脆肉瓜炒牛梅花肉 + 油麥菜 ( 4-MAR-2025 )

( 4-MAR-2025  TUE )

感恩尋晚瞓得都唔錯   不過起身都係有啲攰囉   潮濕天氣快啲過啦 ~

今朝都係食迷你芝士包   口感仍然 Soft   下次再買嚟食先 ~

菇場忙咗陣就做自己嘢   所以好快又到 11 點 45 分喇 ~

Lunch Time 蒸完飯就出去行半個鐘   咁行完再買菜就番菇場開飯喇 ~

唔忙就做自己嘢   雖然唔眼瞓   但個人就好攰咁囉 ~

放工即走   我差唔多落車嘅時候   坐我隔離個女人話有洗電單車服務   話駛咩出去洗呀   自己洗都得啦   個男人話未必度度都有水喉家嘛   個女人話拎水桶裝水咪得囉   個男人話拎得幾多桶呀 ?!   笑鬼死   咁好多嘢自己做都得嘅   妳都可以唔駛搭巴士行路添 ~

番到屋企都即預備晚餐   差唔多 6 點半就煮好   咁打比里奧大人啦   原來佢仲未走得 ~

里奧大人 7 點鬆啲先番到屋企   佢頭先仲話出去食可以早啲休息   真係好在我煮飯咋 ~

是日晚餐 - 脆肉瓜炒牛梅花肉 + 油麥菜

脆肉瓜炒牛梅花肉 - 加咗條京蔥一齊炒   其實因為買咗 2 條唔知點整   今次我用泰式聖羅勒辣椒醬煮㗎   里奧大人話好味道呀   我話醬汁整嘅好難會唔好味囉   哈哈 ~

油麥菜 - 星期日買咗無煮   所以今晚點都要食㗎喇   之前買咗樽炸蒜   用咗 1 次就唔記得佢存在   依家記得有佢就想快啲用哂佢呀   因為開咗會好快腍呢 ~

洗埋碗就開機洗衫   里奧大人話想沖涼先   咁可以快啲熨衫   其實等佢沖涼嗰陣   我都做咗陣小清潔   呢幾日潮潮濕濕   硬係覺得周圍立立黐黐咁 ~

搞掂就即沖涼   之後同里奧大人一路食橙一路睇 "瘩子無間道"   今晚連睇 2 集   睇到 10 點 20 分呀 ~

平時會睇多陣 Youtube   今晚都唔睇喇   要即刻瞓覺   呢排啲天氣令到我瞓極都唔夠咁呀 ~