洋蔥豬扒 + 蕃茄薯仔魚湯 + 雪梨蘋果川貝茶 ( 6-nov-2010 )

( 6-nov-2010 sat )
每月一 OFF   真係令人好振奮呢   今朝 10 點有電話響   原來係晴晴打黎話一齊食早餐   佢同媽咪睇完醫生就話約我地食早餐喎   又幾乖噃   之後上黎屋企坐   傾下計 ~

傾開依家 d 年青人唔鍾意 d 父母打黎問喺邊   幾時番咁   覺得好老土   但我又唔覺架喎   可能我由細到大都有交帶    同埋出黎做嘢之後   媽咪都會早午晚打電話比我   佢唔打比我呢    我到時到侯就會心掛掛   就會打比佢   就算依家結咗婚都係咁   我有時 OFF 或者假期遲咗 d 打比媽咪   佢會以為我唔舒服   點解瞓咁晏架 ~   
時代唔同   真係諗嘅嘢都唔同   有父母關心都不知幾好啦   唔珍惜之餘仲覺得煩厭   咁樣真係唔得囉 ~
諗住去買餸   點知媽咪話 12 點幾街市好多都休息   無乜嘢買   咁我就打道回府啦   落雨濕濕都唔想周圍行呀   喺屋企整下嘢好過 ~ 
做完家務都差唔多 2 點半   係時候食 tea 喇   又係大快活   唔知幾時會食厭呢 ~

食完 tea 就自己去買餸 lu    見里奧大人咳 所以買埋雪梨同蘋果   番到屋企即煲雪梨蘋果川貝茶   n 年無煲    覺得好鬼滋潤咁呀


時間過得真係快   郁兩郁就到煮飯時間喇 ~ 
是日懶餐 - 洋蔥豬扒 + 蕃茄薯仔魚湯
洋蔥豬扒 -  其實係茄汁豬扒   不過今次落重咗豉油   所以比較鹹   唉 ~ 
蕃茄薯仔魚湯 - 今次買 $10/5 條細嘅大眼雞   因為我唔捨得買 $28/2 條大嘅大眼雞呀   好在味道都一樣咁清甜啫 ~