綜合丸麵 + 雲吞麵 + 蠔油唐生菜 + 跑步機 ( APR-2008 )

尋日里奧大人要北上   番落香港嘅時候又塞車   而我又唔駛煲中藥   所以就有好多時間   可以他他條條去街市買雲吞 ($12) 同唐生菜 ($6)   番到屋企又可以慢慢拖地同開機洗衫   最正係可以無壓力下咁睇電視   唔駛一路掛住望鐘一路睇電視   真係好正呀 ~

是日懶餐 - 綜合丸麵 + 雲吞麵 + 蠔油唐生菜

綜合丸麵 + 雲吞麵 - 至在清埋啲麵 ~

蠔油唐生菜 - 懶呀   所以蘸蠔油食 ~

食完抖陣   又同里奧大人做機喇 ~

番到屋企沖涼之後就飲杯黑木耳   再食 2 個細布冧   好脹肚呀   所以熨衫當做運動喇 ~

~~~~

今朝天氣好好   涼涼哋咁   如果日日係咁就好喇 ~

今晚可能有機會蒸水蛋   所以早餐唔食三文治   食芝腿菠蘿包 + 咖啡 ($15) ~

晏晝就非常非常非常非常之開心喇   因為媽咪請我.家姐同里奧大人去 Ruby's Tuesday 食嘢呀   有愛心湯飲   又一路食一路傾偈   開心到爆呀   如果我晏晝唔駛番工妳話幾好   呢個 4 月真係好開心呀 ~

粟米燴豬扒 + 湯 + 紅豆年糕 + 跑步機 ( APR-2008 )

呢排瞓得唔好   所以成日都好鬼攰咁   勁辛苦呀 ~

雖然攰   但都唔係好想下下出去食   因為真係好無益呀 ~

是日晚餐 : 粟米燴豬扒 +  湯  + 紅豆年糕

粟米燴豬扒 - 用豉油 + 生抽 + 蒜蓉 + 胡椒粉 + 生粉醃一晚   再加一罐粟米湯同一隻蛋   唔駛加水一齊燴   方便得嚟又好好味 ~

湯 - 隔夜湯只需翻滾就飲得   又係好方便 ~

食完之後就同里奧大人去做機   兩個人一齊做真係無咁悶呀 ~

尋晚睇下個廚櫃   發覺有啲罐頭擺咗 2 年   但又未過期   都唔知食唔食得 ?!   仲有就係雪櫃盒韓式辣椒醬   用咗 1 次已經擺到過期 (15-3-2008)   但我真係唔捨得掉   我會照食   所以應該會留到 6 月到先掉 ~

咁尋晚食飯又好似食唔飽咁   所以整埋啲過期 (19-4-2008) 嘅年糕   加埋紅豆蓉一齊煮   真係好好味   但就好飽肚下囉 ~

尋晚睇無線 "一百萬人的故事"   講啲低收入人仕   聽完真係覺得佢哋好慘   但有啲又唔抵爭   好似有個後生仔怨收入少   拖都唔敢怕   無錢喎   但咁點解你自己之前唔勤力啲讀書呢 ?!   仲喺度怨人   有個師奶又話自己有 3 個小朋友   所以啲錢緊緊夠用   咁點解妳又生咁多呢 ?!   我真係好唔明白囉 ~

睇睇下有啲掹   所以走去瞓覺喇 ~

~~~~

今朝好早番到公司附近   所以可以食米粉   食五香肉丁腸仔米粉 + 奶茶 ($18)   諗住慢慢嘆   點知有個人坐喺我對面   嗰個人係成日望住我   疑似地盤佬   佢啲指甲有黑邊   同埋啲手指好粗   唔似做文職囉   已經第 3 次見到呢個人㗎喇   次次都望住我笑   咁我當然又會笑啦   唔通就係咁樣就出事?!   食食下 Feel 到比佢昅住   點知一望佢   佢就扮望第到   到第二次我就巢銀包...又 Feel 到比佢昅住   一望又係扮望第到 ~

之後番到菇場   真係悶到爆呀 ~

晏晝帶飯   比啲同事搞到無咩胃口   因為食飯前 Toilet 塞咗   佢哋話啲嘢就嚟浮到出嚟喇   妳話啦   聽完仲有咩胃口食吖 ~

叉燒蛋絲炒米粉 + 金銀蛋菠菜 + 淮山杞子圓肉茨實當參石斛豬展湯 ( APR-2008 )

尋晚雖然夜瞓   但都堅持要番教會   因為之前太忙   成個月都無番過   所以同里奧大人一齊 10 點起身   梳洗後就打的去教會附近食早餐喇   諗住祟拜完就即去做機   咁要食飽啲   食炸菜肉絲米粉配腸仔蛋   而里奧大人就要配火腿炒蛋嘅   食完就去祟拜喇 ~

本來諗住聽完道就即打的去做機   點知 12 點 40 分都仲未講完   所以唔做機喇   因為體育館 1 點 Close 嘛   橫掂唔駛做機   .所以同里奧大人逛街市買餸   買咗 1 斤菠菜 ($6) 再買豬展 $20 同 3 塊豬扒 ($15)   豬肉檔阿婆都唔知係咪未瞓醒   我好清楚講話要 $20 豬𦟌   佢居然斬 $36 比我   我話唔要咁多   $20 夠喇   咁啲豬扒又切到厚厚咁   真係唔知佢做咩嘅   咁厚好難煎家嘛 ~

之後同里奧大人慢慢行番屋企   再去 Jusco 買叉燒 ($18)   之後再睇下有咩鞋款   睇睇下咁就已經成 2 點幾   要番屋企放低嘢又去 Tea 喇   去餐廳食 XO 醬炒公仔麵 同 三絲炒意粉   其實好怕肥   但又真係好想食囉 ~

本來我又諗住食完就去公園散步   但有輕微頭痛...唔想吹風   所以就改為同里奧大人行商場喇   終於行下行下搵到里奧大人想要嘅款   咁啱我又有想要嘅兩款鞋   買完就走喇   再行多陣   里奧大人又有鞋啱心水   所以順便買多兩對   拎住 5 對鞋真係唔番屋企唔得喇 ~

番到屋企已經 5 點半   要快快手咁煲湯喇 ~

是日晚餐 - 叉燒蛋絲炒米粉 + 金銀蛋菠菜 + 淮山杞子圓肉茨實當參石斛豬展湯

叉燒蛋絲粉炒米粉 - 唔想食飯   所以煮超簡易米粉 ~

金銀蛋菠菜 - 菠菜含有酸性會破壞體內鈣質   所以滾完菠菜嘅水千萬唔好要呀 ~

淮山杞子圓肉茨實當參石斛豬展湯 - 滋陰補腎   一個好好嘅湯水 ~

食完再沖埋涼就同里奧大人睇番獎門人   好鬼搞笑   尋晚仲一路食蝦片一路睇   真係勁嘆呀 ~

~~~~

今朝又係涷涷哋   呢啲天氣真係好舒服囉 ~

星期一嘅早餐多數想食甜嘅   所以就食芝腿菠蘿包 + 奶茶 ($15) ~

番到公司做埋少少嘢就有大把私人時間喇   晏晝帶飯   點知里奧大人同啲同事失散咗   所以搵我陪   我食完就去咗 Cafe 搵里奧大人   佢食咖啡牛腩意粉 Set Lunch   但份量好多   所以又要我陪食   真係飽到上心口呀 ~

番到公司附近   麥當勞有流動車派即磨咖啡   唔駛排隊   所以拎杯試下   味道一般啫   仲諗住好香咖啡味添 ~

BBQ + 壽司 @ 將軍澳 ( APR-2008 )

尋日真係好開心   因為可以同里奧大人班舊同事 BBQ 呀 ~

由於里奧大人要買衫同鞋...所以放工就一齊行咗陣   行行下有啲餓   所以去麥記醫肚   Share 食 個餐   我其實最想食係 Shake Shake 薯條   但食完有啲後悔   因為成個餐都好飽下   之後再行多陣   比我見到有個自己鍾意嘅袋   仲要係買一送一   但我又唔想同一款袋有兩個   里奧大人好醒咁話一個送比我家姐咪得囉   好感動呀   愛屋及烏   咁唔買唔得啦 ~

食完就出發 Join 埋佢哋一齊買嘢喇   如果要買嘢   我覺得有朋友係高佬真係好處多多   因為唔駛下下等啲 Staff 埋嚟擔梯拎嘢   6 呎 3 喎   同佢講完嘢都覺得條頸有啲梗咗呀   同埋覺得好似有條燈柱喺度行嚟行去咁   勁得意呀 ~

今次係同里奧大人班舊同事芒支支 + 馬基 & 鬍鬚勇 + 豬脷 + 小鬍子 & 超大眼 +  茄瓜 & 大根 + 好可愛 & 大肚一齊到芒支支屋企嘅 Club House 度 BBQ   不過唔係用燒烤叉 BBQ   係用烤爐   我比較鍾意用叉   咁可以一大班人圍住燒...氣氛好好多   同埋因為烤爐地方有限   所以只能夠燒完一堆一齊食   之後再燒又要等食   我覺得咁樣會好快飽   同埋唔可以一大班圍住一齊傾偈嘛 ~

今次 BBQ 有牛扒 + 豬扒 + 雞扒 + 蜆 + 雞翼 + 雜丸 + 芝士腸 + 紅腸 + 魷魚 + 山竹牛肉 + 燒賣 + 蝦餃 + 銀雪魚 + 蕃薯 + 粟米 + 金菇 + 娃娃菜 ~

雖然我係 Keep Fit   但我都照食   因為無我最想食嘅面包   肉我唔係咁好   但唔食又無其他嘢食   所以咩都食啲咁啦 ~

燒完之後就去 Club House 玩保齡球 + 篤波 + 滴滴仔   好耐無玩   所以好鬼開心   但一睇見啲分數就好唔想玩囉 ~

玩完就去茄子屋企附近食壽司   第一次 10 個人食壽司   所以 Order 真係有啲難度 ~

10 點食完就上茄子新屋坐下   傾下笑下已經 11 點   所以要走喇 ~

之後同里奧大人同豬脷一齊坐 MTR 再坐巴士番屋企   番到屋企沖埋涼成 1 點先瞓呀 ~

太興 @ 大埔 ( APR-2008 )

同自己講過   星期五係唔想煮飯   所以已經諗好咗去元祿食 Pizza ~

想同埋里奧大人一齊做機   所以番屋企等   熨埋啲衫   之後就等里奧大人一齊去食晚飯 ~

我哋有個習慣係差唔多番到屋企   距離屋企幾個巴士站   就會打電話比對方   咁就可以唔駛咁趕   有啲時間預備下   但尋晚里奧大人好耐都仲未打電話嚟   因為佢一上車打比我   所以計到時間幾時番到屋企   我穩陣啲去定元祿攞位   一落樓里奧大人就打比我   話依家行緊過去   聽到得一頭霧水   點知一過馬路真係見到佢   再快快腳一齊行去元祿   驚無位嘛   估唔到元綠要等位呀   但唔可以等呢   因為趕住去做機呀   所以被迫去太興   好唔開心呀   我好想食 Pizza 家嘛   無啦啦要食飯   坐低即刻話里奧大人做咩唔打比我   早啲打咪好囉   依家搞到無得食元綠   衰人   佢話原來有舊同事同佢傾偈   所以打唔到比我喎   激死我喇   所以我要佢請番我食 2 次元祿補數   同埋嚟緊嘅食飯洗費都要佢比 (唔用公數)   食到食咗 2 餐元綠為止 ~

喺好唔願意情況下叫咗南洋咖哩牛腩同八寶飯套餐   可能真係唔想食   所以覺得唔好味   埋單 $95   之得食麥記好過   話哂薯條都好味嘛 ~

番屋企抖咗幾個字就同里奧大人換衫出發做機   做咗 15 分鐘咋   好過無啦 ~

~~~~

今朝坐巴士   我坐喺隔離個肥女人度   我一坐埋去佢突然手 Fing Fing   再拎紙巾出嚟 "掩"鼻   又係咁郁同發出 "摺摺" 聲   我以為自己踩 "紙"   好驚啦   後尾佢無啦啦同空氣講   "好臭呀   都唔知啲人點解噴香水好似噴殺蟲水咁 ?!   咁即係話我啦   因為我噴咗香水嘛   但我無理佢   聽 MP3 瞓覺   我淨係噴咗 3 下香水喺衫領同頭髮   唔通真係多得滯 ?!   定係佢無品呢 ~

今朝食腿蛋治烘底 (走牛油要熟蛋) + 奶茶 ($15)   好耐無食過煎咗火腿嘅腿蛋治喇   所以覺得好好味呀 ~

老細 Off 呀   Free 到爆 ~

晏晝同里奧大人啲舊同事 BBQ   好開心呀 ~

粟米雞粒 + 脆肉瓜魚蛋粉絲煲 + 跑步機 ( APR-2008 )

尋日真係唔知道自己係咪真係番緊工   因為我不停 MSN   又不停遊 Blog 咁   好唔真實呀 ~

有朋友 6 月中會自由行去泰國   好想去呀...本來之前想同里奧大人去泰國   但硬係覺得人生路不熟   無咩安全感   所以先去台灣   依家朋友去泰國   又令到我想去泰國喇 ~

尋晚可以準時放工   咁啱又有巴士   所以好快可以番到屋企   之後再做機   做完先去街市買菜   見到粟米五蚊一份   即買   再買五蚊十一粒魚蛋 就番屋企 Ready 晚餐喇 ~

是日晚餐 : 粟米雞粒 + 脆肉瓜魚蛋粉絲煲

粟米雞粒 - 時間關係   所以將粟米切粒   連同雞粒用海鮮醬同埋少少黑椒粉炒到熟為止   又甜又辣咁   好正呀 ~

脆玉瓜魚蛋粉絲煲 - 為咗用埋啲就過期嘅雞粉   所以先整呢個餸   不過又幾簡單同好味喎   最緊要呢個餸加埋都唔駛十蚊咁先正嘛 ~

我連續食咗 6 餐脆肉瓜   所以開始有啲憎食脆肉瓜呀 ~

尋晚覺得自己好勁   因為食飽飯   沖涼之後就一路按腳一路飲杯黑木耳   再食兩隻香蕉   已經起哂梅花點同埋開始好腍   同埋一件大蛋糕   就嚟過期   真係唔肥都幾難呀 ~

~~~~

今朝都仲係好涼   不過就好舒服 ~

我依家諗住逢星期五會比自己 Relax 啲   所以早午晚餐都會比自己食飽啲   所以今朝食咗五香肉丁炸菜肉絲米粉 + 奶茶 ($18)   啲雪菜勁鹹   我食雪菜肉絲好麻煩   為我係唔食啲肉絲嘅   所以要撩哂出嚟先食   如果時間太趕就唔可以食㗎喇 ~

逢星期五番工比較慘   因為朋友要忙 Report   所以唔可以 MSN 得咁密   唔好阻住人嘛 ~

晏晝帶飯   見到啲翠肉瓜都覺得悶   但唔可能唔帶疏菜嘛 ~

依家覺得男人啲心態真係好難明   好似里奧大人咁   佢好抗拒拎我個得意銀包仔買嘢   但佢見個袋好重時   又會好主動幫我拎個大豬袋㗎噃   但佢拎嘅時候係豬臉向外嘅   哈哈 ~

脆肉瓜粒雞絲炒飯 + 精緻瓜粒 + 跑步機 ( APR-2008 )

尋晚知道里奧大人要 8 點先番到屋企   所以我都可以為自己編排好啲時間   唔駛下下咁趕嘛 ~

不過都係要放工即刻走   因為走咗班車要等 10 至 10 分鐘   所以唔走唔得 ~

我依家多數番屋企換衫褲就去做機   所以會諗定兩晚嘅餸菜   唔係再去街市買餸就會好趕   好辛苦   同埋決定星期五唔煮飯   因為我真係需要多啲私人時間做自己鍾意嘅嘢   就係睇書 ~

是日晚餐 - 脆肉瓜粒雞絲炒飯 + 精緻瓜粒

脆肉瓜粒雞絲炒飯 - 雞絲用豉油 生粉同糖醃一晚   脆肉瓜切粒   加老抽生抽同蛋炒埋一堆就搞掂   啲冷飯係之前連臘腸蒸嘅飯嚟   好好味呀 ~

精緻瓜粒 - 原來係勁花時間去切粒   本來想放棄   但做咗開頭無理由唔做埋去   同埋我唔想又係炒一嚿嚿嘅脆玉瓜   費事里奧大人話悶啦   細細粒爽爽哋幾得意㗎   咁又當係一個新菜式   幾好呀 ~

做完機好攰   再加埋煮飯   搞到無咩胃口   所以用辣腐乳撈飯   里奧大人問點解用腐乳撈飯   我話好攰   無咩胃口   所以食啲辣嘢刺激一下味蕾囉 ~

里奧大人見我咁攰   所以主動話洗碗   我梗係話好啦   仲聲明唔好要我執手尾   不過最後都要我執手尾   因為無抹爐頭周圍   無掉垃圾   無啦啦一隻手套放喺廚櫃   其實佢仲應該要用消毒藥水抹地㗎   不過見佢做得都幾好   比佢抖下咋 ~

之後再沖涼再飲杯黑木耳就睇電視   叫做 Relax 下咁啦 ~

呢排瞓得唔好   所以 10 點半就瞓喇 ~

~~~~

今朝又涼咗   不過覺得好舒服   因為我鍾意着外套遮肥肉 ~

番到公司附近見時間尚早   所以食芝蛋治烘底 + 奶茶 ($15)   話明要熟蛋   但都好似生生哋咁嘅 ~

唔駛點講   番到公司都係上網遊 Blog 咁囉 ~

晏晝同里奧大人去赤丸食 Lunch   食冷烏冬 + 煎餃子 + 煎肉腸 + 天婦羅南瓜 + 可樂 ...食完行一陣就走喇   不過勁搞笑   里奧大人話要低調   所以只可撓手   不可拖手喎   佢公司啲人都知佢結咗婚   做咩要低調呢 ?!   唔通佢真係以為自己係馬英九 ?!   驚 Fans 唔鍾意 ?!   下次再係咁   我唔會再同佢食 Lunch   因為我覺得啲感覺好古怪 ~

真係唔明點解   唔通結咗婚生咗仔就唔會理自己儀容嘅 ?!  今日見到我 Partner 啲頭髮後面係 "拱" 起   瞓醒無梳頭嗰隻呀   最恐怖佢係成日抓頭   仲有   我做咗年幾   佢髮型無變   係老土短髮   日日都係 Tee + 牛仔褲波鞋   唔悶嘅咩 ?!   最難頂係件企領 "Where" 哂同埋件風褸褪哂色都照着番工   唔係睇唔起人   係出嚟番工見人   點可以咁寒酸㗎   平都有靚嘢家嘛   講真   女人都要扮下家嘛   同埋最最最最難頂係佢喺公司着嗰件褸   我未見過佢拎番屋企洗㗎   就算過年放幾日假都仲喺度呀   好污糟咁囉 ~

臘腸雞翼 + XO 醬炒脆肉瓜 + 香飯 + 酸薑皮蛋 + 跑步機 ( APR-2008 )

尋日里奧大人第一日番工   好在個 CEO Manager 同啲 Assistant 都好好   咁我都放心啲   不過最搞笑係里奧大人有 2 位同事係佢 N 年前嘅同事   世界真細小   所以真係做人留一線   他朝好相見係真呀 ~

是日行程 -  做機 -> 煮飯 -> 煲中藥 -> 開機洗衫 -> 煲紅棗黑木耳 -> 收衫 -> 洗碗 ->  晾衫 -> 熨衫 ~

尋晚放工即走   因為趕住做機   之後就煮飯   煲中藥同埋開機洗衫   里奧大人 8 點幾終於番屋企呀 ~

是日晚餐 - 臘腸雞翼 + XO 醬炒脆肉瓜 + 香飯 + 酸薑皮蛋

臘腸雞翼 - 其實係臘腸同鹽焗雞翼   但擺出嚟嘅外型似臘腸包住啲雞翼呀 ~

XO 醬炒脆肉瓜 - 想惹味啲   所以用 XO 醬 ~

香飯 - 因為我放咗臘腸喺飯面蒸   所以啲飯好香好好味 ~

酸薑皮蛋 - 驚啲酸薑會變壞   想清埋去 ~

食完就梗係我洗碗   真係攰到 "眼癱癱" 呀 ~

洗完碗再飲杯黑木耳就沖涼   之後再敷 Mask   因為女人要 Keep 住保養呀 ~

諗住睇電視 Relax   點知無線幾套劇都用埋同一堆人   混淆到無心機睇 ~

唔想熨衫   但唔熨唔得   因為成兩呎高   再唔熨就會無衫着呀 ~

唔知點解呢排瞓覺隻腳成日抽筋   唔通做運動用錯力 ?!

~~~~

今朝里奧大人北上   所以得我一個坐車番工   突然又毛毛雨又涷   真係比啲天氣玩謝 ~

想食甜嘢   所以食芝腿菠蘿包 + 奶茶 ($16)   好飽呀 ~

番到公司又係種菇菇   好在晏晝同媽咪去美心皇宮飲茶   食鳳爪排骨飯 + 山竹牛肉 + 蛋散   個蛋散超好味呀   食完都飽飽哋   唔想再食其他嘢   同埋無咩好選擇   今餐只係飲咗 $102   媽咪係都要請   唔駛洗錢有得食   所以好開心呀 ~

熟食中心 + 跑步機 ( APR-2008 )

我估我去完旅行仲未抖足精神   所以成日都好攰   番到屋企又唔願郁   自己都覺得好懶呀 ~

本來真係好想煮飯   之前已經醃好埋雞翼   又買埋脆肉瓜添   但難得里奧大人仲未番工   咁無理由唔出去食吖   無謂嘥時間煮嘛    到里奧大人番新工好忙   我唔煮都唔得啦   所以我要好好享受里奧大人唔駛番工嘅日子 ~

去到熟食中心   諗住睇下邊間小菜多人食就去邊間食   可能 6 點幾時間尚早嘅關係   所以無咩人   求其去間叫 "三小姐" 度試下   因為呢間有 2 枱人喺度食緊晚飯 ~

食豉椒炒蜆 ($38) + 魚香海鮮燒豆腐煲 ($48) + 涼瓜炒牛肉 ($48) + 豉骨陳村粉 ($38) + 1 支啤酒 ($15)   啲味太濃   所以里奧大人飲啤酒   我都飲咗 3 啖   覺得飲完個肚好脹超辛苦   最後食剩啲肉同陳村粉   所以留番黎帶飯 ~

番到屋企又抖 1 個鐘就同里奧大人去做機   我鍾意一齊做機   因為無咁悶   傾唔到偈   望下個樣都好吖   好過一個人都唔識嘛 ~

今次真係要 11 點前瞓呀   因為里奧大人聽日番新工   所以要 6 點 45 分起身   .咁就可以一齊食早餐先番工   橫掂大家都同一區嘛 ~

~~~~

今朝同里奧大人一齊坐車番工   排隊等車時   里奧大人發覺無帶銀包   要番屋企攞   激到我死   因為臨出門口時我已經提佢帶齊銀包電話   佢話有喇   點知最後都係漏咗   咁樣咪自己嘥哂啲時間囉 ~

同里奧大人食早餐   食炸菜肉絲出前一丁 + 奶茶   里奧大人食火腿鮑絲通粉 + 奶茶   由於里奧大人份早餐好遲先到   所以食到好趕   好可憐呀 ~

番到公司呢   做少少嘢就要寫埋台北旅行個 Blog   好在有啲寄託啫   唔係唔知點捱 ~

晏晝帶飯   油到爆   所以食咗一半食唔落喇 ~

今日係里奧大人份第一日番新工   希望做得開心啦 ~

台北手信 ( APR-2008 )

衛生巾棉花糖

保險套朱古力

膠布朱古力

真空粟米 + 草梅糖 + 綠茶糖

魷魚絲

牛軋糖 + 鳳梨酥 + 小麻糬

阿婆魚酥 + 鐵蛋 + 蝦薯餅 + 蝦餅

粉寒天 + 黑糖糕 + 豬肉紙 + 阿里山珠露茶葉 + XO 醬 + 果涷粉 + 沙茶醬

黑糖 + 薑味黑糖 + 度小月辣味肉燥 + 蒸肉粉 + Wasabi + 粉圓

亞默蛋糕

由於今次係自由行關係   買嘢要就住就住   因為里奧大人要買書   驚行李超重   所以今次只係 2 個喼去   2 個喼 +  4 大袋番嚟   真係好開心   不過拎到死死下 ~

黑椒牛仔骨 + 菜心 + 花膠蟲草湯包 + 跑步機 ( APR-2008 )

尋日做完機就番屋企抖抖   睇下報紙咁   之後約賓姑佢哋食 Tea   雖然係 Tea 但份量都唔少   我食墨丸魚餃金邊粉   里奧大人食干炒三絲意粉 ~

食完賓姑就上我屋企   因為要里奧大人教佢做功課   我就喺度執嘢同熨衫   再煲川貝雪梨水   仲忙過佢哋做功課呀 ~

佢走咗我就開始煮飯喇   我覺得好耐無煮飯咁   所以都好似唔知道由邊度做起咁 ~

是日晚餐 - 黑椒牛仔骨 + 菜心 + 花膠蟲草湯包

黑椒牛仔骨 - 十分方便   只用韓式醃肉醬醃幾個鐘就搞掂   不過煎嘅時候就好快燶囉   同埋唔知點解次次都煎到好鬼 "鞋"   里奧大人話食一塊之後個口就好攰喎...

菜心 - 好似好耐無食過菜咁   所以覺得好清甜   唔想蘸蠔油   所以用薑蔥蓉加豉油代替蠔油   好好味 ~

花膠蟲草湯包 - 係之前喺百佳買   接近 $40/包   煲出嚟啲顏色好深色都幾恐佈   但啲味道又唔錯噃 ~

沖涼之後就同里奧大人一齊睇獎門人   好好笑呀 ~

之後食吓台灣買嘅亞默蛋糕   因為襯啲蛋糕口感仲非常 Soft   同埋就到 Expiry Date   所以要快啲食 ~

里奧大人仲未番新工   所以可以夜瞓   我又想陪佢多一陣   所以又攪到我都夜瞓 ~

~~~~

今朝上車無耐已經瞓着咗   真係好少會咁   鬼咩   尋晚成日發惡夢   發夢見到鬼呀   幾驚呀 ~

唔係太餓   所以食奶油多 + 奶茶 ($13) ~

番到公司呢   又係種菇 ~

晏晝帶飯   好在有我最鍾意嘅牛仔骨   所以都好享受呢個 Lunch ~

落雨好選擇 @ 大家樂 + 跑步機 ( APR-2008 )

尋日大風大雨到不得了   就算開埋遮等巴士都吹到成身濕哂 ~

唔想里奧大人行到周身濕   所以去大家樂   突然好肚餓   所以同里奧大人 Share 食德國大熱狗 + 叉燒湯瀨 + 蜜汁雞翼拚烘蒜蓉包   最後飽到上喉嚨   之後去百佳買餸   想買豬扒同鯇魚   點知無哂   3 點幾咋噃   咁快比人搶哂   諗下其實係啲人驚打風   所以買定番屋企   應該係咁喇 ~

番到屋企坐陣   執下嘢   煲下藥又要食晚飯喇   里奧大人話丈突然好想食飯   但又想食扒   但最緊要係快   所以又要去大家樂食雜扒餐 + 油雞燒鴨飯套餐 ($72)   實在太多肉喇   所以都係食唔哂個扒   嘥哂 ~

太飽喇   之後同里奧大人行下 Jusco 就走喇 ~

抖一個鐘又去做機   好在 Join 咗體育館   如果唔係都唔駛做運動 ~

難得星期六   所以睇電視睇到 12 點幾先捨得瞓呀 ~

~~~~

今朝唔番得教會   因為水務處約咗 12 點至 12 點半睇廁所天花板呀 ~

所以同里奧大人一齊 10 點起身   再他他條條食早餐   食咗腸 + 煙肉 + 蛋公仔麵拚多士...飲咖啡    因為我覺得假期飲咖啡係好 Relax 呀 ~ 

12 點 15 分 都未見水務處啲人   所以我先去做機   因為體育館 1 點 Close   所以迫於無奈留里奧大人喺屋企等   點知水務處甩底   12 點 45 分都未到   里奧大人只可以做 10 幾分鐘機   不過好過無喎 ~

之後去街市買 Pack 牛仔骨 ($33) 同 1 斤菜心 ($9) 就再行 Jusco 買防潮箱   咁啱 Jusco 有台灣 Promotion   比我睇到有八仙果   就係喺台灣無買到果個牌子呀   所以即刻買 3 包 ($47/包)   台灣好似 HK$3x 買到   不過無辦法啦   鬼叫自己當時買唔到咩   依家有得買真係好好彩㗎喇 ~

住家飯 @ 奶奶屋企 ( APR-2008 )

尋日無啦啦勁多嘢做   要係臨收工先多嘢做嗰隻喎   搞到我幾緊張呀   唔係驚做唔切   而係唔想阻住我見屋企人嘅時間啫 ~

 
里奧大人要去媽咪屋企附近洗牙   可以順便帶埋啲手信   洗完牙仲可以去媽咪屋企 Hea 下   而我就放工番屋企 Join 埋里奧大人同媽咪一齊去奶奶屋企食飯   最開心係可以帶埋深愛嘅朱朱一齊去嘛 ~

去到傾下偈又食飯喇   有魚 + 豉油雞 + 燒肉 + 菜 + 蕃茄薯仔魚湯...清清哋   啱哂我 ~

8 點幾要走喇   因為媽味要趕住番屋企睇 "古靈精探 " 大結局呀 ~

番到屋企煲中藥   煲完都成 11 點   再睇下電視就諗住瞓   點知里奧大人居然食豬肉紙   幾吸引呀   遞咗 2 次都忍到   但遞第 3 次   終於忍唔住要食喇   真係好似紙咁薄好好味 ~

~~~~

今朝自己食早餐咋   食芝腿治烘底 + 好立克 ($15) ~ 

到公司淨係 MSN 上網 遊 Blog   個個都係咁   不如改為 5 日制好過啦   慳番啲電費   環保嘛 ~

放工即走啦   因為好想快啲見到里奧大人呀 ~

尚壽司 + 跑步機 ( APR-2008 )

真係無辦法   去完旅行真係好攰   又成堆嘢未執   仲邊有心情煮飯吖   加上里奧大人依家放緊假   所以實喺屋企等我   咁咪即係迫緊我快快手煮飯   唔好喇化   所以依排多數會出去食晚飯 ~

尋日全日食甜嘢   所以夜晚好想食鹹嘢   於是就去咗食壽司喇   食咗海膽軍艦 + 加洲卷 + 軟殼蟹手卷 + 三文魚手卷 + 醋鯖魚壽司 + 八爪魚壽司 + 紫菜蝦卷 + 炭燒雞骨肉腸 + 帶子裙邊 + 麵豉湯   埋單 $172   唔係好飽   但飲咗麵豉湯個肚好脹囉 ~

食完番屋企煲中藥   又執手信   真係好攰   但都迫自己去做機   難得里奧大人肯陪我嘛 ~

一心諗住 11 點瞓   點知整呢樣嗰樣又成 12 點先瞓 ~

~~~~

半夜 3 點幾   見里奧大人無啦啦刷牙   原來話頭先餓得滯起身食蛋糕   又會咁恐怖嘅 ~

今朝遲咗出門口   所以買魚肉燒賣粉果 ($10) 番公司食 ~

番到公司有嘢唔願做   但又必須做   之後又整下相咁   都仲係有 Holiday Mood   好在聽日係星期六啫 ~

晏晝食牛筋米 ($19)   牛筋真係只可能一嚿起兩嚿止   食得多真係好漏 ~

我番來喇 ( APR-2008 )

感謝神嘅保守   讓我同里奧大人平安腳步番到香港   番到屋企都 11 點幾   梳洗完成 12 點幾先瞓呀   好攰呢   講下去台北感受先 ~

幾日都天色暗暗   好大霧   不過無落過雨   感謝神保守 ~

同里奧大人係自由行   最主要係買書同食嘢   所以第一件事係買有捷運站沿線嘅台北地圖   點知   想去嘅地方喺地圖裡面係 Cut 咗嘅.   唔知有無攪錯 ~

去到台北第一個感覺   係同大陸無咩分別   里奧大人強調係同幾十年前嘅大陸喎...啲地方好舊   又多   台灣人多數用電單車代步   所以好多時喺馬路會見到電單車隊   十幾廿架電單車喺街度   壯觀呀 ~

台北啲人好有禮貌   里奧大人幫我影相時佢哋會停低   等我影完先行   或者係喺里奧大人後面行   絕對影響唔到我哋   抵讚   的士司機又好有禮貌   短程都係咁   又早安又 "些些"   真係令人好舒服   又係好抵讚 ~

夜晚去掃街   梗係去到邊食到邊㗎啦   點知街頭行到街尾都唔見一個垃圾桶   一路食一路楂住啲牙簽   一袋二袋咁   又要影相   真係成手都係嘢咁   都唔明點解唔擺多啲垃圾桶喺街   但奇怪喺條街又無垃圾 (牙簽 / 膠袋) 㗎噃   唔通啲人拎番屋企先掉 ~

街頭小食真係好好好好食   我都豁出去    肥又食  辣又食   炸又食   涷又食   總之係特色都食   台北好得意   有咩好 Hit  嘅嘢就會一鍋蜂咁開   譬如炸雞好 Hit 就周街都係...所以其實去夜市食嘢   行一度就可以   因為行另一個夜市又係食番呢啲嘢   只係好唔好食   無咩特別 ~

不斷食嘢又無做運動   但無肥過喎   只係行到腳都腫埋咁啫 ~

第 4 日終於食滯咗   食完早餐已經再無意慾食任何嘢   簡直係有想嘔嘅感覺   原來食滯都好辛苦下 ~

喺台北食得太多肉   食到個口好攰   所以番到香港   必須要停一停把口或者食啲軟身啲嘅嘢   同埋食下麥皮降膽固醇咁   仲有就係今晚一定要做跑步機呀 ~

啲相要執呀   所以要遲啲先有相睇   乖呀   麻煩大家等下先啦下 ~

食食食 ♡ 台北 DAY 4 ( 16-APR-2008 )

( 16-APR-2008 )

無哂台幣喇   所以要早啲起身去銀行兌換台幣   換咗 HK$1,000   應該夠駛喇啩 ~

去丹堤咖啡食早餐   就係呢杯咖啡太濃喇   搞到我個胃勁唔服   勁想嘔   仲要一路行一路搽平安膏止嘔呀   幾核突呀 ~

食完番酒店 Check-out 再打的去三越   因為要買亞默蛋糕   好好味㗎   所以買咗 3 盒   之後再去買魷魚絲 + 黑糖 + 露珠茶做手信 ~

行行下見到燉蛋好得意   所以買嚟食   好好食呀 ~

好懷念夜市食嗰碗蚵仔麵線   所以再去 Food Court 食   雖然多料   但始終唔夠夜市咁好味囉 ~

台北真係好多人楂電單車   有啲仲一家大細坐埋   其實佢哋知唔知好危險嘅呢 ?!

食完又打的去買杏仁豬肉紙做手信 (註: 係紙咁簿嘅紙   Paper 呀)   買咗 2 包豬肉紙同嬰兒豬肉鬆   講真   如果唔係飲食男女同肥媽介紹過   講到好正咁   點都唔會去呀   因為真係勁勁勁隔涉   如果買 1 包豬肉紙 (NT$240) 就蝕喇   因為打的來回都要 NT$400   真係妹仔大過主人婆呀 ~

之後再去隔離舖買咗2 Pack 鳳梨酥就番酒店拎行李去機場喇   途中再去維格買鳳梨酥做手信   一入到去就買鳳梨酥   買完即走   因為架的士係跳標等我哋呀   唔快唔得囉   今次去機場好抵   因為只需要 NT$ 800   一般係要 NT$1,000 - NT$1,200   本來酒店都可以安排車到機場 (NT$400/人)   但可能同埋其他人一齊坐   所以唔想   倒不如舒舒服服同里奧大人打的算喇 ~

去到機場   Check-in 後無嘢做   咁唯有去 Burger King 度食嘢囉   食咗個餐   NT$160   本來想最後衝刺買杯珍奶茶㗎   但要 NT$85   出面最貴都係 NT$35   所以唔飲喇   其實都係平過香港   但硬係覺得唔抵咁囉 ~

上咗機無耐又有飛機餐   淨係食生果同飲 Juice   因為實在太飽喇 ~

此行最搞笑係臨上機前去買手信   個 Sales 妹妹話里奧大人似馬英九   講咗幾次   搞到里奧大人尷尷尬尬咁   真係笑到我甩肺呀 ~

呢日行程完畢 ^^

食食食 ♡ 台北 DAY 3 ( 15-APR-2008 )

( 15-APR-2008 )

9 點半起身   食埋酒店嘅早餐   牛肉麵   又估唔到好好味喎   啲麵好煙韌呀   正呀 ~

食完又打的去台北車站   再坐巴士 去九份   又要坐個幾鐘頭先去到呀 ~

山長水遠去到   唔肚餓都要食呀   食綜合丸麵 (貢丸 + 墨魚丸 + 豬肉丸)   墨魚丸正都不得了   所以再食多碗   唔好以為用碗做單位會係好多粒   實際上1 碗得 3 大粒咋   不過食得太多墨魚丸會好漏   都係少食多滋味好嘅~

綜合丸 - 貢丸 + 墨魚丸 + 豬肉丸   超彈牙又好味

貢丸 - 好多餡又唔油   香港嗰啲係好多油喺裡面㗎

墨魚丸 - 因為實在太好味   好有墨魚味又彈牙   去九份必食呀

食完再食炸臭豆腐 + 紅糟素肉圓 + 雪條 + 粉圓   食完就買有機葋蒻同八仙果做手信就走喇 ~

炸臭豆腐 - 香口但好乾

紅糟素肉圓 - 餡係南乳齋麵根   都幾煙韌但超多油

粉圓 - 糖水唔甜   好味   粉圓又煙韌   一定要食   因為自己勁鍾意食

再轉公車到金瓜石   純粹影相   無咩特別 ~

之後坐公車番台北喇   喺車度瞓咗陣   精神好多   落車第一時間又係買珍珠奶茶   再殺入去鼎泰豐   食冷盤 +  2 籠蟹粉小籠包 + 小籠包 + 菜肉雲吞湯   NT$740 (約 HK$196)   今餐真係好滿足呀 ~

珍珠奶茶 - 外賣手挽好方便

冷拌 - 爽爽哋幾好味

蟹粉小籠包 - 一口一個   皮薄多汁   超級正正正正

小籠包 - 一樣係皮薄多汁

菜肉雲吞湯 - 好清   好好味   又係皮薄餡靚

食完行下又打的番酒店抖抖   之後再去西門町   同銅鑼灣無分別   所以無咩特別去行   不過見到有魷魚羹同魯肉飯...咪又食下囉   里奧大人又話再食多次柯仔煎添   但其實我真係好鬼飽   但又好想試魯肉飯   .所以拚條命都去食 ~

魯肉飯 - 細細碗   甜甜哋   好食過自己整好多呀

魷魚羹 - 好似魚肉豌仔翅咁   不過係豬肉釀魷魚

蚵仔煎 - 都係士林夜市好味啲

特登去西門町   點知無咩特別嘢睇   不過又見到鹽水雞   所以買番酒店慢慢食 ~

時間尚早   所以就行到老遠嘅 Carrefour   買咗牛頭牌沙茶醬   好大罐都係 NT$160   不過唔知香港 City'super 買幾錢喎   之後再買 2  Pack 蒟蒻粉 + 粉圓 + 2 Pack 蒸肉粉就走喇   蒸肉粉好平   1 Pack 有 3 盒嘅價錢仲平過香港 1 盒   唔買係絕對無可能呀 ~

聽日要走喇   所以早啲打的番酒店執嘢 ~

呢日行程完畢 ^^

食食食 ♡ 台北 DAY 2 ( 14-APR-2008 )

( 14-APR-2008 )

9 點起身   食完酒店包嘅早餐就出發去淡水喇 ~

首先打的去台北車站再轉捷運去淡水   因為台北去淡水要成 45 分鐘   打的好貴㗎 ~

天氣好好   所以副超可以大派用場   里奧大人無帶超   所以要去買呀   咁曬無超點得呢   好在我都有收獲   就係買咗副粗框平光鏡 (NT$390)   買嚟玩下都好吖   喺香港閒閒哋都要幾百蚊喎 ~

買完又對住本 Guide Book 搵嘢食喇   淡水好細   所以好快搵到   又係掃街   食咗巨無霸雪糕 + 炭烤泡菜臭豆腐 + 炸蝦卷 + 黑橋牌香腸 + 珍珠奶茶 + 擔仔麵 + 酸梅湯 ~

炭烤泡菜臭豆腐 - 諗住好辣   點知啲都唔辣   不過濕濕哋又幾好味

炸蝦卷 - 得個脆字   無咩特別

黑橋牌香賜 - 著名台灣香腸   又係好好味

珍珠奶茶 - NT$25 (約 HK$7)   係咪好抵呀   不過無咩味   唔緊要   我旨在食珍珠啫   啲珍珠多香港 6 倍呀   飲完杯嘢已經好飽

擔仔麵 - 細細碗   .所以試下   味道唔錯

酸梅湯 - 真材實料

去度估唔到有泰國出名嘅 "Naraya" 袋買喎   所以我都買個嚟玩下 (NT$550)   因為去唔到泰國買   唯有買過安慰下自己啦 ~

食完去漁人碼頭睇下   又話好靚   我覺得無咩特別   之後行下條橋   影下相   再去埋 Toilet 就走喇 ~

途經碼頭   見到好大支薯片   之前喺 City'super 做過㗎   所以買嚟試下   好味就好味   不過好鬼熱氣同埋好 "呢 Hea"   簡直係儀態盡失呀   仲要比啲海風吹到成臉成身都係粉   食完覺得個鼻哥窿好慶   所以即刻買支竹蔗水   飲完舒服好多呀 ~

之後再買鐵蛋 + 魚酥 + 蝦片 + M 巾朱古力 + 話梅做手信   再翻兜食黑橋牌糯米腸   食完飽到頂點呀 ~

黑橋牌糯米腸 - 即係糯米包住條腸   可想而知食完有幾飽

好在帶埋環保袋   唔駛一袋二袋   食完買完又要搭捷運再打的番酒店抖抖喇 ~

里奧大人抖咗半個鐘就出發食嘢喇   今次去饒河街夜市同士林夜市食嘢喇   難得見到有生果車   所以即買生果食   買番鬼荔枝 + 哈蜜瓜   好清甜呀   之後再食胡椒包 + 腸 + 生煎包 + 炸雞 ~

胡椒包 - 用土窰烤焗嘅   外脆內軟   又有肉汁   香香辣辣   必食呀

生煎包 - 加醬油膏同辣椒醬一齊食   個包軟軟   又有肉汁   超超超好食呀

今次仲好彩   尋晚食唔到嘅胡椒包   終於比我排隊買到...買唔到又要再等 30 分鐘㗎   不過真係好好好好食呀 ~

炸雞勁大塊   里奧大人又唔食   不過真係好熱氣   所以最後都食剩一半 ~

食完再買生果番酒店食   因為酒店嘅早餐唔係 Buffet   所以無生果任食   我哋又無咩食菜   所以一定要買生果食   食生果都食成一百蚊港紙   雖然貴   但食完舒服好多囉 ~

番到酒店   執下嘢就休息 lu ~

呢日行程完畢 ^^

食食食 ♡ 台北 DAY 1 ( 13-APR-2008 )

( 13-APR-2008 )

終於等到去台北喇   晨早 6 點要起身   6 點半要出門口喇   因為要坐個幾鐘頭車先到機場呀 ~

去到國泰 Check-in   多人到爆   用咗 30 分鐘 Check-in   之後去大家樂食早餐   食完就入閘行一陣   之後就搭 10 點 20 分機去台北 lu   一上機又有飛機餐食   雖然好飽   但個包脆卜卜又幾好味喎 ~

太好喇    11 點幾就飛到台灣喇 ~

同里奧大人係自由行   所以一落機要即刻兌換台幣 (1 : 3.75)   兌換 HK$4,000   之後就坐 飛狗巴士去酒店   因為 Package 包埋   唔駛煩 ~

我哋住四季飯店 (4 星級)   叫做係新咁囉   無設備㗎   仲諗住做 GYM 添   不過就好乾淨   同埋有個按摩浴缸   算係咁啦 ~

酒店 Check-in 之後就即刻打的去食嘢   去誠品附近食 Lunch   食咗牛肉餅 + 牛肉麵 + 酸辣餃子! ~
牛肉餅 - 係牛𦟌   好腍好入味   個包又脆又熱

牛肉麵 - 好油但好好味   不過啲牛肉得 1 塊   仲要係得手指尾咁少

酸辣水餃 - 唔酸唔辣無咩味

食完就去誠品買書   嗰度真係好正   如果香港有個咁大型嘅書店就好喇   今次里奧大人最有收穫   因為啲醫書平香港幾十蚊   唔買真係對唔住自己呀   不過就好重囉 ~

買完書再去樓下 Food Court 食少少嘢   主要目的係想買我至愛嘅珍珠奶茶   真係好好味   再食粉粿 + 豆腐花 + 粉圓   煙煙韌韌又係好好味   食埋真係好飽   再去超市買咗 2 樽仔 XO 醬 + 寒天粉就打的番酒店喇 ~

粉粿 + 粉圓 + 豆腐花 - 又煙韌又滑

番到酒店放低書就出發去華西街夜士掃街   見到咁多嘢   真係好興奮   其實我都好驚肚屙...因為啲小食全部係好辣好油好熱氣   但一場嚟到無理由唔食家嘛   所以咩都唔諗   見到 Guide Book 介紹嗰啲就食嗰啲   食咗烤魷魚 (NT$20) + 炭烤腸 (NT$35) + 鹽酥雞肶 (NT$40) + 麥芽餅 (NT$20) + 炸花枝球 (NT$10) + 蚵仔煎 (NT$50) + 甜不辣 (NT$50) + 沙茶魷魚蒜 (NT$40) + 燒雪糕   樣樣都又平又好味   本來想食埋胡椒包   但要等 30 分鐘   所以放棄喇 ~

烤魷魚 & 燒香腸 - 好好好好味

鹽水雞肶 - 好似鹽焗雞咁.   又係好好好好味

麥芽糖餅 - 無咩特別   但好黐牙

食蚵仔煎嘅地方 - 其實我好怕污糟地方   但係掃街要食得有風味嘛

甜不辣 - 樣樣都好煙韌   但覺得啲醬太甜

雪在燒 - 有磨碎嘅花生糖 (啡色嗰磚) + 莞茜 + 雪糕   又涷又鹹   口感好得意

天氣又唔熱   咁樣掃街真係好正   好有風味 ~

食完就打的番酒店喇   因為今日真係好頻樸   番到酒店第一件事就去浸按摩浴喇   浸咗 10 分鐘   因為好驚浸得耐   啲皮皺哂呀!!

呢日行程完畢 ^^

丸丸丸丸丁+ 鮮蝦雲吞鮑魚麵 + 腐乳唐生菜 + 跑步機 ( APR-2008 )

呢幾晚食得街嘢太多喇   抖咗幾晚   唔係咁慣一下子楂鑊剷   所以求其煮麵食算喇 ~

我就話食丸得啫   因為我好鍾意食丸   但無理由里奧大人都係食丸嘛   所以我特登去街市買半打鮮蝦雲吞 ($12) 同一份唐生菜 ($3) 就趕番屋企開工喇 ~

是日懶餐 : 丸丸丸丸公仔麵 + 鮮蝦雲吞鮑魚麵 + 腐乳唐生菜

丸丸丸丸丁 - 丸 + 出前一丁   全部都係之前打邊爐食剩嘅 ~

鮮蝦雲吞鮑魚麵 - 大大粒雲吞好好味   又方便 ~

腐乳唐生菜 - 三蚊份又甜   無可能唔買嚟煮啦 ~

估唔到區區十粒丸都幾飽下   食完洗完煲完中藥就自己去做機喇   里奧大人考試在即   要拚老命   所以唔陪我喇   不過佢都好擔心我一個人去做機   因為全部係男人呀 ~

里奧大人聽日要考試   所以特登煮紅豆年糕 (罐頭紅豆蓉 + 日本年糕) 比佢食   等佢食完糖水好瞓啲   而我當然要陪佢食啦   雖然好肥   但好好食喎   算吧啦   值得嘅 ~

瘋癲 Cafe Lagoon @ 大埔 ( APR-2008 )

今朝里奧大人 12 點要考試   所以早啲起身爭取時間溫書   而我都同佢一樣咁早起   因為爭取時間同深愛嘅朱朱見面 ~

一番到屋企   朱朱瞓緊   仲要好 "林"   不過我坐咗陣   佢就聞我啲 女人味就醒咗喇   之後同佢一齊去食早餐   食腿蛋治 + 奶茶 ($16)   本來唔想食   但媽咪話朱仔唔食自己嘢 (雞柳)   所以叫我食腿蛋治   比朱朱食火腿喎 ~

食完同朱朱行一陣就番屋企喇   因為我要去洗牙呀   原來真係有一隻蛀牙   所以順便補埋   我好怕洗牙補牙   一聽到 "吱吱" 聲就腳都軟埋   醫生話當音樂咁聽喎   不過我覺得最攞命係補牙嗰下   又冤又麻痺   超攞命呀   今次洗牙 + X-Ray + 補牙要 $720   睇牙真係好鬼貴   但唔睇又唔得呢 ~

睇完牙去 Manning's 逛下   今日好正呀   因為護膚品買滿 $200 有 8 折   即掃 6 盒 Mask 再買化妝棉同香口膠   樣樣都係特價    $430 找數   比平時平咗成百蚊   所以買得好開心 ~

之後同媽咪家姐去 Ruby Tuesday 食晏   食細拼盆 + 肉醬闊條麵 + Mini's Ruby + 沙律   埋單 $255   家姐之前做咗會員就平好多   差唔多半價   今次又係家組請 ~

食完去 Toilet 要拎 Key   佢用個湯殼做廁所牌   真係笑到碌地   好在唔多人行過咋 ~

難得 3 位靚女聚首   所以再去 Haagen Dazs 食雪糕   今次我請喇   媽咪食牛油拖肥雪糕筒   我同家組食香橙醇朱古力同桑梅雪芭   好食但好貴   八十幾蚊   不過一齊食好開心   所以都值得嘅 ~

食完就各自歸家喇   番到屋企即刻執旅行啲嘢   再洗衫燙衫換轉季衫   忙到暈呀 ~

同里奧大人去 Cafe Lagoon...食安格斯牛扒 (8 oz) 配薯菜 + 咖哩雞飯   .埋單只需 $97   因為有 $50 Coupon   不過真係食到人都顛   嗰果度嘈到柝天呀   真係街市都無咁嘈呀   最恐怖係越食越嘈   同里奧大人要 "哄" 到好埋先可以聽到對方講嘢   傾咗幾句拿氧聲食完就走喇   唔係肯定嘈到頭痛呀 ~

今晚又係得我去做機   比咗錢   所以我都會 Keep 住做 ~

聽朝 6 點要起身喇   因為同里奧大人出發去台灣玩   16/4 夜晚先番香港   希望玩得開心啦   因為我好怕天氣唔好落雨呀 ~

各位 Blog 友   17/4 見喇   拜拜

東江雞 @ 大埔 ( APR-2008 )

幾晚無煮飯   生疏哂喇 ~

尋晚里奧大人又係都要我出街食   又係話早啲食早啲做運動喎   真係聽到厭呀   哈哈 ~

本來想食壽司   不過無菜食唔好咋   正確係應該有菜食   不過唔啱我食   因為上次食完碟炒雜菜 (椰菜)   食到我無 "紙" 屙呀   幾辛苦呀   幾驚要塞金油條呀 ~

所以就去食中菜喇   去度無咩人   仲可以對住個電視食飯   幾正呀 ~

食椒鹽白飯魚 + 京都肉排 + 豉汁炒涼瓜   好好味呀   因為樣樣我都好想食   本來仲蠢呀   叫椒鹽排骨   叫完自己覺唔對路先改叫京都肉排   兩樣都係椒鹽   想鹹死咩   不過個肉排唔掂   啲肉用鬆肉粉醃到勁腍   口感極差   但個汁我就好 Like   最搞笑係叫侍應阿姐比碟淮鹽   佢居然比碟鹽   話師傅都係咁整椒鹽白飯魚喎   唔係嘛   淮鹽點同鹽㗎   唔好呃我好喎   埋單 $140 都抵   因為食唔哂   所以我可以帶埋飯   一舉兩得 ~

番到屋企即刻開機洗衫 燙衫 煲中藥   搞掂哂就同里奧大人去做機喇 ~

~~~~

今朝天陰陰   明明唔攰都覺得好攰咁   都係有太陽好啲   個人有活力同生氣 ~

今朝食清清哋   因為晏晝又食番晚剩嘅 3 塊豬扒   所以食奶油多 + 奶茶 ($13) ~

番到公司吽咗成箱菇喇   嚟緊嘅日子點好呀   Y Blog 你真係要生生性性呀 ~

晏晝帶飯   好悶 ~

返 工 「 黑 仔 」 賴 邪 門

如 果 你 是 打 工 仔 ， 是 否 平 日 風 平 浪 靜 ， 但 有 約 會 的 日 子 總 會 碰 上 老 闆 突 然 要 你 加 班 ； 沒 事 做 提 早 關 電 腦 ， 但 放 工 前 又 突 然 有 事 要 開 機 。
網 友 「 littleseal 」 列 出 了 五 大 上 班 信 邪 事 件 ， 如 戴 了 某 條 手 鏈 上 班 一 定 會 做 錯 事 ； 在 某 間 快 餐 食 早 餐 ， 當 日 通 常 會 很 忙 等 。
原 來 不 少 網 友 也 信 邪 ， 「 小 美 玲 」 說 ： 「 如 果 有 人 問 你 （ 工 作 ） 有 無 問 題 ， 一 答 無 問 題 的 話 ， 就 會 突 然 出 現 問 題 ， 而 且 係 大 單 隻 。 所 以 以 後 人 問 我 ， 我 一 定 答 問 題 唔 大 。 」 也 有 一 些 與 風 水 有 關 ， 「 prince86811 」 說 ： 「 我 之 前 公 司 有 一 個 坐 位 ， 邊 個 坐 ， 都 唔 夠 三 個 月 會 俾 人 炒 ， 之 後 就 一 直 長 期 無 人 坐 ， 個 位 係 對 住 5 隻 門 … … 」
有 網 友 認 為 是 心 理 作 用 居 多 ， 雖 然 Net 人 仍 有 遇 過 上 述 情 況 ， 不 過 相 信 是 事 有 湊 巧 ， 與 邪 無 關 。

 

B: 我覺得係關個上司事   唔關風水事囉   因為我公司某部門都成日有人走 ~

做 殯 儀 好 過 做 文 員

今 日 香 港 物 價 飆 升 ， 百 物 騰 貴 ， 有 網 友 打 份 牛 工 趕 不 上 通 脹 ， 打 起 為 先 人 服 務 主 意 來 ： 「 做 文 員 要 英 文 及 格 ， 中 英 文 打 字 ， 識 船 務 ， 要 求 高 ， 人 工 卻 低 ， 成 日 要 OT 只 得 九 千 ； 殯 儀 則 要 求 能 夠 獨 立 守 夜 一 星 期 及 間 中 幫 手 化 妝 換 壽 衣 ， 月 薪 達 二 萬 五 ！ 」 你 會 點 揀 ？
不 少 網 友 表 示 百 無 禁 忌 願 意 一 試 。 「 hk10001 」 坦 言 一 定 揀 殯 儀 ： 「 錢 銀 大 過 天 ， 真 係 做 唔 來 先 算 。 」 網 友 「 PAPER 」 慨 嘆 今 日 港 人 笑 貧 不 笑 娼 ， 無 錢 就 真 係 俾 人 笑 。 「 ronaldino10 」 則 盛 讚 殯 儀 業 前 景 好 ： 「 社 會 老 化 ， 越 來 越 多 人 死 ， 環 境 富 裕 ， 後 人 越 來 越 願 意 使 錢 。 」 「 花 輪 同 學 」 更 稱 若 然 做 好 呢 份 工 ， 令 先 人 高 興 ， 會 有 橫 財 運 。 真 係 講 到 NET 人 都 心 郁 郁 。
然 而 ， 有 網 友 謂 此 行 業 並 非 人 人 都 做 得 。 「 小 美 玲 」 說 八 字 夾 好 重 要 ： 「 唔 夾 就 會 病 ， 咁 搞 法 唔 好 話 25K ， 250K 都 唔 掂 ！ 」 「 快 樂 神 仙 」 則 表 示 要 入 行 都 唔 容 易 ： 「 殯 儀 業 好 多 都 係 由 熟 人 介 紹 入 去 做 ， 又 或 者 家 族 一 向 有 人 做 開 而 帶 入 行 ， 如 果 你 本 身 上 述 兩 種 情 況 都 無 ， 根 本 唔 使 旨 意 入 行 。 」 看 來 要 賺 先 人 錢 都 唔 係 咁 容 易 ， 還 是 腳 踏 實 地 吧 ！

 

 

B: 呢行真係唔易做   見親唔係先人就梗係喊哂口嘅人   心情真係跌到超低點呀    我仲係一個好易急尿嘅人嚟添   咁我肯定唔咁去廁所   谷到有病都似呀   仲有人話成日接觸屍體會有屍味同埋個瞼色會變啞色咁   自問我真係無本事做呢一行囉 ~