榨菜粒脆肉瓜炒肉碎 + 雲南春菜 ( 6-MAR-2025 )

( 6-MAR-2025  THU )

尋晚瞓得唔錯   不過今朝里奧大人早咗起身整嘢   搞到我都瞓得唔好   咁我望個鐘已經 7 點 05 分   但都照瞓到 7 點 25 分囉 ~

鬧鐘一響   里奧大人即刻話唔好意思   話因為驚我唧唔到牙膏無得刷牙   所以頭先整咗先   咁我一起身就可以刷牙呢 ~

早餐食丹麥條   家姐話估唔到我都好鍾意食咁   我話少少提子都 OK   但好多就唔會買嚟食㗎喇 ~

今朝凍咗好多呀   仲落毛毛雨   真係濕上加濕   攰上加攰   哈哈哈哈 ~

菇場唔忙   咁就好喇   因為無咩動力咁呀 ~

Lunch Time 蒸完飯就出去 7-11 買嘢   感恩第 1 間已經有   咁買完要即番菇場喇   因為好鬼凍呀 ~

1 個袋仔 + 3 包糖 ($45.5) - 今朝等車見到   但得 2 分鐘時間   咁我唔買住喇   一陣架車早咗就慘啦

細細個唔錯   最緊要放到銀包 手機同紙巾   咁假期出去食早餐就唔駛轉另一個揹袋喇

家姐生日嘅日子   我好多時睇到家姐生日或者里奧大人生日嘅日子   就會影比佢哋睇㗎   佢哋又係會咁做㗎   好搞笑呢

阿齋好奇怪我咁早番   我話凍咗好多呀   唔想冷親呀 ~

唔忙就繼續做自己嘢   所以好快又放工喇 ~

番到屋企即預備晚餐   里奧大人 6 點半番到屋企可以即開餐喇   今晚食出前一丁同泰國米粉   食完成個身暖哂呀   我覺得好舒服   哈哈 ~

是日晚餐 - 榨菜粒脆肉瓜炒肉碎 + 雲南春菜

榨菜粒脆肉瓜炒肉碎 - 就咁榨菜粒炒肉碎好似好少咁   所以特登買多 2 個脆肉瓜   又可以帶飯   真係唔錯㗎 ~

雲南春菜 - 船頭以為我買呢隻菜係燜豬肉   我話第一次買咋   當菜心咁食咋   哈哈 ~

洗埋碗抖陣   7 點鬆啲就同里奧大人出去搞啲嘢   差唔多搞咗 1 個鐘   搞掂就買糖水番屋企 lu ~

番到屋企即沖涼   整呢樣嗰樣都已經 9 點半   咁啱啱好可以睇 "痞子無間道" 喇 ~

今次啲芋圓超級煙韌呀   里奧大人話有無後悔只買一碗 ?!   我話無喎   因為 Share 食就啱啱好   一個人食一碗真係好飽㗎

我同里奧大人講話買咗個小新袋   之後再話我都鍾意呢隻嬲爆爆嘅鱷魚   里奧大人話佢之前買咗個水樽袋比我   咪就係呢隻鱷魚囉   同埋 Mouse Pad 都係有呢隻鱷魚㗎   我都唔記得添   哈哈

睇完都 10 點幾   所以睇多陣 Youtube   差唔多 11 點先瞓覺呢 ~