日式咖哩煮芝士腸扁意粉 + 金銀蛋菠菜苗 ( 12-MAR-2025 )

( 12-MAR-2025  WED )

尋晚半夜熱醒呀   成條頸流哂汗   呢兩晚飲完中藥都係咁熱醒 ~

里奧大人話尋晚瞓得唔好   所以陪唔到我去食早餐   本來我都想瞓多陣   但最後都唔瞓喇   都知道翻瞓係瞓唔到   除非瞓到自己醒又唔同   哈哈 ~

本來想去菇場附近食   但最後都係喺屋企附近食算喇   咁食完搭車就時間啱啱好呢 ~

菇場唔忙   今日 3D   咁可以全日 Hea 過喇 ~

Lunch Time 出去 iEAT 買菜   之後再行下   行咗半個鐘就番菇場開飯喇 ~

咁我有一個飯兜係裝哂節瓜粒   溫總以為係薯仔   之後佢話瓜唔係炒嘅咩 ?!   我話我無炒過節瓜喎   咩要炒㗎 ?!   我以為炒就無咁涼   佢話唔係呀   因為佢不嬲都係炒啲瓜   未試過咁蒸   仲話之後試我呢個方法   咁唔駛有時食少少又要開鑊炒呢 ~

唔忙就同 Ivy Whatsapp 咗 2 個鐘   之後佢問我係咪無番工 ?!   咁又好難怪佢咁問嘅   哈哈 ~

放工即走   番到屋企即預備晚餐同蕃薯糖水   里奧大人 6 點 20 分番到屋企   但我話未食得住   叫佢沖涼先 ~

差唔多 7 點先食得   今晚煮得好慢呀 ~

是日晚餐 - 日式咖哩煮芝士腸扁意粉 + 金銀蛋菠菜苗

日式咖哩煮芝士腸扁意粉 - 一次過煮哂 5 條芝士腸   所以煮埋就一大盤咁 ~

金銀蛋菠菜苗 - 菠菜苗好爽脆   我覺得 iEAT 嘅蔬菜真係唔錯 ~

洗埋碗就沖涼   里奧大人就熨衫 ~

一路食蕃薯糖水一路睇 "痞子無間道"   里奧大人鍾意睇嘅戲   就會想一路食一路睇   會覺得好 Relax 咁呢 ~

里奧大人話好食   個薑汁糖水味道啱啱好

  

睇完再睇埋 "臥底旅行團 4.0"   睇完都 10 點 20 分   我都要瞓覺喇   今日有啲攰呀 ~