煙鴨胸炒扁意粉 + 超甜粟米 ( 23-FEB-2025 )

( 23-FEB-2025  SUN )

今朝想瞓又瞓唔到   所以同里奧大人一齊食早餐喇 ~

食完就去里奧大人公司   等阿妹食完早餐就一齊出去做嘢   做咗 45 分鐘就再番公司 ~

咁我就去番崇拜   完畢就去買生果同麵包   買完就番屋企 lu ~

番到屋企又比我噴死咗隻蚊   希望係最後一隻啦 ~

開埋機洗衫就休息   2 點幾都預備午餐   今日唔係咁想出去食 ~

芝士包 ($20) - 好似幾好味就買嚟試下喇

里奧大人鍾意食迷你冬甩   咁呢排佢做嘢好辛苦呀   所以特登行遠少少買比佢食呢

里奧大人 2 點 45 分先番到屋企   餓到我呢   可能今朝出咗去做嘢呀 ~

洗埋碗就燜餸   搞掂就睇電視   睇睇下又比我見到隻蚊   不過捉唔切囉   等我今朝仲咁開心以為殺哂啲蚊添 ~

4 點左右就同里奧大人出去搞啲嘢   感恩半個鐘頭就搞掂 ~

里奧大人話我今日好開心咁嘅   我話係呀   因為當好有信心做一件事嘅時候   嗰份喜悅真係好難掩飾   哈哈 ~

家姐 5 點幾問我喺邊 ?!   原來佢想要 EarPhone 個耳塞   咁無問題啦   我都想快啲比佢   諗住尋晚約佢官塘交收   不過佢同糟糟佢哋食自助餐   咁時間就唔啱 lu ~

等埋家姐整完嘢就同里奧大人出去喇   家姐話之前想買耳塞㗎喇   好在問我哋有無咋   因為我好多時都同佢講   想買啲咩就問我哋有無先   所以我又係好多時買嘢問佢要唔要   要就買埋嘛   如果一陣佢買貴咗   我會好激氣點解唔問佢要唔要㗎 ~

傾咗 20 分鐘喇   諗住叫佢快啲番屋企   之後無啦啦問我塊臉嗰幾粒係咩來 ?!   我話比蚊針呀   佢話我個人好熱   啲蚊一定針我   哈哈 ~

CC 好搞笑呀   居然記得比水費單同電費單銀碼比我哋睇   仲話兔兔有 11 件厚底衫   仲話佢無薄嘅長袖底衫   里奧大人話兔兔完勝佢嘅記錄   之後 CC 話襪就唔會完勝到里奧大人   我咪話囉   佢哋買嘢但唔執嘢   所以佢哋唔知自己買咗幾多就係咁再買買買   下次叫佢哋買完自己執   就會知自己原來買咗咁多㗎喇 ~

番到屋企即煮晚餐   不過今晚都好簡單   所以 7 點鬆啲可以開餐喇 ~

是日晚餐 - 煙鴨胸炒扁意粉 + 超甜粟米

煙鴨胸炒扁意粉 - 今次煮得乾咗呀   難為了里奧大人   哈哈   因為我無食到呀 ~

超甜粟米 - 諗住尋晚打邊爐先買粟米   點知突然出去食飯   所以今晚要食啦 ~

洗埋碗就沖涼   抖陣就食榴槤蕃薯同橙   之後睇 "哪吒之魔童降世"   估唔到好睇喎   仲有啲感人添 ~

睇完再睇多陣 Youtube   今晚 10 點 45 分先瞓覺 ~