韓式燒汁燜雞肶 + 蒸茄子 ( 26-MAR-2025 )

( 26-MAR-2025  WED )

感恩一覺瞓天光呀   又係瞓到熟睡嗰隻 ~

早餐食迷你腸仔包   好耐無食喇   覺得好好味   哈哈 ~

菇場 3D 呀   開心開心 ~

我去洗手間   我一出嚟就同隔離公司嘅 Admin 打招呼   之後佢話我個小新 Card Holder 好得意   佢話佢又係好鍾意小新   每次去日本都會買小新啲嘢㗎   我話我其實鍾意小白多啲   之後介紹番小白係點嚟   我話以前買哂小新啲漫畫   但真係咩都唔記得啦   哈哈 ~

Lunch Time 蒸完飯就出去行下   行咗半個鐘就番菇場喇   今日好鬼熱   番到菇場都要開風扇呀 ~

唔忙就做自己嘢   但突然好眼瞓呀  不過只係合埋眼一陣   之後飲杯熱水   咁就好快精神番啲   我唔敢瞓着呀   因為好驚有鼻鼾聲呀 ~

放工即走   今晚又要 7 點先食飯   我同里奧大人講話上次咳完之後   做好多嘢都係力不從心咁   係快唔到嗰隻   今晚啲餸其實好簡單   但都要搞成 45 分鐘 ~

是日晚餐 - 韓式燒汁燜雞肶 + 蒸茄子

韓式燒汁燜雞肶 - 焗完之後諗住加啲燒汁就算   但最後都係加蒜頭同乾蔥頭   再加埋幾隻雞翼一齊燜仲好 ~   

蒸茄子 - 今次買幼身嘅茄子   咁樣唔駛切咁多下   我再加多個節瓜墊底 ~

洗埋碗就抖陣   再食埋葡撻+老婆餅   里奧大人話好攰唔做運動   咁又好呀   我其實今晚都唔想做   因為想熨衫呀 ~

繼續食埋葡撻   今次焗到有酥皮嘅感覺呀   易姐今日請食老婆餅   口感好煙韌同埋唔甜   其實好想問佢喺邊度買   但好肯定問完就會買比我哋   所以都唔敢問 lu

之後里奧大人又話好攰   想快啲沖涼   我話好煩呀   我知道你攰喇   唔駛講咁多次   佢話驚我聽唔到喎   我話黐線啦   聽唔到點會應你呀 ~

開機洗衫就沖涼   抖咗 10 分鐘就熨 2 機衫   估唔到 45 分就搞掂   厚衫有呢樣好   一機唔會洗得好多   即係唔駛熨得多   哈哈 ~

里奧大人 10 點瞓   我就睇多陣 Youtube   差唔多 10 點半先瞓 ~