星期日 ( BBQ ) & 星期一 ( 蝦醬豬肉蒸茄子 + 猴頭菇螺片響螺瘦肉湯 )

星期日 ( 12-apr-2009 )

同里奧大人喺教會附近食早餐   咁就唔駛咁趕咁呢   因為之後好快又會食午餐   所以 share 食一個通粉餐  & 一件奶醬多 ~ 

番完教會又要食午餐喇   因為約咗里奧大人屋企人掃墓   d 時間唔拖唔水   所以要早 d 食午餐   唔係唔知幾時食呢 ~ 

難得咁早食午餐   所以去熟食街市食嘢   每一個角落都好多人   但我只會食魚蛋麵    其實魚蛋魚魚片一般啦  ( 因為我對呢兩樣嘢無乜興趣 )   但 d 麵就唔錯   同埋 d 魚皮浸咗好耐都好脆   好好味   最正係 d 辣椒油   睇個樣唔辣   但原來好辣好香   真係可以為咗 d 辣椒油而食碗粉架 ~  

食完就 join 埋里奧大人屋企人一齊搭車去掃墓   之後再去里奧大人家姐屋企 BBQ   不過一路都落住毛毛雨   勁無癮 ~  

~~~~
星期一 ( 13-apr-2009 )

10 點半起身出發食早餐   食到 11 點半  超 relax 呢 ~  

之後里奧大人跑步   我就執書房同熨衫   天氣好焗好熱   所以出汗仲犀利過跑步呀   最後頂唔順開冷氣   真係兩個世界 ~ 

勞動完要去開餐喇   咁焗嘅天氣一定要食 d 刺激開胃嘅嘢   所以食酸辣米線喇 ~ 

食完同里奧大人去買餸買生果   有個老公傍住真係好呢 ~   

4 點半喇   要 ready 煲湯同晚餐喇 ~  

是日懶餐 - 蝦醬豬肉蒸茄子 + 猴頭菇螺片響螺瘦肉湯

蝦醬豬肉蒸茄子 -  材料有五花腩 ( $10 ) / 茄子 ( $3 ) / 蝦醬 1 湯匙 / 水少許   呢個餸係喺雜誌度睇到   好似好方便好惹味咁   所以試下整   味道唔錯呢 ~  

猴頭菇螺片響螺瘦肉湯 - 官燕棧湯包   自己再加 3 隻響螺 + $10 瘦肉   里奧大人話甘甘地  幾好飲   不過唔好飲都要飲   因為我買咗一大包猴頭菇呀 ~ 

4 日假期話咁快結束 lu ~