麥當勞 @ 美孚 ( 6-SEP-2019 )

板燒雞腿包套餐 - 同里奧大人一個餐 share 食   因為其實大家都唔餓   但我怕一陣番學肚餓   所以點都要食啲嘢呢

( 6-SEP-2019  FRI )

今朝早餐食飽啲   因為中午要晏啲食 ~

菇場唔忙   咁就好喇   我要準時走呀 ~

今日放下午去驗眼   所以約里奧大人喺佐敦等 ~

搵間坐得舒服嘅餐廳食嘢   差唔多 3 點走人 ~

酸辣雲吞麵 ($58)

排骨粗炒 ($68)

Book 咗 3 點 15 分   估唔到 3 點 10 分已經可以睇呢 ~

滴藥水等曈孔放大   其實我覺得最辛苦   因為對唔到焦睇嘢呀   搞到個人有啲暈暈哋 ~

之前覺得自己散光   再上網睇又驚自己白內障   之後再睇仲死   以為係糖尿上眼   咁啱上個月食咗好多朱古力嘛 ~

醫生話我唔係病   係散光   要帶眼鏡   同埋開始老花   我之前聽到係老化呀   嚇死 ~

同埋油脂好多   唔知咩失調   加上眼好乾   成日睇嘢濛查查呢 ~

睇完都係 3 點幾   唔想咁早入美孚   所以又食啲甜品喇 ~

芒芒奇冰 ($48) - 好味呀   但依家食甜品真係好貴 

珍珠奶茶 ($19 ) - 勁重奶味   我唔係咁受得   但點都要飲埋去囉

搭地鐵去美孚   差唔多 6 點左右到   里奧大人話去千兩   佢話頭先喺地鐵站見到有千兩喎 ~

行咗成個商場再上網 Check   美孚無千兩喎   咁里奧大人再去地鐵站睇多次   話應該係賣廣告   因為無地址   哈哈 ~

之後有個人企喺度   好似識我哋咁   咁我對眼仍然係濛嘛   睇得唔清楚   佢再叫里奧大人個名   原來係我舊公司同事呀   起碼 14 年無見   但最搞笑係佢話認到里奧大人   反而認唔到我   我另一個舊同事又係咁   話認到我家姐但認唔到我   可能我肥咗好多   哈哈哈哈 ~

喺條街傾咗成 45 分鐘   佢 Update 咗我好多資料   哈哈   今日同佢真係有緣   因為本身係肯定見唔到佢   咁我出咗地鐵即去學校嘅洗手間   之後里奧大人又落去地鐵睇嘢   同埋平時我都唔會咁早到美孚啦   所以我都話今次整定見到面咁   哈哈 ~

9 點 20 分放學   等巴士等咗好耐   都知唔對路   因為旺角有示威活動 ~

咁我話去洗手間先   一出嚟聽到司機同個女人話旺角塞死哂   巴士入唔到嚟 ~

我同里奧大人講番啦   佢話個女仔話有小巴出去   我話好呀   因為唔知要等幾耐 ~

個女仔都同埋我哋一齊搭   感激有佢帶路   唔係 12 點都番唔到屋企呢 ~

里奧大人同我講番   話佢等我去洗手間果陣   佢睇到隔離女仔嘅手機   睇下依家咩情況   個女仔直頭同埋里奧大人一齊睇   再話都唔知等幾耐   建議搭小巴   所以我一出來   佢就即問我搭唔搭小巴囉 ~

番到屋企都 10 點幾   沖埋涼都休息喇 ~

今晚睇新聞睇到 12 點 20 分   開始好攰   要瞓覺喇 ~