肉絲炒意粉 ( 24-MAR-2025 )

( 24-MAR-2025  MON )

感恩一覺瞓天光呀   仲要係好熟睡嗰隻   當我醒嘅時候   鬧鐵就啱啱響   如果日日係咁就好喇   哈哈 ~

里奧大人突然起身出嚟錄 "臥底旅行團 4.0"   因為佢知我鍾意睇   之後又問我瞓得好唔好 ?!   我話好呀   佢話咁就好喇   因為我連踩 7 日呀   驚我唔夠休息好易病呢 ~

早餐食車打金銀畢芝士包   麵包好 Soft 呀   下次經過東海堂會再買嚟食 ~

菇場忙咗陣又可以做自己嘢   咁我去斟水   見溫總同阿 B 傾偈   之後我又傾埋一份   原來佢哋人事變動   小 A 突然請一個月假   仲爆咗 Uber 啲低能做法嘢出嚟   真係比我講中哂啦   一早都覺得 Uber 做嘢超級唔掂啦   睇佢搞個 System 搞到無人願意用   根本就係燒錢囉 ~

Lunch Time 蒸埋飯就出去行陣   行咗半個鐘就番菇場開飯喇 ~

唔忙繼續做自己嘢   放工即走   番到屋企即預備晚餐   因為起碼半個鐘後先食得   所以里奧大人就熨衫先喇 ~

我開雪櫃唔見芝士包   原來今朝擺咗喺枱無放番入雪櫃呀   我真係第一次咁輪盡咋   激鬼死   所以我話今晚要食埋去啦 ~

是日晚餐 - 肉絲炒意粉

肉絲炒意粉 - 尋晚食剩嘅叉燒同油雞   將佢哋剪開一絲絲   再加埋少少豉油汁同薑蓉   咁都好好味呀   生抽老抽都唔駛落添呀 ~

洗埋碗就抖陣   之後同里奧大人一齊去做運動   今晚只係做 20 分鐘   太耐無做喇   要慢慢嚟   唔係一陣做傷咗又唔駛做㗎喇 ~

番到屋企即開機洗衫   搞掂就開機洗衫 ~

同里奧大人一齊睇 "臥底旅行團 4.0"   睇完再睇陣 Youtube   今晚睇啲靈異嘢   都有啲驚同埋覺得假假哋咁   睇到 10 點 45 分都瞓覺 lu ~