譚仔三哥 @ 紅磡 ( 21-SEP-2024 )

( 21-SEP-2024  SAT ) 

今朝 7 點起身   里奧大人本來諗住番上午   但佢話 Burn Out   最後改為補假休息   不過我都會照去家姐屋企㗎   呵呵 ~

姐夫今朝要出去   所以家姐陪佢食完早餐再陪我食   咁我又早到咗   我就去家姐屋企放低嘢先 ~

我一開門  Berry 先吠   平時我企喺門口都已經吠家嘛   咁工人放假   我以為佢喺房瞓覺   點知佢突然喺廁所開門出嚟   真係比佢嚇鬼死呀 ~

我袋都未放低   佢第一時間同我講 Berry 成日 R 痕   之後再拎盒米比我   咁好乖喎   家姐話無諗過佢會記得呀   所以都好感恩   家姐啲工人都好錫我呢 ~

Berry 依家唔係成日坐梳化   所以 工人又拎包零食比我引 Berry 出嚟   哈哈 ~

食早餐

好攰咁

又咁望我喇

我最鍾意坐佢隔離摸下佢

家姐差唔多 9 點就叫我去食早餐   不過佢食唔落呀   所以食一個餐就夠   佢幫手食多士同半條腸   因為我話條腸好鬼乾   但其實我係諗住自己食哂嘛   因為我唔會將唔好食嘅比佢食囉   真係激死我 ~

家鄉泡米通粉   口感幾煙韌   所以家姐叫我試下

咁走嘅時候   家姐望住我   好凝重話叫我唔好比錢   因為佢要打散五百蚊   我話下次咪鬼咁嘅樣同聲線囉   同埋有人比錢   我真係無所謂㗎   呵呵 ~

食完就去超市睇嘢   之後就番屋企 lu ~

Berry 又係咁撲我同尖叫   好似我頭先無嚟過咁   佢仍都一樣唔理家姐   家姐無啦啦嘆氣講   話唔怪得啲人會唔開心   即係好似啲小朋友黐工人唔黐媽咪咁呀   哈哈 ~

今日 Berry 做咩都慢動作

Berry 之前係咁 R 痕   咁打去診所問駛唔駛嚟睇醫生   定就咁配藥就得 ?!   姑娘答就咁配藥就得   最感恩係家姐同事可以幫佢拎藥   咁家姐就唔駛特登去拎呢 ~

我初初以為 Berry 要睇醫生   咁工人今日又放假   我話我陪妳哋去睇咪得囉   之後家姐話診所開 12 點呀小姐   妳都要走啦   咁點陪呀 ?!   哈哈哈哈   諗住陪下佢點知比佢串番添   真係慘 ~

我話依家轉天氣   人同狗都身痕啦   所以醫生叫家姐一定要開冷氣   之前阿齋又係咁   屋企無人都要開住冷氣比隻狗呀   不過咁都無辦法   因為睇一次醫生仲貴   同埋唔想佢哋成日食藥囉 ~

今日 Berry 女食完藥   所以好攰

佢喺地下瞓覺   所以我叫家姐抱佢上嚟比我摸下   不過佢好快就走 lu

我比家姐嘅生日利是   我話拆完個利是封要比番我   哈哈哈哈

糟糟喺英國買比家姐嘅零食   佢話好食   所以又比兩包我試下

同家姐傾下偈   之後佢又同糟糟   大媽同陳老二   又同同事傾電話   我又傾埋一份啦   原來佢同事又係好鍾意福寶   仲比咗張一家五口比家姐睇   我即刻話佢知啲家族成員啲名呀 ~

差唔多 12 點半就走喇   家姐同 Berry 行街   但落雨呀   所以叫佢行完好番屋企   唔駛陪我搭車 ~

我同里奧大人又唔太餓   所以佢話買腸粉燒賣番屋企食   咁又好喎   我都唔想食下午茶餐 ~

魚肉碗仔翅好味呀   因為夠熱   同埋口感唔似食漿糊   哈哈

家姐送比我嘅榴槤鮮生冰皮月餅

貓山王 & 黑刺味道

又買咗 1 斤梅菜比我

食完抖陣就要去 LA 事奉   今日同石頭姐姐一齊帶遊戲   所以差唔多 4 點 45 分先完畢 ~

番到屋企都要休息下   之後就同里奧大人番崇拜喇 ~

崇拜完畢就去食晚餐   今晚仍然好想食米線呀 ~

食完就番屋企開機洗衫同沖涼   里奧大人就去做運動 ~

睇下福寶   今晚 10 點 20 分都瞓 lu ~