Fame Deli @ 紅磡 ( 10-APR-2024 )

紐西蘭草飼肉眼 250g ($118)

今次都係叫意粉   我覺得好味呀

好多人食牛扒要 Medium Well 係極限   但我唔係囉   哈哈   我其實未咁接受到有血嘅牛扒呢

香煎美國自然豬梅肉扒 (招牌) ($98) - 好在今次係我切開咋   因為啲豬扒係唔熟   初初以為燈光問題   但見有啲血水   所以肯定係生啦

蕃茄湯 + 牛角包

綠茶雪糕

( 10-APR-2024  WED )

又係半夜熱醒咗   我覺得個身係滾咁㗎   但已經開咗冷氣啦   唔通真係飲咗當參 ?!

早餐食蕎麥五穀提子包   里奧大人就食丹麥條   咁唔駛佢咁悶   嘻嘻 ~

菇場忙下停下   其實咁都唔錯   起碼可以郁下嘛 ~

船頭話個顛婆好鍾意喺廁所冥想   我都知佢話緊阿怪   因為佢真係每次去廁所都接近 20 分鐘   同埋如果佢一知道有人入去廁所   佢又會拿拿聲出番嚟   其實廁所咁鬼污糟   要偷懶都坐喺自己位啦   反正又無人理妳喺個位到做咩嘅 ~

里奧大人陪九龍們姑奶過大埔睇醫生   咁佢順便都問埋對眼嘅情況   聽下醫生意見 ~

Lunch Time 都即出去呀   呢幾日好想食雞翼酸辣米線   所以今日忍唔住去買喇 ~

唔忙就做自己嘢   咁就好快放工呢 ~

今晚睇中醫   醫師話我仍然唔夠氣   體力都係得 20%   我話半夜熱醒但無汗   係咪因為飲咗當參 ?!   佢話因為我唔夠氣   所以依家開嘅藥會以補身為主   每晚飲一次就可以 ~

我問佢要調理幾耐 ?!   佢話 3 個月至半年   不過我話都預咗㗎喇   始終調理都係要一段時間囉 ~

睇完就諗住買燒鴨   但又唔想煮飯   最後都係無買   哈哈 ~

6 點半打比里奧大人   咁啱佢開完會   咁我話去豬豬度等啦 ~

食完就番屋企抖下   無啦啦搞肚痛   好在里奧大人話 8 點先出去行公園咋 ~

抖多陣就出發去行公園   行咗半個鐘都番屋企 lu   因為我好驚又搞肚痛呀 ~

番到屋企即開機洗衫   之後沖涼休息喇 ~

阿妹派比里奧大人嘅時候   話好好食㗎   所以派多 1 包比佢   之後話你識做啦   里奧大人話知啦   妳比咩都會上繳㗎

9 點幾又嚟搞肚痛   今次感覺係會暈嗰隻添呀 ~

我即刻同里奧大人講話搞肚痛   佢已經好緊張   之後我再同佢講我有啲暈 (因為次次想暈之前   個肚有一下係特別痛嘅   同埋係想嘔   之後個人就無氣咁)   里奧大人即刻企喺我身邊   我挨住佢   佢係咁搓我塊臉   我再話我要暈喇   之後合埋眼了   到我醒嘅時候聽到有人叫醒呀醒呀醒呀   原來係里奧大人叫我醒呀 ~

佢話我暈咗 10 秒左右   因為我成個人放軟哂   同埋標緊冷汗   我話今次起身個頭唔痛呀   佢話梗係唔痛啦   都無跌落地下 ~ 

今次好在同里奧大人講暈咋   仍好感恩佢喺屋企呢 ~

排哂毒之後真係舒服好多   但咁都唔係辦法   不過睇過兩個西醫同中醫都話無問題 ~

我同里奧大人講話唔再去呢間食晚餐喇   因為之前食完又係搞肚痛   今次又係咁   真係好驚呢 ~

睇陣 Youtube   今晚 10 點 45 分都瞓覺喇 ~