黑椒牛仔骨意粉 + 粟米蛋花湯 ( 26-sep-2012 )

( 26-sep-2012 wed )

尋朝同里奧大人出門口   所以趕唔切 8 點 20 分班車   咁今朝自己出門口先   之後我去到 van 仔站   里奧大人打黎話見到我   我見到佢企喺對面條行人天橋企定定望過黎   我話佢好似 d 變態佬偷窺人地咁 ~ 

架 van 仔唔兜入村就最好   10 分鐘肯定可以落車   依家完全唔想搭  6D 喇 ~

早餐有半個鐘食   又可以睇埋報紙   真係好開心   因為我鍾意睇食譜同埋超市有咩減價嘢   哈哈 ~

菇場又忙噃   好快就到 lunch   今日要去萬寧買嘢   所以順便出去食埋牛筋米   食完去買嘢   番到菇場就啱啱好開工   正 ~

放工諗住去超市買洋蔥同西蘭花   不過唔見有   之後又諗起媽咪之前比咗紅蔥頭比我   都唔駛再去另一度買洋蔥啦 ~

番到屋企預備好意粉就開機洗衫   再熨衫   差唔多 7 點半就煮喇   8 點家姐打黎叫我落停車場交收洗地水   因為佢掃咗 10 支   所以又比 2 支我喇 ~

又唔知里奧大人幾點放工   咁我食先喇 ~  
是日懶餐 -黑椒牛仔骨意粉 + 粟米蛋花湯

黑椒牛仔骨意粉 - 其實我好怕煮牛仔骨   d 骨成日唔熟咁嘅   所以我次次都 over cook 架   今次呢幾塊又估唔到咁厚肉   上哂碟剪開先知原來仲係有 d 未熟   嚇到即刻再煮過   我情願食好鞋嘅牛肉   都唔食帶點血嘅牛肉架 ~ 

粟米蛋花湯 - 雞蛋過期   打咗 2 隻都無臭   所以一次過落哂 d 湯度   但水嘅份量無加到   所以超級杰   衰里奧大人話係咪茨汁   特登大力 d 將個碗放落枱   但碗粟米湯係無瀉出黎   d 湯直情係無郁到   杰過茨汁   所以佢話下次唔好再預佢粟米湯   呵呵 ~  

里奧大人 9 點 15 分終於放工   番到黎都 10 點   食完又做下公司嘢   咁我又睇 Ipad 陪下佢囉   睇到入哂神   一望鐘已經 12 點 15 分   嚇到即刻熄機瞓覺呀 ~