( 26-FEB-2025 WED )
感恩一覺瞓到 9 點半呀 沖埋涼就出去食早餐喇 ~
食完早餐就番屋企抖下 之後里奧大人要番公司做啲嘢 阿妹以為里奧大人又番工 我話妳好想里奧大人番工咩 ?! 佢話佢私心真係想 哈哈 好在 15 分鐘就搞掂咋 始終好怕突然又有突發嘢要處理呢 ~
今次搭地鐵再轉火車去羅湖 其實依家係咪無人叫火車呢 ?! 哈哈 ~
車程只係 45 分鐘 本來我話唔搭頭等 但里奧大人話貴十蚊咁上下 所以叫我搭頭等 坐得舒服啲嘛 ~
我覺得頭等應該無咩人坐 因為依家唔係開工時間
放哂啲袋喺隔離位
12 點 20 分就到羅湖喇 估唔到都好多人 我仲成日話唔會多人去添 ~
由羅湖去國貿只係一個站 所以今次就唔會坐直通巴去落馬洲喇
5 年幾無去深圳 所以覺得好興奮呀
始終太耐無嚟 所以里奧大人會提我拎身分證或者回鄉卡 咁到入境嘅時候 我同里奧大人係分開兩條隊 佢好快就入到境 我就等好耐都未掃瞄到 我以為擺錯方向啦 之後再擺就見到 "証件已過期" 嗰下又唔係好驚嘅 因為我知道可以做臨時証 不過無諗過自己會咁論盡囉 我成日以為自己幾年前續咗 好記得里奧大人仲話續証好快 如果過期申請就好耐 但可能當時係佢續証而唔係我續啦 哈哈 ~
因為里奧大人已經入咗境 佢唔可以逗留咁耐 所以佢即問職員點樣搞臨時回鄉卡 職員話直行出去轉右就去到 同埋要 5 百幾蚊 ~
咁里奧大人企埋一邊等我 我就即去整啦 因為我唔想浪費時間搵 所以我問免稅店職員點去整回鄉卡嘅位置 佢用廣東話教我行前少少右手邊間房仔就係 估唔到係咁近 我仲以為要出番去好遠整添 ~
中旅社職員話要等 4 - 6 個鐘 仲話呢度無食店無得坐 叫我去上水食嘢再番嚟 咁我即打比里奧大人啦 叫佢不如去酒店 Check-in 再周圍行下 但佢話佢去上水陪我 叫我喺頭先出閘嘅位置等佢 ~
好有驚喜嘅生日 因為無証件相 所以要 HK$570 咁我以為係要比人民幣 仲走去問里奧大人拎人民幣添
搞掂就行番出去啦 有職員叫我去佢嗰邊呀 佢問我係咪番香港 ?! 我話係呀 佢話妳要同我講先得㗎 我話頭先個職員叫我就咁行出去就得嘛 佢話講咗佢哋好多次都係咁 之後佢再教我點行出去 好感恩佢都係講廣東話呢 ~
逆方向行真係夠哂樣衰 行到唔知邊有香港海關叫我拎証件出嚟 叫我坐陣等佢 搞掂又再直行 之後海關問有無帶煙酒 ?! 我話無 但佢話循例都要開個袋睇下 叫我望住佢檢查 搞掂就跟佢行去唔知邊 我問佢多唔多人証件過咗期 ?! 佢話日日都有呀 ~
終於見到地鐵出閘位置 但係無得出閘 又要再去問職員點去 佢叫我搭電梯就可以 但其實頭先個職員應該同我講啦 ~
見到地鐵站只係去金鐘 我問咗 2 次職員點去上水 佢話去金鐘個方向就啱喇 我勁豬兜啦 去金鐘方向但上水會有站家嘛 我以為架車係直接去金鐘呀 真係黐得好嚴重 ~
里奧大人幫我換咗張大陸電話卡 但就幫我 Keep 住張香港電話卡 所以我去到上水就打唔到比佢 不過我唔驚嘅 因為我記得出閘附近有間 Circel K 我可以麻煩職員幫我打比里奧大人呢 ~
等咗 11 分鐘就開車 一出車廂諗住出閘 之後聽到里奧大人叫我呀 真係安心哂喇 感謝主 ~
原來我同佢係同一班車 之後佢話頭先出閘嘅位置係另一邊㗎 所以我好感恩里奧大人一出車廂就見到我呢 ~
今次真係超級論盡 因為真係好少會唔睇証件 同埋我最心痛係里奧大人拎住咁重嘅旅行袋周圍滕囉 咁佢一定好擔心我一個人咁行 又無得打電話 因為我真係人生路不熟嘛 之後佢問啲人係咪全部講廣東話 ?! 我話係呀 我用廣東話問佢哋 其實我都好驚佢用國語教我呀 哈哈 ~
因為最少等 4 個鐘 咁諗住飲茶啦 但上水廣場同花都廣場又無酒樓 所以揀去上海姥姥 因為可以坐耐啲嘛 ~
木須肉炒蘭州拉麵 ($59) - 都幾好味 不過里奧大人話啲麵身好乾
蔥爆牛肉配上海菜飯 ($69) - OK 啦 喺上海姥姥食嘢 預咗唔會有驚喜出現呢 哈哈
酸辣湯 / 無糖豆漿 (+$6) - 唔熱嘅湯 我真係最鬼驚
食完再行陣 行到 3 點幾就去羅湖 lu 里奧大人話應該搞掂張証㗎喇 ~
好感恩真係有得拎張臨時回鄉卡呀 之後見到有 2 個女人都嚟搞過期証 又係一聽到話等 4 個鐘要等陣先 情況同我一樣 因為無諗過要咁耐呢 以為一申請就有得拎 ~
4 點再次踏足羅湖 好開心呀 哈哈
以前成日去羅湖商業城按摩同飲茶 不過都有十幾廿年咁耐了 哈哈
5 年幾無嚟 呢個地方真係唔同哂喇 所以想行下睇下先 ~
依家幾乎全部係食店
港人最鍾意買嘅燒肉
我其實都想買嚟即刻食 不過驚份量太多呀 雖然可以買少少 但食燒肉都好滯 所以都係留番 Quota 食其他嘢好過
禽始皇個名好搞笑 我記得有間飲手搖飲品叫調茶局 佢哋啲食字真係好掂呀 哈哈
好栗子選薜記 要用國語讀出嚟先壓韻
草莓乾就吸引喇 不過唔會買住啦
RMB6.68/50g 有個男人睇到以為一盒只係 RMB6.68 呀
檬茶茶個名又係好搞笑
我叫里奧大人千奇唔好買油柑汁嚟飲 因為係刮油神器嚟 但對我同家姐又無咩作用喎
一定係飲鴨屎香檸檬茶
即叫即制
鴨屎香檸檬茶 (RMB18 / HK$19.45) - 茶味唔苦澀 同埋依家鍾意飲酸嘢 所以呢幾日都會買檸檬茶飲呢 如果見到嘅話
買完飲品就搭地鐵去國貿站 今次我哋拎旅行袋 真係唔想坐好耐車先到酒店囉 同埋喺國貿走嘅時候又方便 所以我都幾鍾意國貿㗎 ~
我嘅 B.Duck 地鐵卡 感恩仲可以用到呀 用哂啲錢就用支付寶 其實都無咩人用呢啲地鐵飛㗎喇 哈哈
話咁快又 4 點 25 分了
羅湖去國貿只係一個站
@ 國貿站
里奧大人話有人吊住條水魚
行去搵酒店
4 點 35 分就到酒店 其實如果喺另一個出口仲近呀 不過第一次嚟就跟指示好啲呢 ~
@ 芈白酒店 (MIENBIAS HOTEL)
本身係 2 點先可以 Check-in 仲諗住早得滯要食埋午餐先嚟 Check-in 依家唔駛啦 可以直接嚟 Check-in 喇 哈哈哈哈
Lobby 位置
今日房價
早餐係包埋嘅
房間字頭要加個 8 字 大陸好多酒店都係咁 我唔太明白點解要咁做
走廊都光猛
另一邊就有掛畫裝飾
我鍾意呢個房間號碼牌嘅設計呀
房間都幾大
關咗窗簾都光猛
以前我好怕用呢啲水龍頭 依家習慣咗就好鍾意呢
我以為係電子馬桶添
最唔慣係水龍頭喺出面
免費提供嘅水
牙膏牙刷 / 剃鬚刀 / 浴帽 / 梳
有得睇翡翠台
迷你雪櫃都夠凍
有 4 個衣架都唔錯㗎喇 同埋有獨立包裝嘅拖鞋
兩邊落床位置都闊落
小度智能客房語音操作
有小度幫手真係唔錯㗎 所以我哋係咁小度小度 叫到佢聽唔切無咗反應咁 哈哈
健身房
去得旅行就要放縱下㗎啦 我除非好悶無嘢做先會嚟做運動 哈哈
呢間酒店係我揀㗎 因為想試下住智能酒店 價錢係 HK$788.48 (2 晚) + 稅項及其他費用 (HK$130.84) 其實我覺得貴呀 不過生日就豪少少咁啦 下次會住番啲平少少嘅酒店 哈哈 ~
5 點鬆啲就去金光華廣場 其實無咩話特別好行 不過就鍾意佢乾乾淨淨呢 ~
我鍾意國貿區㗎 但食嘢買嘢唔算係平 之後里奧大人話國貿係商業區呢 佢以前喺度食午餐都唔平 但無得選擇 哈哈 ~
酒店附近都有啲小食店 呢啲就平喇 因為講緊只係 RMB20 但對於喺深圳生活嘅人嚟講 我就唔知係咪覺得平喇
隆江豬腳飯都想試下㗎 不過里奧大人就麻麻哋豬手豬腳呢啲 咁我一個人食會好飽 所以都係唔食 lu
我鍾意呢架電單車呀
天陰陰但唔覺得凍
里奧大人以前喺深華商業大廈番工 仲做咗 6 年咁耐添呀 唔怪得成日記得佢啦
依家好多人用電動車 所以空氣無咁污濁 真係幾年無嚟 好多嘢都唔同哂喇
5 點半就嚟到金光華廣場 呢個時間就無咩人喇 可以舒舒服服咁行呢 ~
熊貓無處不在
打邊爐就零興趣
雖然只係 5 點幾 但我想食少少嘢呀 咁我又見到有干鍋 環境又唔錯 所以入去食喇 ~
@ 炭舍干鍋
我哋坐卡位
準備開餐
好似拍片咁 其實我哋只係自拍 哈哈
開餐喇
百威啤酒 (RMB15) - 食熱氣嘢 里奧大人一定要飲啤酒清熱
祝大家身體健康
川味涼麵 (RMB12) - 我鍾意食涼麵㗎 微辣但唔覺辣 麵條口感都 OK 呀
細細份都唔錯 始終食麵好易飽嘛
炭烤羊肉串 X 4起 (RMB16) + 炭烤牛肉串 X 2起 (RMB16) + 炭烤魷魚 X 2 (RMB18) - 細細粒嘅肉 + 細細塊嘅魷魚 我哋樣樣都係微辣 依家唔會食得咁刺激㗎喇 里奧大人想叫羊肉串 但知我唔食羊就唔叫 但我話咩都試下啦 估唔到唔係好羶喎
我無用啲嘢嚟做對比 所以影到啲肉好大粒咁
爆漿糍粑 (RMB19) - 原來係紅糖餡 我仲以無紅糖漿添 因為香港食係紅糖漿嘛 呢個新鮮炸起真係好好食 但我覺得凍咗都好好食呀
炭烤千頁豆腐 X 3 (RMB9) - 無諗過 Size 係細過粒骰呀 估唔到口感好得意 里奧大人話想再食炭烤魷魚 所以又叫埋喇
現炸小酥肉 (RMB19) - 我同里奧大人講話去大陸一定要食呀 同埋我話份量應該唔多就叫喇
呢餐食咗 RMB147.2 (HK$159.06)
去到邊都見到美團 佢頂帽上面有隻公仔好得意呀
差唔多 7 點就走人 又周圍睇下 ~
呢期鍾意哪叱
好似幾好玩咁
呢層係 For 小朋友
扭蛋要 RMB33 里奧大人話隻隻都得意 話扭個比我 不過我話咁貴唔要呀
熊貓要行埋一陣先 呢幾日要主打睇哪叱公仔呀 哈哈
里奧大人話用唔到支付寶 之後佢自己企喺度研究咗好耐呀 但最後都係用唔到 所以佢先肯走咋
聽朝會嚟瑞幸咖啡食早餐
商場都好多金舖
蛋餅吸引 但太大個所以唔敢食
喺 Taste 見到麻糬 不過就唔會買㗎喇 份量太多了
麵包都唔錯
印尼紅肉菠蘿蜜都好貴喎
丹麥手撕包好似幾好味咁
Bread Talk 呢個真多合桃 Plus 有好多合桃
法式焦糖可頒都吸引
呢個包叫貓寧 (MORNING) 個名又改得幾搞笑喎 哈哈
馬卡龍都整得好靚
牛乳麵包 好似專比小朋友食咁 哈哈
港客回購 TOP 1 不過我唔會喺呢間買
福客精選麻辣燙
廖記捧捧雞都吸引 今次真係好多樣嘢都想試咁 哈哈
去得國貿就當然要去老街啦 因為都係搭一個站 同埋我本身都係諗住國貿+老街咁行 因為太耐無嚟又天黑黑 如果唔係都可以行路㗎 都只係 15 分鐘呢 ~
BOSS 直聘
7 點半就到老街 舊地重遊真係好興奮呀 所以又周圍行下 咩都睇下喇 ~
@ 老街
無咩人
COCO 都可
好似茅台酒嘅零食
森林之莓個名好有氣勢咁
終於見到哪叱公仔
居然見到麥麗素 唔知係咪同以前一樣咁難食呢 哈哈
魷魚 / 烤肉 頭先食咗 所以唔試 lu
有砵砵雞又有生果 咁食完辣可以即解辣 哈哈
里奧大人話見到九龍灣
東門老墟古井
唔知係平日關係 定係依家已經無人行老街呢 ?!
本來想搵趙記傳承 但見到順德甜品餔又想試呢間 ~
順德雙皮奶就無咩興趣
仙草大滿貫 (RMB23) & 楊枝金露 (RMB20) - 呢兩碗只係香港價錢 $46 我覺得好平囉
仙草大滿貫 - 好多料呀 芋丸都煙韌 但芒果就無咩味喇 就咁食一碗都夠哂飽
楊枝金露 - 我覺得都好味呀 同埋最緊要夠凍
火爆魷魚好抵呀
行下東門町
自助火鍋
都想同里奧大人試下呢啲串燒 其實一串得嗰少少肉 所以啲人會叫廿幾三十串咁食 都係 Gimmick 嘢囉
平靜嘅老街
好細架嘅巡邏車
我覺得呢間唔係真正俄超
我同里奧大人講話第一次行呢度 佢話唔係啦 只係因為成日都好多人喺度 妳無留意咋
思月書院
唔知假期係咪會多啲人呢 ?!
一番街 即刻諗起大阪
呢 Set 都得意 不過我都係唔會買 唔知點解呢期無咩興趣買 Figure
PETTY DUST 有綠色就好啦 咁我就一定會買喇
深圳藏寶城
唔知係咪頭先架巡邏車呢
呢間店舖叫豬豬很忙 咁打去佢公司 佢第一句一定係講豬豬很忙 咁都幾搞笑
又見到哪叱 我覺得佢笑得好開心 所以好鍾意佢
呢個警崗 我覺得好似啲流動餐車咁呀
行到 8 點半左右都番國貿喇 今日行咗好多路要抖下 同埋想睇下有無蛋糕買呢 ~
搭地鐵番國貿喇
車廂都乾淨
圳好玩 我諗極都唔明 後尾用國語讀出嚟就知咩意思喇 圳係估佢唔到呀 哈哈
8 點 45 分又番到金光華喇 所以真係覺得好方便呀 ~
烤魚片 試咗唔係咁啱我口味
木糖醇芝麻酥
試咗好味 所以買 1 包
木糖醇芝麻核金丸 里奧大人鍾意個口感 所以買咗少少
我覺得山渣味道唔突出
前胜點心社有海苔小貝 其實我想試嘅嘢都係幾年前嘅嘢 哈哈哈哈
試咗東北糯米糕 無想像中咁煙韌 所以唔買喇
里奧大人話買呢件做生日蛋糕 但我真係唔係咁想食朱古力蛋糕呀
里奧大人想食甜甜圈 但太大個就唔買 lu
再行去 Taste 買飲品 之後先知道 Taste 即係永輝超市呀 見啲人成日話永輝超市好大 我以為好似山姆嗰啲規模添
買咗呢支元氣森林汽泡水 (RMB5 / HK$5.94) 之前香港做特價好似 HK$2 定 HK$4 不過好似無呢隻橙味
HEY.YO 喜乳酪 喺香港買過佢啲蛋糕 都幾好食㗎
我覺得紫色靚呀 同埋我想食芋泥丸子 所以買呢個芋泥丸子奶酪蛋糕喇
夜遊國貿 哈哈
9 點 25 分番到酒店 要快啲沖涼喇 因為要食生日蛋糕呀 ~
夜景
睇到少少 "痞子無間道"
估唔到有得烘乾毛巾 我第一次見咋
差唔多 10 點先食生日蛋糕
原味蛋糕+芋泥奶油夾心+麻糬夾心+芋泥奶蓋+原味白玉丸子 我覺得樣樣都好味呀 同埋白玉丸子好煙韌 食得好滿足呀 哈哈
頭先買嘅木糖醇芝麻核公丸 (RMB25.92) + 木糖醇芝麻酥 (RMB33.66) (HK$64.38)
里奧大人話尋晚瞓瞓下突然醒起拎錯咗個叉電頭 所以即刻換番呀 如果唔係今晚就無得叉電呢
今日行咗 2 萬幾步 對於一個懶人嚟講就算多㗎喇
食到咁飽真係唔可以即刻瞓 所以睇 Die Hard 呀 我覺得幾好睇幾緊張喎 雖然唔合邏輯 終於睇到差唔多 12 點先瞓呀 ~
沒有留言:
發佈留言