 km 喎   所以我覺得自己已經好勁㗎喇   妳知啦   肥人行喎   好辛苦家嘛 ~

(啦啦隊歡迎番來喇)

(贊助嘅午餐)

(農夫做現場表演   唱 Live 又唔錯噃   之後仲有 Hotcha Ella 等等   但我走喇   所以無睇)

(好多年都係 Vincent 做 MC (唔知真人叫咩名   淨係知做同事三分親個名)

1 點會有大抽獎同 Shuttle Bus 接送   但我次次都唔會等到 1 點   因為我唔想乾煎呢 ~

雪菜火鴨絲炒米 + 菜心 + 蕃薯糖水 ( NOV-2008 )

星期一喇   又新嘅開始 ~

番到菇場   心情都係一樣   番工想放工   不過我都鍾意有嘢做嘅   無咁悶嘛 ~

  
晏晝唔想出街   所以 Lunch 食麥皮 + 餅乾    咁食果下都好飽   但 4 點就開始餓囉 ~

今晚唔駛買餸   因為叫里奧大人幫手買   難得佢又肯   真係發達咯 ~ 

是日晚餐 - 雪菜火鴨絲炒米 + 菜心 + 蕃薯糖水

雪菜火鴨絲炒米 - 好在買定燒鴨咋   如果唔係夜晚應該無呢   因為買嘅時候得番兩盒咋   而雪菜平時我買細棵嘅   里奧大人去買就大棵到呢   因為一睇佢樣都知唔曉啦 ~

菜心 - 里奧大人食菜嘅時候   個樣好似執到寶好叻好開心咁話   原來唔駛問人攞蔥都會比㗎   我成日話買菜超過五蚊就一定要問人攞蔥   我再問問幾錢斤 ?!   佢話 12 蚊一斤   我真係頭暈啦   12 蚊買第啲嘛   叫佢買真係買   之前同佢買過菜啦   講咗逢係十幾蚊嘅菜就唔買   買第啲菜或者瓜都得   我唔會比佢再買菜   一係就要打電話比我問問先買囉   不過佢唔會打比我㗎   成個師奶咁款嘛 ~

蕃薯糖水 - 蕃薯買咗幾日啦   再唔食就驚爛呀   反正凍凍哋就整多啲薑   食完成身暖哂呀 ~

蜜糖金沙骨 + 菜心 + 薑粒蛋白炒飯 + 芝麻糊湯丸 ( NOV-2008 )

尋晚勁他條   因為只需要去街市買 1 斤菜心 ( $12) 同 1份雪梨 ($10) 就番屋企喇 ~

不過今次係整新嘅菜式   所以番到屋企要 Ready 喇 ~

是日晚餐 - 蜜糖金沙骨 + 菜心 + 薑粒蛋白炒飯 + 芝麻糊湯丸

蜜糖金沙骨 - 跟頭條日報嘅食譜   但我睇錯咗做法   人哋係將調味料連同水加金沙骨一齊燜   而我將調味料嚟醃咗成晚   所以千其唔好心急立一立就算喇   咁唯有覺得醃一晚入味啲囉   不過我覺得呢個骨都幾嘥時間   但我又唔知用焗爐要焗幾耐   所以求其燜就算喇   但好奇怪   人哋啲金沙骨好深色   但我加埋老抽都無咩色   都唔知點解   呢個餸係新餸   好在都幾好味  甜甜哋唔錯㗎 ~

菜心 - 就咁灼算喇   啲菜好清甜   但我鍾意加埋薑蔥蓉一齊食呢 ~

薑粒蛋白炒飯 - 未試過用蛋白炒飯   所以試下   但好似無咁香咁囉   下次都係唔好扮健康喇   都係有埋蛋黃好食啲 ~

芝麻糊湯丸 - 里奧大人煮㗎   不過佢永遠唔會將啲嘢放回完位   有咩理由可以將個煲蓋擺喺廳   而唔會放番入廚房㗎噃   係咪個個男人都無手尾嘅呢 ~

~~~~

今朝 6 點 10 分起身   個天仲好似未光咁呢   但我誓要梳洗連搭車要 7 點鐘去到媽咪屋企   同埋朱朱一齊食早餐呀 ~

生炒排骨 + 海皇雜菜煲 @ 大埔墟街市熟食中心 ( NOV-2008 )

尋日要拿拿林放工   因為要 2 點要去到灣仔做 Research 訪問   求其去 Panash 買個藍梅芝士包就算   食芝士包飽啲   無咁易肚餓呀 ~

我對灣仔唔係咁熟   好在行行下有警察   可以問問路   但咁啱有位途人聽到我問路  佢好熱情咁教我點行   真係出路遇貴人呀 ~

做完之後就 Join 里奧大人番教會   再去熟食中心食晚飯 ~

里奧大人生痱滋又皮膚痕   所以唔食炸嘢辣嘢同海鮮   早講嘛   人哋想食炸花枝丸同椒鹽雞軟骨家嘛 ~

無咩好選擇下   所以唯有叫里奧大人自己發板   叫咗生炒骨 + 海皇雜菜煲   好在味道都唔錯啫 ~

食完行路番屋企   食完飯行下真係好舒服呢 ~ 

不過唔知點解無啦啦想食甜嘢   所以走咗去麥當勞食濃朱古力蛋糕   但唔好食嘅 ~

~~~~

今晚要早啲瞓   因為要養足精神聽日慈善步行呀 ~

孤零零食一丁 ( NOV-2008 )

一早諗好煮咩   仲會有大把時間煮添   因為里奧大人探奶奶   點知里奧大人打嚟話肚餓   想食埋先屋企喎   真係吖   早啲講嘛   我番媽咪屋企食飯嘛 ~

呢排真係好想打邊爐   所以最後忍唔住去街市買咗啲丸同金菇   再埋多磅金沙骨就番屋企喇 ~

是日懶餐 - 雙丸丁丁

雙丸丁丁 - 有海謄丸同蟹粉丸再加金菇   勁有打邊爐 Feel 呀   本來想食米粉   但因為知道里奧大人鍾意食一丁   所以我就食一丁喇   我要報復佢唔番嚟陪我食飯呀   等佢知我原來都會喺屋企煮一丁㗎 ~

食到咁飽   所以熨衫消化一下~

唔知點解   里奧大人唔喺屋企嘅話   我無咩心機睇電視㗎喎   所以我索性熄電視睇報紙好過   個感覺十分之正呀 ~

~~~~

今朝好似熱番咁   做咩咁快回暖㗎 ~

早咗番到公司附近   所以嘆下早餐   食至愛嘅吉列魚柳腸仔蛋 + 奶茶 ($21)   食完番到菇場咳到我吖 ~

一早諗定晏晝同里奧大人食車仔麵   點知兩間都無位   咁求其去咗茶餐廳食快餐   豉油雞胒豆腐飯 + 干炒三絲銀針粉   啲飯太腍勁難食   我又唔多鍾意食銀針粉   以前食到驚咗   所以會覺得呢餐唔掂呀   同埋我係如果一早諗定食咩而食唔到   我會食咩都覺得唔好味㗎 ~

鯪魚大餅 + 牛油炒粟米 + 腐竹湯丸糖水 ( NOV-2008 )

估唔到自己可以真係做到晚晚煮住家飯   但煮咗一個星期   野性難馴   始有啲想出街食咯 ~

呢排天氣凍   好想打邊爐   但里奧大人話唔好喎   熱氣呀   無哂心機   想蛇下都唔得 ~

唔想食豬又唔想食雞   更加唔想食蛋   所以去街市買鯪魚肉 ($10)  再加 2 條粟米 ($5) 就算喇   唔知係咪好多人用粟米打邊爐呢   所以好難先買到粟米呀 ~

臨番屋企前再買包腐竹 ($6)   因為好想煲糖水潤下呀 ~

是日懶餐 - 鯪魚大餅 + 牛油炒粟米 + 腐竹湯丸糖水

鯪魚大餅 - 加菜脯碎   所以食落爽爽哋好正㗎   再加埋泰式醬汁   真係超好味呀 ~

牛油炒粟米 - 大粒嘅粟米好容易拻   話咁快拻完   之前成日買 3 條粟米   食完真係有啲滯   但今次買 2 條嘅份量就啱啱好呢 ~

腐竹湯丸糖水 - 唔想煲湯   加上天氣乾燥   食糖水就最好喇   同埋希望食完好瞓啲啦 ~

依家習慣 11 點前瞓   感覺好似有足夠嘅時間休息咁呀 ~

~~~~

今朝好似無咁凍 lu   但依然都要着番件外套呢   唔係冷親好麻煩㗎 ~

唔想食蛋  唔想食麵   所以食芝腿菠蘿包 + 奶茶 ($17)   個菠蘿包皮甩咗出嚟   好似帶咗假髮咁   樣衰到不得了   今朝仲買埋報紙邊食邊睇   $5.5 送 Tempo 又幾抵喎   不過其實我好少買報紙   因為根本無時間睇呢   同埋上網可以睇嘛   唔好嘥錢呢 ~

老細今日番咗喇   要快手快腳做嘢喇 ~

晏晝里奧大人同同事食   所以我就約媽咪 朱朱去食晏   食濕炒牛河 + 海蜇燻蹄 + 馬拉糕   好開心呀 ~

焗豬扒飯 + 粟米湯 + 桂花大菜糕 (失敗版) ( NOV-2008 )

尋晚無啦啦塞車   搞到我要極速殺入去街市買蕃茄同洋蔥 ~

之後再去寵物店買衫仔比朱朱   因為朱朱瘦咗好多   以前啲衫太大件唔啱着呀陰公   希望朱朱快啲肥番幾磅就好喇 ~

是日晚餐 - 焗豬扒飯 + 粟米湯

焗豬扒飯 - 用 3 個蕃茄 + 茄汁 + 喼汁 + 豉油 + 水   點知個汁太稀   用 2 隻蛋炒飯   點知啲飯太濕    豬扒驚唔熟    點知煮到好 "鞋"    時間關係  啲芝士又未溶哂   總括嚟講   我覺得味道 OK   但里奧大人話好食   當然咁講啦   因為知我辛苦嘛   同情分點都要比嘅   所以都係信自己好啲 ~

粟米湯 - 原本想整炒粟米   因為好想食   但諗到要遂粒拻嘅話   拻得嚟都 9 點   所以飲粟米湯算喇 ~

里奧大人好鍾意食大菜糕   所以前日整咗   好期待自己整嘅桂花大菜糕   點知超難食   唔知點解好實咁   但我照足包裝指引做㗎噃   見里奧大人食兩啖個樣就無哂表情都知咩事啦    所以我話掉咗去算喇   無謂 "格硬" 食嘛 ~

上次又係咁實   今次又係咁   唔想令自己三度傷心   我應該唔會再掂大菜糕呢家嘢㗎喇 ~

~~~~

今朝勁呀   6 點 10 分起身   沖完涼之後覺得好凍呀   可能係未瞓醒啦 ~

同媽咪 朱朱食早餐   今次飲埋奶茶都有啲眼瞓添 ~

番到菇場又忙到爆    好在老細唔喺度   可以放慢啲嚟做咋 ~

晏晝同里奧大人食車仔麵    因為又平又好味  $18/5 餸 + 豆漿   邊度搵呀 ~

臘潤腸蒸雞翼 + 蠔油唐生菜 + 隔夜湯 ( NOV-2008 )

天氣凍凍哋   真係行步路都舒服啲呀 ~

因為之前已經醃好咗雞翼   所以只係買 1 份唐生菜 ($6) 同 1 份木瓜仔 ($10) 就可以番屋企喇 ~

唔好講笑  天氣凍凍哋  做嘢都舒服過人   尋晚拖地都無出汗   個地又快乾   勁正呀 ~

其實我都幾鍾意乾燥嘅天氣   因為啲衫好快乾   但唯一唔好處就係啲皮膚超乾   要狂搽 Cream   仲要做埋 Mask   比較多嘢搞呢 ~

是日懶餐 - 臘潤腸蒸雞翼 + 蠔油唐生菜 + 隔夜湯

臘潤腸蒸雞翼 - 用雞粉醃雞翼   再加埋臘腸潤腸  雖然好油膩   但真係好方便又好好味呢   一次半次無所謂啦 ~

蠔油唐生菜 - 唔想駛多隻鑊   所以灼唐生菜 ~

隔夜湯 - 最鍾意飲隔夜湯   晚餐有啖湯水真係好好呢 ~

買咗好多蘋果   所以食完飯隔陣就要食喇   試下晚晚食生果   睇下係咪真係無咁易病先 ~

凍凍哋真係好易眼瞓   所以 10 點半已經瞓着咗喇 ~

~~~~

今朝凍咗好多   真係好想瞓多陣呀 ~

好早番到公司附近   所以可以慢慢嘆個煙肉蛋漢堡 + 奶茶 ($15)  其實真係好想戒奶茶   但真係唔飲唔掂   但我只會比自己飲 1/3   極其量最多半杯   咁點都好過飲哂嘛 ~

番到菇場好忙   但老細唔喺公司好 Free   呢個環境真係好唔想做嘢住呀 ~

 
呢個世界真係好細   原來里奧大人嘅新同事係以前公司同事   所以晏晝同埋佢一齊食晏喇   去嚐越   我食春卷撈濛 + 粉包 2 件仔   里奧大人食海鮮蠔仔泡飯 + 炒雜菜 1 碟仔   啲嘢食麻麻哋啫   不過請人食就要環境好啲咁囉 ~

菜心 + 雪梨蘋果花膠豬骨湯 + 綠茶椰果凍 ( NOV-2008 )

唔想成日喺屋企附近食嘢   所以出咗去大埔墟熟食中心食嘢   食咗馳名魚蛋粉 + 海南雞飯 ~

食完就去醫院探奶奶   出到去時間尚早   所以去食唯珍食北京餡餅 + 煎餃子   再加多支椰汁   十分十分飽呀 ~

探咗奶奶一陣就走喇   因為醫院太多菌   里奧大人又啱啱好番   都係唔好逗留咁耐喇 ~

同里奧大人食得太飽   本來我諗住煮雞翼   但最後都唔煮   因為實在食唔落呢 ~

是日懶餐 - 菜心 + 雪梨蘋果花膠豬骨湯

菜心 - 唔食飯都要食條菜呀   感覺上有啲餸落肚嘛 ~

雪梨蘋果花膠豬骨湯 - 6 個雪梨 + 2 個蘋果 + 8 片花膠 + 豬骨 ($25) + 3 粒蜜棗   煲兩個半鐘頭就搞掂   雖然又刨又切都幾煩   但又真係好清潤好甜呢   我好怕用削皮器削皮   因為之前整到我流血   今次又唔小心削到忽指甲出嚟   嚇到我即刻用刀批皮   時間耐啲   但我覺得安全好多呢 ~

整哂所有嘢就睇獎門人   都幾好笑   可能對佢無期望啦 ~

一路睇一路食自己整嘅綠茶椰果凍   好好味呀 ~

依家經濟唔好   係時候要清哂雪櫃廚櫃所有嘢   唔好未用完就買買買   所以呢排都會多咗啲自家制品呢 ~

講過要早睡早起   所以 10 點半就瞓覺 lu ~

~~~~

今朝天氣好凍咁呀   不過就好舒服囉   因為我太多肥肉   所以實在太唔鍾意夏天喇 ~

好耐無食   所以今朝又食番芝腿菠蘿包 + 凍奶茶 ($17)   唔知係咪天氣清爽關係   今朝食早餐都食得開心過人呀 ~

番到菇場勁多嘢做   不過今日心情靚   所以幾多嘢做都好無所謂呀 ~

晏晝同里奧大人食車仔麵   食完慢慢行番公司   當做運動好舒服呢 ~

薑蔥鯇魚 + 菜心 + 竹庶茅根馬蹄水 ( NOV-2008 )

食完晏番屋企抖陣就番教會   因為覺得咁樣啲時間好駛好多   星期日可以瞓晏啲嘛 ~

是日懶餐 - 薑蔥鯇魚 + 菜心 + 竹庶茅根馬蹄水

薑蔥鯇魚 - 我煮親魚都要大量薑蔥   因為我好怕腥   今次唔想淨係落豉油咁鹹   所以學人整豉油   味道都 OK 咁啦   唔知點解   我次次整完都唔想食   整完魚個人好唔舒服咁㗎噃 ~

菜心 - 白灼最好   因為唔駛落油   又極度方便喎 ~

竹庶茅根馬蹄水 - 4 扎竹庶茅根 + 3 條細甘筍 + 10 粒馬蹄 + $ 2 芫茜 + $ 3 糖冬瓜   煲兩個鐘    超甜超清潤呀   飲到里奧大人斟完再斟呢 ~

星期六真係要比自己抖下   所以整完哂所有嘢就同里奧大人睇 DVD "霧地異煞"   雖然覺得唔 Make Sence   但係唔想睇得一半唔睇   里奧大人就睇到發火   係咁話唔 Make Sence   做戲啫   唔係點做到個幾鐘喎 ~

~~~~ 

今朝天氣凍咗   又可以同里奧大人去大家樂食早餐   真係好開心呀 ~

食完早餐又去街市買生果   番到屋企就大清潔廚房   雖然好攰   但見到個廚房乾乾淨淨就真係好舒服   真係煮嘢都煮得開心啲呢 ~