施捨的麵

尋日媽咪血壓高入咗醫院...要留醫...所以真係無咩心機

放工即刻搭車探媽咪喇 ...感謝神..搭車搭 lift 買嘢都好順利...因此搭車有車..搭 lift 有 lift...買嘢又唔駛排隊

唉...天氣轉呀...所以勁多人入院...媽咪要瞓走廊添呀...最慘係對住男廁...好尷尬家嘛...同埋又覺得好似吸咗好多 "臭崩崩" 嘢咁

我去度第一件事唔係安慰媽咪...因為我好嬲...非話不可...第一 : 就係做咩唔按平安鐘...坐白車有儀器...自己坐的士有咩事都無人理...有工人陪都無用啦...第二 : 媽咪成日夜晚睇大戲...睇到十二點先番到屋企...睇完又攰又無精神....仲要係有時連續睇幾晚添...睇唔係問題...睇到自己又攰又辛苦有咩謂呢...平時自己又係九點幾要瞓四點幾會自動起身嘅人...攪到瞓得三四個鐘...唔駛做嘢啫...但都好辛苦家嘛...第三 : 就係婆婆成日要媽咪陪...因為婆婆話無人陪喎...(但佢自己有工人架噃...只不過唔鍾意個工人啫)...so...佢又覺得媽咪唔駛做嘢好得閒...成日叫佢飲茶....飲完又要去佢屋企坐幾粒鐘先可以走...媽咪對腳痛....要轉兩程車先去到婆婆屋企...去到只不過係瞓覺...因為媽咪血液泵去心臟比較慢...以好容易攰...之後婆婆仲話媽咪淨係成日瞓...我真係好想鬧婆婆...但媽咪話唔好...ok...我忍...依家婆婆又好 d 噃...媽咪一上到去就話叫媽咪去瞓啦...天呀...要瞓駛咩山長水遠去妳度瞓呀??但媽咪又唔敢同婆婆咁講...因為自從公公唔喺度...婆婆就好需要人陪...直至到瞓覺為止...大佬...個工人唔係人咩...媽咪舅父亞姨年紀唔係細...個個又有自己家庭...有自己舖頭...婆婆就覺得自己大哂咁...下下要人陪...係咪要個個唔做嘢全天侯陪住先得呀??大家要互相體諒...關心係出自自己內心...要陪妳都係出自自己內心...而妳咁強迫要人陪...大家都唔開心...坐喺度妳眼望我眼有咩意思呢??咁大個人...唔需要我教妳咩嘢叫互相體諒嘛??真係一諗起就眼火爆呀

話完媽咪...轉頭見到個工人喺廁所對住塊鏡紮頭髮...嚇到我即刻叫番佢出黎...話男廁黎架...佢都嚇到即刻跑出黎...笑 c...
之後家姐又黎埋...坐到七點半就走喇...因為家姐屋企又有人睇樓...但又想陪我食飯...因為里奧大人番學...覺得我自己食好慘咁喎...所以係都要早 d 走一齊食嘢咁囉

同家姐去食粉...食雙丸米 + 牛什米 + 炸魚皮 + 菜心 + 細支忌廉...埋單 $76...家姐咁好...當然我請啦...家姐咁好陪我喎...食完送埋家姐搭車就走喇...番到屋企就拖地...之後沖涼...時間啱啱好...攪掂所有嘢...里奧大人就番到屋企喇...

       

今日係我生日...所以就去麥記食早餐...食魚柳包餐 + 熱啡 ($13.8)...因為有 $5 cash coupon 呀...所以覺得好抵...仲要係飽到上喉嚨頂果隻添噃


番到公司咩 mood 都無...又無嘢做...悶 c...
晏晝食墨魚丸河粉 ($15)...超漏...之後去買玻璃樽...因為要整鹹金桔...家姐話 d 金桔唔要...我咪學整下鹹金桔囉...家姐又鍾意飲...話喉嚨唔舒服飲咗真係舒服到唔知點形容咁喎...不過桔仔要醃好耐...我婆婆果樽醃咗廿幾年呀...如果我整得好好同唔發 mo 嘅話...我希望十年後可以醒比家姐啦

仲有時間周圍行...所以去 market place 買咗包 350 gm 嘅五穀米 ($11.3) 同咖哩粉 ($9)...試下 d 米好唔好食先...好食就會買大包 d...因為五穀米都好健康...買完都係度笑...番工買米...前世未辛苦果咩