干燒伊麵 + 蠔油菜心苗 ( 14-APR-2024 )

( 14-APR-2024  SUN )

感恩瞓得都唔錯   今朝可以同里奧大人出去食早餐 ~

食完都去里奧大人公司幫手   做到 9 點半左右都走喇 ~

買埋餸走番屋企   今日有啲熱咁 ~

搞掂哂就抖陣   一路睇 Youtube 一路熨 ２ 機衫   咁樣就唔覺攰   哈哈 ～

里奧大人 3 點先放工   餓到我呢   要即去食下午茶喇 ～

食完就去萬寧買嘢   咁我行行下   有個小朋友喺我面前行   之後突然好開心咁企喺我前面同我笑   我笑住問佢做咩嘢呀 ?!   佢又無講嘢   只係甜絲絲咁對住我笑   佢媽咪見到都喺度笑呀   哈哈   咁我同佢講 Bye Bye   佢又講番 Bye Bye 就走喇 ~

去 HKTV Mall 買 2 盒藍莓   好食就今晚再買   其實尋日已經買咗 2 盒   呢期真係好鍾意食藍莓呢 ~

里奧大人話頭先見到姊妹 CF   呢個姊妹好關心里奧大人㗎   之前里奧大人唔舒服瘦咗好多   佢嗰日咁啱有嘢比里奧大人   之後佢要走   但都即刻打比里奧大人問佢咩事瘦咗 ?!   里奧大人同佢講話呢排又係有啲唔舒服   原來 CF 都有咁情況   不過無里奧大人咁嚴重   所以叫里奧大人放鬆啲 ~

之後我同里奧大人講話頭先喺屋企爆喊呀   佢問我咩事 ?!   我話擔心你囉   所以佢話感恩見到 CF   咁等我聽完無咁擔心 ~      

番到屋企即沖涼   里奧大人沖完涼都瞓覺   我就靈修 1 個鐘   之後就睇 Youtube 喇 ~

5 點半預備晚餐   里奧大人瞓到 6 點   不過都未食得   同埋我哋唔太餓   所以今晚 7 點幾先開餐呀 ~

是日晚餐 - 干燒伊麵 + 蠔油菜心苗

干燒伊麵 - 之前買咗罐草菇罐頭   今日有時間   所以的起心肝整干燒伊麵   仲特登買埋韭黃同 2 個大嘅麵餅   但其實下次買 1 個都夠   分埋比里奧大人做 Lunch Box   仲剩 1 盒要留番聽晚食呀   好在里奧大人話好食   唔係佢連食 3 餐都幾慘   哈哈 ~  

蠔油菜心苗 - 本來想買節瓜   但懶得蒸   所以又買番菜心苗 lu ~

洗埋碗就同里奧大人出去行陣   之後買埋藍莓就番屋企喇 ~

沖埋涼就休息一下先   今晚睇 2 集 "美好世界"   大結局都無爛尾   但就有啲啲牽強   哈哈 ~

睇到 11 點先瞓呀   初初仲諗住 10 點半睇得哂添 ~