松子肉丁 + 香草粟米 ( FEB-2008 )

人減肥我減肥   咁食法唔肥已經偷笑   我都唔敢奢望會減到磅呀   仲有喎   一睇 Blog 仲覺得自己未必減到添喎   因為啲 Blog 友會話鍾唔鍾意食野先   鍾意就啱喇    有啲又話有咩好煮意   等我話你知咁喎   又有啲話係 Food-tour  + 美食 +食譜咁喎   仲有仲有   我又幾鍾意小動物又鍾意紅色   有啲用狗仔貓仔狗仔做 Banner   又吸引到我睇喎   咁唔通唔睇下人哋寫咩嘢咩   就係咁   攪亂咗我嘅減肥大計喇 ~

由於未想減肥前已經諗好咗整通少嘅松子肉丁   所以豬肉一早已經醃定   只係買洋蔥 + 紅蔥頭 + 青椒 + 粟米就算喇   依家唔知做咩鬼呢   啲粟米好貴呀   $10/2 條咋   仲要唔係成日有得買添   之前 $2 條咋   不過唔想食菜   所以貴啲都要買囉 ~

是日快餐 - 松子肉丁 + 香草粟米

松子肉丁 - 見通少整得好好食咁   所以之前已經買咗包松子   咁啱屋企又有海鮮醬   唔駛特登去買   咁咪試下整囉   講真   呢個餸都幾方便   只係切洋蔥 紅蔥頭 青椒 蒜蓉咁啫   因為我懶   所以用免治豬肉代替梅頭   我覺得炒松子嗰陣時真係要好小心   因為中火好快燶   好快變咗啡色咁   嚇到即刻轉細火炒 2 炒就上碟備用   不過今次又係做錯步驟   就係將所有材料一齊炒 (包括松子)   今次好好彩   當我整醬汁時記得通少啲份量係 4 個人嘅   所以即刻調校番啲份量   真係要比五個叻比自己呀 ~

粟米 - 呢一生人最憎係切粟米   其一係要用菜刀   其二係一刀劈落去   彈到周圍都係啲汁   但今次唔劈唔得   因為條粟米好肥大   跟本無可能用手拗為兩節   唯有劈開去   諗住逐粒拻啦   又好鬼難拻喎   一拻就爆汁   把幾火咪用刀劈囉   又真係好鬼方便嘅   但里奧大人食嘅時候問點解有渣嘅 ?!   平時無喎 ?!   我都覺得有渣極度影響口感   唔係係咪切得入得滯所以有渣呢 ?!

洗洗下碗先記得要 Join 做 GYM 會員   但為時已晚喇   因為已經 Closed ~

洗完碗就整鹹金桔   之後沖涼   沖完涼真係舒服到不得了   所以好 Relax 咁食咗杯 Delight Yogurt   再加廿幾粒藍莓   因為啲藍莓超級酸   真係擺唔落口   但買咗個幾星期   唔食會變壞嘛   所以加落 Yogurt 度一齊食   估唔到又超好味喎   第時都咁食先 ~

唔知做咩   呢排好攰   所以 11 點就瞓覺喇 ~

~~~~

今朝唔知點解超級肚餓喎   所以食咗芝蛋治烘底 + 熱啡 ($15)   超級滿足呢 ~

.瞓矮頸呀   又唔敢叫里奧大人幫手按下條頸   因為一按條頸我會即刻想嘔   所以我做按摩都係叫人走頸   唔係就會好辛苦 ~

晏晝帶飯呀   呢排都無咩點帶飯   差啲唔記得拎個飯盒去叮添   好在我番工嘅時候   個腦唔係諗上網就係諗食啫   如果唔係真係驚唔記得叮㗎 ~

越想減肥就越想食嘢   咁攪法唔得㗎噃   我公司個櫃桶仲有 1 條三角朱古力同鳥結糖   屋企又有樂家杏仁糖 M&M 魚皮花生 豬肉乾 蝦條 可樂糖咁   要食哂先可以減肥喎   因為減肥唔可以有咁多引誘   唯有事前做啲功夫   快啲食哂去真係好煩呀 ~

生日中菜 ( FEB-2008 )

尋日媽咪出院   所以我都安樂哂   個人都放鬆咗好多   在此多謝 Blog 友對媽咪嘅問候同祝福獻上感謝 ~

尋晚放工等車期間   聽到隔離巴士站有男人鬧交   排第一個男人話有人打尖   打尖嗰個人係地盤佬   企咗喺鐵欄出面   鬧鬧下另一個地盤佬話嗰個無打尖   話因為上唔到車   所以排番第一喎   唔係嘛   上唔到車咪排番原本自己企緊嘅位囉   點會排第一架   咁個個咁做咪即係個個都要排第一 ?!   唔駛排隊啦 ?!   不過件事最後係點就唔知喇   因為我啱啱有車   不過點睇都係個地盤佬唔啱囉 ~

頻樸咗兩晚   又夜瞓   有啲攰   橫掂生開日   咪出去食飯再慶祝咁囉   於是就同里奧大人去屋企附近嘅迎喜酒家食晚飯喇 ~

食咗乳豬 (例牌) + 西檸煎雞甫 + 海味什菜煲   估唔到又食得哂喎   可能我無食到飯   所以食多咗餸   食食下覺得啲乳豬好鹹   我估係因為唔係連埋飯一齊食...不過唔食飯都好飽   樣嘢好唔抵   就係渣打信用卡有 88 折   我係有   但因為之前寄咗張新   里奧大人又確認咗   但佢又唔比張卡我   就咁話我知就算   無啦啦嗡句嘢   邊鬼個會記得吖   所以我張舊係失效嘅   88 折呀   慳番廿幾蚊都好吖   真係心痛 c 我呀 ~

等埋單期間   追番里奧大人去和民食嘢啲錢   睇番張單原來係 $220.8   但我簽咗 $220 呀   因為當時又暗   自己又飲咗兩啖酒睇唔清楚   以為係 $220   依家攪到我好似呃人咁 ~

番到屋企都搵唔到張新嘅渣打信用卡   抵啦   成日周圍放嘢   仲要屈我擺埋咗   真係累黑人憎到不得了   我放我實知嘅   因為同一時間寄嚟另一張信用卡我放咗櫃桶入面   無理由放啲唔放啲家嘛   我唔會幫手搵㗎   等佢自己攪掂啦   呢個係一個好好嘅教訓 ~

又要飲中藥喇   因為之前感冒停咗   依家飲番覺得超級苦呀 ~

~~~~

今朝晨早要抽血   好在唔係好多人   好快抽完   所以可以食咗較為豐富嘅早餐   就係沙爹牛肉麵 + 熱央 ($16) ~

番到公司有嘢做   但我唔興一坐埋位就做嘢   我會睇下 Blog 再 MSN 一陣   要 Relax 下先可以半投入工作   如果唔係會好無精神 ~

晏晝出去買嘢食   買咗魚肉燒賣 + 炒米粉 ($11)   經過見到煎釀三寶又好想食   所以買咗無咁肥嘅豆腐同青椒 ($5)   飽到想嘔呀 ~

生日快餐 @ 和民居食屋 ( FEB-2008 )

尋日雖然係自己生日   但媽咪入咗院   所以都無咩 Mood   以前生日就好開心   年紀越大就越過得平淡   最緊要係屋企人同里奧大人陪我食餐飯仔就好滿足㗎喇 ~

尋日里奧大人喺我公司附近見客   咁我好開心啦   因為見完可以一齊坐車探媽咪   點知里奧大人唔記得咗約咗我一齊探媽咪   約咗朋友嘆咖啡...攪到我無癮之餘仲有少少慶   但朋友特登約出嚟就當然唔可以推啦   所以後尾都係要應約囉 ~

真係估唔到放工突然好鬼大風好鬼涷   因為晏晝啲天氣似大回南又熱   幾個鐘就變化咁大   真係估唔到   好在家姐放假   可以早啲陪媽咪   所以我可以唔駛咁趕   去到醫院見到媽咪終於入病房   環境點都好過走廊啦   又有電視睇   無咁悶嘛 ~

媽咪好攰要抖下   所以我同家姐就係睇報紙同雜誌囉   媽味抖咗陣就一齊傾下偈咁啦   之後里奧大人又口嚟埋   傾下偈咁   7 點半就走喇   因為 Book 咗和民食生日飯 ~

幾日前打比家姐   本來唔得閒同我食㗎   但尋日又話可以   所以我都好開心   因為始終 3 個人可以食多啲嘛 ~

一埋位   里奧大人就同家姐一齊舉杯同我講生日快樂   身體健康   啲感覺好得意呀   但估唔到里奧大人咁遲先講囉   一早見到我又唔講喎   古靈精怪   已經無禮物㗎啦   生日快樂都唔講   真係有啲唔開心㗎   我仲已經諗埋如果佢唔講我會點對佢添呀 ~

我哋一齊合力食咗和風 pizza  + 串燒盛合 + 三文魚刺身 + 帶子刺身 + 和民沙律 + 辣辣泡菜炒飯 + 一口豆腐 + 什菌野菜炒 +  一杯 asaki 啤酒...埋單 $220 咋   因為有 $100 生日 Cash Coupon   同埋有 Free Drink for Bday   食就麻麻哋   但好抵囉   今次要自己請呀...因為要和民卡簽賬呀   里奧大人之前話會比番 Cash 我   但尋晚家姐大聲多謝我時   佢又博大霧講幾次多謝   衰衰咁  我實會攞番錢㗎   唔好諗住以為我笑笑口唔出聲就唔駛比番我呀...

和風 Pizza - 必叫嘅   個皮又薄又脆   好好食
帶子刺身 - OK 咁啦   但超級細塊   同相片不符   相片大成陪㗎   搵笨

三文魚刺身 - 我無食到   但家姐話唔算新鮮   又係同相片不符   又係搵笨

串燒盛合 - 鰻魚 + 帶子 + 雞腎 + 雞肉 + X肉 + 雞翼  全部唔熱嘅   激死

和民沙律 - 必食嘅   因為里奧大人好鍾意食

辣辣泡菜炒飯 - 好食   因為熱辣辣   但份量好少同埋啲泡菜少到睇唔到

一口豆腐 - 難食   又係唔熱嘅   同埋唔係山水豆腐   硬實實   後尾原來我記錯咗我係鍾意食元祿嗰啲一口豆腐

什菌野菜炒 - 好味   有菇有菜   最緊要係熱辣辣

番到屋企成 10 點幾   真係好攰   係咁易掃下地就沖涼   坐多陣就瞓喇 ~

~~~~

今朝都係好攰   所以令到自己精神啲   就去美心快餐食糯米雞 + 熱啡 ($20)   超飽   好在食咗少少肉同無食隻雞膇啫   如果唔係應該係會食滯唔係食飽 ～

番到公司都有啲嘢做下都好...唔駛發霉 ~

太開心喇   因為媽咪出院呀   我又可以鬆一啖氣   擔心一個人真係好辛苦   仲會 Feel 到自己個心好實添呀 ~

晏晝去銀行攪啲嘢再去百佳行下   之後就去 7-11 買咗碗仔翅 + 司華力腸 + 蒜撈麵 ($21.5)   太耐無食   所以覺得勁好味 ~

頭先搭 Lift 見到男同事   咁梗係同人笑下打招呼咁㗎啦   但佢居然話我笑得好淫邪   OMG   微微咀係咁易笑咋噃   都叫淫邪 ?!   我好驚㗎   因為驚佢以為我比埋啲咩嘢 Signal 佢就唔好啦   不過真係唔明   我咁樣笑   個個都話我係笑淫淫咁   笑又話淫   唔笑又話我惡   點好呀 ~

施捨的麵 ( FEB-2008 )

尋日媽咪血壓高入咗醫院要留醫   所以真係無咩心機 ~

放工即刻搭車探媽咪喇   感謝神   搭車搭 Lift 買嘢都好順利   因為搭車有車   搭 Lift 有 Lift   買嘢又唔駛排隊 ~

天氣轉呀   所以勁多人入院   媽咪要瞓走廊添呀   最慘係對住男廁   好尷尬家嘛   同埋又覺得好似吸咗好多 "臭崩崩" 嘢咁 ~

我去度第一件事唔係安慰媽咪   因為我好嬲   非話不可  第一就係做咩唔按平安鐘   坐白車有儀器   自己坐的士有咩事都無人理   有工人陪都無用啦   第二係媽咪成日夜晚睇大戲   睇到 12 點先番到屋企   睇完又攰又無精神   仲要係有時連續睇幾晚添   睇唔係問題   睇到自己又攰又辛苦有咩謂呢   平時自己又係 9 點幾要瞓   4 點幾會自動起身嘅人   攪到瞓得三四個鐘   唔駛做嘢啫   但都好辛苦家嘛   第三就係婆婆成日要媽咪陪   因為婆婆話無人陪喎   佢自己有工人㗎噃   只不過唔鍾意個工人啫   所以佢又覺得媽咪唔駛做嘢好得閒   成日叫佢飲茶    飲完又要去佢屋企坐幾粒鐘先可以走   媽咪對腳痛   要轉兩程車先去到婆婆屋企   去到只不過係瞓覺   因為媽咪血液泵去心臟比較慢   好容易攰   之後婆婆仲話媽咪淨係成日瞓   我真係好想鬧婆婆   但媽咪話唔好   咁我忍   依家婆婆又好啲噃   媽咪一上到去就話叫媽咪去瞓啦   天呀   要瞓駛咩山長水遠去妳度瞓呀 ?!   但媽咪又唔敢同婆婆咁講   因為自從公公唔喺度   婆婆就好需要人陪   直至到瞓覺為止   大佬   個工人唔係人咩   媽咪舅父阿姨年紀唔係細   個個又有自己家庭   有自己舖頭   婆婆就覺得自己大哂咁   下下要人陪   係咪要個個唔做嘢全天侯陪住先得呀 ?!   大家要互相體諒   關心係出自自己內心   要陪妳都係出自自己內心   而妳咁強迫要人陪   大家都唔開心   坐喺度妳眼望我眼有咩意思呢 ?!   咁大個人   唔需要我教妳咩嘢叫互相體諒嘛 ?!  真係一諗起就眼火爆呀 ~

話完媽咪   轉頭見到個工人喺廁所對住塊鏡紮頭髮   嚇到我即刻叫番佢出嚟   話男廁嚟㗎   佢都嚇到即刻跑出嚟   笑死我 ~

之後家姐又嚟埋   坐到七點半就走喇   因為家姐屋企又有人睇樓   但又想陪我食飯   因為里奧大人番學   覺得我自己食好慘咁喎   所以係都要早啲走一齊食嘢咁囉 ~

同家姐去食粉   食雙丸米+牛雜米+炸魚皮+菜心+細支忌廉   埋單 $76   家姐咁好   當然我請啦   家姐咁好陪我喎   食完送埋家姐搭車就走喇 ~

番到屋企就拖地   之後沖涼   時間啱啱好   攪掂所有嘢   里奧大人就番到屋企喇 ~

~~~

今日係我生日   所以就去麥記食早餐   食魚柳包餐 + 熱啡 ($13.8)   因為有 $5 Cash Coupon 呀   所以覺得好抵   仲要係飽到上喉嚨頂嗰隻添噃 ~

番到公司咩 Mood 都無   又無嘢做   悶死 ~

晏晝食墨魚丸河粉 ($15)   超漏呀   之後去買玻璃樽   因為要整鹹金桔   家姐話啲金桔唔要   我咪學整下鹹金桔囉   家姐又鍾意飲   話喉嚨唔舒服飲咗真係舒服到唔知點形容咁喎   不過桔仔要醃好耐   我婆婆嗰樽醃咗廿幾年呀   如果我整得好好同唔發霉嘅話   我希望十年後可以醒比家姐啦 ~

仲有時間周圍行   所以去 Market Place 買咗包 350gm 嘅五穀米 ($11.3) 同埋咖哩粉 ($9)   試下啲米好唔好食先   好食就會買大包啲   因為五穀米都好健康   買完都係度笑   番工買米   前世未辛苦果咩 ~

唔中唔西嘅晚餐 ( FEB-2008 )

由於屋企太大   所以好怕喺里奧大人熟睡嘅時候執屋   因為驚迴音太大嘈醒就唔好啦 ~

里奧大人瞓醒咗就一齊落街買日用品   原來藥房買日用品比喺 Watson's 同 Mannings 差幾蚊㗎   有啲仲平成十蚊咁多呀...所以我依家都轉軚去藥房買喇 ~

之後去 A1 買個細法包   因為勁想整蒜蓉包   見到個咩咩酵母芝麻芝士火腿包   個樣好似好好味咁   所以買咗個嚟試下   不過我覺得 $11 好貴囉   番到屋企同里奧大人慢慢嘆   又真係好好味噃   又香芝麻味   個包又煙煙韌韌   下次我都會再買黎食呀 ~

真係覺得星期日同埋假期嘅時間係過得特別快   同里奧大人一齊執櫃桶   一執就咗個幾鐘   咁就 6 點幾   又即係要 Reday 煮飯喇~

是日晚餐 : 煎雞翼 + 茄汁炒意粉 + 菜心 + 蒜蓉包 + 蕃茄薯仔魚湯

煎雞翼 - 用韓式醃肉醬醃   又入味又唔駛煩   一樽攪掂哂   不過煎嗰陣時就會好快燶囉   唔知點解 ~

茄汁炒意粉 - 今次啲意粉好有咬口   在此多謝通少嘅教導   由於覺得好多嘢要整   所以求其用茄汁炒勻就算   但點知突然間記起里奧大人要多汁   嚇到頭暈   所以我即刻用乾蔥粒同茄汁喼汁做個汁喇 ~

菜心 - 灼熟就算喇   蠔油都唔蘸呀   但又好清甜喎 ~

蒜蓉包 - 刴蒜頭刴到手瓜起展   不過我真係勁想食蒜蓉包   加埋啲香草同芝士粉一齊焗   真係超級正呀   所以幾辛苦都係值得嘅 ~

蕃茄薯仔魚湯 - 今次又唔知做咩   啲湯滾到好鬼正呀 ~

呢餐飯總共有 5 樣嘢   本來想煲飯   但見有蒜蓉包   又包又飯好飽啫   但我覺得自己好奇怪   因為估唔到自己無啦啦買菜心   西餐無理由食菜心家嘛   做咩唔買粟米呢   就咁炒極度方便   煮完擺食物上枱都覺得自己黐咗線整 5 樣嘢   係睇見都飽 ~

無啦啦又打噴嚏呀   所以唔理咁多   即刻食 2 粒感冒 Panadol   病咗兩個幾星期喇   都仲係斷斷續續咁流鼻涕同打噴嚏   想點呀 ~

無嘢做又係食...不過就食生果咁啦...今次買嘅 blueberry 酸到爆呀...里奧大人又幾好   見我仲未好番   就即刻切個木瓜比我食   強身健體喎...講開木瓜   就諗番起里奧大人又幾好   幾緊張我咁   事緣年初三食完早餐我就想番屋企   但里奧大人係都要去百佳買嘢   我又攰   無問買咩   去到百佳   里奧大人第一時間去睇生果   我覺得好奇怪   做咩唔去街市去百佳   原來係買木瓜比我食   因為街市之前無木瓜買   所以點都要嚟百佳   嗰刻真係超感動   因為睇得出佢真係好緊張我咁   所以依家一諗起木瓜就諗起呢件事喇 ~

~~~~

今朝里奧大人又要見客   所以又得我一個人搭車   今朝食吞拿魚治烘底 + 熱啡 ($16)   半年內由 $13 加到 $16 好犀利啫 ~

番到公司無嘢做   呆呆咁   好在寫 Blog 同 MSN 過日晨啫 ~

晏晝帶飯   食完就睇下報紙咁   望電腦望到驚呀 ~

公司春茗 ( FEB-2008 )

尋晚公司春茗   所以就約埋同事一齊到   有個伴好啲嘛   費事咁早到唔知做咩嘢好   我又無約同事打牌   所以就睇人打牌喇   又同同事傾下偈咁   啲時間都好容易過 ~

傾傾下又傾到自己把幾火   因為我同 3B 出街食飯   次次都係我比錢   仲要係佢次次開口要我比先   但佢自己都有帶銀包㗎噃   最憎人係奉指咁   有次食粥每人 $13   佢居然比個 $5 +  $1 (7 個) + 5 毫子 (2 個)   黐鬼線㗎   比咁多散紙   仲唔問人哋介唔介意添喎   明知 Coins 咁重   妳仲要咁比人   好自私啫 ~

又有一次又係食粥   佢又係食咗十三蚊   條友又比 1 個 $5 + $2 (4 個)   我覺得佢真係自私到爆囉   不過我最慶係有次食粉   我哋食咗 $38   比錢時我問佢有無錢   因我得一張廿蚊 + 零碎 Coins   咪問佢有無一張廿蚊   條友不知所謂話無喎   咁我咪死刮難刮啲 Coins   好在有 $18   刮完原來剩番 5 毫子咋   我咪好大聲話佢無錢就出聲啦   我未必有錢比埋妳嗰份家嘛   "整佢個制" 吖   所以依家我都好少約佢食飯   我真係覺得佢好不知所謂囉 ~

公司出 Email 話 7 點開席   點知成 8 點先開席   我仲慘到坐喺風位   吹到個頭勁辛苦   好在我條裙有帽   所以一路食飯一路帶住頂帽   勁古怪囉   .玩埋遊戲同抽埋獎   食完成 12 點先番到屋企   走嘅時候又大風又落毛毛雨   涷到死   最慘係里奧大人喺屋企等我嘛   聽日又要番學實無精神啦 ~

~~~~

今朝 10 點半起身喇   因為要番祟拜   同里奧大人食燒賣 + 腸粉 + 熱豆漿   飽到震   之後打的番教會   聽完道已經 12 點半   要急急腳走   因為里奧大人要番學呀   求其食咗鹹魚肉餅盅頭飯 + 干蒸燒賣 + 山竹牛肉 + 熱央 ($40)   里奧大人一路食一路話好眼瞓   想唔番學   我真係開心到爆   我話因為星期六我食春茗   星期日你又要番學   無咩點見呀   但因為申請咗持續進修基金   出席率一定要有 90 %   如果唔係 Claim 唔到錢   咁又好在里奧大人今次唔番都無問題   終於都無番學陪我喇   其實都唔係叫陪我   係屋企休息做功課咁啫 ~

經過 Jusco 做健康食品節   買咗包麥皮   有助降低膽固醇喎   又唔係貴   對身體又好   係咪值得先 ~

 

難得里奧大人喺度   所以去埋街市買餸   買咗蕃茄 + 薯仔 ($10) + 菜心 ($10) + 大眼雞魚 ($17)   再買埋 6 個木瓜 ($24) + 4 個蘋果 ($10)...咁就番屋企喇 ~

里奧大人番到屋企即刻瞓覺呀   我就睇報紙同食下家姐喺陳意齋買嗰啲零食咁囉  ~

媽咪生日前夕 @ 板長壽司 ( FEB-2008 )

尋日無嘢做   所以成日都係睇 Blog   睇到眼痛同眼濛呀 ~

尋日係媽咪生日前夕   因為媽咪生日正日   我要食公司春茗   咁提早一日慶祝   媽咪呢排唔知做咩   好想食壽司   因為食中菜食到厭喎   所以媽咪就話去板長食壽司喇 ~

好難得先等到放工   咁啱里奧大人又見完客   所以就約埋一齊去攞位喇   行行下里奧大人話好肚餓   因為晏晝啲飯好難食   又話好想食牛脷蘇   我話唔好啦   今晚好快食飯㗎喇   但佢用好哀怨嘅眼神同我講話好餓喎   咁我唯有話好啦   點知佢仲要買多杯豆漿   激到我死   咁飽一陣實食唔落嘢   所以佢好精   同我兩份食   但我只係食咗 1/4   飲咗兩啖豆漿啫   唔好再預我 ~

同里奧大人行陣商場買啲小禮物比媽咪先再去板長壽司   去到 6 點 15 分   居然要排隊喎   到叫我張飛時   個 Asst. Supervisor 話人未齊唔入得住 (我要係四人枱)   我話之前打電話問 4 個人   如果兩個人係咪可以入座   你哋話得㗎噃   你依家話唔得 ?!   佢話依家係繁忙時間喎   我咪慶囉   話你哋地無講話繁忙時間唔得喎   而個牌都話半數可以入座 (無寫話只限於非繁忙時間)   好在講講下有把女人聲話到咗   原來係家姐嚟嘅   無幾耐媽咪又到埋   可以一齊入去囉   好在媽咪到嘅時候有位咋   如果唔係個 Asst. Supervisor 就死   我實丙到佢上天花板呀 ~

今次期望唔大   因為上次食咩無咩   所以叫家姐有心理準備   但估唔到今次又樣樣齊喎   快手快腳叫咗芥辣墨魚軍艦 + 三文魚子軍艦 + 油甘魚軍艦 + 蟹肉蟹子沙律 + 日式海撒沙律 + 三文魚刺身 (六件) + 吉列蝦卷 + 加洲卷 + 鰻魚 (杯飯) + 親子 (杯飯) + 三文魚壽司 + 醋鯖魚壽司 + 蟹捧壽司 + 水牛乳雪糕   家姐係都要請   埋單 $298 咋   又飽   但家姐屋企有人嚟睇樓   所以 7 點 10 分就要走喇   我同媽咪 里奧大人就繼續食埋食剩啲嘢   真係好飽   牛脷蘇又漏   里奧大人仲慘   飲咗杯勁甜豆漿   飲到想嘔喎   抵啦 ~

媽咪嘅生日禮物 - 蛋糕擺設

~~~~

星期六要自己孤零零搭車   孤零零食早餐   星期六我會對自己好啲   因為有多啲 時間食早餐   去咗美心食吉列魚柳拚腸仔配多士 + 熱檸茶 ($21)   魚柳熱辣辣   正到爆呀 ~

番到公司一開機   MSN 又唔得   幾驚呀   難得星期六又難得老細 Off   好在後尾可以 M 咋   唔係真係唔抵喇 ~

今日係媽咪正日生日   而我今晚係公司春茗   所以陪媽咪食晏   去媽咪屋企附近飲茶   食咗椒鹽白飯魚 + 灼魷魚柏葉菜心 + 羅漢齋粉包 + 鴨腳扎 + 鹹肉糉   食到勁飽   埋單都係 $90   媽咪生日   當然係我啦 ~

飲完茶就上媽咪屋企 Hea 下   同朱朱玩下   之後就約同事去食春茗喇 ~

叉燒炒米粉 + 蕃茄薯仔大眼雞魚湯 ( FEB-2008 )

唔讚自己唔得   尋日真係好攰又唔多舒服咁   但又唔想里奧大人成日食街嘢   所以點辛苦都唔比自己籍口唔煮飯   覺得自己好似好偉大咁樣呀 ~

所以尋晚用沉重嘅腳步去街市買嘢...首先買芹蒜 ($3)   之後就諗滾唔滾湯好   因為里奧大人好耐無湯水   但自己又要煲中藥好煩   最慘係用哂兩邊爐   中藥果邊唔郁得   但煲得湯嚟又要趕頭趕命炒米粉好辛苦   最攪笑係去咗街尾嗰幾檔睇啲蕃茄都好唔靚   個心係度笑   唔通個天都唔想我咁辛苦 ?!   所以我已經放棄滾湯   但番屋企係途經街頭嘅   點知見到啲蕃茄好大好靚   咁點可能唔買喎   買咗兩個蕃茄 +  1 個薯仔 ($10)   買完又要去番街尾買條大眼雞魚 ($14)  好在行番街尾   因為來唔記得買叉燒   買咗一條自己揀完去磅嘅叉燒   我揀最細條嗰啲都要 $20   其實我想買 $10   但唔敢叫佢斬一半   好驚比人鬧買咁少呀   所以先買 $20 咋   我就真係唔係咁鍾意食叉燒   但里奧大人就勁鐘意食   咪比佢食多啲囉 ~

是日晚餐 - 叉燒炒米粉 + 蕃茄薯仔魚湯 

叉燒炒米粉 - 好似好簡單...原來都幾麻煩   米粉要浸   叉燒要切絲   芹蒜要切粒   分開幾十隻碟嚟裝   都唔明點解   我用開水浸廣東米粉   浸成半個鐘都浸唔軟   大佬   要開鑊喇   幾時先得嚟軟呀   把幾火用熱水浸   浸咗 10 分鐘都仲唔軟   唔鬼理就拎去炒   一餅餅死唔分開咁   我左手用鑊鏟   右手用筷子係咁撩散去   炒完對手攰到呢   但食嘅時候都有啲硬   激到我跳舞呀   浸咁耐炒咁耐都仲係硬   想點呀 ~

蕃茄薯仔魚湯 - 我其實好怕滾湯  我係用兩至三碗水嚟滾嘅   所以啲 水會好快滾   要喺等水滾期間要攪掂哂所有材料係好趕   因為一睇見水滾個蓋係度伏下伏下咁   就會好緊張   好似催我要放哂啲材料咁   所以滾湯嘅壓力真係好大   所以依家唔會切蕃茄皮   就咁擦表面就算   薯仔求其切   總之煲完可以食得就算㗎喇 ~

可能太耐無一次過煮嘢又煲中藥   煮完洗埋碗個人有啲虛脫 ~

一飲中藥就諗起之前要食啲藥丸仔   所以就即刻拎哂啲樽仔出嚟   計下自己食咗幾耐藥   一日食 4 次   原來都食咗唔少日子   希望身體快啲調理好啦 ~

~~~~

今朝食雪菜肉絲米粉 + 熱咖啡 ($17)   碗雪菜得幾條肉仔又幾好噃   因為我唔食肉絲嘅   食完啲感覺好唔舒服 ~

晏晝又係帶飯   撞鬼   啲米粉好似鐵線咁   係咪咁呀   食餐飯仔都咁辛苦 ~

洋蔥回鍋雞柳 + 芥蘭 + 紅豆年糕 ( FEB-2008 )

呢排唔知做咩   成日都好似吽吽哣哣咁   又覺得好似生智慧牙咁   啲牙頂住頂住咁   真係連食咩都無心機諗呀 ~

唔知點解   我覺得次次諗住煮雞柳之前就會周身唔舒服咁嘅   唔通係暗示要我唔好食雞 ~

但一早醃好咗   無理由唔食家嘛   所以去街市買咗個細洋蔥 ($2) 同芥蘭 ($10) 就番屋企喇 ~

里奧大人又遲咗放工   我可以抖半個鐘頭先 Ready 煮飯   一開 Cable 就睇到欣宜開記招   感謝幫過肥姐嘅人   睇佢強忍淚水個樣真係好可憐   20 歲人就要面對咁大打擊   有 Daddy 但最親嘅 Daddy 唔會喺妳身邊   仲更加可憐   希望欣宜真係可以堅強咁生活下去啦 ~

是日晚餐 - 洋蔥回鍋雞柳 + 芥蘭 + 紅豆年糕

洋蔥回鍋雞柳 - 雞柳用韓式醃肉醬醃一晚   爆香洋蔥   再加雞柳炒同埋兩湯匙回鍋醬炒到熟為止   呢個真係易到爆 ~

芥蘭 - 之前買 $8/斤   仲好靚好大條   依家又唔靚又細條   激死我喇 ~

同里奧大人食完飯就同行去睇睇做 GYM 嘅環境   都 OK 咁啦   價錢男女有別   拉上補下每人百幾蚊   都抵嘅   話哂係屋企附近嘛   但要比半價 ($40) 會費先可以玩   期限係至到 3 月尾   因為跟財政年度喎  咁如果要再續會就要 $80   又好似好唔抵咁   再諗諗先 ~

番到屋企就煮紅豆年糕   甜甜哋   年糕又煙韌   好味到爆呀 ~

~~~~

今朝食芝蛋治烘底 + 熱檸茶 ($15)   番到公司又等發霉 ~

晏晝帶飯   超飽   食完又係等發霉 ~

今晚應該開始煲番中藥喇   真係攪到無哂心機   因為煲中藥真係好煩 ~

Food Court @ APM ( FEB-2008 )

尋日真係奄悶咗成日   加埋做嘅嘢改完又改   睇見都煩   終於頂唔順沖茶飲   同食啲酸嘅糖   咁又好似好啲啲咁 ~

因為約咗保險朋友 "德文"  6 點半喺 APM 傾 Renew   咁我放 5 點半   里奧大人就放 6 點   所以我就接里奧大人放工一齊去 APM 喇   開心到佢吖   行行下又話估唔到自己有啲肚餓   突然勁想食燒賣   所以就行到老遠買串燒賣   勁好味呀   因為係少食多滋味呢 ~

時間啱啱好   去到就見到 "德文"   一坐低就開始傾閒偈   佢瘦咗 20 磅呀   條腰瘦咗 4 吋   佢係刻意減肥   因為知道自己有高血壓同高膽固醇   佢好有恆心   佢話一三五朝早會早 1 個鐘起身   做完 GYM 先番工   早餐食麥皮   午餐同晚餐食半碗飯 + 烚菜 (唔落油同豉油)   我真係覺得佢好勁   可以持久呀 ~

比佢咁講一講   又比佢話我比之前嘻嘻嘻 (同時用手拉闊塊瞼)   攪到我仲更加開要籌備決心去減肥   你知啦   話減就減咩   我又為食   口不停咁   不過我都係時候減減喇   因為依家又肥   身體又唔好   一個月睇中醫睇幾千蚊   條數好襟計   倒不如我減肥做運動   身體好啲   自然病痛又少啲   最緊要係錢都用少啲嘛 ~

唔好講笑   之前成日心口痛   好難抖氣   真係好怕突然唔係度   又好怕里奧大人突然咁失去咗個難能可得又靚又好嘅老婆   咁樣里奧大人就會好寂寞好唔開心   無好餸食   無湯水飲   好在尋晚知道自己份保險金足夠讓佢同我媽咪 家姐嘅生活   咁我都安樂啲 ~

同德文真係傾咗好耐   反而保險 Renew 只不過傾咗半個鐘到   我哋居然由 6 點半傾到 9 點半   好在之前我食咗串燒賣先可以捱到咁耐   德文之後又約咗人   所以得我同里奧大人食晚飯   食咗海南雞飯套餐 + 馬拉盞通菜 + 印度千層酥餅   終於比我食番個較為似樣嘅海南雞飯   好開心呀 ~

番到屋企睇啲藝人講肥姐嘅嘢  睇到個心好嗡呀 ~

~~~~

今朝唔食火腿通粉 + 熱檸茶 ($17)   唔知點解好想食通粉   但原來番工嘅朝早食通粉係好飽嘅   所以食唔哂呀   嘥哂添 ~

晏晝食魚皮餃米粉   又係唔知點解好想食魚皮餃   不過好好味   但太多米粉   所以又係食唔哂 ~

做完少少嘢又可以抖下喇   都唔知係好定唔好 ~

香煎芋餅 (樣衰版) + 鵝掌翼 ( FEB-2008 )

自從情人節食得飽得滯之外   之後又成日出街食   早餐又去麥記食   我覺得自己好似食滯咗咁 ~

尋日晏晝同 3B 食粥   我食皮蛋豬潤粥 ($20)   我覺得啲粥無咩味   同埋又驚啲豬潤唔熟   所以食哂粥先食豬潤   好漏呀 ~

成 4 點先可以上網做嘢咋   無得上網真係好慘   悶到爆炸 ~

一心諗住整通少嘅芋餅   所以一早起身已經浸定冬菇   放工就即刻去買芋頭 ($10)   驚自己整得唔好食   所以買定兩隻鵝掌翼 ($18) 做後備 ~

是日晚餐 - 香煎芋餅 (樣衰版) + 後備鵝掌翼

香煎芋餅 - 其實本應想唔整住   但通少話易到爆   咪試下囉   所以步驟跟足通少   不過材料就用臘腸   無用花生   首先我用輕鬆嘅心情入廚房 Ready   切粒呀   煲芋頭呀   炒香冬菇臘腸蝦米無難度   但當我做芋泥時   壓到手都軟   忍唔住同里奧大人講話通少話易到爆喎   呃人嘅   點知里奧大人笑笑口話係易到爆   通少係話對於自己嚟講係易到爆喎   人哋煮開嘢食家嘛   原來真係太高估自己能力啊   講番煎芋飯先   我覺得自己做芋泥嘅步驟做得唔好   太大件喇   因為我食芋泥糖水係求其一劈   所以我都係求其一劈大大件就算   雖然大大件   但都有十幾件   我已經頭都暈埋   兩個人點啃呀   到煎嗰陣時一壓又好易散...所以我都係輕輕咁按下就算   但都好易燶喎   我根足指示用中火㗎   通少係煎到金黃色   而我係煎到啡黑色   仲有仲有   整呢個芋餅   我足足用咗一個鐘頭零十分鐘喎   不過雖然樣衰   但里奧大人同我都覺得食落又幾好味喎   真係要多謝通少嘅分享 ~

鵝掌翼 -  好在買咗   因為芋餅好漏   所以一路食一路蘸鵝掌翼嘅白醋   無咁漏 ~

食食下飯同里奧大人傾偈   我問里奧大人   如果想食 Nuts 你會唔會買嚟食㗎 ?!   里奧大人答睇下有無需要買嚟食   如果有益嘅就會買   如果咁咁咁   下冊數十字   我即刻話得喇   唔駛講嘢   顛㗎   問會唔會買嚟食啫   答會定唔會咪得囉   講咁多嘢   傾閒偈啫   唔駛 Professor 上身咁分析咁多嘛 ~

尋晚天氣無咁涷   所以同里奧大人跑步   番到屋企之後 Upload 相   順便睇下通少嘅 Reply   睇到話壓個餅唔好大厚   太大件呀   但一切已經太遲喇 ~

~~~~

今朝食咗芝腿菠蘿包 + 熱央 ($16)   番到公司勁唔舒服   我覺得係飲咗杯熱央作怪   攪到我想嘔想嘔咁   又有嘢做   辛苦死 ~

晏晝又係食芋餅   好好好好好好好好滯呀   嚟緊呢幾年真係唔想再食有關芋頭嘅嘢呀 ~

壽司 @ 味魚 ( FEB-2008 )

尋日唔知點解   瞓極都好攰   瞓到 11 點幾   所以無番到教會 lu ~

之後同里奧大人要立即梳洗喇   因為里奧大人要去水姑屋企搵姐夫傾功課   又約埋我家姐一齊去 水姑屋企睇下個環境 ~

約咗家姐去將中 Food Court 食嘢   諗住多選擇   但原來都係得兩個選擇   因為其他嘅唔啱胃口   食咗海南雞飯 + 串燒沙爹牛肉 + 香茅豬扒金邊粉拚春卷   樣樣都唔好食   特別係個海南雞飯   真係可以用不知所謂嚟形容   啲飯腍林死   豉油就求其比豌豉油   最離譜就係嗰啲辣椒醬   難食到爆呀   串燒啲沙爹醬鹹到咩咁   金邊粉又無味   第一餐就咁難食   唔食又嘥   真係勁慘 ~

之後就上水姑屋企傾下偈   里奧大人就傾功課   話咁快就到 5 點幾   所以就同里奧大人 家姐走喇   見又未到食晚飯時間   就去家姐屋企坐坐   坐咗半個鐘就走 lu   驚食飯時間多人要等位呀 ~

家姐話晚餐有兩個選擇: A 係日本嘢 B 係泰國嘢   我話無所謂   因為呢兩樣嘢我好似食咗無幾耐   里奧大人話唔想食泰國嘢   咁家姐又想試新開張食日本嘢   咁即係日本嘢啦   咁即係又係食壽司啦   我真係有啲驚呀   埋單 $3xx   今餐係里奧大人請   因為里奧大人猜輸咗 ~

食咗刺身 (三文魚 + 油甘魚 + 甜蝦 + 墨魚 + 赤貝) + 帶子 / 蟹捧 / 酢鯖魚 / 三文魚壽司 + 海謄墨魚 / 芥辣八爪魚 / 蟹子XX壽司 + 天婦羅鰻魚壽司 + 炸蝦卷 + 三文魚手卷 + 太卷 + 北海道拉麵 + 串燒雞軟骨 + 芝士年糕 + 大蜆味僧湯   太飽喇   所以食完就同家姐行豐澤睇雪櫃   因為家姐部雪櫃壞咗   好在最後都買到   我覺得屋企壞雪櫃好慘  啲嘢食又唔知擺喺邊   又會好易壞   好在呢排天氣涷咋   唔係啲嘢壞得仲快 ~

搞掂哂就同里奧大人走喇   今日真係好攰   雖然有太陽   但入黑就好大風   吹到我個頭有少少痛   但咁難得出到嚟   無理由咁快就番屋企嘛 ~

番到屋企唔理三七二十一   即刻食粒 Panadol 呀 ~

~~~~

今朝又食麥記嘅煙肉蛋漢堡餐配熱啡   又係有 $5 Cash Coupon   所以好抵同好滯 ~

番到公司一開機就心知不妙   點知真係 Server Down 咗   到晏晝 3 點幾先有 I.T. 人嚟   又要做嘢   又要 MSN 又要睇 Blog   真係攪到有啲神經衰弱呀 ~

紅燒雞翼 + 味千拉麵 ( FEB-2008 )

橫掂里奧大人番學   所以就陪媽咪同婆婆   陪到 5 點半就走喇   因為要趕住番屋企煮飯呀 ~

行經燒味舖  見到紅燒雞翼 ($12/4 隻) 好想食   所以肉酸都要喺紅磡買袋雞翼番屋企喇 ~

番到屋企已經見到里奧大人   所以我要即刻開火煮嘢喇 ~

是日懶餐 : 紅燒雞翼 + 味千拉麵

紅燒雞翼 - 番到屋企已經涷冰冰   好難食 ~

味千拉麵 - 一 Pack Pack 嗰啲   以前好好味   依家落哂所有調味料都無味   又係好難食 ~

晏晝啲嘢都未落格就要食晚餐   所以覺得更加更加難食 ~

上年啲水仙花未到初二已經開哂   到依家 (初十) 都仲未開哂   今年天氣真係涷得交關 ~

黃金炒飯 + 馬蹄糕 ( FEB-2008 )

尋日忙到九彩   因為之前唔願做   所以堆埋一堆   自己攞嚟衰 ~

好在臨放工前 1 個鐘做哂嘢可以抖抖   順便諗下煮咩炒飯好   因為前日已經整定盒冷飯   所以一定要炒飯 ~

本來想買火腿   但唔想一次過食一 Pack 咁多   但食一兩塊又驚之後唔記得煮等到過期   所以我就去街市買 $5 芝士腸   唔知街市涷肉舖啲散裝腸仔會唔會過期呢 ~

其實本來想整楊洲炒飯   但原來屋企包雪藏蝦已經喺 17-11-2007 到期   激死我喇   嘥嗮啲嘢   再睇下 Pack 蟹柳   好在無過期咋   又好在買咗芝士腸...唔好真係得齋炒飯呀 ~

是日懶餐 : 黃金炒飯 + 馬蹄糕

黃金炒飯 - 仲係新年嘛   所以改個好聽啲嘅名   配料只不過係粟米 (黃金) + 雜豆 + 芝士腸 + 蟹柳 (切粒) + 雞蛋 + 薑粒 + 蔥粒   但今次用老抽同咖哩粉一齊炒   所以有啲辣   但又好好味喎 ~

馬蹄糕 - 係阿婆之前比嗰啲   再唔食就要掉㗎喇 ~

洗完碗   沖埋涼就食蘋果雜果沙律   本來唔想整   好耐之前買咗雜果同椰果   驚唔整又等到過   所以涷冰冰都要整沙律囉 ~ 

~~~~

今朝勁開心   因為同里奧大人去 Can-teen 食早餐   我又係食至愛嘅魚柳腸拚多士配即磨咖啡   里奧大人食雞扒蛋拚多士配熱央   勁好味 ~

番到公司有啲嘢做咁啦   講真   唔急真係唔願做住   因為勁有 Holiday Mood 呢 ~

里奧大人晏晝要番學   所以我就同媽咪去食板長壽司   好在媽咪早到攞飛   我去到等多一陣就有位   因為人齊先可以入   呢間嘢真係唔掂   食海膽無海膽   食鰻魚無鰻魚   食蟹捧無蟹捧   食鯖魚無鯖魚   話無貨喎   激死   攪到咩 Mood 都無哂   媽咪又唔好食生嘢   所以比較難選擇   只係叫咗三文魚 / 蝦 / 帶子 / 八爪魚嘅壽司 + 軟殼蟹手卷 + 親子飯 + 天婦羅 + 牛油果蟹肉沙律   埋單 $167   價錢都 OK   啲飯又新鮮   美中不足係想食嗰啲全部無囉 ~

之後同媽咪去婆婆屋企附近食糖水   食合桃糊 ($17) + 杏仁糊 ($18)   諗住食啲甜甜哋嘅嘢   點知啲糖水又無味又唔滑   仲要鬼咁貴添   下次都唔會去食呀   突然覺得自己整嘅芝麻糊原來係好好味㗎 ~

主動情人節 ( FEB-2008 )

情人節喇喎   梗係要出街食下嘢咁啦  無花收但食餐飽都好吖   里奧大人想扮唔知   所以我就 Book 咗位先至同佢講情人節出去食飯   咁主動唔會拒絕啩 ~

去嘅地方係大尾督嘅忠誠茶座   係食泰國嘢嘅 ~

真係唔讚自己醒唔得呀   好在一早 Book 咗位咋   里奧大人仲恥笑咁話: 唔駛 Book 都得啦   無人會入到 "山卡拉" 食嘢㗎   佢錯哂啦   一走就有人坐喇   有啲仲要排隊添呀 ~

太想食泰國菜   所以一早已將感冒拋諸腦後   炸嘢辣嘢貝殼類嘅涷嘅都叫哂 ~

食咗炸春卷 + 辣椒膏炒青口 + 鹹魚炒椰菜苗 + 蒜蓉包 + 釀雞翼 + 珍多冰 + 石榴子冰 ...其實食嘅地方係村屋出面嘅前花園   只不過在搭啲板就當係舖位咁   所以啲嘢食好快涷   要食快啲先得   如果唔係就會好難食   所以同里奧大人食到吖   我飽到要冒瞓唔着嘅險都要飲茶消滯   餓辛苦   但飽都好辛苦   因為我唔想浪費食物 ~

埋單 $321   最搞笑係個職員比張單時話: 多謝 9 百幾   嚇到我吖   9 百幾唔係化   後尾個職員見我咁大反應再望張單   就好唔好意思話係 $321 ~

番到屋企附近又去 Jumpingym 走轉   玩咗 50 Token 擲彩虹就收手喇   估唔到自己居然會有自制能力 ~

~~~~

今朝好似涷過尋日咁   真係要爭扎一陣先捨得起身 ~

今朝食芝腿菠蘿包 + 涷奶茶 ($16)   番到公司都忙忙哋咁   都好嘅   我都唔想無嘢做等放工 ~

晏晝買咗腸仔麵 ($12) 番公司食   因為唔想出街   覺得好鬼涷呀 ~

特平超飽晚餐 ( MAR-2008 )

   

尋日食完開年飯就番公司坐多陣   到 3 點半就可以放工   所以可以幫里奧大人將功課交比佢姐夫睇睇   之後就搭車番屋企喇   呢排食藥   所以一上車就好想瞓   但又唔敢瞓   因為驚唔記得落車就死喇   同埋我又鼻塞   驚瞓到扯蝦就唔好啦   女仔人家瞓到咁核突 ~

番到屋企電視又無嘢睇   左騰騰右騰騰終於待到里奧大人番嚟   唔知想食咩   所以一路行一路睇有咩好食   終於搵咗間茶餐廳   食咗艇仔粥 + 鹹肉糉 + 魚滑米粉 + 菜心   埋單 $41 咋   又平又飽   仲平過我哋平時食早餐呀   不過可能食咗藥口淡淡   所以覺得毫無味道可言 ~

呢排無線兩套劇集都幾好笑   如果唔係開電影都幾悶   有線嘅節目成日 Repeat 又 Repeat   半年前睇過嘅又番做   雖然我好鍾意睇飲食同旅遊節目   睇多次就無所謂啫   但一星期做 5 次就悶爆囉   好想快啲到 7 月   因為 Klinsmann 會執教拜仁   估唔到 Klinsmann 會再教波   仲要係我鍾意嘅拜仁   如果 Frings 同波歷克都係拜仁就正喇   簡直係我最鍾意嘅德國隊添呀 ~

~~~~

唔知係咪好多人都未正式開工   所以無咩人排隊搭車   車程又暢順   今朝去咗麥記食魚柳包套餐   因為有 $5 Coupon ~

番到公司點都要上陣網先可以半程投入工作   我唔會全程投入   因為我仲要 Spare 一半時間 MSN ~

晏晝買咗炸菜豬扒米線番公司食   食飽好想瞓又瞓唔到 ~

魚香茄子煲 + 梅菜扣肉飯 ( FEB-2008 )

里奧大人終於比我傳染咗感冒   要休息一天   但我就無陪佢睇醫生   因為我約咗媽咪去家姐公司附近嘅金煌庭食 Lunch ~

我次次去親媽咪度就實會先同朱朱食早餐先嘅   之後就會上媽咪屋企坐一陣再出發食嘢   但自己唔舒服   又加上天氣涷   所以無同朱朱食早餐   媽咪話朱朱都涷到打噴嚏   唔敢帶佢出街   媽咪咁講我都好驚   因為朱朱知道我番就等如有得出街   所以當我出門口時   佢對眼突然好精靈   仲舉起一隻前腳仔   示意妳同佢出街街   嚇到我即刻唔望佢就轉身走喇   對唔住呀朱朱   等家姐好番   下次先同妳出街街啦 ~

好在 Book 咗位   都唔記得啲人會食開年飯   如果唔 Book 應該會無位   食咗煎腸粉 + 北京水餃 + 黑椒牛仔骨 + 蝦餃皇 + 豉汁蒸鳳爪 + 蒸銀媽卷 + 千層馬拉糕 + 雞絲粉皮 + 肉末叉子餅   埋單 $298   家姐請   食物有水準但啲服務態度就差到不得了   話說我食緊嘢嘅時候   有個人喺度格硬整開我張櫈   迫入嚟拎嘢去後面張枱   大佬   我食緊嘢家嘛   之後我望下係咩人   原來係部長級   咪好惡咁 "啤" 住佢囉   整佢吖   居然話妳坐過啲吖嘛   我即刻發火話: 你係咪應該講唔該呀 ?!   咁無禮貌嘅 ?!   咩嘢態度呀 ?!   再一輪咀咁話佢   佢嬲爆爆無出聲行開咗   黐線㗎   仲有就係啲 人成日將隔離枱啲點心比我哋   真係大大話話講咗成 10 次話唔係我哋   飲茶飲到咁掹都係第一次呀 ~

食完就同媽咪搭車走喇   而我又要再陪里奧大人開餐   去大家樂食紅腸雞翼瀨 + 熱奶茶同朱古力西多士 + 熱奶茶   之後要番屋企瞓喇 ~

食完又瞓   瞓完又食   呢個循環令我有啲驚 ~

無力煮飯   所以去東江雞食飯   食咗魚香茄子煲 + 梅菜扣肉飯   今次搭枱   好衰唔衰   張枱係 3 個女人坐嘅   聽佢哋講嘢啲語氣   我估佢哋都係麻煩人   真係比我估仲咗   話說有個印印一手拎 BB 車一手拎袋   但個小朋友就周圍走   之後個女主人就同印印講嘢   根本聽唔到佢講咩   但班女人就自己喺度配音   話個女主人喺度鬧個印印   之後又話最憎呢啲人   有個錢懶巴閉   駛死人咩   係咁喺度鬧鬧鬧   足足話咗成 10 分鐘   又講埋粗口   我都忍唔住用啲郫視眼光望下佢哋   好在佢哋話人多唔好霸住張枱要走咋   食店又嘈   搭枱班人又嘈   所以食完就拿拿聲走   唔係遲早會頭痛呀 ~

唔知涷到幾時呢 ?!   依家瞓覺真係要掙扎一大輪先上床瞓   因為張床同張被超級涷呀   不過里奧大人又幾好喎   呢排臨瞓前會早啲上床   坐喺我瞓嘅位置   等我唔駛涷冰冰   算佢啦 ~

~~~~

今朝要番工喇   好辛苦呀 ~

我估今日都仲有好多人未番工   車程好順   .又難得美心唔駛排隊   所以食咗糯米雞 + 即磨咖啡 ($20)    耐無食過好味嘅糯米雞   所以心情都變得相當唔錯   唔知點解   人病我病   病得咁有胃口嘅 ~

番到公司諗住做嘢   但 System 又 Shot 咗   所以唔駛做住   咁都好   因為食咗藥好攰好辛苦呀 ~

晏晝去美心皇宮食開年飯   最正係 3 點半可以放工呀 ~

蒜蓉豆豉蒸排骨 + 菜心 ( FEB-2008 )

終於頂唔順睇醫生喇   因為勁鼻塞 + 喉嚨痛 + 失聲   勁 Down 啦   但居然有胃口食嘢   同里奧大人去酒樓飲茶   食咗三色糕 + 蝦腸 + 灌湯餃 + 家鄉煎薄餅 + 上素粉果   樣嘢都超級難食到爆   唔會再有翻單 ~

食完咁油膩嘅嘢   梗係要郁下咁啦   所以行下行下又去咗 Jumpingym 玩擲彩虹   仲咗 220 票呀   真係超開心 ~

番到屋企食藥就瞓一陣   醒咗又係食   去大家樂食咗雞翼脆皮腸沙律 + 熱奶茶   里奧大人食叉燒瀨 + 熱奶茶   再 Share 食 朱古力西多士   唔知點解好好胃口   所以我唔出聲無人信我係病緊 ~

雖然唔舒服   但都想郁下   所以又煮啲簡單嘅餸 ~

是日懶餐 - 蒜蓉豆豉蒸排骨 + 菜心

蒜蓉豆豉蒸掛骨 - 學 MuiMuimui 做法   用老李磨豉醬醃一晚   因為感冒   所以我要食濃味啲   再刴多啲蒜蓉豆豉   爆香去放落排骨面   放喺飯面蒸   超簡單 ~

菜心 - $10 / 斤   唔知算唔算貴   因為我好似好耐無買菜   但好好彩啲菜都好甜   之後呆呆滯滯   但又唔係攰   唔知點形容 ~

我淨係好想唔好再鼻塞   因為 "吖" 大個口抖氣好辛苦   令到我個喉嚨好乾    繼而好痛   我病唔緊要   但唔想咁好胃口   因為食完又瞓   瞓完又食好鬼易肥   我真係唔想 ~

盤滿砵滿炒烏冬 + 阿婆馬蹄糕 + 粟米湯 ( FEB-2008 )

病到好攰   所以都無番到教會教會喇 ~

同里奧大人去椰林閣食早餐   我食牛扒蛋拚鮮果沙律配冬士 + 熱鴦   里奧大人食腿蛋治配麥皮 + 熱華田   又係要等廿年先有得食 ~

食完就番屋企執屋   又唔估到有精神執屋噃   所以又順便執下個衣櫃   執到整整齊齊   人都開心啲呀 ~

假期諗食咩都幾煩   食得多又嫌悶   想食嘅又多人   加上仲係新年   真係食咩無咩   一係就加價到飛起   明明平時一個炒飯套餐係 $32   但新年就無套餐   飲品要原價多成 $10喎   我覺得好離譜囉   好在大機構嘅快餐店無咁做咋 ~

同里奧大人諗到去澳門街食下午茶餐   唔記得係新年假期   所以原來又係無下午茶餐   好在都有啲啱心水嘅食物啫   就係什扒餐 ($42)   有包有湯有餐飲   仲估唔到係用鐵板上   熱辣辣   正呀 ~

食完又係番屋企睇下電視   睇下報紙咁   但啲時間過得好快   轉眼又到食晚飯時間 ~

是日懶餐 - 盤滿砵滿炒烏冬 + 阿婆馬蹄糕 + 粟米湯

盤滿砵滿炒烏冬 - 烏冬好似就嚟過期   一定要消滅佢   用日本魚蛋做配料   用甜豉油嚟炒   無味嘅 ~

阿婆馬蹄糕 - 係隔離單位嘅婆婆比嘅   煙煙韌韌勁好味   人生第一次食咁好味嘅馬蹄糕   簡直係一食難忘呀 ~

粟米湯 - 無菜食就會飲嘅湯   係家中長備嘅食糧 ~

又病又唔想出街食   所以煮啲超簡單嘅餸   煮完食完洗埋碗之後個人有啲虛脫   假期先嚟病真係超無癮呀 ~

在此祝自己身體健康 !!

2008 年 麻麻地好嘅開始 ( 9-FEB-2008 ) ( FEB-2008 )

首先祝各位新年快樂 !! 新春大吉 !! 身體健康 !!

好耐無 Update Blog 喇   所以咩都打一餐嚟練下字先 ~

年三十晚 - 實在太可惜喇   因為身體不適關係   無可奈何喺屋企過年三十   幾十年都係行年宵渡過年三十   今年無行好唔慣呀 ~

大年初一 - 同里奧大人去媽咪屋企拜年   本來家姐同唔到我哋一齊食飯   但咁啱約咗嗰個人要遲啲到   所以我哋可以一齊食飯   真的感謝神   食到差唔多 2 點就走喇   因為要去婆婆屋企拜年   又係坐個幾鐘頭就番屋企喇 ~

番到屋企附近有啲餓   所以去元氣醫醫肚 ~

之後同里奧大人講: 真係好想去 Jumpingym 玩   里奧大人居然首肯呀   所以拿拿聲續卡再換 $200 Token   第一樣嘢係玩 "擲彩虹"   我擲到有 500 票呀   開心到有啲暈   之後就玩 "推錢機"   但手風唔順   玩咗一陣就再玩番 "擲彩虹"   今次好幸運   換 $200 加埋其他抽獎   差唔多 $100   .到最後仲有 $200 Token 留番下次玩   係好嘅開始   因為唔駛等里奧大人覺得 Jumpingym 係燃燒金錢嘅地方 ~

之後去 Jusco 買照燒雞翼 + 薯格   再加上自己煮味千拉麵   咁就係一個超簡單又好味嘅晚餐喇 ~

大年初二 - 非常可憐   半夜起身去洗手間   打咗 3 個噴嚏之後覺得個鼻塞   心知不妙   因為已經 Feel 到會有傷風   起身又有啲頭痛   但又要去奶奶屋企食開年飯   不過今次都好彩   有順風車坐   食完飯開始有啲唔舒服   但傳說話打牌能醫百病   所以我就同奶奶 姑奶 水老打牌    奶奶屋企有貓   加上我又感冒   攪到我個鼻超痕   鼻水又長流   辛苦到暈   在極度辛苦嘅狀態下打牌之下都好好彩只係輸 $100   食完飯姑奶佢哋話未夠喉   所以再打   唯有頂硬上   打到 11 點就走喇   又幾好噃   嬴番 $100   終於明白咩叫做唔辛苦點得世間財 ~

年初三 - 瞓到 1 點   之後同里奧大人去食 Lunch   間都唔開   又涷又腳軟   搵食原來真係好艱難   之後去咗 "好麵膳"   我食香茅豬扒湯濛   里奧大人食叉燒燻蹄飯   勁唔好食 ~

番到屋企里奧大人就瞓下   我睇下報紙咁又到 4 點幾   要出去食嘢喇   想食公司三文治   所以去大家樂食 Tea   我食公司三文治 + 熱央   里奧大人又食叉燒湯瀨 + 可樂 ~

實在太攰   所以都唔係點周圍行   要番屋企休息下   過下過下又到 8 點   唔想食太飽   求其食車仔麵 + 腸粉就算 lu ~

太興 @ 大埔 ( FEB-2008 )

前晚同里奧大人去太興食咕嚕肉套餐 + 花生醬厚多士   真係希望越大失望越大   上次件厚多士好好味   但今次真係唔多掂   外面硬崩崩嘅 ~

番到屋企再飲埋啲隔夜湯就沖涼喇   因為每月一到有少少唔舒服要早啲休息 ~

~~~~

瞓得唔好再加上每月一到   諗住沖過涼會無事照番工   點知上到巴士有啲暈暈哋   所以去到總站再由總站搭車番屋企休息   辛苦到呢 ~

番到屋企附近睇埋醫生就瞓覺喇   里奧大人就去利苑食完 Annual Lunch 就可以放工   有個人喺屋企陪下   幫我斟下熱水都好嘅 ~

晚餐就係里奧大人喺 Annual Lunch 拎番嚟嘅干燒伊麵   食咗少少   味道都唔錯   最緊要唔係好油   食完之後就瞓喇 ~

~~~~

今日好開心呀   因為年三十關係   所以公司提早下午 1 點放工 ~

個人仲有啲唔舒服   睇怕今日都去唔到行年宵   不嬲有行年宵嘅習慣   今年無得行   硬係覺得唔知點咁 ~

鎮江骨 + 紅蘿蔔粟米花膠豬骨湯 ( FEB-2008 )

天寒地涷真係好鬼想食嘢   頭先買咗 2 個迷你菠蘿叉燒包 +  1 個迷你豆沙包   番到屋企無幾耐就 Feel 到有啲口痕   所以就煎香嚟食   個皮好脆又熱辣辣   好味道呀 ~

個頭仲係痛   但要煲藥又要煲湯又要燜鎮江骨   但又唔想瞓   又唔想食 Panadol   所以尋日超級辛苦 ~

是日懶餐 - 鎮江骨 + 紅蘿蔔粟米花膠豬骨湯

鎮江骨 - 見到街市原來有雪藏金沙骨   所以買咗一斤 ($16)   解涷之後無醃   直接出水   爆香乾蔥同薑片   之後用鎮江醋 + 喼汁 + 蠔油 + 孖蒸 + 冰糖 + 水嚟燜   燜到啲汁杰就收火   之後我放埋一邊   到食飯時再翻熱   我覺得今次好好食   所以好鬼開心   今次跟個 Recipe 相當唔錯 ~

紅蘿蔔粟米花膠豬骨湯 - 花膠浸咗 1 晚   再用 1 條紅蘿蔔 +  3 條粟米 + 豬骨一齊煲   女人飲最啱   所以我會有時間就煲 ~

個頭又痛   天氣又涷   已經諗住煲湯同埋個餸係唔好味   點知今次嘅鎮江骨整得好好食   個湯又煲得好好好飲   真係估唔到 ~

~~~

唔知花膠湯係咪利尿   成晚起身去洗手間   真係慘 ~

今朝食吞拿魚治烘底 + 熱啡 ($15)   好耐無飲咖啡   所以今日飲完好精神 ~

晏晝帶飯   食完好飽仲開始好想瞓覺   但又要開工 ~

團年飯 @ 姑奶屋企 ( MAR-2008 )

尋日里奧大人要番學   所以得我喺屋企   天氣太涷   又早起身   所以不知不覺咁瞓咗一陣   之後就煮出前一丁   雖然係我最鍾意嘅五香牛肉味   但就咁齋麵真係幾難頂   天氣持續寒冷   所以瞓飽食飽就做下家務   拖下地咁   等自己無咁涷 ~

唔知點解一個人喺屋企特別悶   平時就會好想抽多啲時間做家務   但當妳好多時間就唔願做   我估係太涷關係   等到里奧大人番到屋企放低嘢就去佢家姐屋企做團年飯喇   佢屋企好鬼涷   食物只係得咖喱魷魚 + 白汁磨菇意粉 + 炒飯 + 雞 + 菜 + 沙律 + 涷冰冰嘅包   好在仲有剩咗嘅 3 件三文魚壽司 +  2 件甜蛋壽司   任何節日都係食呢幾款嘢   食咗幾年   雖然唔係成日食   但真係睇見都厭囉 ~

其實真係好佩服里奧大人啲屋企人   食嘅 自己煮嘅 着嘅   甚至傾嘅話題都可以十年不變   真係好佩服佢哋嘅專一態度 ~

~~~~

今朝無番到教會   唔係因為涷又唔係因為懶   而係里奧大人話校咗嘅鬧鐘無響過喎   就係咁喇 ~

今朝好開心   因為難得見到太陽   不過都係好涷   自己懶壯   見有太陽就着件薄褸出街   點知涷到震   但費事又番屋企換衫麻麻煩煩咁   所以頂硬上 ~

同里奧大人食燒賣 + 腸粉 + 薄餈 + 熱豆漿做早餐   埋單 $22 又抵又暖身又飽肚 ~

之後去街市同超市買嘢就番屋企又大掃除喇   抹窗 吸塵   清潔窗台都攪咗幾個鐘   我頭痛呀   應該係頭先冷親   所以無咩點做嘢   係幫里奧大人執頭塊尾   不過仲煩過自己做   男人係咪多數無手尾嘅呢 ~

整到 2 點幾開始有啲餓   所以同里奧大人食 Tea   一早諗好咗大家樂   點知里奧大人突然話食麥記   我聽到即仆到去啦   因為我想食好耐   食咗椒財牛肉包套餐 (配扭扭薯條 + 可樂) + 魚柳包 + 麥樂雞   好好味呀 ~

食完要去家品店買嘢   年近歲晚   度度都迫   連家品店都迫到死呀   幾經辛苦先買到嘢呀   買完又要番屋企大掃除喇 ~