泡菜雞柳 ( 18-sep-2012 )

( 18-sep-2012 tue )

依家諗住搭 van 仔番工   個人真係無咁掹咁呀   因為知道大概幾時有車   同埋如果真係無車   可以轉另一架 van 仔番工   再唔係就搭番地鐵   不過   最開心係可以同里奧大人一齊行去地鐵站呀   咁樣又可以傾下計嘛 ~

如果搭到 8 點 20 分班車   咁架 van 仔又唔入村嘅話   基本上 10 分鐘已經到餐廳   咁就可以慢慢嘆早餐架喇 ~

做咗陣嘢又等 lunch time   今日出去食粉   再去銀行拎卡   之後再去萬寧買幾 pack 高露潔牙刷   好感恩係出位價呀   我覺得萬寧出位價嘅嘢真係好平 ~

番到菇場去洗手間時   咁啱會計部新同事又一齊   佢話菇場靜得好恐怖   無聲嘅   又無人同佢食飯   不過佢只係做 Part Time   所以都無咩所謂   用 "恐怖" 黎形容菇場氣氛真係好搞笑   不過真係妳唔現場感受過   又真係唔知菇場係幾咁靜呢 ~

放工即走   番到屋企抖陣就預備晚餐   之後拖地   熱熱地所以又開冷氣   依家天氣其實真係好舒服   如果我唔駛拖地煮飯   應該唔駛開冷氣架喇   自然風真係好鬼正 ~

感恩里奧大人 7 點 15 分就放工   咁 8 點就可以一齊食飯 lu ~

是日懶餐 - 泡菜雞柳

泡菜雞柳 - 1 塊雞柳 + 2 湯匙泡菜 + 2 湯匙韓式辣醬   估唔到出黎嘅效果係微辣   正呀   我超愛辣   但可惜食完就火燒後爛   所以今次辣度係啱啱好   太辣里奧大人就頂唔順架喇 ~

搞掂哂沖完涼差唔多 9 點   依家多數用 Ipad 睇嘢   無理由買咗唔用嘛   哈哈   睇番之前 d 類似 "笑笑小電影" 呢 d   整鬼人真係好好笑   佢地 d 樣真係好驚   之後知道係比人整鬼就喺度傻笑   我覺得外國人先會咁玩得囉 ~