泰北美食 @ 九龍城 ( 16-sep-2012 )

碎肉生菜包 - 我成日覺得呢個餸無咩味咁   因為 d 肉白雪雪   ( 但其實可以係好難嘅 )   同埋我唔鍾意碎肉   多數肥嘛   不過里奧大人好有興趣試   就試下啦   肉佢最愛   可惜呢次整得好鹹 @.@

我最愛嘅辣椒粉   以前真係一更更咁落架   依家就落 1 更唔夠   無計啦   年紀大   再加埋做完手術   都係要錫身架喇 

拚盤 ( 蝦餅 / 蝦卷 / 蝦片 ) - 我唔想食扎肉   老闆娘話要睇下廚房會轉 d 嘢囉   不過都無轉到嘅   只係小咗扎肉   但里奧大人就話份量就多咗囉  

牛丸冬蔭功湯金邊粉 ( 大辣 ) - umm   今次咩事呀   失哂準呀   嗚嗚嗚嗚

泰星加啤酒 ( 大 )

地方真係好細   不過又好多人幫襯

( 16-sep-2012 sun )

10 點起身   食完早餐   番屋企沖涼   之後就番教會喇 ~

1 點完畢   我去街市買煲湯料   里奧大人就番屋企做公司嘢 ~

woo   番到屋企即煲湯   差唔多 3 點就去大快活食 tea   食完行陣就番屋企   因為唔知里奧大人做唔做得哂公司嘢   如果做得哂就出九龍城食泰菜   做唔哂就我煮飯呢 ~

佢做公司嘢   我就熨衫啦   好感恩佢做得哂呀   飲完碗湯抖陣仲可以瞓本個鐘添呢 ~ 

6 點 15 分出發   感恩去到有巴士   好快出到去呀 ~  

食到太飽喇   所以要散下步   再行埋九龍城廣場   因為我想去十蚊店呀   不過依家都無 $10 嘢好耐啦   所以都改埋名叫 Living Plaza   樣樣 $12   不過咁樣都係抵嘅   因為質數唔差   同埋有 d 嘢平平地買黎玩下都幾好呢 ~

之後再殺入去 Jusco 買 2 對拖鞋   咁我諗住拎定張 Aeon 卡出黎先   點知緊張得滯搵唔到   要停喺度   dup 低個頭好認真咁搵   衰里奧大人整鬼我呀   因為我頭 dup dup 搵嘛   唔知企咗喺邊   當我搵到時   佢手指指我右邊   我正想隊咗張卡去右邊時 ( 以為真係 Cashier )   望到原來係煮食爐 Promotion Counter 黎架   好在我縮得切   唔係樣衰到爆   之後里奧大人一路行一路笑   真係丫 ~

都唔記得開咗間 Jusco   都幾闊落   同埋最正係無咩人   可能 9 點啩 ~  
又係搭巴士番屋企   又係沖完涼再食尋晚買嘅凍芝麻糊   真係超級超級飽呢 ~