泰風味泰國菜館 @ 官塘 ( 22-FEB-2025 )

泰式鳳爪沙律 ($70) - 呢個勁好味   酸酸甜甜又夠辣   又夠凍   口感都好爽脆   不過得我同兔兔食咋   哈哈

泰式脆肉炒椰菜苗 ($72) - 好味但份量好少呀

蝦醬炒飯 ($70) - 里奧大人叫㗎   我無食到呀   但里奧大人同 CC 話好味道呀

泰式拚盤 - 我話叫㗎   我哋覺得蝦片都好好味   我本來話買包番屋企食   不過唔記得咗添

原隻燒魷魚 - 好味呀   完全唔韌

鹽燒魚 ($168) - 今日午餐想食酸菜魚   但里奧大人話唔想食   仲諗住黐佢食少少添   所以今晚有魚食   實在太感恩喇

我飲芒果沙冰 ($35)   CC 就飲椰汁冰 ($25)   里奧大人同兔兔飲 SINGHA ($35) & CHANG ($33)

開餐

( 22-FEB-2025  SAT )

今朝里奧大人要番工   不過我唔陪佢食早餐 lu ~

我都只係瞓到 8 點 52 分起身   但叫做自然醒咁囉   哈哈 ~

早餐食 3 隻烚蛋   因為懶得出去買麵包 ~

食完抖陣就大清潔屋企   之後開機洗衫再熨 2 機衫 ~

搞掂都差唔多 12 點   要出發去里奧大人公司喇 ~

同里奧大人出去食午餐   之後就出席頒獎禮   里奧大人就番公司做嘢 ~

頒獎禮 2 點半完畢   又要去里奧大人公司幫下手   阿妹話見到佢做咩咁驚 ?!   我話見到核突嘢   哈哈 ~

之後我話佢做嘢好 Smart 好似我   睇住佢個咀郁郁下想講嘢   但又駁唔到我   嗰個樣真係好好笑   佢話我今日好似好開心咁喎   呵呵 ~

里奧大人差唔多 3 點先放工   臨走見到皇太后   佢話我個袋咁大個   好似去露營咁   之後見到細細聲   佢同里奧大人講話個袋唔係咁大個   你點會有咁多嘢食呀   哈哈   所以里奧大人成日會話所有人都會幫我   對佢好唔公平喎 ~

番到屋企休息下   差唔多 4 點幾就出發去官塘 ~

里奧大人見到熊貓   就問我影唔影呀   哈哈   我一係唔鍾意   一鍾意就好瘋狂   但瘋狂過後就好快唔鍾意   所以里奧大人又估唔到我依家仲鍾意熊貓   呵呵

去 APM 行陣   里奧大人喺 MUJI 買咗件外套比我   佢話 $228 都抵   我話依家公司又凍咗好多呀   遲啲可能要戴埋手套番工添呀   哈哈 ~

行到 6 點就去食店喇   咁大家去到嘅時間應該差唔多呢 ~

夜晚影都好靚呀

咁我哋搵緊食店嘅時候   突然有個人喺我哋面揚我哋   原來係 CC   真係好在佢見到我哋   唔係我哋仲要搵囉   因為佢比嘅食店名都唔係呢間嚟囉 ~

其實 CC 喺 2 月 7 日已經話請我食生日飯   但嗰日里奧大人要番晏   咁 CC 尋晚問我哋今日得唔得閒 ?!   但我要出席頒獎禮所以要 3 點先走   咁我話一係下午茶啦   但其實出到去都可能 4 點   同埋我其實係想同埋兔兔一齊食飯囉   之後 CC 話牛丸唔等得   最後佢話兔兔都可以一齊食晚飯呀   所以就揀今晚食飯呢 ~

本身去家樂坊食飯   但限 90 分鐘   CC 話唔夠時間吹水   咁所以揀呢間食店喇 ~

一坐低就睇下食咩先   叫完就一齊傾偈喇 ~

我問佢哋覺得凍唔凍 ?!   佢哋話凍   我再問有無着打底衫 ?!   里奧大人即望兔兔呀   哈哈 ~

咁佢哋都有着 Heattech   之後又講下底衫   CC 話兔兔有 6-7 件厚底衫   里奧大人話合理吖   因為有時洗唔切同埋未乾透   所以兔兔好開心仲即刻話里奧大人都話合理呀   我話梗係啦   里奧大人自己都有十幾件底衫呀   仲要係短袖長袖每樣十幾件   褲仔都有起碼 40 條   仲有超級多襪   所以佢唔會話人哋多嘢啦 ~

洗衫分深淺色   床單又係一機   CC 就會分埋上半身同下半身嘅衫褲嚟洗   仲要一日開兩機衫   不過佢話水費電費唔係特別貴   我估同洗衣機有關   因為前日先同阿齋講開洗衫   佢又係一日兩機   但水費接近二千呀 ~

我講開同同事撞衫啲搞笑嘢   CC 話佢都試過啦   仲話本身啲 Pattern 唔係普通嗰啲款   咁 CC 係 One Piece   另一個係上身衫   再另一個係下身裙   佢個同事叫 CC 着番件外套啦   我話 One Piece 都遮唔到啦   最搞笑係佢哋係同一張枱食飯   里奧大人話人哋唔知以為係 Uniform   哈哈 ~

我話我同同事撞咗嘅衫   我只會留番喺放假着   CC 話佢唔會   里奧大人就話 CC 好喇   駛咩理人點睇   因為里奧大人成日都同勁哥撞哂衫款   但佢哋照着    所以依家真係覺得 CC 同里奧大人好似呀 ~

之後講牛下   呢樣真係大家都有嘅共同回憶   以前喺九龍灣番工   好多時放工都會去買嘢食   嗰時啲嘢食真係好好味   依家真係食唔番囉 ~

我話以前同里奧大人會同同事打網球   之後嚟呢度食泰菜   但唔記得係咪呢間   CC 話講開就有印象   之後再講啲同事名   里奧大人講話無同過 CC 做同事呀   我同 CC 不嬲以為係公司識㗎   哈哈   因為大家成日出嚟玩   咁又識咗咁鬼耐   所以有呢個錯覺呀 ~

咁我哋要再肯定真係無做過同事   大家講嘅上司名都唔同   咁就肯定係咯   哈哈哈哈 ~

因為我哋嗰時放假就周圍去玩   去海洋公園又去過世界之窗   同埋放工又成日唱 K   之後終於記得點解會一齊玩   因為有個同事阿謝好錫 CC   佢又好錫里奧大人同阿驚   所以成日約埋一齊唱 K 囉   嗰時幾乎一星期唱一次 K 㗎   諗起都好顛 ~

CC 仲記得我哋無聊到同埋阿驚一齊學掌相添呀   哈哈   之後大家都拍拖就有異性無人性 lu   但結婚之後又多咗見面咁呢 ~

食下傾下   有職員嚟執枱   原來已經 10 點喇   佢哋都差唔多收工   咁我哋都埋單走人喇 ~

兔兔好快手咁去埋單   我見里奧大人都已經拎定錢出嚟㗎喇   CC 話唔好啦   所以兔兔再頂住里奧大人唔比佢比錢   咁我話下次我請飯茶啦 ~

最搞笑我問幾錢 ?!   佢哋又唔講   好在我睇到張單係 $798 啫 ~

一齊行去搭車   我一路行一路 "蝕蝕聲"   CC 話做咩鬼呀   我話好凍呀   佢個樣好愕然   因為我話凍呀   哈哈 ~

番到屋企即沖涼   雖然有啲眼瞓   但又處於興奮狀態瞓唔到   哈哈 ~

CC 叫我唔好嘥錢買零食比我   但佢又送咗支 Hand Cream 比我   自從我哋上次話呢個牌子啲 Ceam 好用   佢就成日會幫我睇呢個有無做特價   哈哈   兔兔就送咗樽黑芝麻醬比里奧大人

之後又比包潮汕牛丸同大蝦乾   真係太客氣啦   搞到我都唔好意思囉   請食飯仲送嘢比我哋

睇下 Youtube   今晚 12 點先瞓呀 ~