潮州汕頭手打牛丸辛辣麵 + 油麥菜 + 蕃茄薯仔南瓜湯 ( 1-MAR-2025 )

( 1-MAR-2025  SAT )

尋晚瞓得麻麻哋呀   可能個人仍然興奮狀態   哈哈 ~

里奧大人鬧鐘響   我又瞓唔到   所以陪佢食早餐   咁我只係刷牙洗臉   奇怪點解咁快就 8 點 10 分   原來里奧大人校 8 點起身   因為佢諗住自己食早餐呢 ~

食完就去買蕃茄薯仔同菜   里奧大人就番工 ~

番到屋企做大清潔   之後再滾蕃茄薯仔湯   搞掂就沖涼休息下喇 ~

喺深圳買咗啲手信   我同里奧大人講話無諗過會買到嘢㗎   不過就真係唔會買得多   因為去深圳好易   幾時去都得咁呢 ~

蟹黃鍋巴 X 2 (RMB 19.8/包 HK$42.58) @ 酥嬉塘 - 試咗好味就即刻買喇   口感似以前嘅泡泡飯焦   里奧大人見我鍾意食就話買 2 包啦

紫皮糖香橙味 (RMB 29.9 / HK$32.15) @ 伊凡瑪麗亞俄羅斯館 - 我諗緊買唔買好   里奧大人話又唔貴   買 1 包啦   好多時都會話咩都買嚟試下啦

薜記配拌豆乾 (RMB10.8) & 草莓乾 & 菠蘿乾 (好似每樣 RMB 2X) & 芭樂乾 (好似 RMB 4X) @ 薛記炒貨   呢度總共買咗 HK$102

木糖酵芝麻酥 (RMB33.66) & 木糖酵芝麻核金丸 (RMB25.92) (合共 HK$64) @ 木蘭炒貨 - 我同里奧大人都鍾意食黑芝麻嘅零食   難得有得試食   覺得好味就買喇

樂事馬鈴薯片煙火排檔甜辣炸雞味 RMB 4.2 (HK$ 4.5) @ Hotmaxx - 諗住買嚟睇戲嘅時候食   點知套戲太好睇   我想專心睇戲呀   真係無咩幾可係咁

戰鬥士星矢 - 超越版獅子座 (RMB 99 / HK$106.44) - 里奧大人睇嘅時候已經想買   之後話諗諗先   咁番香港前又再去睇   我就叫佢買啦   難得鍾意又唔貴   但如果要二百蚊就唔比買㗎喇   哈哈

12 點半出發同里奧大人搞啲嘢   之後買埋午餐就番屋企 lu ~

里奧大人喺我生日當日已經比咗生日利是   但係人民幣   話去大陸可以用喎   我話用支付寶比錢嘛   咁用唔哂比番你   咁即係無比過咁喎   雖然佢都幫我增值咗 $1,000   但我話一樣還一樣   點都要收港幣利是呀   哈哈

今日約咗石頭去食午餐   因為佢要番工   所以我早啲去餐廳叫定嘢   佢一嚟到就有得食喇 ~

我食嘅香草煎雞扒意粉 ($73)

石頭食嘅牛肉泡菜湯烏冬 ($83)

食下傾下   佢又講咗好多秘密比我知   其實真係識咗佢唔夠 1 年   所以好感激佢咁信任我呀 ~

2 點 40 分要走喇   佢話佢一定要請食飯   話記得我係 2 月生日呀   仲話上次聽我講完就靜靜雞 Mark 低   我話我都唔記得幾時講自己 2 月生日添 ~

咁唔怪得啦   佢之前叫我揀 2 月 15 日 或者 22 日   不過咁啱呢 2 日又唔得閒   之後佢就話 3 月 1 日啦   點都要食餐飯   好開心佢咁有心呀   哈哈 ~

今日一齊參加  LA 活動   差唔多 4 點半先完畢 ~

番到屋企見里奧大人熨衫   咁我又可以開機洗衫   去完旅行係好想快啲洗哂啲衫咁呢 ~

6 開始預備晚餐   今晚非常簡單   所以 6 點半都可以食得 lu ~

是日晚餐 - 潮州汕頭手打牛丸辛辣麵 + 油麥菜 + 蕃茄薯仔南瓜湯

潮州汕頭手打牛丸辛辣麵 - 想快啲清埋啲牛丸   不過仲要食多一次先清哂   我今晚都食唔落麵   就咁煮辛辣麵比里奧大人食就搞掂 ~

油麥菜 - 買咗 2 棵   只係 $4 咋   但其實今晚食 1 棵都夠   不過浸咗就食埋啦 ~

蕃茄薯仔南瓜湯 - 難得有時間就滾呢個湯喇   但就唔加粟米   因為真係食到驚咗   哈哈 ~

洗埋碗就沖涼   里奧大人去徑步   等佢沖埋涼就即刻申請回鄉卡喇 ~

搞掂就睇 Youtube   今晚 11 點先瞓 ~