茄汁洋蔥雞柳 + 素翅粟米蛋花湯 ( 6-JUN-2012 )

( 6-JUN-2012  TUE )

尋晚成 11 點 40 分先瞓   雖然都差唔多瞓到 8 個鐘   但都好鬼攰   好想瞓到 10 點先起身呀 ~

無咩胃口又攰   食奶醬多啦   唔駛咬咁耐   之後 8 卦又嚟食早餐   我又遲到添 ~

菇場靜呀   如果可以瞓覺   我一定瞓到呀 ~

又食 Lunch Box   我鍾意食牛仔骨   所以今日食得好開心 ~

放工即走喇   諗住去超市買生菜   不過唔靚   所以番屋企算數 ~

今晚要快呀   因為約咗家姐游水   所以我番到屋企即刻醃雞扒   煲飯   再開機洗衫 ~ 

是日懶餐 - 茄汁洋蔥雞柳 + 素翅粟米蛋花湯

茄汁洋蔥雞柳 - 簡單又好味   不過其實我又唔鍾意食雞柳喎   好怕啖啖肉 ~ 

素翅粟米蛋花湯 - 無買菜   粟米湯係不二之選   同埋最緊要方便呀 ~

7 點半食完   家姐 8 點上到嚟   差唔多 8 點 15 分就出發去泳池 lu ~ 

其實我同家姐都唔識游水嘛   旨在踢下水咁囉   喺水入面踢下腳   Fing 下手都好啦   反正我成日腰骨痛   踢水當物理治療   呵呵 ~

家姐近視嘛   但無理由帶住副眼鏡游水家嘛   咁我哋就手拖手行去泳池   仲要係 0.6m 嘅泳池   救生員見到都可能覺怪   咁淺水駛唔駛手拖手呀   同埋我哋又捉住啲動物踢水   當浮板咁囉   本來我想去大人池   不過家姐又眼濛濛   我又論論盡盡   都係咪搞   下次等埋里奧大人一齊嚟先 ~

我哋踢到 9 點半就走喇   一離開泳池好鬼凍呀   起哂雞皮   家姐話都係遲少少熱啲先游   不過我想晏晝游   因為想曬下太陽呀 ~

一齊行番屋企   同家姐講唔知點解   游完水好似好鬼餓咁    我話頭先食得飽喎   同埋我踢水之嘛   又唔係真係游   之後家姐問我頭先有無食飯   我話游水前一定要食飯㗎   唔係無力游   家姐係咁笑   話踼水之嘛   講到懶勁真係游水咁 ~

番到屋企真係好想食嘢   家姐又係喎   所以 Share 食一包蝦條   咁里奧大人 10 點都未放工   所以叫埋家姐飲埋里奧大人嗰碗粟米湯   佢咁夜實唔飲嘛   家姐差唔多 10 點半就走喇   之後佢打嚟話飽到有啲頂住個胃 ~

里奧大人差唔多 11 點 15 分先番到屋企   食完飯即沖涼瞓覺喇   真係好少見佢食完飯即沖涼   所以佢真係好攰呢 ~