豉汁釀青椒 + 辣蒜蓉馬拉盞炒飯 + 粟米蛋花湯 ( 3-jun-2012 )

( 3-jun-2012 sun )

今朝起身望鬧鐘已經 9 點   不過見里奧大人未醒   我就再瞓   再醒嘅時候已經 10 點半   我奇怪點解里奧大人唔教鬧鐘起身番主日學   之後我諗住都番唔到教會   就 sms 家姐過黎買嘢   點知里奧大人鬧鐘響   佢仲話剛剛 9 點醒就鬧鐘響   我話依家 10 點半喎   佢即刻睇鐘   係 9 點喎   唏唏唏   原來自己個鬧鐘無咩電   所以 d 時間錯哂   好在唔係要番工   唔係就慘喇 ~

沖埋涼就出去食早餐喇   之後番主日學同崇拜   估唔到家姐 10 點幾已經到咗 Piago 買薯片   丫   Piago 成日有優惠   但多數係星期日 10:00 am - 1 :00 pm 囉   所以次次都無我份   我依家又要番主日學   唔係實陪佢買嘢   佢買完再入元朗   所以我完咗崇拜   佢都差唔多番到黎九龍灣 lu ~

里奧大人就番屋企瞓陣先   我就同家姐去惠康掃貨   好感恩買到出前一丁   買滿 $30 再額外 95 折   所以超抵   買下買下又好多   不過無拎環保袋   但又唔想番屋企拎   所以大家左塞塞右塞塞   左夾夾右夾夾   狼狽到暈   最緊要唔好笑   因為一笑   個人震一震   d 嘢就好易跌哂落地 ~  

番到屋企已經 2 點半   放低嘢就去食 tea 喇   家姐好想食雞肶   所以同佢去大快活   之後一齊睇完鞋就番屋企 lu ~

里奧大人幫家姐 downlaod 電話嘢   我地就傾下計   搞掂哂都 4 點半 lu   家姐番屋企   我就送埋佢上車就去街市買餸喇 ~  

我買嘅魚仔係叫紅米奇   阿姐話因為魚尾黑色部份似米奇老鼠   嘩哈哈哈哈   佢唔講我真係唔知架

是日晚餐 - 豉汁釀青椒 + 辣蒜蓉馬拉盞炒飯 + 粟米蛋花湯

豉汁釀青椒 - 本來想買尖椒   不過難得見到細燈籠椒   所以都係買佢喇   咁我煮完個獻汁   問里奧大人要唔要辣   佢諗都唔諗就話要   所以我係咁易加隻指天椒   不過佢又話辣   話有籽喎   我覺得辣椒要有籽先辣   唔係不如唔好食   嘩哈 ~

辣蒜蓉馬拉盞炒飯 - 尋晚特登煮定多 d 飯   咁今晚就用黎炒飯喇    懶呀   咩調味都無加   就咁 "沈" d 香蒜馬拉盞喺飯面就算喇 ~

粟米蛋花湯 - 本來想蒸脆肉瓜   不過唔記得應該先蒸咗瓜   再用 grill pan 釀青椒   但我用咗鑊黎釀青椒   為咗慳時間   都係滾粟米湯算喇   想有啖蔬菜食下嘛 ~