滷水雞翼 + 菜心 + 花膠響螺燉雞湯 ( 31-jan-2010 )

( 31-jan-2010 sun )
今朝同里奧大人食完早餐就去髮型屋喇   我補番焗油   里奧大人就剪髮   估唔到 11 點已經好多人   12 點已經爆哂   好在預約咗   唔係又唔知要等到幾時 lu ~

次次吹完個髮型都好靚   自己硬係吹唔到 d 效果   不過我相信係自己無心機吹   求求其其就算   所以我下定決心   每朝早 10 分鐘起身   咁就多 d 時間吹靚 d 個頭喇 ~
臨近新年   之前已經清潔咗廚房   執好哂衣柜   所以今次就只係主力清潔書房   里奧大人就負責燉湯   各有各忙呀 ~   
今日好好太陽   所以執嘢抹嘢都幾熱   有 d 辛苦呢 ~
3 點幾去食 tea 喇   之前嘅 tea set 份量好細   估唔到今次份量多咗 1/3   之得唔叫多士啦    食到超飽呀 ~

番到屋企 hea 陣先煮飯   因為尋晚已經整好咗餸   今晚就咁翻熱就得呢 ~
是日懶餐 - 滷水雞翼 + 花膠響螺燉雞湯 + 菜心
滷水雞翼 醃咗一晚嘅雞翼非常入味呀   最鍾意係可以咁深色   因為我之前整係無咁深色架   所以今次好開心呢 ~
花膠響螺燉雞湯 - 今次材料有冰鮮芝麻雞 + 響螺 + 圓肉 + 杞子 + 紅棗 + 薑   其實燉湯可以話好方便   又可以話幾煩   因為要將之前嘅材料煲滾 45 分鐘先可以放入燉盅   再燉 3 個鐘   加埋洗切   前前後後要用 4 個鐘   但就唔駛睇火同埋加水囉   咁無咁大壓力架   最怕煲燶湯   嘥哂 d 材料   時間同煤氣呀 ~
菜心 - $10 有 2 斤   分兩餐食就最好不過啦 ~