豉油雞 (外賣) + 玫瑰三花腸拚加瘦鮮鵝肝腸 + 菜心 ( 31-MAR-2025 )

( 31-MAR-2025  MON )

今朝一覺瞓天光錯呀   可能天氣凍凍哋   所以今朝鬧鐘響都唔想起身呀 ~

里奧大人 11 點要開會   尋晚話一齊食早餐   咁佢醒咗就話想瞓到 9 點先起身   咁當然無問題啦   我不嬲牌叫佢瞓到 9 點嘅 ~

早餐食雞尾包   茄汁薄餅就留比里奧大人   麻糬波波球就比里奧大人晏啲食   因為佢約咗水姑 3 點食下午茶   咁食個麻糬頂住個肚都好過無嘢落肚啦   所以尋日買定 3 個麻糬波波球呢 ~

呢兩日凍咗好多呀   不過我都係着件貼身底衫+抓毛 Hoodie + 厚身 Legging   咁都好夠暖呀 ~

菇場忙咗陣呀   我差啲唔記得做 Report 添 ~

糟糟比我㗎   不過呢個包裝就唔好囉   雖然有膠紙封住   但個蓋唔實嘅   我頭先拎銀包出嚟   見到個銀包好多一點點白色   我以為甩咗啲皮呀   再望真啲原來係啲沙糖呀   好在我轉咗衰仔袋   我就唔會袋咁多嘢   咁即係唔駛抹咁多嘢呢

Lunch Time 蒸完飯就出去 360 買檸檬汁再去 iEAT 買菜   買完再行多陣就番菇場開飯喇 ~

食完諗住去洗碗   點知同阿齋同步起身   咁一齊去洗碗啦   佢洗完仲想幫我洗埋   我話唔駛啦   佢話妳估我個個都洗呀   哈哈   不過我都係自己洗番囉   一齊傾偈就得啦 ~

中午 3D   可以上下網同做自己嘢就最開心喇 ~

放工即走   買埋麵包就番屋企   見到里奧大人熨衫   咁就好喇   因為未咁快食得   哈哈 ~

是日晚餐 - 豉油雞 (外賣) + 玫瑰三花腸拚加瘦鮮鵝肝腸 + 菜心

豉油雞 (外賣) - 尋日買定㗎   諗住雞絲炒意粉   不過好攰   所以就咁蒸熱算喇 ~

玫瑰三花腸拚加瘦鮮鵝肝腸 - 食多一次就食哂   實在太好   因為夏天唔係咁想食㗎 ~

菜心 - 淥咗 2/3 咋   因為要留肚食生果 ~

洗埋碗就開機洗衫   今晚好攰   所以唔做運動   做陣小清潔就沖涼喇 ~

同里奧大人一齊睇 "臥底旅行團 4.0"   之後再睇 Youtube   呢排睇記錄片多啲   所以覺得自己睇緊新嘢   哈哈 ~

睇到 10 點 25 分已經好眼瞓   但想睇哂囉   所以睇到 10 點 40 分瞓覺 ~

韓式燜牛肋骨 + 魚香茄子 (外賣) + 炒麵 (外賣) ( 30-MAR-2025 )

( 30-MAR-2025  SUN )

尋晚瞓得好差呀   可能 4 點幾飲咗杯珍珠奶茶   因為係眼瞓但又瞓唔到呢啲感覺

感恩起身又精神呀   咁可以同里奧大人一齊食早餐喇 ~

吞拿魚碎蛋三文治好好味呀

食完去里奧大人公司幫手   之後都要番自己教會事奉 lu ~

今次去另一個崗位做   太耐無做   個 Step 好多都唔同哂

崇拜完畢就去黃埔嗰邊買嘢   買完就番屋企 lu ~

番到屋企已經 2 點 15 分   好在里奧大人啱啱放工   咁可以一齊食午餐 lu ~

買開豉油雞   咁順便買咁兩餸飯   想食啲甜甜酸酸嘅嘢   又係買番咕嚕肉同京都骨飯喇

要唔切嘅   因為留番聽晚食

里奧大人食完就沖涼瞓覺   我就開機洗衫   搞掂就睇 Youtube 啦   不過睇睇下都瞓着咗   都應該瞓咗半個鐘   起身嗰下仍然想瞓   但見 5 點就唔瞓 lu ~

我鍾意將啲生果咁擺法   因為雪櫃太細   士多啤梨又無可能疊高喎

做陣小清潔又預備晚餐   今晚只係蒸熱   所以好快搞掂 ~

是日晚餐 - 韓式燜牛肋骨 + 魚香茄子 (外賣) + 炒麵 (外賣)

韓式燜牛肋骨 - 家姐成日話糟糟整得好好食   尋晚里奧大人又話好好食   到我今晚食      啲肉燜到好腍   真係好好食呀 ~

魚香茄子 (外賣) - 攰呀   菜都唔想淥   所以買魚香茄子喇 ~

炒麵 (外賣) - 難得經過粥舖就買包炒麵   因為里奧大人鍾意食呀 ~

洗埋碗就即沖涼   里奧大人就熨衫   抖陣就食生果喇 ~

同里奧大人一齊睇 "中年好聲音 3"   睇完再睇陣 Youtube   再望個鐘已經 11 點 15 分   無諗過睇到咁晏   所以要即刻瞓覺喇 ~

住家飯 @ 糟糟屋企 ( 29-MAR-2025 )

薑蔥炒蟹 - 我食咗 1 嚿   都唔記得邊個夾比我添   味道好似係酒樓食咁   超級好味呀

清蒸東星斑 - 糟糟問我想食咩   我話食魚   所以條魚一上枱   家姐夾好多比我   之後里奧大人又夾   糟媽又叫我食多啲魚   我覺得食咗半條都有呀

菠蘿咕嚕肉 - 糟糟煮過一次比髮型師食   佢話好好食   所以想煮比我同里奧大人食呀   真係外脆內嫩   里奧大人係咁話好好食   佢用金鑽菠蘿   我話我只會用罐頭菠蘿咋

豉椒炒蜆米粉底 - 呢個好味呀   上次我夾得慢   所以今次終於食到脆卜卜米粉底喇   里奧大人話佢食咗好多呀

蜆肉都好大粒

100隻雞腳爵士湯 - 因為我唔食得花膠   所以糟糟即改雞腳   佢話買咗 40 隻雞腳+2個雞殼   仲有螺頭   呢個湯非常好飲呀   我聽完糟媽講點煲   我話要咁有心機   咁我一定唔會煲   哈哈

韓式燜牛肋骨 - 我太飽無食   但里奧大人話好食   家姐都成日話糟糟整呢個係超級好食㗎   好在食唔哂   我可以拎走   哈哈

爛鬼薑汁芥蘭 - 我諗住食菜清清哋   點知原來有咁重嘅薑汁味道   我第一次食到咁咋

西米焗布甸 - 我不嬲都麻麻哋西米甜品   但糟糟整得好鬼好味呀

我鍾意呢張餐巾   之後家姐揭開   原來 1 張係有 4 個圖案   我哋以為係一張一個呀   哈哈

( 29-MAR-2025  SAT )

臨起身前發個咗個好激氣嘅夢呀   個夢係我煮嘢比鬼佬朋友一家四口食   佢哋食完唔執嘢   又食到地下都係   點知鬼佬仲衰   將啲茄汁整到牆都有   我發火鬧爆佢呀   鬧完就去抹地   再諗諗下我煮兩個人都攰   我煮 6 個人嘅餸真係唔掂   咁即同佢老婆講   晚餐妳自己煮但水電煤就要 Share 比   佢問點解佢要比 ?!   我話妳有份用就要比啦   之後鬧鐘響呀   真係好在響咋   唔係可能會鬧交激氣到扎醒咗呀   哈哈 ~

今朝同里奧大人一齊起身   同佢食完早餐就番屋企   佢就番工喇 ~

今次少咗蛋   但對於我嚟講都係超級多呀

番到屋企即開機洗衫   之後熨衫做大清潔   雖然無咩汗出   但都要再沖涼洗頭   感覺乾淨啲   反正又喺屋企 ~

11 點幾就去里奧大人公司   我靈修 1 個鐘   里奧大人差唔多 1 點就放工   所以一齊去九龍灣申請回鄉卡喇 ~

去到影相   之後等 15 分鐘就去拎相   但其實好似唔駛 15 分鐘就有得拎 ~

影完相就比咗呢張紙比我   里奧大人話無 Number 嘅 ?!   之後我見到張枱好多人影咗相未拎   我睇嘅時候明明係得 3 份   之後同里奧大人講話啲相放喺枱度自己拎㗎   同佢行埋去嘅時候就見到自己張相   但我唔見有人行埋去放低喎   哈哈

拎完相即去申請回鄉卡   去 Counter 排隊之後就叫我哋去另一邊自助申請   有職員幫手真係好快搞掂   感恩感恩 ~

原來已經 2 點 35 分喇   里奧大人話好餓呀   所以拿拿聲去 megaBOX 食嘢呢 ~

我話想去銀咖哩   里奧大人話食富士山飯   我話記得要少飯   之後佢話今次唔駛   因為佢好肚餓   後尾我見到有下午茶餐   我話食午茶餐啦   留番個肚一陣食好嘢好過   哈哈 ~

吉列豬扒+薯角+腸+汽水+迷你咖哩飯 (+$6) ($38)

日式炸雞+薯角+腸+汽水 ($32) - 新鮮炸起   但可惜有羶味

食完就周圍行下   之後里奧大人話想去麥記食雪糕   我話去 Ikea 啦   佢哋啱啱出咗士多啤梨味雪糕呀 ~

里奧大人話好味道   同埋個筒入面都係雪糕   所以食完都好飽   哈哈

食完再去 AEON 買 3 Pack 意粉就去坐 Shuttle Bus   因為想行下德福 ~

行完 Muji   里奧大人話有啲攰   咁我話去 Foodeli 買珍珠奶茶啦   又可以坐下 ~

抖咗 20 分左右   喧啱家姐整完嘢打比我   但里奧大人又要去洗手間   之後去 Unilquo 買咗件 Tee   再行到去地鐵站已經用咗 20 分鐘   家姐已經去到朋友間舖頭拎埋生果   所以話直接喺九龍塘等   最衰我啦   之得聽里奧大人講話早 15 分打比我啦   咁我可以幫家姐拎生果   因為我哋特登拎埋戰車出嚟拎生果嘛 ~

珍珠奶茶 ($28)

送比糟糟嘅禮物   好在無整皺個盒咋

去到地鐵站再去健康工房買嘢飲   之後見到姐夫   所以一齊搭車去糟糟屋企喇 ~

真係好多年無去糟糟屋企   一入到去真係回憶番哂嚟呀 ~

Auntie 一見到我都話我瘦咗   糟糟又係咁講   我話呢句就最啱聽喇   哈哈 ~

之後我帶里奧大人參觀廚房   因為我好鍾意佢嘅對門式雪櫃呀   其實仲有部 3 門雪櫃   如果我屋企係咁   肯定會買好多嘢呀 ~

糟糟煮嘢都唔得閒理我   我本身問糟糟駛唔駛早啲去幫手㗎   佢話唔好阻住佢喎   咁我哋同糟媽傾偈啦 ~

去到嘅時候已經開始炸嘢

本身諗住喺家姐屋企食   但最後都係去糟糟屋企食   佢廚房夠大嘛   同埋佢有 3 個爐頭又有蒸焗爐   咁又係方便好多嘅

因為有啲餸要人齊先煮   如果唔係就唔好食   真係辛苦了糟糟喇

好大煲湯   其實有好多料   不過工人啱啱 "北" 湯   我都唔影喇   哈哈

我成日話佢唔記得我   佢話邊有呀   上年咪見過囉   之後我好肉緊咁攬住佢   話多謝妳每年比利是我呀   哈哈 ~

Auntie 後生又係惡㗎   我記得佢講過話佢唔會升到做 xxx   因為佢成日頂撞上司   佢所有上司都係外國人   我話唔係 Nice 啲咩 ?!   佢話 Nice 妳個頭呀   之後講佢遇過嘅激氣事   糟糟都叫媽咪冷靜啲   真係死我同里奧大人呀 ~

佢話佢嗰個年代   好多女人都識煮飯   Auntie 話佢啲朋友話妳識煮飯又會娶妳   Auntie 話老公愛佢囉   糟糟都忍唔住話所以寵壞咗佢囉   哈哈 ~

不過佢哋由細到大都有工人嘅   所以我係好欣賞糟糟煮嘢係自己落手落腳   佢 Daddy 之前身體唔好   佢仲去上堂學煮啲營養嘢   我成日都同里奧大人講糟糟真係好孝順   真係做出嚟   唔係得把口話自己孝順呢 ~

呢餐真係辛苦糟糟   不過佢煮嘢又係好快手   話咁快又整好一個餸 ~

一路食一路傾   里奧大人食好多嘢呀   我每次問佢好唔好味   佢都話好味   之後 Auntie 問我有無煮飯 ?!   我話梗有   但點都煮唔到糟糟咁好味啦   所以妳見我老公食咁多   就知道我好少煮好嘢啦   哈哈 ~

8 點 45 分要走喇   因為糟糟要去整嘢 ~

家姐 Call 車番屋企   我就同里奧大人搭地鐵番屋企喇 ~

家姐一個人拎 3 份   所以真係好鬼重

番到屋企擺好哂嘢就即沖涼休息   話咁快又 9 點半 ~

我問里奧大人今餐啱唔啱食 ?!   佢話啱食呀   同埋好好食   其實上次話今晚喺糟糟煮飯呀   佢即刻話糟糟煮嘢實得啦   好開心佢對糟糟咁讚賞呀   哈哈 ~

波子提 ($55) /芒果 $55/3 個 / 釋迦 ($60 & $25) / 藍莓 ($20/盒) / 士多啤梨 ($130)

睇下 Youtube 又打下機   同埋唔知係咪飲咗奶茶   個人唔係咁眼瞓咁   所以 11 點半先瞓呀 ~

銘興山西刀削麵 @ 紅磡 ( 28-MAR-2025 )

熱拌豬頸肉刀削麵 ($62) - 豬頸肉都幾好味

份量都唔少

麻辣牛𦟌刀削麵 ($56) - 牛𦟌又係唔錯

今次蘿蔔好酸   但都好味㗎   因為食刀削麵好滯   食番啲酸嘢可以即刻消滯   哈哈

( 28-MAR-2025  FRI )

感恩尋晚瞓得都唔錯   今朝起身都精神呀 ~

早餐食迷你忌廉芝士蛋糕 + 迷你合核蛋糕 + 咖啡朱古力迷你麻糬波波球   樣樣有啲真係好唔錯呀   食起上嚟真係無咁悶咁   哈哈 ~

今朝天氣又潮濕又焗   仲有啲熱   不過我覺得着短袖又凍喎 ~

菇場唔忙又做自己嘢   真係好爽   哈哈 ~

Lunch Time 蒸完飯就行去 360 買檸檬汁   買完又行下惠康   之後再行多陣就番菇場開餐喇 ~

船頭請我食㗎   話一田做特價   之後佢買咗包日本嘅龍蝦味米果   我哋覺得係有陣油益味呀   佢仲話貴嘢嚟㗎   見個樣幾靚就買囉   特價都三十幾蚊   原價係 $49.9 㗎   真係笑死   佢話唔買過點知唔好食喎   呢句家姐成日講㗎   哈哈

唔忙就繼續做自己嘢   開心開心 ~

放工睇中醫   醫師話我血氣仲未夠好但唔嚴重   同埋比之前真係好咗好多   所以依家可以得閒先嚟睇   感恩感恩 ~

italian tomato

同里奧大人去銘興食嘢   食完去 AEON 買意粉   不過唔記得係咩牌子   所以都係唔買住   之後去 Italian Tomato 買禮物比糟糟   買完再去買糖水   之後就番屋企喇   落毛毛雨但好熱咁   真係好驚咁嘅天氣 ~

我記得糟媽鍾意食呢隻曲奇   本身里奧大人都話買呢盒嘅   咁家姐就叫我問糟糟啦   其實我想比驚喜佢哋嘛   不過里奧大人都話問下好啲   一陣唔食就浪費嘛   估唔到糟糟都揀咗呢盒呀

8 點番到屋企   拿拿聲沖埋涼就染髮喇 ~

搞掂就開機洗衫   差唔多 9 點半先食糖水呀 ~

我同里奧大人話今晚好飽唔好買糖水   點知佢話今晚啲麻辣好辣要食甜嘢喎   所以我就要負責食粉粿同芋圓喇

睇下 Youtube   今晚 10 點 45 分都瞓 lu ~

韓式辣汁燜茄子雞肶 ( 27-MAR-2025 )

( 27-MAR-2025  THU )

感恩又一覺瞓天光呀   之後望下手機原來係 7 點 22 分   咁都起身整早餐 lu ~

早餐食丹麥條   依家都係 Share 食 1 條就算   次次每人食 1 條真係太飽喇 ~

家姐今朝出去 KFC 食早餐   平時會喺屋企食麵包家嘛   之後佢話唔想成日食包   咁啱屋企又無哂包所以出去食   我話邪啦   今朝里奧大人又話食包食到好悶呀   不過我話我諗晚餐已經好攰   叫佢負責諗早餐食咩呀 ~

菇場 3D   開心開心 ~

Lunch Time 蒸完飯就出去行下   去完 A1 買蛋糕就去大生買茄汁   其實已經買咗 1 支比家姐㗎喇   但佢尋晚打嚟話見到大生   所以想買多支   我叫佢唔好買啦   因為諗住今日買比佢呀 ~

一入到去就見到船頭同阿花   船頭話頭先喺樓下見我飄咗去另一邊   估唔到依家又見   阿花話又係妳呀陳小姐   不過其實好多時都會見到   我哋來來去去都係行嗰幾間呢   同埋今日好焗熱   所以一定行商場呀 ~

唔忙就繼續做自己嘢   阿怪真係超級怪   突然間哭腔咁講電話   我都知又會發顛㗎喇   點知真係越講越大聲   原來係同小說傾緊   佢喺 Uber 間房打比阿怪   叫佢調番條數   阿怪話唔可以咁樣 Adjustment   又話妳有無問題呀 ?!   妳有無腦㗎 ?!   之後阿輪聽到   皺哂眉頭咁行去叫阿怪冷靜啲   因為係老細叫調嘅   呢個阿怪真係不知所謂   一話老細話調就話無問題   其實 Uber 又係廢嘅   佢係 Finical Manager 叫佢做咪得囉   駛咩要經小說把口叫佢做呀   搵人嚟搞 ~

放工即走   船頭同阿花都話阿怪好有問題   我哋公司出名和諧家嘛   做咩要咁話人無腦呀   船頭同佢隔咗 2 條河都聽到   所以次次阿怪發顛即係全公司都知   無人鍾意佢係有原因嘅 ~

番到屋企即預備晚餐   里奧大人番到屋企係咁食零食   我問佢係咪肚餓 ?!   佢話唔係   我話要 7 點先食得呀 ~

里奧大人話榴槤買咗盒餅乾比我同阿妹   唔係個個有   所以唔好講出嚟   我話我唔會斷自己米路   里奧大人話估唔到我咁講   哈哈

里奧大人講話阿妹幫我報名食飯之後開工   里奧大人問點解妳會覺得我會去 ?!   阿妹答食嘢佢實去呀 ~

因為里奧大人聽日同姑奶好早食午餐   所以我特登買蛋糕仔做早餐   咁唔駛咁飽   我話對佢幾好   等你話食包食到悶   我就即刻買其他嘢你食   之後佢話我唔發脾氣就真係好好嘅   其實我覺得自己唔係成日發脾氣咁噃   真係死得   我真係要改善一下喇 ~

是日晚餐 - 韓式辣汁燜茄子雞肶

韓式辣汁燜茄子雞肶 - 今次加埋茄子落去燜   一鑊熟就最方便 ~

洗埋碗就抖陣   之後一齊去做運動喇 ~

呢排都係做 20 分鐘先   所以睇陣福寶就做完咁   唔錯唔錯 ~

番到屋企即沖涼   之後再執下嘢   搞掂就睇 Youtube 喇 ~

間唔中會睇啲真人故事改篇嘅案例   其實都好好睇   因為真係好難想像會發生呢 ~

睇完再打陣機   今晚 10 點 40 分都瞓覺 lu ~