脆肉瓜粒雞絲炒飯 + 精緻瓜粒 + 跑步機

尋晚知道里奧大人要八點先番到屋企...所以我都可以為自己編排好 d 時間...唔駛下下咁趕嘛 

不過都係要放工即刻走...因為走咗班車要等十至十五分鐘...所以唔走唔得

我依家多數番屋企換衫褲就去做機...所以會諗定兩晚嘅餸菜...唔係再去街市買餸就會好趕...好辛苦...同埋決定星期五唔煮飯...因為我真係需要多 d 私人時間做自己鍾意嘅嘢...就係睇書... 
是日晚餐 : 脆肉瓜粒雞絲炒飯 + 精緻瓜粒
脆肉瓜粒雞絲炒飯 - 雞絲用豉油...生粉同糖醃一晚...脆肉瓜切粒...加老抽生抽同蛋炒埋一堆就搞掂...d 冷飯係之前連臘腸蒸嘅飯黎...好好味呀...  
精緻瓜粒 - 原來係勁花時間去切粒...本來想放棄...但做咗開頭無理由唔做埋去...同埋我唔想又係炒一舊舊嘅脆玉瓜...費事里奧大人話悶啦...細細粒爽爽地幾得意架...咁又當係一個新菜式...幾好呀

做完機好攰...再加埋煮飯...搞到無咩胃口...所以用辣腐乳撈飯...里奧大人問點解用腐乳撈飯...我話好攰...無咩胃口...所以食 d 辣嘢刺激一下味蕾囉 

里奧大人見我咁攰...所以主動話洗碗...我梗係話好啦...仲聲明唔好要我執手尾...不過最後都要我執手尾...因為無抹爐頭周圍...無掉垃圾...無啦啦一隻手套放喺廚柜...其實佢仲應該要用消毒藥水抹地架...不過見佢做得都幾好...比佢抖下咋

之後再沖涼再飲杯黑木耳就睇電視...叫做 relax 下咁啦

呢排瞓得唔好...所以十點半就瞓喇 

  

     

 

今朝又涼咗...不過覺得好舒服...因為我鍾意着外套遮肥肉 

番到公司附近見時間尚早...所以食芝蛋治烘底 + 奶茶 ($15)...話明要熟蛋...但都好似生生地咁嘅

唔駛點講...番到公司都係上網遊 blog 咁囉

晏晝同里奧大人去赤丸食 lunch...食冷烏冬 + 煎餃子 + 煎肉腸 + 天婦羅南瓜 + 可樂 ...食完行一陣就走喇...不過勁搞笑...里奧大人話要低調...所以只可撓手...不可拖手喎...佢公司 d 人都知佢結咗婚...做咩要低調呢??唔通佢真係以為自己係馬英九??驚 fans 唔鍾意??下次再係咁...我唔會再同佢食 lunch...因為我覺得 d 感覺好古怪 

真係唔明點解...唔通結咗婚生咗仔就唔會理自己儀容嘅??今日見到我 partner d 頭髮後面係 "共" 起...瞓醒無梳頭果隻呀...最恐怖佢係成日 "r" 頭...仲有...我做咗年幾...佢髮型無變 (老土短髮)...日日都係 tee + 牛仔褲波鞋...唔悶嘅咩??最難頂係件企領 "where" 哂同埋件風褸褪哂色都照着番工...唔係睇小人...係要出黎番工見人...點可以咁寒酸架...平都有靚嘢家嘛...講真...女人都要扮下家嘛...同埋最最最最難頂係佢喺公司着果件褸...我未見過佢拎番屋企洗架...就算過年放幾日假都仲喺度呀!!好 "烏租" 呀