魚香茄子 + 香煎蓮藕餅拚韭菜餅 (外賣) ( 5-MAR-2025 )

( 5-MAR-2025  WED )

今朝鬧鐘響咗都唔想起身呀   本來喺屋企食早餐㗎   但我同里奧大人講話都係要出去飲杯醒神咖啡呀 ~

隔離枱個女人落單   明明外賣又轉堂食   咁同佢改為堂食   佢又話轉番外賣但又唔講飲咩   我聽到都覺得煩   我以前幫 8 卦叫早餐   佢都係成 Set 咁講哂   里奧大人都係咁   一定會講埋飲咩囉   始終一 Set 早餐係有嘢飲家嘛   除非堂食後上啫   但無咩幾可會咁好囉   不過我都唔慣後上飲品   我鍾意濕一濕個口先食嘢呢 ~

里奧大人陪我去巴士站   咁落毛毛雨嘛   我話最煩係咁   里奧大人以為我無帶遮呀   我話基本上我一年 365 日都有帶囉 ~

菇場忙咗陣又做自己嘢   唔錯唔錯 ~

Lunch Time 去蒸飯   溫總話我好勁   因為晚晚都煮飯   我話煮簡單嘢之嘛   一個菜同一個肉   佢話都係勁啦   晚晚煮喎   我話咁有時諗唔到煮咩都會出去食嘅   哈哈 ~

蒸完就出去行陣   之後買埋菜就番菇場喇   諗住比自己行 25 分鐘   點知行咗 35 分鐘   好在無蒸乾水咋 ~

唔忙就繼續做自己嘢   所以好快放工   買埋祛濕茶就番屋企預備晚餐 ~

里奧大人 6 點鬆啲番到屋企   佢話記得食薯條呀   我話做咩無啦啦食下午茶嘅 ?!   佢話忙到 2 點先食   所以叫叻叻幫佢買個腿蛋包做午餐   點知佢買咗個 Big Mac 餐番嚟   我話你有帶飯㗎喎   之後里奧大人話完全唔記得呀   所以要番公司拎番個午餐番嚟 ~

好在今晚要啲時間煮嘢   里奧大人番到嚟都仲未食得   所以叫佢沖涼先呀 ~

是日晚餐 - 魚香茄子 + 香煎蓮藕餅拚韭菜餅 (外賣)

魚香茄子 - 包醬汁今日到期要煮啦   反正有肉碎   又可以清埋條京蔥   一舉幾得呀   哈哈 ~

香煎蓮藕餅拚韭菜餅 (外賣) - 因為得好少肉碎   所以買呢兩個餸   食唔哂又可以帶飯呢 ~

洗埋碗就開機洗衫   做多陣小清潔就沖涼   里奧大人就熨衫 ~

一路食橙一路睇 "痞子無間道"   睇埋下個星期就無得睇 lu ~

喺日本買嘅朱古力 (594 Yen 約 HK$30)

口感好得意呀   好似食緊軟腍腍嘅威化餅咁

睇下 Youtube 又打下機   今晚 10 點 50 分先瞓覺 ~