柱候焗雞扒 + 紅豆糭 + 節瓜鹹蛋肉片湯 ( 11-jun-2012 )

( 11-jun-2012 mon )

星期一啦   好眼瞓呀   正常的 ~

早餐食餐蛋治   但見到人地食麵又好想食麵架喎   所以如果里奧大人或者家姐喺附近番工就好啦   可以一齊食早餐或者午餐   幾咁好呢 ~

嘩   菇場居然忙呀   做到 1233 添呀   幾咁勤力  ~

Lunch 食穀麥片 + 麥精   再食幾塊雞蛋餅   其實唔飽   不過又唔想食到太飽 ~ 

放工即走喇   去街市買餸   買埋聽晚嘅餸   因為聽日會落大雨   都懶得去街市   濕濕立立好討厭 ~

番到屋企樓下   咁啱有人入大堂   咁我都唔駛拍卡就入去喇   我每晚都會睇信箱有無嘢   咁諗住開信箱嘅時候   居然發現原來無帶鎖匙包   搵咗幾次都無呀   即刻打比家姐   問佢喺邊   好在佢喺官塘   所以我叫佢過黎救我呀   好感恩佢有將我屋企門匙跟身咋   唔係我唯有番媽咪度囉   但一袋二袋好鬼重呀   好唔想周圍走囉 ~

家姐同媽咪都問我同一個問題   就係問今朝咪無鎖門囉   佢地唔知我早過里奧大人出門口呢   可能覺得我咁近都咁早出門口呀 ~

上到屋企即搵番鎖匙包先   真係喺另一個袋度   因為尋日換袋嘛   個袋係紅色   我個鎖匙包又係紅色   所以無為意無拎出黎囉   下次真係要睇清楚先得喇 ~

番到屋企即預備晚餐   再開機洗衫   不過今日星期一   個人真係好攰   所以都唔熨衫同拖地咯   留番聽晚先做呢 ~

差唔多 8 點先開餐   實在太熱喇   所以沖完涼先食   不過食完又覺得熱   又要再沖過   暈呀 ~   

是日懶餐 - 柱候焗雞扒 + 紅豆糭 + 節瓜鹹蛋肉片湯

柱候焗雞扒 - 諗住用叉燒醬醃   點知原來無喎   所以求其用柱候醬醃算數   都懶得開火煎   就咁焗算喇   本來唔想整架   不過驚里奧大人就咁食糭無肉唔飽   所以咪焗比佢囉   食唔哂就留番聽日炒麵 ~

紅豆糭 - 媽咪知我鍾意食   所以同相熟舖頭訂   不過今次糯米唔得煙韌囉   唔係仲正   但就好多紅豆   都好大粒嘅   仲有個蛋黃同一件仔肥豬肉   我鍾意食唔熱嘅糭   因為咁樣先煙韌嘛   但里奧大人就要熱食 ~ 

節瓜鹹蛋肉片湯 - 有瓜有湯最好啦   我依家想滾多 d 湯呀   有湯水好似好 d 咁 ~

里奧大人 8 點半放工   番到黎都差唔多 9 點 15 分   即預備晚餐比佢啦   好開心佢都食得哂   因為我真係好怕佢一開暖壺就話咁多咁多食唔哂   我真係覺得好煩   有得食仲度嘈   同埋暖壺份量有幾多呀   點都唔夠你出去食碟豉椒排骨炒麵多啦 ~

今晚同里奧大人講開阿邊個每日用 2 度電   係環保份子   佢就話係咪架   都唔知真定假   咁之前我又講阿邊個出食譜   走個好多城市   用咗幾年時間精心炮製架   佢又話唔知係咪   我忍唔住同里奧大人講   點解同你講親嘢   你都否定咗人先嘅   佢反而話我太易信人   我話有邊個人鍾意同人傾計   一開口就比人打沉先 ?!  咁邊有人鍾意同你傾計 ?!   真係一件好替人開心嘅事   都變成一件好無癮嘅事囉   同埋下下咁懷疑人地   咁嘅心態唔得囉 ~