麻辣手撕雞 (外賣) + 雜肉芝士條 + 菜心苗 ( 10-SEP-2024 )

( 10-SEP-2024  TUE )

感恩瞓得都唔錯   其實 7 點鬆啲醒咗   但都係等鬧鐘響先起身 ~

早餐仍然食芝士條拚朱古力捧捧   其實仲剩 2 條芝士條   諗住今晚食埋佢呢 ~

菇場忙呀   直頭唔知做邊樣好   真係好耐無試過 ~

Lunch Time 諗住蒸飯再出去 360 買咖啡粉   但阿齋係都要幫我蒸飯   係都要我走   仲話我好討厭   哈哈 ~

買完就番菇場開餐   咁樣都幾好   其實我唔係咁好意思   因為佢幫我喺雪櫃拎個飯壺出嚟灘下   又幫我拎埋個蒸盒入 Pantry   但佢話十幾年同事唔駛咁啦   總知第時佢蒸完就幫我蒸就得啦 ~

阿花同我一樣飲中藥   又係星期六睇中醫   所以星期六唔駛番   可以做好多嘢呢 ~

佢話溫總斟水落水煲只斟 1/4   覺得佢好自私   但其實要煲嘅話   真係應該斟滿水囉   佢又係好奇怪   咁到另一個同事好似佢咁煲 1/4   之後佢又自己再煲   咁樣咪仲煩   真係唔知佢諗啲咩 ~

仍然忙呀   真係對手未停過   全日做 Report   見到數字都驚   哈哈 ~

去完鴻福堂拎豬腳薑醋   再去 Haagen-Dazs 拎雪糕月餅   咁就唔駛成日記住 ~

其實用膠袋裝雪糕月餅真係唔係咁好囉   所以我都拎定冰袋去換

經過麵包店   覺得啲麵包好吸引   所以買個嚟試下喇 ~

扭紋栗子酥 ($32)

今晚要搭地鐵   估唔到都好快到   可以買埋手撕雞先番屋企 ~

今晚可以慢慢預備晚餐   因為里奧大人要 7 點放工 ~

家姐公司送㗎   佢又比埋我

影完相即放入雪櫃   乾冰都懶得抹走呀   哈哈

是日晚餐 - 麻辣手撕雞 (外賣) + 雜肉芝士條 + 菜心苗

麻辣手撕雞 (外賣) - 懶又唔想出去食   咁買手撕雞就最好   我哋只係食咗少少   好在依家我都帶飯   咁就唔駛格硬食咁辛苦   哈哈 ~

雜肉芝士條 - 尋晚食剩啲豬扒牛扒   我就切絲之後夾麵包   里奧大人話好好食呀   因為本身佢話條芝士條好硬唔好食㗎   但我焗熱再即食   口感真係唔硬㗎喎   可能上次我焗完   佢隔幾個鐘先食呀 ~

菜心苗 - 終於清哂   下次要買其他菜喇   哈哈 ~ 

今日榴槤請里奧大人部門食韓國烤肉   之後佢哋番到公司話要飲嘢   阿妹同里奧大人講   話里奧大人有 1 支榔汁同 2 支檸檬汁仲寫埋名嘅   所以里奧大人話叫佢哋 Share 飲   其實阿妹又唔係帶飯   正路係唔會開雪櫃嘛   依家連里奧大人嘅飲品都睇埋   真係好搞笑   不過咁都好   可以提里奧大人飲埋去   唔係又擺到過期 ~

里奧大人拎比我食㗎   乖仔 

洗埋碗就開機洗衫   之後沖涼休息喇 ~

里奧大人就熨衫   佢今日遲放工   沖埋涼又熨衫   差唔多 10 點搞掂   之後佢話飲中藥   我話 10 點唔好飲喇   佢原來以為只係 9 點咋   我都奇怪點解咁放飲中藥   哈哈 ~

睇多陣 Youtube   今晚 10 點半都瞓覺 lu ~