( 18-SEP-2024 WED )
今朝同里奧大人 9 點半自然醒 咁都起身食早餐啦 ~
假期多數出去食早餐 所以會睇下有無其他餐廳會開 不過想去嗰間就無開 之後里奧大人話去撳錢 我叫佢比一千蚊比我買衫 佢話唔比 之後啲錢出嚟嘅時候 我自己拎咗五百蚊 我話呢啲叫幸福搶 佢話搶嗰個咪幸福囉 哈哈 ~
最後都係去番屋企附近食早餐 其實我都無問題㗎 始終假期無咁多人 坐得都好舒服呢 ~
番到屋企就執櫃 其實只係擺番整齊 但感覺好似突然多咗好多空間咁 所以里奧大人其實知道我買好多嘢 只係收埋得好呢 哈哈 ~
家姐仲搞笑 同工人去新都城行街 又話買咩買咩 真開心 ~
里奧大人就開 2 轉機洗窗簾 難得今日有時間 同埋咁好陽光嘛 ~
差唔多 1 點半就搞掂 我都沖涼休息一下先 ~
2 點左右出發去佐敦 食埋午餐就周圍行下 ~
四季老壇酸菜魚配四川擔擔麵 ($59) - 我覺得味道唔夠同埋比較油 但魚嘅份量都好多 配菜係芽菜 份量又係好多
四川擔擔麵都好味道
四季上海排骨配四川擔擔麵 ($50) - 呢個好入味呀 但每人食咗 1 條咋 因為好飽呀 所以打包今晚食
凍西洋菜蜜 (+$3) & 凍朱古力 (+$3)
食完去永安超市 估唔到買到嘢 呵呵 ~
買完就去三德買齋 經過權發小廚 里奧大人見到椒鹽魷魚鬚 話我鍾意食 但我唔買啦 屋企仲有咖哩雞又買咗齋 估唔到佢記得我鍾意食啲咩喎 頭先買麻糬嘅時候 佢又話我鍾意黑糖珍珠奶茶 因為我成日話佢唔記住我食啲咩㗎 除咗煙韌嘢同乳豬 哈哈 ~
又去裕華超市睇下 咁有個 Counter 職員 一見人就問先生搵啲咩 小姐搵啲咩 ?! 搭扶手電梯嘅時候 里奧大人衰衰咁笑 之後話會答佢搵老婆 我話我會答想搵巴士站 佢再話想搵番個初戀呀 勁無聊 哈哈 ~
行咗一轉再去廟街行下 話咁快又 4 點幾 最後買埋護髮素就搭巴士番屋企 lu ~
番到屋企就即開機洗窗簾 里奧大人今日都好忙下 ~
C/T 護髮素 ($108) & T/T 護髮素 ($98)
髮尾油 ($178)
波霸麻糬 ($20) / 柚子參 ($36)
爆漿黑芝麻 & 黑芝麻無爆丸 ($110/3 盒)
甜酒釀 ($32)
我同里奧大人講今日真係好開心呀 你陪我食嘢買嘢 佢聽完我咁講 佢都會好開心 因為佢呢幾年都忙 我有時都想出街 但又想比佢休息下 所以次次佢話出街 我都問幾次係咪唔攰先出㗎 ~
抖多陣就預備晚餐 所以今晚 6 點 45 分可以開餐 ~
是日晚餐 - 酸齋拚齋叉燒 (外賣) + 咖哩薯仔燜雞 + 豆角拚椰菜
酸齋拚齋叉燒 (外賣) - 呢盒 $40 (中盒) 每樣試咗一件都幾好味 不過太飽 所以成盒又要留番聽晚食 ~
咖哩薯仔燜雞 - 我又加咗幾條芝士脆皮腸同半個洋蔥 咁聽日又可以帶飯 一餐咖哩食 3 餐 食到有啲驚 哈哈 ~
豆角拚椰菜 - 之前食剩啲豆角 咁今晚煮埋去啦 再加多少少椰菜 感覺無咁悶 ~
我食緊嘅時候 里奧大人望住我 我以為佢都覺得啲咖哩好好味啦 之後我先醒起無拎筷子比佢 佢仲話係咪想佢好似非洲人用手食 ?! 我話其實都好喎 咁可以洗少樣嘢 ~
糟糟叫家姐 姐夫去佢哋屋企做節 咁就乖喇 哈哈
洗埋碗就抖陣 8 點一齊出去散步 順便影下月亮 ~
我覺得月亮唔係咁大 但就真係好圓喇
里奧大人番咗屋企拎腳架 不過我都無用呀 所以個月亮飄嚟飄去 哈哈
中間嚿雲好似隻兔仔
差唔多 9 點就番屋企 之後沖涼休息 lu ~
打下機又睇下 Youtube 今晚 11 點瞓 ~
沒有留言:
發佈留言