香辣雞中翼 + 蠔油油麥菜苗 ( 12-APR-2024 )

( 12-APR-2024  FRI )

又係半夜熱醒   之後里奧大人又開大 1 度風   但其實我唔蓋被又凍   真係麻鬼煩 ~

我發覺好多時如果熟睡 6 個鐘左右   之後就好難瞓得番   咁我 10 點半就瞓嘛   所以 4 點半起身就最驚   但無可能因為咁而 1 點先瞓嘛   哈哈 ~

里奧大人今日放假   咁佢起身去廁所   之後話尋晚半夜 4 點幾都醒咗   諗起啲激氣嘢   所以出廳覆埋個 Email 先再瞓   希望件事快啲搞掂啦 ~

今朝起身整早餐再煲薑茶   咁我都整咗比自己拎番公司飲呢 ~

早餐食丹麥條   其實食半條都飽   但里奧大人都有 1 條丹麥條   無可能比佢食 1 條半   哈哈 ~

菇場唔忙   大粒唔喺度   所以勁爽呀 ~

Lunch Time 出去行陣   之後再買腸粉同韭菜豬肉餃番菇場慢慢食 ~

仍然唔忙   呢排成日睇福寶啲 Youtube   睇到姜爺爺同宋爺爺唔捨得福寶啲片段   我又會忍唔住喊   所以個人好攰囉 ~

都唔記得幾多點   頂唔順好眼瞓   我伏喺張枱度   應該瞓着咗呀   因為記得自己合埋眼已經即刻瞓着咁   好在今日無大粒喺度咋 ~

里奧大人話唔食個飯盒   話 10 點半先食條丹麥條都好飽   之後話第時放假食 1 條丹麥條就頂到全日   但如果番工就可以 Share 食 1 條   因為真係好飽肚   哈哈 ~

放工即走   番到屋企都預備晚餐 lu ~

因為我食埋里奧大人個飯盒   所以佢自己焗福麵   不知幾開心 ~

是日懶餐 - 香辣雞中翼 + 蠔油油麥菜苗

香辣雞中翼 - 諗唔到煮咩   所以焗雞翼   我覺得 11 隻都好多   但如果里奧大人帶飯就份量啱啱好 ~

蠔油油麥菜苗 - 依家鍾意食菜苗   菠菜苗同菜心苗呢啲   同埋鍾意細細棵   拎都方便啲啦 ~

我問里奧大人福麵有無 "益"  ?!   佢答得好快話所有即食麵都無益   之後我忍唔住笑話其實我係問有無 "益" 味個 "益"   佢又忍唔住笑話講清楚啲啦   哈哈 ~

洗完碗就抖下   之後一齊去公園散步 ~

今晚真係只行半個鐘   因為無咩風呀   里奧大人話遲啲夏天就更加熱   我話仲好   我就係想流多啲汗呢 ~

番到屋企即沖涼   之後可以休息   因為里奧大人晏晝手熨咗衫 ~

同里奧大人一齊睇 "餐餐有宋加"   係覺得好笑先睇咋   所以都唔係成日睇呢 ~

睇多陣 Youtube   今晚 10 點 25 分瞓覺喇 ~