玫瑰三花腸拚加瘦鮮鵝肝腸 + 煙鴨胸 + 茄汁豆 + 超甜粟米 ( 20-MAR-2025 )

( 20-MAR-2025  THU )

尋晚去完廁所都好快瞓得番   但之後又醒一醒就難瞓番呀   感思今朝起身都精神咋 ~

早餐食丹麥條+芝士包   甜甜鹹鹹都唔錯㗎 ~

里奧大人陪我等車   我同里奧大人講話對面個小朋友會同排我後面嘅女人揮手同飛吻   不過今朝個女人未到   我覺得佢哋係兩姊妹嚟   因為都幾似樣   之後里奧大人就同對面小朋友揮手   估唔到小朋友真係會同我哋揮手   咁里奧大人再同佢飛吻   佢又向番我哋飛吻呀   真係勁可愛呢   我話嚇死佢媽咪呀   做咩鬼個姨姨叔叔同佢仔咁樣玩   哈哈 ~

菇場唔忙   又可以 Hea 喇 ~

Lunch Time 即刻蒸飯   之後出去一田   行咗半個鐘就番菇場開飯 lu ~

湖池屋鹽味薯片 & 湖池屋紫菜鹽味薯片   見到 $24/3 包就買啦   比咗包船頭同阿花   其餘就係比阿妹同榴槤 家姐同里奧大人   分配得啱啱好

唔忙就做自己嘢   今日里奧大人去姑奶屋企整手機   但 4 點幾就搞掂   咁我都煮飯啦   難得咁早番到屋企休息   唔好出去食喇 ~

放工即走   今晚晚餐真係好求其呀   因為冰格無哂儲備   好在有啲臘味咋 ~

是日晚餐 - 玫瑰三花腸拚加瘦鮮鵝肝腸 + 煙鴨胸 + 茄汁豆 + 超甜粟米

玫瑰三花腸拚加瘦鮮鵝肝腸 - 想快啲清哂去呀   下次都係同家姐 Share 算喇   因為佢又係要快啲食哂呀   哈哈 ~

煙鴨胸 - 好在開雪櫃見到佢咋   咁就唔駛就咁食臘味咁單調~

茄汁豆 - 有 2 罐過咗期   咁開埋嚟食啦   好在無變味 ~

超甜粟米 - 今晚食 1 條   另 1 條就帶飯   我都係鍾意中午有啲蔬菜食下咁呢 ~

洗埋碗就做陣小清潔   之後沖涼休息   里奧大人就去做運動 ~

飯後甜品就食香芋批   咁我話好食呀   里奧大人話好彩買咗 6 件   我估下次佢分分鐘買 9 件都似

睇下 Bao Family   今晚 10 點 25 分都瞓覺喇   我有 3 晚飲咗中藥都係 10 點半前瞓覺   唔知有無關係呢 ~