五香肉丁公仔麵 + 芥蘭苗 ( 21-MAR-2025 )

( 21-MAR-2025  FRI )

感恩一覺瞓天光呀   真係醒咗無耐就鬧鐘響呢 ~

里奧大人話今晚買麥當勞   我話煮飯呀   聽晚先食啦   之後話我講話今晚買又唔買   估唔到佢真係記得喎   佢真係成個細路仔咁   一話食就要去食 ~

今朝同里奧大人出去食早餐   因為班車又早咗   所以食完就去里奧大人公司坐陣先番工喇 ~

菇場唔忙   又係做下自己嘢   依家一到星期五就好開心   終於真正明白番 5 日係幾咁好呀   感恩感恩 ~

Lunch Time 蒸完飯就去幫里奧大人公司配鎖匙   點知話休息幾日   咁配唔到就周圍行啦   買咗 3 包乾蔥頭再行陣超市   行下行下又已經 12 點 15 分   要番菇場開飯喇 ~

阿花一入嚟就話聞到好香   船頭就即刻過嚟問我係咪食潤腸 ?!   所以帶飯真係唔係樣樣都可以帶   如果帶鹹魚同筍呢啲   一定比人鬧爆呀   哈哈 ~

唔忙繼續做自己嘢   所以話咁快放工 lu～

我打去里奧大人公司搵佢   佢一聽到我把聲就笑   因為阿妹叫佢快啲聽   所以里奧大人就以為邊個搵得佢咁急呀   哈哈 ~

番到屋企就預備晚餐   其實好簡單   只係浸菜最耐 ~

里奧大人 6 點 40 分番到屋企   可以即刻食得喇 ~

是日晚餐 - 五香肉丁公仔麵 + 芥蘭苗

五香肉丁公仔麵 - 里奧大人見到就勁開心   仲話我煮得好食   我話罐頭之嘛   不過我就一定要蒸熱啲五香肉丁嘅   我接受唔到就咁開嚟食呀   出面食就無計啫   屋企食就唔得囉 ~

芥蘭苗 - 之前買咗 2 包芥蘭苗   今晚要食埋去喇 ~

洗埋碗就去惠康買嘢   因為買滿 $120 減 $18 呀   本來今日諗住買豆豉鯪魚同醬料   但唔夠 $120   點知家姐話可唔可以比 1 罐豆豉鯪魚比佢   所以我今晚就買夠 8 罐   比 2 罐比家姐   到佢想再要嘅時候就開我有無就可以   上次佢工人就醒喇   因為姐夫突然間鍾意食超力米粉   工人話問咗我有無先呀   點知我仲未食   咁可以即刻比哂佢哋呀 ~

買 4 罐有 9 折   折實平均 $17.1/罐   我覺得抵呀   同埋真係珠江橋牌先好食   咁有次 8 卦講話天龍牌又平又好食   咁我買嚟試下啦   完全無味道嘅   所以之後都買番珠江橋牌算喇

番到屋企做陣小清潔就開機洗衫   之後沖涼休息   里奧大人就熨衫 ~

睇下 Youtube   今晚 11 點先瞓 ~