豆豉鯪魚炒油麥菜苗 + 蒸臘味 + 超甜粟米 + 脆門鱔魚皮 (外賣) ( 5-FEB-2025 )

1 條玫瑰三花腸 + 1 條加瘦鮮鵝肝腸 + 1 件臘鴨餅

( 5-FEB-2025  WED )

感恩一覺瞓天光呀   日日係咁就好啦 ~

早餐食芝士條   我都係鍾意食鹹嘢多啲   但食得多又要食番甜   所以里奧大人成日話我麻鬼煩   哈哈 ~

今朝班車早咗好多   所以我唔想咁趕呀   食完去里奧大人公司坐陣先番工 ~

菇場唔忙又做自己嘢   一做就做到 11 點半   我覺得朝早時間係過得特別快咁㗎 ~

Lunch Time 蒸完飯就出去買菜   差唔多 12 點 20 分先番到菇場開餐   好在無蒸乾水 ~

唔忙就繼續做自己嘢   之後又要做下其他嘢   話咁快就放工 lu ~

放工即走   番到屋企都即預備晚餐   里奧大人番到嚟就話我咁早番到屋企   我話 6 點幾啦   因為之前佢成日早番過我   依家我早過佢就覺得我早囉 ~

是日晚餐 - 豆豉鯪魚炒油麥菜苗 + 蒸臘味 + 超甜粟米 + 脆門鱔魚皮 (外賣)

豆豉鯪魚炒油麥菜苗 - 本身買咗茄子   但其實仲有半斤油麥菜苗   咁不如食埋去仲好   因為雪櫃會有時會突然好凍   成日雪壞啲菜呀 ~

蒸臘味 - 要帶飯就蒸啲臘味   始終豆豉鯪魚份量唔多呢 ~

超甜粟米 - 喺菜檔買㗎   $12/3 條   每條都肥嘟嘟   真係食一條都夠飽 ~

脆門鱔魚皮 (外賣) - 尋日已經想買嚟食   但話今日先有貨   所以今晚即買嚟食 ~

洗埋碗就開機洗衫   之後沖涼   沖沖下好似見到個人影   沖完之後問里奧大人係咪入咗嚟 ?!   佢話我今晚沖咗好耐呀   我話用謢髮素就比較沖得耐啲囉 ~

同里奧大人一齊睇 "富貴千團"   真係好少會同佢一齊坐定定睇劇   所以我真係覺得呢套劇好睇呀 ~

依家要食多啲橙呀

睇多陣 Youtube   今晚 10 點半都瞓覺 lu ~