蜜汁叉燒 (外賣) + 招牌豉油雞 (外賣) + 佛手瓜紅蘿蔔螺頭豬骨湯 ( 23-MAR-2025 )

叉燒就一定要焗熱   最後再淋啲蜜汁

( 23-MAR-2025  SUN )

今朝同里奧大人一齊起身   食埋早餐就去佢公司幫手 lu ~

搞掂就番崇拜   崇拜完畢就去買餸喇   今次要出戰車   因為唔想拎嘢呀 ~

買完西施骨就去買佛手瓜   買完再去買麵包同急凍肉   最後買埋燒味同提子就番屋企 lu   真係好在有拎戰車   依家唔想拎住咁多嘢行呀   但搭車又要等   咁不如拖車好過 ~

番到屋企已經 12 點幾   要即刻煲湯喇 ~

波子提 $28/磅   我見開箱即拎一抽啦   因為真係好大粒   呢包要 $92 呀   感恩食落真係好甜好爽口呀

有啲好大粒   真係食 4 粒=普通嘅 8 粒口咁

諗住里奧大人差唔多放工   我就去買外賣   咁等佢番嚟有得食   之後里奧大人話佢買咪得囉   唔駛我又特登落去買   咁又好呀   我唔駛再換衫   哈哈 ~

煲埋湯再整呢樣嗰樣   原來已經 1 點 50 分   里奧大人打嚟話出前一丁無問呀   咁我話去大家樂啦   唔想諗呀 ~

真係搞笑囉   今朝老闆娘又係未開   里奧大人笑住話我今日想食嗰啲都無開呀   哈哈 ~

咁我排隊買嘢食   我後面個婆婆同我傾偈   佢話佢好多心   樣樣都想食   所以話唔知食咩好   我話今日食呢樣   聽日食另一樣囉   咁妳就樣樣可以試啦   之後話唔係成日嚟呢頭   最後佢買咗兩個餐   一個留番今晚食   話食嘢最緊要開心   我話係呀   食嘢真係最開心㗎   哈哈 ~

咁我番埋位   里奧大人話做咩咁好傾   以為我哋識得呀   我話婆婆係咁問我食咩好呀   好搞笑囉   不過我真係覺得   鍾意食嘢嘅人係開心啲咁㗎   我識嗰啲就係咁囉 ~

炒麵無食過   咁可以留番做晚餐

食完差唔多走   有個婆婆帶住小妹妹   我哋叫佢哋坐啦   我飲埋杯嘢就走   之後里奧大人叫個小妹妹坐佢隔離   佢真係過去坐呀   連婆婆都話小妹妹坐 1 分鐘都難   估唔到佢會坐   仲同里奧大人講嘢添呀 ~

婆婆就同我傾偈   話佢個女話要當個孫係朋友咁   唔可以打同鬧   婆婆話有時忍唔住鬧㗎   我話唔係佢哋成日對住   當中辛苦激氣根本唔知   婆婆好開心話我好明白佢呀   其實做人要將心比己   咁基本上好多嘢係可以解決到   始終叫人做嘢就易囉   當自己做嘅時候就會知道難處㗎喇 ~

番到屋企就睇 Youtube   里奧大人就沖涼瞓覺 ~

我睇睇下都瞓咗半個鐘   其實仲想瞓   不過已經 5 點就唔瞓 lu ~

今晚都只係焗熱啲叉燒同蒸熱啲雞   估唔到都要 6 點半先開餐 ~

是日晚餐 - 蜜汁叉燒 (外賣) + 招牌豉油雞 (外賣) + 佛手瓜紅蘿蔔螺頭豬骨湯

蜜汁叉燒 (外賣) + 招牌豉油雞 (外賣) - 買咗半隻豉油雞   里奧大人話想食叉燒   咁買半斤啦 ~

佛手瓜紅蘿蔔螺頭豬骨湯 - 材料有 3 個佛手瓜 + 1 條紅蘿蔔 + 1 條粟米 + 3 隻乾螺頭 + $40 西施骨   好似年幾無煲過老火湯咁   真係唔識預計水份   落哂料嘅時候先覺得多咗   所以拿拿聲 "北" 番出嚟   唔係啲湯肯定無味呀 ~

洗埋碗再做陣小清潔   搞掂就沖涼休息   里奧大人就去做運動 ~

今晚一路食砵仔糕一路齊睇 "中年好聲音 3"   我呢個偽運審又講中哂呀   里奧大人話點解我聽得出 ?!   我話我真係好細心咁聽哂成首歌個故事㗎   唔係點會成日講到個 Point 出嚟喎 ~

$18/5 個   多豆又煙韌

話咁快又 10 點   睇多陣 Youtube   今晚 10 點 45 分都瞓覺 lu ~