蠔油燜薯仔雞翼 + 超甜粟米 ( 24-FEB-2025 )

( 24-FEB-2025  MON )

尋晚半夜又熱醒咗   感恩好快瞓得番呢 ~

坐梳化預備着襪嘅時候   隻蚊喺我面前呀   我即刻捉啦   終於比我捉到   我人生第一次用手捉蚊咋   不過真係唔理得咁多   成日比蚊咬真係好鬼煩囉   希望係最後一隻啦 ~

早餐食芝士包   里奧大人 7 點 50 分都起咗身   所以一齊食   最搞笑佢以為我食完   我話今朝好凍咁   沖咗好耐熱水涼呀 ~

我話真係凍咗好多呀   要着番件厚身抓毛衫先得   但里奧大人話我尋晚好熱咁   所以開咗冷氣比我   等我瞓得好啲 ~

菇場忙咗陣又做自己嘢   眨下眼又 11 點 45 分 lu ~

Lunch Time 蒸完飯就出去行下   行咗 25 分鐘就番菇場開餐喇 ~

唔忙又做自己嘢啦   阿花影咗我頭先睇 ASTRO 嘅新片   之後話太好啦回歸   哈哈   佢知道我因為 Binnie 離開咗都無睇過 ASTRO 啲片呀   之後又 Whatsapp 咗 2 個鐘   眼都濛埋 ~

我話依家冷氣凍咗好多   搞到個人好寒   佢即刻比個暖包比我   不過我話唔用住呀   因為都已經 4 點咁滯   飲熱水暖下好過   哈哈 ~

放工即走   里奧大人打嚟話佢都係啱啱喺公司走咋 ~

番到屋企即預備晚餐   今晚只係翻熱同淥粟米   所以好快可以開餐喇 ~

是日晚餐 - 蠔油燜薯仔雞翼 + 超甜粟米

蠔油燜薯仔雞翼 - 唔想成日焗雞翼   所以就用蠔油燜   今次整得好味呀   希望下次都係咁好味啦   哈哈 ~

超甜粟米 - 里奧大人唔食嘛   我又食到驚驚哋   其實有一刻我好想掉咗條粟米囉   不過又好嘥嘢咁   食埋今次要停喇   我真係食到好驚 ~

洗埋碗就開機洗衫   搞掂就沖涼休息   里奧大人就負責熨 2 機衫喇 ~

榴槤蕃薯做甜品   之後就一路食橙一路睇 "瘩子無間道"   今集都幾好笑 ~

睇多陣 Youtube   今晚 10 點半都瞓覺 lu ~