燒汁焗金沙骨 + 油麥菜苗 ( 25-SEP-2024 )

( 25-SEP-2024  WED )

尋晚瞓得都唔錯   可能換咗揀感應燈   之前嗰盞實在太敏感   成日間唔中就着   有時差唔多天光又着   我以為手機着要起身   但其實只係 6 點幾囉 ~

早餐食魚肉燒賣   不過間唔中食好喇   因為我覺得用多咗時間整早餐咁   哈哈 ~

菇場忙下停下   好快又到 11 點 45 分 ~

Lunch Time 蒸完飯就出去行陣   因為阿齋以為我無帶   如果唔係佢早啲蒸   我話無所謂啦   反正我未餓 ~

番到菇場都 12 點 20 分   呢個時間食算係最好   雖然都係早   哈哈 ~

之前唔覺下午茶份量少   但今日食埋尋晚剩嘅 2/3   我分開兩個碗放   都只係佔個碗 1/3 位置咋   所以今次真係唔夠飽   要飲包鈣思寶先夠飽呀

 

阿齋又幫我抹碗   不過佢話大家熟先會   同埋都係睇啲咩人   如果係會計部同事就唔會抹   咁佢知我乾淨嘛   我朝朝番工第一時間係噴消毒酒精再抹枱   嗰時坐佢後面隔離就唔覺我咁大力抹   我掉咗坐佢後面嗰日   佢話終於感受到我出盡力抹枱   哈哈 ~

忙下停下   咁我要搵里奧大人   點知佢無帶手機   之後打去公司搵佢   但阿妹話佢行開咗   咁阿妹話有秘密同我講   所以又傾咗 20 分鐘   女人真係特別多嘢講   我自己都係咁   哈哈 ~

放工買埋雞骨草就番屋企   番到屋企都即預備晚餐 ~

里奧大人話要 6 點鬆啲先放工   我話無問題啦   我都未咁快煮好 ~   

是日晚餐 - 燒汁焗金沙骨 + 油麥菜苗

燒汁焗金沙骨 - 今次加埋車厘茄同韓國辣椒醬再燜   我覺得好味道呀   見里奧大人食飯都好快   即係都鍾意食   哈哈 ~

油麥菜苗 - 終於清哂啦   估唔到仍然好脆綠 ~

洗埋碗就要同里奧大人出去搞啲嘢   今晚都好焗熱   真係出一出去   個人好似喺水撈出嚟咁 ~

第一時間去沖涼   里奧大人就開機洗窗簾 ~

同里奧大人一齊食雪糕月餅   佢唔食塊朱古力片   咁我食埋啦   但真係好鬼甜   食到有啲漏   之得每人食一個先啦   不過拎咗出嚟就費事再擺番入冰格囉

1 件芒果雪糕 & 1 件藍莓雪糕 & 2 件士多啤梨雪糕

睇陣福寶   今晚 10 點 35 分都瞓覺 lu ~