焗叉燒 + 菜心 + 紅豆黑糯米糖水 ( 19-sep-2010 )

( 19-sep-2010 sun )
呢排里奧大人好攰   所以今朝瞓晏咗無番教會呀   食完早餐就去舖頭拎衫   之後番屋企   今日好焗呀   一 d 風都無   番到屋企又要再沖多次涼先再出街呀 ~  

好感恩   里奧大人可以陪我睇中醫   因為之前 check 咗星期日唔開架   但今個月就會開星期日   所以就去睇喇 ~

都係調理身體   雖則我肥斯大隻   但身體又虛又貧血   今次我仲針灸   初初好驚架   但其實又唔係好痛   最緊要係對身體好   我咩都會試囉 ~ 
今次係藥粉   咁就最好不過啦   最怕煲藥   又要睇火   又會煲到成間屋一陣味   好煩呢 ~


咁我等藥期間   里奧大人話出去行   佢好小會咁架   多數陪我呢   原來佢係去商場附近   睇下有無桂花茶   其實佢對我又真係幾好幾細心嘅   如果唔依依哦哦嘅時候 ~

4 點終於搞掂哂   一早諗定食米線   所以又去星林居喇   食完再去旺角 PCCW 拎嘢   之後就番屋企喇 ~

( 豬軟骨小鍋米線 )( 豬腩肉豬潤小鍋米線 )


雖然出咗成日街   但我都想煮飯   因為唔想雪柜擺咁多嘢呀 ~ 
是日懶餐 - 焗叉燒 + 菜心 + 紅豆黑糯米糖水
焗叉燒 - 今次整得好好味呀   好 juicy 呢   仲以為媽咪係特登讚我添   估唔到又真係好味喎    里奧大人都話好似出面食果 d   因為我之前焗到好鞋嘛 ~ 
菜心 - 百佳買架   又唔錯   里奧大人問百佳買同街市買係咪差唔多   我話一 dd 啦   佢話街市平會唔會有好多係要掉   咁我話有時都會   但我話如果買得小就肯定去超市   因為唔想行咁遠囉 ~  
紅豆黑糯米糖水 - 媽咪特登煲架   好多料   食一碗已經飽哂喇 ~