銘興山西刀削麵 @ 紅磡 ( 18-FEB-2025 )

熱拌豬扒刀削麵 ($55) - 我鍾意食拌麵   里奧大人話今次件豬扒好呀   因為唔係炸   無咁熱氣   但我覺得之前好似係炸   同埋有啲蒜頭花生㗎噃

麻辣手撕雞刀削麵 (酸辣湯底 $50) - 醬汁喺雞絲底   但真係唔似係麻辣味道咁囉

里奧大人拎比我㗎   佢話我一聽到話拎蘿蔔就笑   之後再話比人擋住咗個位拎唔到就即縐眉頭   好似變臉咁   哈哈

( 18-FEB-2025  TUE )

尋晚瞓得都唔錯   但呢排都係瞓到半夜就會想去廁所   我同里奧大人講話可能 8 點幾先食橙   下次都係早啲食好   之後佢都覺得食完成日半夜去廁所呢 ~

早餐都係食朱古力吐司   仍然覺得好好味呀 ~

菇場唔忙   咁做自己嘢啦 ~

Lunch Time 蒸完飯就出去行   行半個鐘就番菇場開餐喇 ~

遲啲 LA 會有戶外活動   所以買啲零食一齊食   難得啲零食又做特價   Orihiro 蒟蒻果凍啫喱 ($19.9/3 包) / 固力果 Caplico 雜錦三色雪糕筒 ($38/2 包)

今日 4 點就走人   因為陪家姐睇報告   本身諗住搭地鐵   但行到去地鐵站又上上落落再轉車   同我搭巴士時間差唔多   所以都係搭巴士喇 ~

感恩車程暢順   我 4 點 45 分落車   家姐就早我 5 分鐘到   我落車再 Join 埋佢一齊上診所 ~

5 點鬆啲就見醫生   感恩報告正常   我真係成個人放鬆哂喇 ~

同家姐去埋 Market Place 睇麵包   不過唔係咁啱食 ~

家姐搭地鐵去整嘢   我就搭巴士番屋企喇 ~

今日里奧大人補半日假   我都唔會煮㗎喇   因為唔知睇到幾時嘛 ~

諗住食水煮魚   去到又唔想食   之後里奧大人話去食刀削麵喇 ~

里奧大人話想食甜品   我帶佢去另一間買   佢話估唔到我會搵到間糖水舖   我話有時未買到餸就會周圍睇下嘢呢 ~

番到屋企即沖涼   之後一路食糖水一路睇 "痞子無間道"   最鍾意睇佢哋改啲名   人哋係 "KK 園"   佢就改為 "基基園"   我覺得好搞笑呀   哈哈 ~

芋圓楊枝甘露 ($37) - 食碗牛腩河都係 $36   仲要係飽肚   所以我覺得食甜品係好貴   哈哈

芋圓都煙韌

都幾多芒果粒

睇完就睇 Youtube   我應該睇睇下都瞓着   呢兩晚都係咁 ~

好似瞓咗 15 分鐘就醒   咁再睇多陣   差唔多 10 點 45 分先瞓 ~