洋蔥炒豚肉 + 福花 ( 7-APR-2024 )

( 7-APR-2024  SUN )

今朝起身有啲難度   好在沖完涼之後就精神啲喇 ~

着防水靴真係好熱   但其實今朝係涼涼哋   不過我驚一陣落大雨   所以要着呢 ~

本來諗住唔飲凍嘢   不過我熱到出汗呀   所以又要飲凍嘢囉 ~

基本上同里奧大人或者同家姐食嘢   都會 Share 嚟食   但我唔記得邊個係唔會咁㗎   我話咁咪食少樣嘢囉   哈哈

食完就要去里奧大人公司幫手   搞掂就陪阿妹食早餐 ~

之後又陪里奧大人同勁哥去整嘢   不過好快搞掂   咁番番公司坐陣就要番自己教會喇 ~

A 弟兄叫我   見我戴口罩   以為我唔舒服呀   我話想遮下個黑眼圈   哈哈 ~

咁事奉期間   有姊妹叫我   我以為問我嘅事奉崗位   之後佢問我知唔知邊個喺邊 ?!   我話妳認錯人喇   如果我唔戴口罩   應該無人會應錯我喇啩 ~

事奉完就去買麵包同午餐   之後搭車番屋企 lu ~

里奧大人 2 點半先放工   好在我買咗午餐呢 ~

薯仔燜雞拚魚香茄子   我覺得啲雞一入口係有陣味咁   但唔係臭嘅   唔知係咪雪味呢   我有時叫兩餸飯嘅雞   都會有咁情況   所以下次唔會再買係雞嘅餸 lu

生炒骨仍然脆卜卜   所以每次都必叫   但鎮江骨嘅味道就麻麻   食剩呢盒白飯   今晚就唔駛特登再煮飯

3 點左右落好大雨   咁都好嘅   無咁熱同埋我身在家中   哈哈 ~

食完就睇 "美好世界"   之後里奧大人瞓晏覺   我都坐坐下梳化都瞓着咗呀   都應該瞓咗半個鐘頭 ~

睇下 Youtube   差唔多 5 點就飲碗湯先   但其實一陣仲要再飲 ~

今晚 7 點左右先開餐   其實想再晏啲先食   不過聽日番工   都係想早食早休息   哈哈 ~

是日晚餐 - 洋蔥炒豚肉 + 福花

洋蔥炒豚肉 - 食咗少少咋   因為食完兩餸飯啲餸   都食唔落其他   所以里奧大人好奇怪   點解我整多個餸   我話諗住聽日嘅 Lunch Box 係新鮮餸嘛 ~

福花 - 好在整咗咁少   因為食薯仔都食到好飽呀 ~

洗埋碗就開機洗衫   抖陣就做爆汗運動   里奧大人就出去做運動 ~

沖埋涼就睇下 Youtube   之後又打下機   今晚 10 點 45 分都瞓 lu ~