被迫的泰國菜 + 跑步機 ( APR-2008 )

一早諗好咗煮咩家嘛   但尋日里奧大人去聽 Seminar   所以同我差唔多時間番到屋企   仲強調話想早啲食飯早啲做運動   咁唯有出街食囉   話食泰國菜都好喎   橫掂想食辣嘢 ~

食咗沙爹炒大蜆 + 馬拉盞炒通菜 + 酸辣鳳爪 + 印尼炒飯    其實都幾搞笑   泰國菜無泰式炒飯   反而有印尼炒飯...不過都幾好味嘅   但個炒蜆就好失望囉   又話大蜆...細隻到不得了   話炒蜆咪算囉   呃人   個鳳爪初初食就好辣   之後越食越甜   好怪咁   埋單 $150 都 OK 啦 ~

食完番到屋企仲要每人飲一大碗隔夜湯先可以去做運動   今次又係做半個鐘跑步機   番屋企沖熱水涼   再一路食蘋果一路做腳底按摩   好 Relax 呀 ~

~~~~

晨早流流肚屙呀   肯定尋晚食得太辣所致   仲想去台灣時食麻辣火鍋添 ~

今朝食芝腿治烘底 + 咖啡 ($15)   呢排飲親咖啡都想嘔   但實在太攰無辦法   不過我只係飲 1/3 啫   太多都受唔到呀 ~

番到公司又幾忙喎   因為一路做一路 MSN   而寫 Blog 就留番 Lunch Time 之後先寫   不得不讚自己   因為時間分配得實在太好喇 ~

媽咪煲咗北芪當參豬展湯   所以晏晝同媽咪去美心皇后飲茶   食懷舊燒腩卷 + 柱候牛雜 + 潮州粉果 + 紫米露 + 馬拉糕   埋單 $142   今次我請   因為唔想媽咪用錢 ~

番到公司做埋啲手尾   就開始專心寫 Blog 喇 ~

閒話一則 - 依家用係屋企或者出街食飯會用公數 (即係家用)   所以我特登買個我好鍾意嘅銀包仔分開啲錢   但唔知點解里奧大人好怕拎住個銀包比錢呢 ~