京都骨拉咕嚕肉飯 + 涼瓜排骨拚椒鹽骨飯 (外賣) ( 20-FEB-2025 )

咁樣擺法真係唔錯   完全唔似食頹飯呀   哈哈

( 20-FEB-2025  THU )

感恩尋晚瞓得唔錯呀   因為呢排其實瞓得都唔係咁好   搞到皮膚差哂   手指又濕疹發作添呀 ~

今朝里奧大人去買早餐   咁我鬧鐘響都會起身嘅   我鬧鐘比佢早 5 分鐘   因為我要整早餐   咁如果佢去買早餐   我鬧鐘響佢都會起身   之後就會叫我瞓到佢沖完涼先起身都得   不過我又唔會   始終我唔係咁鍾意翻瞓   除非可以瞓到好晏   否則瞓多 15 分鐘就無必要 lu ~

我沖完涼又見到隻蚊   我仲以為係塵嚟㗎   我同里奧大人講話隻蚊應該差唔多死   因為飛得好抵   佢話係比較易捉啲咋 ~

到我換衫又見到隻蚊喺我臉前   我即刻狂噴香茅呀   終於噴死咗佢 ~

里奧大人啱啱番到屋企   即問隻蚊有無血 ?!   我話無睇到呀   但隻蚊都幾大隻囉 ~

早餐食腿蛋治   加多 1 份好似加十幾蚊   我食到一半就同里奧大人講話下次都係買個腸仔包好啲   因為都幾飽下 ~

今朝忍唔住聽 Again   始終聽番自己鍾意嘅歌係開心啲   哈哈 ~

菇場唔忙   做自己嘢又 Skype   話咁快 11 點 45 分 ~

Lunch Time 蒸完飯就出去一田行下   行咗半個鐘就番菇場開餐喇 ~

雖然洗多咗嘢   但真係鍾意飯同餸分隔   因為好怕啲汁整到啲飯腍哂呀

喺南北行買胎菊   會員只係 $27 咋

唔忙繼續做自己嘢   阿花比咗 ASTRO 新片比我睇   仲要話就嚟 2 月 23 日喇   估唔到佢記得佢哋出道日   之後仲話仲迷緊佢哋   哈哈 ~

放工即走   里奧大人今日同 Melody 同阿妹要去學嘢   起碼 7 點半先可以走   咁我去睇中醫喇 ~

醫師話我仍然貧血同血氣唔夠   話我濕疹係因為抵抗力弱   我話呢排真係好唔夠瞓呀 ~

睇完就去買兩餸飯   買完再去買菜同蕃薯   之後就番屋企喇 ~

里奧大人 8 點都未番   咁我都再焗熱啲餸同蒸熱啲飯先   雖然里奧大人凍食都無問題   只係我接受唔到   咁辛苦做完嘢仲要食凍冰冰嘅飯同餸   咁好慘啫 ~

擺到咁   我覺得勁似東北飯盒   哈哈

搞掂哂都差唔多 8 點半   諗住沖涼啦   點知里奧大人就番到屋企   咁即刻開餐喇 ~

我同里奧大人講話第一次食咁熱嘅兩餸飯好開心   哈哈   始終本身啲餸都唔係太熱   再加上我都要行一段時間先番到屋企呢 ~

食完諗住執嘢啦   估唔到里奧大人好快手咁執嘢   我諗住佢只係放喺鋅盤   估唔到佢仲洗埋呀   真係非常之感動   哈哈 ~

咁我抖陣都即沖涼喇   之後佢做陣公司嘢先沖涼   差唔多 9 點半先睇 "瘩子無間道" ~

睇完就睇 "蛇皇"   之後見到有狐獴   里奧大人就好興奮話妳最鍾意嘅獴仔呀   我覺得佢哋細細隻好得意㗎 ~   

雖然 "蛇皇" 都幾好睇   但我睇到 10 點 45 分都瞓喇 ~