香辣干鍋雞 (外賣) + 招牌糖醋骨 (外賣) + 糯米飯 (外賣) + 齋鴨腎拚酸齋 (外賣) ( 1-JAN-2026 )

( 1-JAN-2026   THU )

感恩一覺瞓到 8 點半呀   沖埋涼再開機洗衫先出去食早餐 ~

食完早餐就番屋企喇   里奧大人話喺屋企食埋午餐先出去   咁佢知我想玩康樂棋   同埋又想去權發買小菜   所以我話去佐敦一定無問題㗎 ~

里奧大人做公司嘢   我就靈修   好感恩又靈修咗 1 個鐘呀   因為我真係一個好懶嘅人嚟呢 ~

1 點鬆啲食午餐   里奧大人食完就要番公司做啲嘢   做到差唔多 2 點先出發去佐敦 ~

我成日同里奧大人講話要搭平車㗎   一程差兩蚊喎   同埋唔趕又有得選擇   咁做咩唔揀平車呀   哈哈 ~

去到裕華   我叫里奧大人行快啲上去   佢真係行快好多㗎   所以我真係好感動嘅 ~

今年開始想改變一下自己   唔好亂發脾氣   同埋要想做到愛人如己   有時覺得自己寫 Blog 好無聊咁   但又覺得係自己嘅生活記錄都唔錯吖   又可以睇下自己有無改變到   有啲真係成日話改但根本無改到   所以希望今年我做得到呢 ~

無得玩康樂棋就去地庫睇嘢食啦   睇到想買嘅就影低相先   等一陣行完先過嚟買   咁到時唔駛搵嘛   哈哈 ~

里奧大人話行下恆豐中心   我實無問題啦   一場嚟到真係咩都要行下 ~

見到蜜雪冰城   我同里奧大人講話深圳成日見到但無試過   之後佢話試杯雪糕   我話減肥呀   但佢係都要我試下   我發覺次次一講有啲咩食店   佢一定話要同我試下   可能覺得我講出嚟就等如想食呀 ~

新鮮冰淇淋 ($5) - 味道都唔錯喎

去廟街行下順便去髮品店買髮泥   之後去權發小廚買小菜同埋去蓮花素食買酸齋喇 ~

里奧大人一見到熊貓就指住叫我睇   嚇到我以為咩事

兩餸飯真係好多選擇   不過我來來去去都係食嗰啲

買完就去裕華買嘢喇   咁里奧大人拎完包芝麻糊   我叫佢企喺度等我   等我拎埋片糖就走得   點知我行過籠要再搵番里奧大人呀   之後佢話妳去咗邊呀 ?!   頭先我係咁叫妳   但我話聽唔到呀   我行過籠好緊張要搵番轉頭呀   哈哈 ~

增城蔗片糖 ($30/600g) - 不嬲都係家姐買比我嘅   見到就即刻打比佢問買開幾錢 ?!   但佢又唔記得   咁我話我喺裕華買 2 包   妳記得唔好再買比我   哈哈

馬玉山紫米黑芝麻糊 ($47.2) - 里奧大人話想試下   我話買囉

我同里奧大人講話 5 分鐘後先有車   可以慢慢行   點知去到見到架巴士上緊客   我哋即刻要急步行呀   去到巴士啱啱架巴士已經關門   好在里奧大人行快幾步   司機見到就即刻開門比我哋呀   感恩感恩 ~

坐定定再睇 Apps   原來我睇錯巴士站位置呀   係前一個站先係 5 分鐘咋 ~

里奧大人又要番公司做一陣嘢   因為開完會好多大單嘢要跟呀   咁我都番屋企先 lu ~

一望個鐘原來已經 5 點   所以抖下又要預備晚餐喇 ~

是日晚餐 - 香辣干鍋雞 (外賣) + 招牌糖醋骨 (外賣) + 糯米飯 (外賣) + 齋鴨腎拚酸齋 (外賣) 

香辣干鍋雞 (外賣) - 呢個好味呀   但如果再辣啲就更好 ~

招牌糖醋骨 (外賣) - CC 好鍾意食呢個餸   不過又真係好味嘅   可能我都鍾意酸酸甜甜嘅嘢啦 ~

糯米飯 (外賣) - 問里奧大人想唔想食 ?!   佢話好吖   咁我就買喇   不過食剩一大半   又要留番聽晚了 ~

齋鴨腎拚酸齋 (外賣) - 食咗少少咋   今晚眼闊肚窄   哈哈 ~

洗埋碗又開機洗衫   之後就沖涼再染髮   里奧大人就做機   等佢番嚟就幫佢染髮   我要對佢好啲呢   哈哈 ~

膝頭哥仲痛添   所以拉筋當做運動   真係好邪   明明諗住今年開始做運動   點知又做唔到 ~

里奧大人熨 2 機衫   我就睇 Youtube 同打機   差唔多 11 點 15 分先瞓 ~