咖哩薯仔燜雞 + 豆角炒飯 + 炸魚皮 (外賣) ( 17-SEP-2024 )

( 17-SEP-2024  TUE )

感恩一覺瞓天光呀   7 點都醒咗   但懶床到 7 點 15 分先起身整早餐呢 ~

早餐食餐包搽花生醬同柚子果醬   間唔中甜甜哋都唔錯 ~

我叫里奧大人唔好喺出面食魚   因為驚啲魚唔熟   佢話食魚片呢 ?!   我話唔得   因為知佢玩嘢咁問   佢再問煎釀三寶啲魚蛋得唔得呀 ?!   我話都唔得   過咗成分鐘   佢又話乳酸菌得唔得呀 ?!   我話你唔駛再諗喇   將啲時間諗啲有用嘅嘢好過啦   笑到佢身都震埋呀   佢又唔知自己頭先係突然靜哂諗緊嘢喎   同埋食物種類佢又唔多識   仲居然諗到乳酸菌   嗰分鐘就係諗埋呢啲食字   真係好無聊   哈哈 ~

食完就同里奧大人一齊番公司   整呢樣嗰樣   只靈修咗 10 分鐘咋   之後都要走人喇 ~

菇場忙下停下   之後見到群組訊息話今日收 4 點   好開心呀 ~

11 點半收到探訪對象電話   原來同我講中秋節快樂   我話真係唔好意思啦   應該係我打比佢   哈哈   其實今朝都 Whatsapp 比佢   估唔到佢咁有心 ~

好感恩佢會話我知生活鎖碎事   因為呢樣係我要關懷之一   之前唔係咁熟嘅時候   真係好難打開話題咁㗎   估唔到今次仲傾咗 15 分鐘添   開心開心 ~

Lunch Time 出去食牛筋河   食完又去買啲菜同榴槤蕃薯   最後買蛋撻比茶記啲人食   之後傾幾句就番菇場喇 ~

阿齋話依家我成日睇貓貓   每次擰轉臉都係見到熊貓   我話佢哋得意嘛   同埋唔駛睇字幕   哈哈 ~

仍然忙下停下   所以好快又 4 點   可以準時放工 ~

去埋惠康買湯丸就番屋企   里奧大人本身放 3 點   點知佢同阿妹做到 4 點半先放工呀 ~

本來諗住去里奧大人同阿妹傾下偈   不過我番上屋企之後   完全唔記得約咗阿妹   原來佢同里奧大人都問我 Whatsapp 喺邊 ?!   但我無睇手機囉 ~

之後里奧大人話佢做咩做完嘢仲唔走 ?!   佢話等埋我   但里奧大話我應該番屋企   阿妹就同佢一齊走啦   真係唔好意思 ~

番到屋企都即預備晚餐   今晚 6 點半可以食得 ~

田師傳乾咖哩即煮醬料

優品 360 只係 $15/盒   所以買 3 盒孝敬里奧大人

阿妹同叻叻請食梨   易姐請食橙   餅乾係細細聲去日本嘅手信   杯麵唔記得邊個請

是日晚餐 - 咖哩薯仔燜雞 + 豆角炒飯 + 炸魚皮 (外賣)

咖哩薯仔燜雞 - 上次買咗 Pack 龍崗雞   用嚟煮咖哩就最好   咁我再加幾條脆皮芝士腸   咁唔駛就咁食雞咁悶嘛 ~   

豆角炒飯 - 里奧大人見到有炒飯就好開心   真係幾乎成碗食哂呀 ~ 

炸魚皮 (外賣) - 好想食呀   所以買包細嘅 ~

洗埋碗就沖涼   今日出咗好多汗好攰呀   所以都唔出去賞月喇 ~

里奧大人就熨衫   等埋佢沖完涼就睇 Anya 套電影   睇咗 2 個鐘   我哋覺得結局比較悶 ~      

睇完都 10 點   再睇陣 Youtube   今晚 11 點先瞓 ~

羅漢齋水晶餃 + 雞扎 + 秘制金錢肚 + 足料糯米雞 (外賣) ( 16-SEP-2024 )

( 16-SEP-2024  MON )

尋晚瞓得麻麻哋呀   唔知係咪飲咗奶茶   同埋晚餐又飲咗杯凍茶呢 ~

早餐食芝麻餐包夾芝士   唔錯唔錯 ~

靈修 15 分鐘就走喇   依家都早咗番工   咁都好㗎   唔駛咁多人喺 Pantry 洗杯 ~

菇場忙呀   所以對眼好攰好攰 ~

Lunch Time 出去買菜   船頭話呢兩個星期六都唔舒服   所以無出街   之後佢衰衰咁話因為無得番工   佢最鍾意就係番工嘛   我話妳可以逢星期六番嚟㗎   但唔駛入公司   阿花都叫佢喺門口望下就得㗎喇   唔好開冷氣開燈嘥電   真係笑鬼死   之後船頭話會影張相   話新蒲崗天晴   因為西瓜好鍾意咁   哈哈 ~

依家又鍾意番帶飯   始終出去食得多好悶   我又來來去去都係食嗰啲更加悶

仍然忙呀   但都會 Skype   哈哈 ~

放工即走   里奧大人今日要番工   差唔多 5 點幾要去拎卡片   咁我可以去埋 360 買嘢先去買晚餐呢 ~

衫初新出嘅時候都買過㗎喇   但得 6 件裝   咁啱里奧大人話要起碼 20 包   呢盒係 12 個裝   我買 2 盒就搞掂

食完就要同里奧大人去搞啲嘢   差唔多 8 點就搞掂 ~

番到屋企即開機洗衫   之後沖涼休息   里奧大人就熨衫 ~

今晚同里奧大人一齊睇 Youtube   咁啱睇到美食之旅   睇佢哋嘅自助餐都唔錯   我越睇越餓囉   但刷咗牙就唔食嘢喇   里奧大人就居然開薯片食   平時佢好少咁家嘛 ~

睇到差唔多 10 點 45 分   我要瞓覺喇 ~

豚肉生薑燒 + 咖哩吉列豬扒飯 (外賣) ( 15-SEP-2024 )

豚肉生薑燒 / 咖哩吉列豬扒飯 - 同里奧大人 Share 食吉豬飯   豚肉飯就大家聽日嘅午餐   一個價錢可以分三餐食真係好抵呀   哈哈

( 15-SEP-2024  SUN )

尋晚瞓得一般   因為成晚諗團隊遊戲點樣玩   但今朝都要同里奧大人一齊起身   因為佢公司有大 Project 要幫手呀 ~

今朝慢慢嘆個早餐   其實平時都係嘅   哈哈 ~

食完早餐即番公司喇   忙完就到我整團隊遊戲物資   里奧大人就要同大胃王開會 ~

我搞到差唔多 12 點   里奧大人啱啱開完會   所以叫埋阿妹一齊去食午餐喇 ~

本來 11 點 45 分出發   但里奧大人開會開遲咗   我哋又要 1 點前番到公司   所以得 45 分鐘食飯咋 ~

不過我都要慢慢食囉   其一啲飯好熱   其二食得太趕   我會好唔舒服咁㗎 ~

個湯好熱   我同阿妹都話飲完成個身好舒服

砂鍋牛肉飯+湯 ($58) - 阿妹都鍾意食牛肉   咁就好喇

砂鍋辣豬肉飯+湯 ($58) - 我要食飯焦   所以先食呢個飯

韓兄弟半半 (豬肉飯) ($65) - 里奧大人就鍾意食半半   佢一坐低就話佢個午餐應該係最快   點知反而佢最耐   哈哈

食下傾下   阿妹話佢仲有睇韓劇   我話我無睇好耐   之後里奧大人好快話我睇福寶嘛   我鍾意啲咩   里奧大人都會同佢啲同事講   但會加句係呢一刻   哈哈 ~

食完就番公司   又要忙一大輪   CF 話好感謝我幫手   我話唔駛感謝啦   佢話有啲人好計較   一份人工兩個人做   咁我話幫到咪幫囉   我真係無咩所謂   反正我又做得好開心 ~

搞掂都 4 點喇   要坐低抖下   咁有個單位比啲小食比我哋   咁啱里奧大人又喺度   佢話我同阿妹本身死氣沉沉   一見到人拎嘢比我哋食   我哋即刻笑哂口同雙眼發光呀   真係零舍誇張   我話人哋特登嚟拎比我哋呀   唔通喊住拎呀   無厘得體 ~

斯里蘭卡奶茶 & 小茴香多士

因為得我同里奧大人 阿妹 大餅同叻叻   根本飲唔哂啲奶茶   所以我話猜輸飲   最後好似每人要飲多 2 杯   哈哈 ~

6 點終於放工   但又未餓   所以買外賣番屋企食算喇 ~

里奧大人去買外賣   我就番屋企沖涼先 ~

食完真係要休息下喇   之後我睇 "他人即地獄" 預告片   我話男主角幾靚仔   所以話中秋節放假睇   里奧大人好驚訝話睇呢啲 ?!   咁我再繼續睇啦   但原來好血腥   我話假期都係唔睇喇   哈哈 ~

再睇下其他嘢   今晚 10 點半都瞓覺喇 ~

譚仔三哥 @ 紅磡 ( 14-SEP-2024 )

過橋米線 (煳辣 3 小辣) - 里奧大人估唔到我又食米線

雲耳

蜜桃乳酸特飲

( 14-SEP-2024  SAT )

感恩一覺瞓天光呀   今朝 8 點半都醒咗   里奧大人話佢都起身呢 ~

沖埋涼就出去食早餐   里奧大人今日本來番晏   但佢又好多嘢做   我又要幫皇上執房   所以都早啲番公司 lu ~

我次次去里奧大人公司   都會第一時間睇下 Yoda 有無比人搞   哈哈 ~   

里奧大人話小辣椒仲搞笑   將 Yoda 瞓低   再用毛巾放喺額頭   話佢發咗喎   又將隻老虎仔擺落 Keroro 個頭上面   里奧大人話佢每次番工   都發現啲公仔有啲唔同   哈哈

因為皇上今日番好晏   所以可以幫佢執房喇 ~

本身有好多嘢放喺 3 個紅白藍嘅   個個見到都忍唔住話佢   我都頂唔順呀   所以係我主動話幫皇上執房囉 ～

執咗接近 2 個鐘   比我想像中快呀 ~

里奧大人影咗 Before & After 比皇上睇   佢話原來係同一間房   真係好 Amazing   我成日話佢間房搞到咁先  Amazing 呀   哈哈 ~

之後話請我食飯   我話唔駛啦   難得佢肯比我幫佢整理間房嘛   我又可以當做練習   哈哈 ~

搞掂哂都差唔多 12 點   同榴槤傾咗一陣偈   之後佢 1 點半佢要開會   所以可以一齊食午餐喇 ~

惹味欖角骨 - 新鮮整起   我同榴槤都覺得好味道呀

川式口水雞 - 份量細哂

酸菜魚米線 - 今次加錢轉食米線   咁唔駛三個套餐都係白飯嘛

桂花冰釀 (+$8) - 榴槤話試下

慾望酸梅 (+$8) - 無啦啦比咁多冰

我食完就去探訪   里奧大人就番公司 ~

今次都係同皇太后加一個弟兄去探訪   但係去老人院嘅   有一個係 3 點先可以探   所以探另一個先 ~

探完已經 2 點 35 分   之後番到中心抖下 ~

同皇太后講邪靈啲嘢   皇太后覺得匪夷所思呀   好在佢同我感覺一樣咋   哈哈 ~

差唔多 3 點再出去探訪   大約 3 點 45 分就番到中心做檢討   傾到  4 點半都要走喇   因為要去里奧大人公司幫手 ~

里奧大人洗乾咗啲袋仔   所以將啲袋仔放喺佢哋頭頂吹乾   Yoda 真係慘   哈哈

搞掂就番崇拜   之後有小食會 ~

咖啡蛋糕 / 斑蘭蛋糕 - 個個都話蛋糕好味   不過我無食呀   里奧大人就每樣食 1 件

斑蘭糯米糕 / 南瓜糯米糕

斑蘭糯米糕真係超級好味

食完就要幫里奧大人做嘢   所以差唔多 8 點幾先食晚餐呢 ~

諗住一齊番屋企   但里奧大人驚聽朝啲嘢做唔切   所以又番公司做嘢 ~

我就番屋企啦   開埋機洗衫就沖涼休息 ~

里奧大人 9 點半先番到屋企   佢話好在真係番公司做埋   唔係聽朝肯定做唔切呀 ~

睇下 Youtube   今晚 11 點都瞓 lu ~

燒汁焗雞下肶拚墨魚丸 + 部隊鍋拉麵 + 唐生菜 ( 13-SEP-2024 )

( 13-SEP-2024  FRI )

尋晚瞓得麻麻哋   之後又係咁發夢   但感恩起身都精神嘅 ~

咁我煲熱水之前快手取消手機飛線   點知唔小心打咗比家姐   我正喺 Whatsapp 話佢知打錯   我已經打咗個打字   點知家姐已經打嚟好驚問咩事 ?!   因為我唔會咁早打比佢家嘛   佢話佢咁啱揀歌嘅時候   見到個未接電話   仲話我做咩唔 Whatsapp 比佢知話打錯   我話無諗過妳咁快打番比我囉 ~

之後同我講去 A1 換豆漿   原來係最後一日呀   講完又問我食咩   佢一陣食咩   星期六做啲咩   傾咗成 10 分鐘呀   我話我要食早餐唔傾喇   哈哈 ~

里奧大人今日放假   咁我都唔出去食 lu ~

早餐食扭紋栗子酥   仍然覺得好好味呀 ~

菇場忙咗陣就 Skype   開心開心 ~

Lunch Time 出去譚仔食米線   其實本來唔餓   但同冰姑係咁講嘢食   講到我好鬼餓呀   所以出去食囉 ~

坐我隔離女人講話佢兒甥女細個由阿婆湊大   到大個之後同媽咪關係比較疏離   再話細個無陪伴佢成長   呢份愛嘅缺失   點都彌補唔到   我覺得佢又講得幾啱   所以我當下好感恩   爸爸媽咪咁錫我   我真係喺愛裡面成長呢 ~

食完去買菜同百香果   有個女人好大聲傾電話   話佢朋友做嘢心急 粗心大意又衝動   我聽完都笑   佢呢位朋友都幾難搞下 ~

番到菇場已經 12 點 50 分   所以睇陣 BAO Family   阿花叫我做熊腦人   哈哈 ~

唔忙就繼續 Skype   咁就好快到放工呢 ~

番到屋企即預備晚餐   雖然唔係難   但要啲時間呢 ~

是日晚餐 - 燒汁焗雞下肶拚墨魚丸 + 部隊鍋拉麵 + 唐生菜

燒汁焗雞下肶拚墨魚丸 - 得兩隻雞下肶好似好少   所以焗啲墨魚丸喇 ~

部隊鍋拉麵 - 終於清哂啲部隊鍋湯包   下次唔會再買 lu ~   

唐生菜 - 點都要食啲菜   所以去錢大媽買包唐生菜   我揀細棵嘅   呢度只係 $4.7 咋 ~

洗埋碗就同里奧大人出去搞啲嘢   搞掂就即番屋企 lu ~

番到屋企即開機洗衫   之後沖涼休息 ~

里奧大人之前拎咗個美心流心月餅比我   今晚都要食埋去喇

試下打橫切   點知一切就碎哂   好在我自己食咋

呢排又成日打機   所以睇一陣 Youtube 又已經 11 點   係時候瞓覺 lu ~

點匠佳餚 @ 紅磡 ( 12-SEP-2024 )

點匠小籠包 ($45) - 有湯汁   但豬肉餡好 "鞋"   真係好有特色

排骨粗炒 ($98) - 其實味道唔錯   但啲豬扒 "鞋" 到爆炸呀   我煮嗰啲都無咁 "鞋" 囉   里奧大人直頭要吐出嚟添呀   呢間食店真係唔會再有下次

( 12-SEP-2024  THU )

今朝起身去廁所   原來只係 6 點 20 分   咁繼續瞓 ~

我仲覺得瞓得唔好   但其實瞓到 6 點幾都算係好啦   哈哈 ~

同里奧大人出去食早餐   食完就搭車番工   時間啱啱好 ~

菇場忙下停下   呢排都係整下啲手尾   所以就可以做下停下呢 ~

Lunch Time 都係出去行陣   咁好多時都係阿後 我 船頭 阿花 4 個一齊搭 Lift   阿後就會話人齊喇   之後船頭講開有幾層樓嘅人係早咗放工   但佢哋成日都格硬迫入 Lift   個背囊又大喎   我話我背囊都係好大喎   佢話我會將個背囊放低   但嗰班人係唔會囉   又唔知個背囊好似玩降落傘嗰啲咁大個   佢咁形容真係好搞笑呀   哈哈 ~

行咗一陣就去食水餃米   食完再去 759 買零食再去 360 買檸檬汁就番菇場喇 ~

特登去買比船頭 阿齋同阿花   因為之前佢哋請我食嘢同飲嘢   不過我嗰排好攰   無咩意慾睇零食囉

同阿齋傾咗 15 分鐘   啱啱好開工 ~

仍然忙下停下又 Skype 下   所以好快就放工 lu ~

今晚同里奧大人一齊睇中醫   醫師話佢今日個脈好番好多喇   感恩感恩 ~

我就因為呢排成日飽飽滯滯咁   所以個人好濕熱   仲話我之前唔係咁   同埋我成日半夜打噴嚏   佢話我鼻敏感同氣管敏感要繼續調理   希望快啲回復狀態啦   因為下個月好忙呢 ~

里奧大人話番屋企附近食台灣嘢   我話好餓呀   同埋一陣要去拎鞋   我要食嘢先呀 ~

我想食小籠包   但呢間價錢仲貴過上海姥姥   地方又比較細   我話都係食第啲   但里奧大人話咩都試下啦 ~

食完就去拎鞋   之後去買糖水   買完就番屋企喇 ~

沖埋涼抖陣就食糖水   我食到好飽呀   所以熨 2 機衫當做運動呢 ~

芋園綠茶 6 號 (芋圓+綠茶凍+小丸子+珍珠+西米) ($28 再 +$3 小丸子) - 今次試下新嘢   但下次唔會再叫   哈哈

粉粿綜合凍 ($33) - 呢個賣相豐富好多   哈哈

睇多陣 BAO Family   今晚 10 點 45 分先瞓覺 ~